Sarag Yo Kasi so Mangigapo na Sakey a Panangiyaral na Biblia No Setyembre?
1. Anton nikaduman sagpot so gawaen tayo no Setyembre, tan anto so lalanoren na saya?
1 Legan na Setyembre, manggawa itayo na nikaduman sagpot pian mangigapo na saray panangiyaral na Biblia diad primeron idalaw ya usaren so libron Ibabangat na Biblia. Anto so lalanoren na saya? Nilikud ed pangipalima na publikasyon, panggunaetan tayon itongtong ed unabung so pigaran parapo tan iyuksoy so pangituloy ed pantotongtongan diad ontumbok iran ibisita.
2. Panon tayon nausar so pahina 4 tan 5 na libron Ibabangat na Biblia pian nigapo so pantotongtong nipaakar ed Biblia?
2 Nayarin onggapo itayo diad pangipanengneng ed saray ilustrasyon a walad pahina 4 tan 5 na libro tan oniay ibaga, “Agta alay abig no nagawa la iray pananguman a walad sarayan litrato?” Ontalineng a maong ed ebat na unabung. No interesado so unabung ed sakey ed saray tema, ipanengneng ed sikato so ibabangat na Biblia nipaakar ed satan a tema diad pangikonsidera ed parapo odino saray parapo ed libro a manisingbat ed satan a teksto. Alimbawa, no sikato so interesado ed pangangga la na sakit unong a nipropesiya ed Isaias 33:24 odino 35:5, 6, ibukay ed pahina 36 tan ipaliwawa so parapo 22.
3. (a) No nausar yo la so presentasyon a mipadpara ed samay nisuheri ed parapo 3, anto so inyebat na unabung? (b) Anto niran presentasyon so nausar yo la sanen nanggunaetan yon igapo so panangiyaral na Biblia diad primeron dalaw?
3 Epektibo iray presentasyon no nigapo tayon tampol so pantongtong nipaakar ed Biblia diad pangusar ed libro. Lapud labay na dakel a totoo so maliket a bilay na pamilya, nayarin oniay itepet yo ed unabung, “Antoy nikuan yo, natulongan kasi so totoo a nawalaan na maliket a bilay na pamilya no iyaplika da iyan simbawa na Biblia?” Basaen so Efeso 5:33, insan abuloyan ya onebat. Nayarin nasagyat so imano na sakey a too ed saray manangilukas a tepet ed kapitulo 14, a mangiyabuloy ed sikayon mangikonsidera ed unonan duaran parapo. Legan yon itotongtong itan ya impormasyon, nigagapo yo la so panangiyaral na Biblia.
4. No nigapo tayo so panangiyaral diad primeron dalaw, panon tayon niyuksoy so pangituloy ed pantotongtong?
4 Iyeskedyul so Ipawil: Sakbay a nasumpal so primeron panangiyaral, nayari yon iyuksoy so pangituloy ed pantotongtong yo diad pangibagay: “Diad loob na pigara labat a minuto et naaralan tayo la so ibabangat na Biblia nipaakar ed sakey ya importantin tema. Diad ontumbok, pantongtongan tayo so [mangitilak na sakey a tepet a pantongtongan]. Nayarin onsamar ak lamet dia ed onian oras no ontumbok a simba?” Manggawa na espisipikon uksoyan pian ompawil, tan seguroen a tooren so tongtongan. (Mat. 5:37) No niletneg la so regular a panangiyaral, aralen so libro diad sistematikon paraan manlapud gapo anggad sampot.
5. Anto so nepeg tayon gawaen no ag-awaten na unabung so panangiyaral na Biblia diad primeron indalaw?
5 No akapangipalima kayo na libron Ibabangat na Biblia balet ag-awaten na unabung so panangiyaral diad primeron indalaw, ompawil tekep na gagalan mangigapo na panangiyaral na Biblia.