Saray Pakabat

◼ Opresin literatura parad Agosto: Nayarin iyopresi so dinanman a brosyur. Setyembre: Iyopresi so libron Ibabangat na Biblia. Nepeg a panggunaetan so pangigapo na panangiyaral na Biblia diad primeron idalaw. Nepeg a pawilen so amin ya apalimaan tekep na gagalan makapangigapo na panangiyaral na Biblia. Oktubre: Iyopresi iray kopya na Say Panag-Bantayan tan Awake! No walay interesado, iparungtal ed sikato so brosyur a Mantultuloy a Manbantay! ta pian lalon nainteresan ed Biblia. Nobyembre: Iyopresi so libron Manaral Manlapud Sankamaongan a Managbangat. No ibaga na unabung ya anggapo so anak to, iyopresi so tract a Labay Moy Makaaral nin Maong Diad Biblia? odino arum a matukoy a tract.

◼ Say mangidadaulon manangimaton odino say tinuro to so nepeg a man-audit ed kuenta na kongregasyon no Setyembre 1 odino tampol kayari na satan. Iyanunsio itan ed kongregasyon sano na-audit la itan.

◼ Katekep ed statement parad Hunyo, naawat na kada kongregasyon so duaran kopya na Congregation Analysis Report (S-10). Saratan so malinew tan malinis a sulatan na sekretaryo na kongregasyon, insan kayari to et maalwar itan ya imanoen na komite parad serbisyo. Diad beneg na satan a form et isulat so kangaranan na amin a regular payunir, pati say kompleton oras da ed serbisyon taon. Say orihinal a kopya na satan a form so nepeg ya ipawit ed sangan opisina no Setyembre 6. Iyatol yo so duplicate.

◼ Nepeg lan ipawit natan ed sangan opisina iray order yon Usisaen so Kasulatan ed Inagew-agew​—2007 tan say 2007 Calendar. Ipawit mi la so special order blank form parad satan a duaran pedido kaiba so statement parad Hunyo. No pigaran kongregasyon so manguusar ed sakey a Kingdom Hall, saray order na kada kongregasyon so kolektaen na literature coordinator insan pantetekepen to iratan ed sakey ya order blank form tan ipawit to ed sangan opisina no Agosto 15, 2006.