No Anto so Ibaga Nipaakar ed Saray Magasin

Say Panag-bantayan Hul. 15

“Anto so nibaga yo, nawalaan itayo ni kasi na sakey a gobiernon makaresolbe ed saray problema na katooan? [Abuloyan ya onebat.] Imbangat nen Jesus iray babangatan to a manpikasi parad ontan a gobierno diad saray salita ton nisulat ed Mateo 6:9, 10. [Basaen.] Isasalaysay na sayan magasin no akin a magmaong so Panarian na Dios nen saray gobierno na too tan dedeskribien na saya no antoray bendisyon na satan ed katooan.”

Awake! Hul.

Sano malangwer a too so nakatongtong yo, oniay nayarin ibaga yo: “Dakel a kaedad mo so maniisip la nipaakar ed panangasawa. Parad sika, iner so pakaromogan na napanmatalkan ya impormasyon nipaakar ed satan? [Abuloyan ya onebat.] Imanoen no siopa so angigapo ed panangasawa. [Basaen so Mateo 19:6.] Wadia ed sayan magasin so pigaran prinsipyo na Biblia a makatulong ed sikatayon nawalaan na maliket a panangasawa.”

Say Panag-bantayan Ago. 1

“Ordinaryo lambengat natan so pakanengneng ed totoo a manmamaltrato ed arum. Antoy nikuan mo, manguman kasi so kipapasen no iyaplika na dakel nin totoo irayan salita nen Jesus? [Basaen so Mateo 7:12. Insan abuloyan ya onebat.] Ipapabitar na sayan magasin unong ed Biblia no panon a niiter so manunan kanepegan na too parad kagalangan.”

Awake! Ago.

“Amin tayo so interesado ed maabig a panangasikaso ed bunigas. Amta yo kasi a dakel lan doktor natan so agmalabay a mangisaksak na dala? [Abuloyan ya onebat.] Ipaliwawa na sayan magasin no akin. Isalaysay met na saya unong ed Biblia no akin a mabmabli so pangipapasen na Dios ed dala.” Basaen so Levitico 17:11.