No Panon a Pansiansiaen so Seseg
1 Say seseg nen Apolos diad impanumpal to ed ministeryo to so mangipapanonot ed sikatayo ed saray kaparan Kristiano natan a nagkalautlan maseseg ed panagpulong a kimey. (Gawa 18:24-28) Balet, amin tayo so nabibilin: “Aleg so mangiras ed saray kimey; marlang ed espiritu.” (Roma 12:11) Antoy makatulong ed sikatayo a nagamoran tan napansiansia so seseg ed ministeryo na Kristiano?
2 Apabiskeg na Kakabatan: Kayarin pinmayawar si Jesus ed duaran babangatan to tan “impaliwawa to ed sikara dia ed saray amin a sulat so saray bengatla nipaakar ed sikato lanlamang,” inkuan da: “Agta dinmalang so puso ta ed loob ta, legan a [sikatoy] nansalita ed sikata ed dalan?” (Luc. 24:27, 32) Ontan met, agta say kapusoan tayo so mandarlang ed liket sano nagamoran tayoy apaaralem a pakatalos ed Salita na Dios? On, say pananisia so napabiskeg na kakabatan. Ipapaliwawa na Roma 10:17: “Say pananisia [et] manlapu ed pandengel.” Sano say kapusoan tayo so napno na talek ed saray sipan nen Jehova, agtayo nitepel so agmansalita nipaakar ed saray bengatlan nadngel tayo!—Sal. 145:7; Gawa 4:20.
3 Agtayo makapanilalo ed pikakabat lambengat ya agamoran tayo ed apalabas ya impanaral tayo pian napansiansian mabiskeg so aro tayo ed Dios tan marlang so seseg tayo ed serbisyo to. Nepeg tayon itultuloy a palaknaben so pakatalos tayo ed katuaan tan paeleten so aro tayo ed si Jehova. Ta no andi, say serbisyo tayo ed sikato et kalkalnan magmaliw a paspasaray. (Apo. 2:4) Papasesegen itayo na Salita na Dios ya “ombaleg ed kakabatan na Dios.”—Col. 1:9, 10.
4 Saray Ugali Tayo ed Panagaral: Kanian, kaukolan tayon usisaen so ugali tayo ed panagaral. Alimbawa, nayarin sarag tayon markaan iray ebat ed aaralen ya artikulo ed Panag-Bantayan tan makapankomento na duga. Balet kasin aanapen tayo iray nisitas a teksto tan uumamengen tayo no panon ya onaplika so materyal ed bilay tayo? Diad sinimban babasaen ed Biblia, kasin pampepelengan tayoy manggawa na kaaruman a panagsukimat no iyabuloy na saray sirkumstansya tayo tan dadalepdepen iray leksion a lugan na satan? (Sal. 77:11, 12; Uli. 2:1-5) Agaylan makagunggona so panumameng tan panmotektek ed Salita na Dios! (1 Tim. 4:15, 16) Say ontan a panagaral so mamaligsa ed kapusoan tayo tan mamabiskeg ed sikatayon magmaliw a “mapaga [odino, maseseg] ed saray maabig a gawa.”—Tito 2:14.