“Magmaliw Kayon Marlang ed Espiritu”
1. Anto so nepeg a napatnagan ed panagpulong tayo?
1 Nepeg ya onaligwas so amin a kimey tayo bilang Kristiano, kanian napapaseseg itayon, “magmaliw kayon marlang ed espiritu” tan “manpaaripen kayo ed si Jehova.” (Roma 12:11, NW) Balet, dakel iray bengatlan mamakapuy na seseg tayo ed ministeryo. Panon tayon ‘napadalang a singa apoy’ so seseg tayo parad kimey na Panarian?—2 Tim. 1:6, 7, NW.
2. Antoy pisiglaotan na personal a panagaral ed pagmaliw tayon maseseg ed ministeryo?
2 Personal a Panagaral na Biblia: Say epektibon managpulong na Panarian et mangaaro ed ganggan na Dios tan napapakiwas a mangiyaplika ed saray katuaan a naromog ditan. (Sal. 119:97) Sano nababasa irayan katuaan legan na personal a panagaral, mamakiwas tan mamaseseg iraya ed sikatayo. Say panangaro tayo ed samay Angitarya ed sarayan katuaan tan say pilalek tayon inabang ed arum so maong a balita et mamakiwas ed sikatayon mangidayew ed Dios tan mangiyabawag na ngaran to. (Heb. 13:15) Kanian say maseseg a pangipupulong na maong a balita et mangipapatnag na aralem ya apresasyon tayo ed satan.
3. Panon itayon natulongan na espiritu na Dios diad ministeryo tayo?
3 Manpikasi Parad Espiritu na Dios: Say epektibon ministeryo et aliwan lapud dilin biskeg tayo. Say peteg ya inkaseseg et manlalapud mabulos ya iyaagus na espiritu na Dios. (1 Ped. 4:11) Say iyapit tayo ed Lapuan na ‘mabiskeg a pakayari’ et mangiter ed sikatayo na espiritual a biskeg pian makpel a makapantasi. (Isa. 40:26, 29-31) Sanen akasagmak si apostol Pablo na kairapan ed ministeryo to, sikatoy ‘akagamor na tulong na Dios.’ (Gawa 26:21, 22) Say manamabiskeg a masanton espiritu nen Jehova et makatulong pian magmaliw itayon marlang ed ministeryo, kanian kerewen tayo itan diad pikakasi.—Luc. 11:9-13.
4. Antoray maabig a resulta na inkaseseg tayo, balet anto so nepeg tayon alwaran?
4 Say mandarlang a seseg tayo ed ministeryo et lalon mamaseseg met ed saray kapara tayon Kristiano. (2 Cor. 9:2) No maligsa tan kombinsido tayo ed saray presentasyon tayo, mas ondengel iray totoo diad teritorya tayo. Balet say inkaseseg et kaukolan a lawas atekepay inkamataktika tan kauyamoan. (Tito 3:2) Diad amin a panoan et igalang tayo so unabung tan respetoen tayo so kawayangan ton manpili.
5. Anton apuyanan a simbawa so pampelengan tayon iyaplika?
5 Bilang manangiyabawag na Panarian, lawas itayo komon a “marlang ed espiritu.” Bayuboan tayoy inkaseseg panamegley na personal a panagaral na Biblia tan masimoon a pampikasi ed si Jehova, say lapuan na masanton espiritu. No gawaen iya, maseseg tayon nasumpal so ministeryo tayo tekep na “masanton espiritu tan mabiskeg a pananisia.”—1 Tes. 1:5.