Saray Pakabat

◼ Opresin literatura ed Marso: Iyopresi tayo so balon libron, Anto so Peteg ya Ibabangat na Biblia? Abril tan Mayo: Sansakey iran kopya na Panag-Bantayan tan Awake! Sano papawilen iray interesadon totoo, pati saramay inmatendi ed Memoryal odino arum niran teokratikon pantitipon balet ta aliwa nin aktibon mililimog ed kongregasyon, iyapasakey ed pakapangigapo na saray panangiyaral ed Biblia ya usaren so balon libro ya Anto so Peteg ya Ibabangat na Biblia? Hunyo: Iyopresi so libron Manaral Manlapud Sankamaongan a Managbangat. No ibaga na saray indibidual ya anggapoy anak da, iyopresi so libron Liket ed Pamilya.

◼ Lapud say Abril et walaan na limaran Sabado tan limaran Simba, satan so maabig a bulan pian man-auxiliary payunir. Saray manangipalapag a malabay a manlingkor bilang auxiliary payunir ed Abril so nepeg a manplano la natan tan iter da lan masakbay iray aplikasyon da. Saya so ontulong ed saray mamatatken a manggawa na nakaukolan iran uksoyan ed lawak na serbisyo tan nawalaan na magenap iran magasin a nausar da. Saray kangaranan na saramay naaprobaan a man-auxiliary payunir so nepeg ya iyanunsio ed kongregasyon.

◼ Say Memoryal so nagawa ed Mierkoles, Abril 12, 2006. No say kongregasyon yo et walaan na saray pantitipon ed Mierkoles, saraya so gawaen ed arum ya agew na satan a simba. Amin so papasesegen a manbasa ed nirekomenda iran kabiangan na Biblia ya aka-eskedyul ed 2006 Calendar tan ed Usisaen so Kasulatan ya Inagew-agew, ya onggapo ed Abril 7 tan mansampot ed agew na Memoryal, Abril 12.

◼ Saray kongregasyon so nepeg a mangipaway a tampol ed sankabaloan iran isyu na Say Panag-Bantayan tan Awake! sano naawat la iraya manlapud sangan opisina. Saya so mangiyabuloy ed saray manangipalapag a magmaliw a pamilyar ed saray lugan na magasin antis ya iyopresi iratan ed lawak na serbisyo. Nepeg met ya ipaway a tampol so Ministeryo Tayo ed Panarian sano sinmabi la itan. Nayarin ibunog itan panamegley na uksoyan na Panagaral na Kongregasyon ed Libro.

◼ No walaray manplaplanon manbiahe kalaktip lay iyatendi ed saray pantitipon na kongregasyon, asamblea, odino distriton kombension ed arum a bansa, say ikerew yo na impormasyon nipaakar ed saray petsa, oras, tan lugar so nepeg ya idirekta ed sangan opisina a mangaasikaso ed kimey ed satan a bansa. Saray address na sangan opisina so akalista ed unor a pahina na peles a Yearbook.

◼ Say video program a Noah​—He Walked With God so singbaten diad Pantitipon Parad Panagserbi no Mayo. No nakaukolan, nayarin orderen iray kopya manlapud sangan opisina. Ipangasin iyespisipiko no kasin VHS odino DVD so orderen.

◼ Balo Iran Audiocassette a Naala:

Anto so Peteg ya Ibabangat na Biblia? (5 cassettes)​—Ingles

◼ Balon Compact Discs a Naala:

Anto so Peteg ya Ibabangat na Biblia? (7 CDs)​—Ingles