Tutulongan Itayo na Saray Anghel
1 “Nia, wala ak a naynay ed sikayo, ya angga ed kasampotan na mundo.” Agaylan makapaseseg iratan a salita parad amin na saramay manusumpal ed ganggan nen Jesus ya: “Onla kayo sirin, tan manggawa kayo na saray babangatan”! (Mat. 28:18-20) Say sakey a makatantandan paraan a si Jesus so wala’d dapag na saray tuan Kristiano et diad panamegley na saray anghel to. (Mat. 13:36-43) Agaylan makapalikliket so pangiyabawag ed “andi-angga a maabig a balita” kaiba na sarayan matoor ya espiritun pinalsa!—Apo. 14:6, 7.
2 Diad Ministeryo Tayo: Ipaparungtal na Biblia a saray anghel so imbaki ‘a manlingkor ed saray manawir naani na kilalaban.’ (Heb. 1:14) Nen inmunan siglo, saray anghel so mangiwawanwan ed papatumbok nen Jesus ed saray makanepegan. (Gawa 8:26) Natan, siansian naiimatonan na saray lingkor na Dios so pakapatnagan ed panangiwanwan na saray anghel. Diad dakel a kipapasen, walaray unabung ya angibagan sikaray manpipikasin tulongan sanen dinalaw ira na saray Tasi. Alay liket tayo, pati saray anghel, sano onkiwas iratan ed mensahe na Panarian!—Luc. 15:10.
3 Sano Susumpaen Itayo: Si Daniel, saray taloran Hebreon kalangweran a kaiba to, si apostol Pedro, tan saray arum ni a pirmin asubok so akaeksperiensya ed pananalimbeng nen Jehova panamegley na saray “mabiskeg” ya anghel. (Sal. 103:20; Dan. 3:28; 6:21, 22; Gawa 12:11) Anggaman no maminsan et singa agtayo nayarian so isusumpa, napaseseg itayo ed eksperiensya na aripen nen Eliseo sanen naamtaan to a “saray wala ed sikatayo sikara so dakdakel nen saray wala ed sikara.” (2 Ara. 6:15-17) Anggano paskaran itayon nisian ed saray Kristianon agagi tayo, nepeg ya ag-itayo nadidismaya. Ipapaseguro ed sikatayo na Salitay Dios: “Say anghel nen Jehova mankampamento ed liberliber na saray ontakot ed sikato.”—Sal. 34:7.
4 Agmanbayag et onsabi so armada na saray anghel pian ekalen so amin ya onsusumpa ed inkaari nen Kristo. (Apo. 19:11, 14, 15) Legan tayon aalagden itan ya agew, komon ta mantultuloy tan makpel tayon idayew si Jehova, a sigpot a manmatalek ed mabiskeg a tulong na mangatatawen ya armada a walad pakauley nen Kristo.—1 Ped. 3:22.