Tutulongan nen Jehova Iramay Manmamatalek ed Sikato
1 Moriaen na dakel a totoo a say kuarta, pakayari, tan inkadunong na too so tombok ed itatalona. (Sal. 12:4; 33:16, 17; 49:6) Balet, saramay ontatakot tan manmamatalek ed si Jehova so papaseguroan na Biblia a “sikato so tulong da tan kinlong da.” (Sal. 115:11) Konsideraen tayo pa so duaran aspekto a nakaukolan tayon ipatnag so panagmatalek ed si Jehova.
2 Bilang Kristianon Ministros: Kada walay asainmin tayo ed kongregasyon odino no manpulong itayo ed lawak na ministeryo, nepeg itayon ompapeg ed Dios tayo. Nonoten so ehemplo nen Jesus. Anggaman sikatoy Anak na Dios, agto nanmatalekan so dilin kakabatan odino abilidad to noagta sigpot a nanmatalek ed mangatatawen ya Ama to. (Juan 12:49; 14:10) Agaylan nagkalalo a nakaukolan tayon gawaen met itan! (Uli. 3:5-7) Diad panamegley lambengat na panamendisyon nen Jehova a mamagalang ed sikato tan mangunggona ed arum so limitadon nagagawaan tayo.—Sal. 127:1, 2.
3 Nipatnag tayo so panagmatalek tayo ed si Jehova diad ikerew na panangiwanwan to tan tulong na masanton espiritu to. (Sal. 105:4; Luc. 11:13) Niarum ni, nipatnag tayoy panagmatalek ed Dios diad pangibase ed ibabangat tayo ed Salita to, say Biblia. Say mensahe na satan so walaan na pakayarin mamakiwas ed kapusoan tan mamasimbalo ed kabibilay. (Heb. 4:12) Sano manlingkor odino “mangiter [itayo] unong na pakayari ya iter na Dios,” si Jehova so nidaydayew.—1 Ped. 4:11.
4 Sano Arapen Iray Problema: Nakaukolan tayo met so patulongan ed si Jehova sano aarapen tayo iray desdes tan problema. (Sal. 46:1) Alimbawa, nayarin ag-itayo abuloyan na amo tayon manbakasyon pian makaatendi ed asamblea, odino nayarin walay baleg a problema tayo ed pamilya. Nipatnag tayo so panagmatalek ed si Jehova diad masimoon a pampikasi ed sikato tan diad pangiyaplika ed panangiwanwan ya itatarya to panamegley na Salita tan organisasyon to. (Sal. 62:8; 119:143, 173) Diad panggawa ed satan, nalikna na saray lingkor nen Jehova so tulong to ed bilay da.—Sal. 37:5; 118:13, 16.
5 Ipapaseguro a mismo nen Jehova ed sikatayo: “Mapalar so too a manmatalek ed Jehova, tan say ilalo to sikato si Jehova.” (Jer. 17:7) Komon ta ipatnag tayo so panagmatalek tayo ed sikato ed amin a gawaen tayo!—Sal. 146:5.