Aligen so Awawey na Kanonotan nen Jesus
1. Anton awawey na kanonotan so impatnag nen Jesus?
1 Anggaman agtayo nin balot anengneng so Anak na Dios, sikato so peteg a naaro tayo diad panamegley na nikurit a bilay tan ministeryo nen Jesus. (1 Ped. 1:8) Bilang katutulok ed linawa na Ama to, intalirak to so nipaatagey a posisyon to ed tawen tan sikatoy linma ed dalin. Bilang too, sikatoy mabulos a nanlingkor ed arum insan inter toy bilay to nisengeg ed katooan. (Mat. 20:28) Oniay ipapaseseg ed sikatayo na Salitay Dios: “Yatol yo so sayan kalakal ed sikayo, a wala met nensaman ed Kristo Jesus.” Panon tayon naalig so masakripisyon awawey to?—Fil. 2:5-8.
2. Anton subok so nasasagmak na dakel a Kristiano, tan anto so makatulong pian nadaeg da itan?
2 Sano Nakekesawan: Anggaman ayadyari si Jesus, sikato nin siansia so akesawan. Diad sakey ya inkagawa, sanen “naksawan ed impanaakar to,” sikatoy sigpot a nantasi ed sakey a Samaritana. (Juan 4:6) Ontan met a subok so nasasagmak na dakel a Kristiano natan. Kayari na makapakesaw a sakey simban trabaho, nayarin anggapo lay biskeg dan mibiang ed panagpulong a kimey. Balet, no gawaen tayo itan a regular, nanengneng tayo a say Makristianon ministeryo et mamabiskeg ed sikatayo diad espiritual a paraan.—Juan 4:32-34.
3. Panon tayon naalig so inkamabulos nen Jesus a manbangat?
3 Diad sananey nin inkagawa, si Jesus tan saray babangatan to so amaarap ed mareen a pasen pian manpainawan magano. Balet, naamtaan itan na dakel a totoo tan binmatik iran angabet ed sikara. Imbes a naingongotan si Jesus, sikaray “naabagey to” tan ginapoan toy “nambangat ed sikara.” (Mar. 6:30-34) Say pangigapo tan pangikondukta na saray panagaral ed Biblia et mankakaukolan na ontan met ya awawey. Kakaukolanen na satan so maseet a pansagpot tan puron panangaro ed totoo. No anggapo ni so iyaaralan yo na Biblia ed kaplesan, agkayo onsusukon mananap.
4. Panon a say panag-auxiliary payunir so makatulong ed sikatayon naalig so awawey na kanonotan nen Kristo?
4 Iyuna Iray Espiritual a Bengatla: Say panag-auxiliary payunir so makatulong ed sikatayo a nagkalalon niyapasakey so imano ed saray espiritual a kimey. Oniay insulat na sakey a kalangweran ya agin bii: “Say ina na sakey ed saray kaarok so amaseseg ed sikamin duan miulop ed sikaton man-auxiliary payunir ed sakey bulan. Malikeliket ak ed impiulop mi ed sikato. Naliliketan ak lapud nakakabat kon maong iray agagin lalaki tan bibii, tan ag-abayag et ipapasen ko lan kapamilyak ira. Panggagayagaan ko met so apadaak a pankanawnawan itongtong ed arum so nipaakar ed si Jehova tan ibangat ira nipaakar ed saray makapakelaw a katuaan na Panarian. Amin na saya so amaapit ed siak ed si Jehova tan ed organisasyon to.”—Sal. 34:8.
5. Akin a kaukolan tayo so tuloytuloy a pansagpot a mangalig ed awawey na kanonotan nen Jesus?
5 Amin tayo so mipupuligesgesan ed baetan na ag-ayadyarin laman tayo tan say pilalek tayon napaliket si Jehova. (Roma 7:21-23) Nepeg ya ipulisay tayo so inkangiras ya ipapatnag na mundo. (Mat. 16:22, 23) Natulongan itayo nen Jehova ya ontalona ed saya diad panamegley na masanton espiritu to. (Gal. 5:16, 17) Legan tayon aalagden so kililiktar tayo a mamaarap ed matunong a balon mundo na Dios, komon ta aligen tayo so awawey na kanonotan nen Jesus diad pangiyuna ed intereses na Panarian tan saray pankaabigan na arum imbes a say pankaabigan tayo.—Mat. 6:33; Roma 15:1-3.