Masanto Komon so Amin a Kondukta Yo
1. Akin ya importante so pagmaliw a masanto ed amin a kondukta tayo?
1 Bilang lingkor na masanto a Dios, si Jehova, panggugunaetan tayon magmaliw a masanto so amin a kondukta tayo. (1 Ped. 1:15, 16) Kabaliksan na saya a panseseetan tayon suportaan tan pansiansiaen iray estandarte nen Jehova diad amin ya aspekto na bilay tayo. Say distriton kombension ed sayan taon so maabig a pankanawnawan ipatnag so masanto a kondukta.
2. Bilang panagparaan parad distriton kombension, akin a kaukolan tayon imanoen so itsura tayo?
2 Desente ya Itsura: “Sankaabigan iray Tasi nen Jehova! Mao-maong iray totoo yo tan desente so panangawes da, tan maresrespeto ira.” Ontan so inkuan na representanti na hotel diad sakey a distriton kombension nen katantaon. Diad sakey nin kombension et oniay inkomento na sakey a mantratrabaho ed hotel: “Mapatnag a say panangawes na totoo yo et para ed Dios.” On, saray delegado ed kombension so naiimano na arum. Labay tayo sirin so mangawes diad paraan a “makana [odino makanepegan] ed ebanghelyo.”—Fil. 1:27.
3. Akin ya aliwan mainomay so pangawes tan pan-ayos a desente?
3 Nayarin aliwan mainomay so pagmaliw a desente. Say imoral a mundo nen Satanas so mangiimpluensya ed totoo ya aligen so mabanday, minumundo, tan nikaduma iran estilo ya agmatukoy. (1 Juan 2:15-17) Kanian, say panangawes tayo so kaukolan a ‘mangibeneg ed ag-inkamaridios tan saray ib-ibeg a mangaraldalin, tan manbilay ed sayan panaon a sidarangka.’ (Tito 2:12) Agtayon balot labay a nabigla so arum lapud itsura tayo, balang lan kaagian tayo, odino saray mantratrabaho ed hotel o restawran, odino arum niran makaiimano.—1 Cor. 10:32, 33.
4. Antoran tepetepet so ontulong ed sikatayo a mangusisa ed itsura tayo?
4 Masimpit tan Mauksoy a Panangawes: Sano manpaparaan parad kombension, tepetan moy inkasika: ‘Kasin masimpit so panangawes ko, odino kasin naiimano ak lapud satan? Kasin ipapatnag na satan so panagrespeto ed liknaan na arum? Kasin abebbebay lewlew na saray blusak odino kasin antiktikey iratan? Kasin mankaninag odino mapitpitat iray kawes ko? Kasin matukoy parad sakey a delegado ed kombension ya akasulong na badge card so panangawes ko? Kasin masuyat ak a mantasin impormal diad panaon na panagligliwa lapud panangawes ko?’—Roma 15:2, 3; 1 Tim. 2:9.
5. Panon itayon natulongan na arum a nawalaan na masimpit ya itsura?
5 Makatulong ed sikatayo iray obserbasyon na matakken la iran Kristiano. Nepeg a tepetan na kaasawaan a bibii so mamasiken da no anto so nayarin impresyon na arum ed panangawes da. Natulongan na maridios ya atateng iray tin-edyer ya ananak da ed sayan pamaakaran. Niarum ni, saray respetado tan maedad ya agagin bibii so nayarin ‘mangibangat ed saray bibii ya ugugaw . . . a mankalakal ira, a malinis,’ so itsura ra “pian agnaayew so salita na Dios.” (Tito 2:3-5) Itatarya na saray publikasyon tayo so makatulong iran ilustrasyon a mangipapanengneng ed masimpit tan mauksoy a panangawes.
6. Anto so laktipen na maabig a kondukta diad pasen a pankokombensionan?
6 Magmaliw a Makonsidera ed Arum: Nagkalalo lan nakaukolan a napatnagan so maabig a kondukta tayo diad pankokombensionan. Ipangasin mikoopera ed panangiwanwan na saray attendant, diad paradaan tan diad auditoryum. (Heb. 13:17) Nepeg a manaabay ed yurongan so pamilya imbes ya abuloyan so ananak da, anggan saray tin-edyer, a miyurong ed arum a kalangweran. Agnepeg ya ikonekta so antokaman a recorder diad kuryente odino sound system na pasilidad tan usaren lambengat iratan no agnadisturbo so arum. No labay yoy manlitrato, ag-itan uusaran na flash legan na saray sesyon. Nepeg ya i-set iray pager tan cell phone pian anggapoy nadisturbo.
7. Panon a say kondukta tayo ed saray kombension so mangigloria ed Dios?
7 Say kondukta tayo so mangibibiig ed sikatayo ed arum tan mangiglogloria ed Dios tayo. (1 Ped. 2:12) Diad kombension et naiimano na arum so kakikiwas na saray Tasi nen Jehova. Kanian, panggunaetan so pagmaliw a masanto ed amin a kondukta yo.
[Kahon ed pahina 5]
Ipatnag so Masanton Kondukta
◼ Mankawes a matukoy parad sakey a Tasi
◼ Bantayan a maong iray ananak
◼ Magmaliw a makonsidera ed arum