Magmaliw ya Ehemplo ed Maabig Iran Gawa
1. Akin a nagkalalo lan nakaukolan a sinononot tayo ed kondukta tayo diad distriton kombension?
1 Diad angkabaleg iran pantitipon tayo a singa say distrito iran kombension, say kakikiwas tan panagtrato tayo ed arum so nagkalalo lan sankaimano na saray maniimaton. Sirin, balang sakey ed sikatayo so kaukolan a mangimanon maong ed bilin na Biblia: ‘Mankalakal [ka], a dia ed saray amin a bengatla ompatnag ka a pinagkauliran na saray maabig a gawa.’ (Tito 2:6, 7) Nakaukolan so kaaruman a sagpot pian ‘onnengneng, [aliwan] ed kayarian tayon dili, noag balang sakey ed sikatayo onnengneng met ed saray bengatlan kayarian na arum.’ (Fil. 2:4) Singbaten tayo so pigaran pamaakaran a niyaplika tayo iya diad manasingger lan “Igloria so Dios” a Distriton Kombension tayo.
2. Antoy nepeg a lawas tayon nonoten no nipaakar ed saray uksoyan ed tagano?
2 Uksoyan Nipaakar ed Tagano: Nipatnag tayo so maabig iran kimey sano mangawit itayo na simplin pangugtoan tan agnadisturbo iramay kaabay tayo ed yurongan sano manguugto itayo. Nipanengneng tayoy konsiderasyon no paliisan tayoy pakaibong na danum odino juice legan itayon mamangan tan, no ag-iya napaliisan a nagawa, kaukolan a tarapoen tayon tampol itan. Antis ya ontaynan ed pankombensionan, nepeg tayon seguroen ya anggapoy basuran atilak tayo diad yurongan odino ed kaliberliber na saray nanyurongan tayo, diad ontan et taynanan tayon malinis so pankombensionan a singa sanen sinabi tayo nen kabuasan.
3. Panon itayon ‘makapanggawa na maabig ed amin’ diad pikoopera ed saray attendant?
3 Paradaan tan Saray Attendant: No walay luluganan yo, mikoopera ed saray attendant ed paradaan, a tumboken iray instruksion da no iner so pamparadaan, anggano aliwan tanton kombeniente ed sikayo. Tumboken so panangidirehi na saray attendant ed panyurongan, a nonoten a walaray yurongan a gendat ya itatarya parad saray maedad la odino walay deperensya. Ontan met, sano mangala na saray balon paway, paliisan so panapura anggan agni asumpal so sesyon ta pian makauna ed pila, imbes maanos a pasumpalen so sesyon insan tumboken iray instruksion na tsirman ed sesyon tan saray attendant. Diad onia’ran paraan et sikatayo so ‘makapanggawa na maabig ed amin.’—Gal. 6:10.
4, 5. Panon a makapangitarok na dayew iray ananak ed si Jehova, tan anto so responsabilidad na atateng?
4 Atateng tan Ananak: Diad mundo a dakerakel iray kalangweran ya andian na maabig iran walna, saray ananak tayo so naiimanon duma, tan saya so mangitarok na dayew ed si Jehova tan ed organisasyon to. Balet, no maminsan et onlesa iray problema no agnaasikason maong iray ananak. (Uli. 29:15) Kaukolan ya agpapaulyanan na atateng iray ananak da legan na saray intermision.
5 Sakbay na kombension, naimano na pigaran atateng a makatulong so pangirepaso ed ananak da ed no anton klase na walna so iilaloan ed sikara. (Efe. 6:4) Sikaray mangipatalos ed ananak da a say puron Makristianon aro et “aliwan mabanday so kagagawa to” odino “agto anapen so kien to.” (1 Cor. 13:5) Say distriton kombension so niganan panaon pian paibangat ed si Jehova, tan nipanengneng na saray ananak ontan met ed saray wala la’d edad so respeto da ed sayan uksoyan diad panamegley na kondukta ra diad pankokombensionan tan ed inerman a pasen.—Isa. 54:13.
6. Anto so epekto na maabig a kondukta tayo ed arum?
6 Baleg so nagawaan na maabig a kondukta tayo pian nipetek iray lingon panmoria na arum ed sikatayo tan managyat ed totoo ed tuan panagdayew. (Mat. 5:16; 1 Ped. 2:12) Komon ta amin na saraman so nakatongtong tayo diad distriton kombension so makagamor na paborablin pantasi diad panamegley na kiwas tan ed panagtrato tayo ed sikara. Diad ontan et ‘ompatnag itayo a pinagkauliran na saray maabig a gawa’ tan mangigloria ed si Jehova.—Tito 2:7.
[Kahon ed pahina 4]
Magmaliw a Makonsidera ed Arum
▪ Linisan yo iray nanyurongan yo antis ya ontaynan
▪ Mananos sano mangala na balo iran paway
▪ Mikoopera ed saray attendant
▪ Asikasoen a maong iray ananak yo