“Manparaan Kayo”
1 Diad makatantandan propesiya to nipaakar ed panampot na sayan sistema na bengabengatla, amasakbay si Jesus sumpad kigalet ed saray kaslakan lan kapagaan ed bilay. (Mat. 24:36-39; Luc. 21:34, 35) Lapud ta nayarin onsabi so baleg a kairapan ed anggan anton oras, kapilitan a talinengen tayo so bilin nen Jesus: “Manparaan kayo met komon; ta dia ed oras ya agyo isisipen onsabi’ Anak na too.” (Mat. 24:44) Anto so makatulong ed sikatayo ed sayan pamaakaran?
2 Labanan Iray Kapagaan tan Pakasbelan: Sakey ed saray espiritual a patit a nepeg tayon panalwaran et “saray kapagaan ed sayan bilay.” (Luc. 21:34) Diad pigaran daldalin, say kairapan na bilay, kaandian na trabaho, tan mabli iran sasaliwen so sengeg na mairap a pakagamor ed saray nakakaukolan ed bilay. Diad arum a daldalin, mainomay so pakagamor na materyal iran kayarian. No alablabas itayo lan mapaga ed materyal iran bengatla, agtayo niyapasakey so imano tayo ed inkapeteg la na Panarian. (Mat. 6:19-24, 31-33) Saray Makristianon pantitipon so ontulong ed sikatayon napansiansia so panangiyapasakey tayo ed saratan. Kasin gagawaen yon kalat so iyatendi ed kada pantitipon?—Heb. 10:24, 25.
3 Say mundo natan so napno na saray pakasbelan a mainomay a manamsam na mablin panaon tayo. Say panangusar na kompyuter so nayarin magmaliw a patit no say sakey so manguusar na dakel ya oras diad pansuksukimat ed Internet, pambasa tan pangipawit na E-mail, odino panggalaw na computer games. Dakel ya oras so nayarin napirdi nisengeg ed telebisyon, saray pelikula, saray panligliwaan, sekular a babasaen, tan saray isport, a daiset lay natilak a panaon tan biskeg tayo parad espiritual iran gegemtan. Anggaman mangiter na temporaryon pakarepreskoan so panagligliwa tan panagrelaks, say personal tan sankapamilyaan a panagaral na Biblia so mangitarok na magnayon iran gunggona. (1 Tim. 4:7, 8) Kasin aanamoten yo so pandalepdep ed Salita na Dios kada agew?—Efe. 5:15-17.
4 Agaylan misalsalamat itayo ta say organisasyon nen Jehova so angiyuksoy na programa na espiritual a panangibangat ya ontulong ed sikatayo ‘pian ontalona a nilaban ed saray amin a bengatlan nagawa, tan makaalagey itayo ed arap na Anak na too’! (Luc. 21:36) Komon ta sigpot tayon anamoten irayan probisyon tan ‘manparaan itayo’ ta pian say pananisia tayo so ‘[pansengegan na] dayew tan galang no ompanengneng si Jesu-Kristo.’—1 Ped. 1:7.