Balon Programa ed Sirkiton Asamblea
1 Impasakbay na Katawan tayo a managmak na kairapan iray babangatan to. (Mat. 24:9) Panon so nepeg a panmoria tayo ed saray subok? Anto so ontulong ed sikatayon makapansungdo ed kairapan? Say programa ed sirkiton asamblea parad 2004 so mangebat ed saratan a tepet. Say tema et ‘Manliket ed Ilalo. Mansungdo ed Kairapan.’—Roma 12:12.
2 Duaran Simposium: Say unonan simposium, ya apauloan na “Manbunga Tekep na Panagsungdo,” so mangonsidera ed saray paraan a sikatayoy manbunga. Nainterbio so pigaran manangipalapag no panon so pampupulong tan pambabangat da tekep na inkaganatan. Nagkalalo lan kaliktanen na atateng so panimanon maong ed partin “Sano Disiplinaen Itayo nen Jehova,” a nasingbat ditan no panon a mankatunongan iray atateng ed ananak da. Ipabitar na unor ya espiker ed simposium no anto so nepeg tayon gawaen pian ag-itayo naimpluensyaan na mundo a sengegan na agtayo pambunga.—Mar. 4:19.
3 Say tema na komaduan simposium et “Batiken so Lumba Tekep na Panagsungdo.” Ipalinew na satan no panon a niyaliling so kurso na bilay tayo ed pilulumba. Akin a nepeg itayon ombatik unong ed saray totontonen? Panon tayon matalonan niwaklit so amin a pakabelatan tan ag-onkesaw ed pilulumba parad bilay? Say nitaryan nipanpanaon a Makasulatan a simbawa so ontulong ed sikatayon amin pian mantultuloy ya ombatik tekep na panagsungdo.
4 Nagamoran so Panangabobon na Dios Diad Pansungdo: Sakey ed saray paliwawa na manangasikaso na distrito et apauloan na “Say Panagsungdo so Mangitonton ed Naabobonan a Kipapasen.” Ebatan na publikon paliwawa so tepet a: Siopan ngaran so nepeg a panilaloan na saray nasyon, tan anto so nalalanor ed satan? Say kaunoran a paliwawa a, “Natalima Yo Iray Kamarerwa Yo Diad Pansungdo Yo,” so mangonsidera ed no panon ya asungdoan nen Jesus so ag-inkahustisya ya agnanem-em na sakit na linawa.
5 Aglilingwanan ya awiten so libro yon Eskuelaan Parad Ministeryo tan say Panag-Bantayan yo parad satan a simba. Mangala kayo na saray nota pian niyapasakey yo so imano yo tan parad reperensya ed arapen. Nagawa ed saginonor so panrepaso na programa diad kongregasyon.