Internasyonal a Panagpaalagey na Kingdom Hall Diad Pigaran Bansa ed Europa
1 Diad agano niran dekada et asebelan so kimey na saray Tasi nen Jehova ed pigaran bansa ed Europa, pati diad Mamabukig a Europa. Diad maslak a kipapasen, saray panameget so alablabas. Mairap a gawaen iray miting a mapalaway, tan ngalngalin imposible so pakausar ed Kingdom Hall. Balet, diad agano niran taon, “si Jehova nanggawa na angkakabaleg a pamaakaran ya onkana ed sikatayo; a lapu ed saraya manliket itayo.”—Sal. 126:3.
2 Ginmapo nen 1983, linmukak so panameget ed saray Tasi nen Jehova. Nen 1989, naikdan na legal a panamidbir iray Tasi nen Jehova diad Poland tan Hungary. Nen 1991, legal met lan nirehistro iray Tasi nen Jehova diad Russia. Nanlapula’d saman, say kimey so binmulaslas ed Russia tan ed dati iran republika ed Soviet Union. Diad baetan na Marso 1996 tan Oktubre 1998, inaprobaan na Mananguley ya Ulop so 359 a loan parad Kingdom Hall na saray sangan opisina a mangaasikaso ed 11 a bansa ed Europa.
3 Legan yon nenengnengen iray litrato ed sayan insert, dalepdepen so baleg tan alay abig iran bengatla ya agawaan la nen Jehova parad totoo to. (Sal. 136:4) Maliket kayon makaamta a saray kontribusyon na sankamundoan ya impanaagi et nauusar ed sankaabigan a paraan, a pakapatnagan ed imbaga nen Jesus, unong a nikurit diad Juan 13:35: “Lapu ed saya amin a too nabirbiran da a sikayo ray babangatan ko, no wala so aro yo ed sakey tan sakey.”
4 Sakey ed saray bansa ed Europa a nagugunggonaan ed uksoyan a panangipaalagey na saray Kingdom Hall diad saray bansa a limitado ed pinansyal et say Romania, a ditan et wala lay 36 a Kingdom Hall a nipaalagey nanlapula’d Hulyo 2000. Diad panguusar ed planon tumboken parad amin lawarin Kingdom Hall, akapangipaalagey so Ukraine na 61 nen taon 2001 tan 76 a kaaruman ni nen 2002. Lapud kuartan indonasyon parad Kingdom Hall Fund, nilasus a Kingdom Hall so nipaalagey la diad Bulgaria, Croatia, Macedonia, Moldova, Russia, tan Yugoslavia.
5 Aliwan mainomay so pangipaalagey na saray Kingdom Hall diad arum a bansa, tan nakaukolan so pirmin pansagpot sakbay a nigapo so aktual a panagpaalagey. Mabetbet a mankaukolan na baleg a panaon so proseso. Insan, sakey ni et mas magastos so panagpaalagey na Kingdom Hall diad satan a parte na Europa nen say diad dakel a parte na Aprika odino Abalaten Amerika. Balet, lapud idaraak a maong na saraman so mandadayew ed si Jehova, nilasus a Kingdom Hall so siansian nakaukolan ni diad saray bansa ed Europa a limitado ed pinansyal!
6 Agaylan abig so pakanengneng ed ontan kapeles ya idarakel na panagpaalagey ed sarayan Kingdom Hall! Sakey a maabig a panagtasi so niiter ed saray kakaabay ya angipaalageyan ed saratan, unong ya ipapanengneng na dakel ya eksperiensya. Diad pigaran lugar, saray lokal ya autoridad so mandinayew lapud mabulos ya espiritun impanengneng diad impanumbok ed saray totontonen ed panagpaalagey.
7 Matukotukoy ya impropesiya nen Isaias so nipaakar ed idaak na tuan panagdayew ed sayan panaon. Onia so impasakbay na Dios panamegley na propeta: “Siak, si Jehova, sikato naani gawaen ko a magano ed panaon to.” (Isa. 60:22) Talagan say imbeneg a dekada so apaneknekan a panaon nen Jehova parad idaak ed Mamabukig a Europa. Komon ta itultuloy nen Jehova ya ikalbo so mayaman a panamendisyon to ed saray sagpot tayon papelesen so panagpaalagey ed saray Kingdom Hall diad dakel a bansa legan tayon susuportaan a nagkalalo so Kingdom Hall Fund! Saya so manresulta ed dakel nin Kingdom Hall a niarum ed saray bansa a limitado ed pinansyal. Makatulong itan ed ibulaslas na puron panagdayew diad dakel a parte na Europa tan ed babaleg a panagtasi a niiiter “angga ed kasampotan na dalin.”—Gawa 13:47.
[Saray litrato ed pahina 3]
Kingdom Hall Complex Moscow, Russia
[Saray litrato ed pahina 4-6]
Balon iran Kingdom Hall ed Mamabukig a Europa
Strumica, Macedonia
Daruvar, Croatia
Bitola, Macedonia
Sokal, Lviv District Ukraine
Sofia, Bulgaria
Krasnooktyabrskiy, Maykop Area, Russia
Bački Petrovac, Serbia and Montenegro
Plovdiv, Bulgaria
Tlumach, Ivano-Frankivsk District, Ukraine
Rava-Ruska, Lviv District, Ukraine
Stara Pazova, Serbia and Montenegro
Zenica, Bosnia and Herzegovina
Sokal, Lviv District, Ukraine
Zhydachiv, Lviv District, Ukraine