Magmaliw Itayon Maseseg ed No Anto so Maabig!

¹ Diad panasingger tayo la ed 2003 a panaon na Memoryal, walaan itayo na dakel a rason pian magmaliw a “maseseg ed no anto so maabig.” (1 Ped. 3:13, NW) Say sankamanunaan ed saraya et say dondon bagat nen Jesu-Kristo. (Mat. 20:28; Juan 3:16) Nipaakar ed saya, nansulat si apostol Pedro: “Aliwan dia ed panamegley na maidederal a bengatla a singa say pilak tan balitok so impakarondon ed sikayo ed saray andi kakanaan a panagbilay yo. . . . Noag ingen dia ed panamegley na mablin dala, a singa dala na sakey a kordero ya andi dumsis tan tilol, salanti say dala nen Kristo.” (1 Ped. 1:18, 19) Say apresasyon tayo parad sayan sankabalgan a panangipatnag na aro so managdag ed sikatayon magmaliw ya okupado ed panggawa na maong, a moriaen a si Jesus et “initer to so inkasikato ya insalat ed sikatayo, pian dondonen to itayo ed amin a kaugsan, tan linisan to so sakey a baley a nipaakar a kien ton dili, mapaga ed saray maabig a gawa.”​—Tito 2:14; 2 Cor. 5:14, 15.

² Sano gawaen tayo so makapaliket ed imaton na Dios, panggayagaan tayo so maabig a pisisiglaotan ed sikato tan niwala itayo ed maaron panangasikaso to. Inkuan ni nen Pedro: “Say maliket a mangaro na bilay, tan onnengneng na maong ira ya agew, . . . arawian to so mauges, tan gawaen to so kaabigan: Anapen to so kareenan tan tumboken to. Ta saray mata na Katawan wala ed saray matunong tan saray layag to imatleken to so pikakasi ra.” (1 Ped. 3:10-12) Diad sayan mapeligron panaon, agaylan bendisyon a naamtaan a si Jehova so mantutultuloy a manbabantay ed sikatayo tan akaparaan ya onkiwas nisesengeg ed sikatayo, ‘pian asikasoen itayo a singa bukel na mata to.’​—Deut. 32:10; 2 Awa. 16:9.

³ Anggaman nidunget ira ed saray subok, saray inmunan Kristiano a sinulat nen Pedro so napnapno na ligsa tan seseg, tan agawaan da so sankalaknaban a panangiyabawag ed maong a balita. (1 Ped. 1:6; 4:12) Tua met itan ed saray totoo na Dios natan. Anggaman manbibilay itayo ed ‘maatap a panaon a mairap a pidenengan,’ say panamabli ed kamaongan nen Jehova so mamakiwas ed sikatayon gawaen so linawa To tekep na seseg. (2 Tim. 3:1; Sal. 145:7) Konsideraen tayo pa so pigara ed saray maabig a kimey a pagmaliwan tayon okupado legay panaon na Memoryal.

⁴ Imbitaan so Arum Diad Memoryal: Say sakey a paraan pian nipatnag tayoy apresasyon tayo ed sankabalgan a regalo a dondon et say pagmaliw a presente ed tinaon a pannodnonot ed impatey nen Jesus, a selebraan ed sayan taon no Mierkoles, Abril 16, kaselek na agew. (Luc. 22:19, 20) Katantaon, diad 94,600 a kongregasyon a manrereport ed sankamundoan, awalaan itayo na interon dagup na inmatendi a 15,597,746! Atagtagey itan na masulok a 220,000 no ikompara ed say inmatendi nen imbeneg a taon.

⁵ Kaunongan karakel so onatendi ed sayan taon? Mandependin tuloy itan ed maseet iran sagpot tayo a mamaseseg ed arum pian midagup ed sikatayo. Igapo diad pangilista ed amin a labay yon imbitaan. Kaukolan a manunaan ed listaan yo so pamilya yo. No agmananisia so asawa yo, ibalikas ed sikato so masimoon a pilalek yon onatendi a kaiba to. Inkuan na sakey ya agmananisian asawan laki a sikatoy inmatendi ed Memoryal nen katantaon lapud amoria ton makabkabaliksan so iyatendi to parad si asawa to. Ontumbok ed listaan yo et saray kakanayon, kakaabay, katrabahoan, odino kaklase. Agyo lilingwanan ya imbitaan iray iyaaralan yo na Biblia.

⁶ Kayari yon inlista, mangiyuksoy na panaon pian personal yon imbitaan so kada sakey. Usaren so inimprinta iran imbitasyon parad Memoryal. Pian agnalibangan na totoo no kapigan tan iner so panselebraan, isulat a malinew so oras tan pasen na Memoryal diad leksab na imbitasyon. No asingger lay Abril 16, panonotan iramay walad listaan yo, balanglan pegdaten iran mismo odino panamegley na telepono. Tulongan tayon makaatendi so dakel no nayadyari diad sayan sankasagradoan ya okasyon.

⁷ Asistian Iraman so Onatendi ed Memoryal: Say labi na Memoryal so naynay a makapaliket ya okasyon. Walaan itayoy pankanawnawa pian abrasaen iramay aliwan gendat ya onaatendi ed saray miting tayo. Iplano yoy onsabin masakbay tan ontilak ni, no iyabuloy na sirkumstansya yo. Kabaten iray balon inmatendi. Magmaliw a makaaro tan maparawes.​—Roma 12:13.

⁸ Kasin natulongan tayo so pigaran inmatendi ed Memoryal pian onaligwas a nagkalalo ed espiritual diad pangiyaral ed sikara na Biblia diad abung? Panseetan a naala so kangaranan tan saray address na siopaman a bisita ya agni nadadalaw ed kaplesan ta pian sikaray mantultuloy a naasikaso yo. Tekep na maaron pananulong, arum ed saraya so nayarin onaligwas ya anggad sikara lay onkualipika bilang agbautismadon manangipalapag sakbay na Memoryal ed ontumbok a taon. Sano pawilen iray inmatendi ed Memoryal, imbitaan ira ed espisyal a paliwawa a nagawa no Abril 27.

⁹ Kasin Makapan-auxiliary Payunir Kayo ed Sayan Tiagew? Kada taon, say seseg tayo parad si Jehova so mamapakiwas ed sikatayo pian mamasyan maong diad ministeryo legan na saray bulan na espisyal a kimey. Diad Pilipinas nen katantaon, 9,515 so nan-auxiliary payunir ed Marso, 15,458 ed Abril, tan 12,652 ed Mayo. Legan na sayan taloran bulan, sikaray angusar na 1,528,501 ya oras diad ministeryo tan 13,836 so promedyo na panangiyaral ed Biblia ya inkondukta ra. Say nankakasakey a sagpot na interon kongregasyon a mangipulong ed maong a balita tekep na seseg legay panaon na Memoryal so nayarin mamawala na maabig iran resulta.

¹⁰ Inreport na sakey a kongregasyon a walaan na 107 a manangipalapag tan 9 a regular payunir a sikaray awalaan na “matalonggaring a bulan” nen imbeneg ya Abril, a 53 so nan-auxiliary payunir, kaiba so amin a mamatatken tan ministeryal iran lingkor. Panon so impangipaseseg na saray mamatatken ed panag-auxiliary payunir ed satan a bulan? Masakbay ni et inggapo da la a pinaseseg so dakel anggad posibli pian manpalista. Ginawa iray pantitipon parad lawak na serbisyo diad nanduruman oras ed sanagew pian makaadapta so amin diad kongregasyon. Nagkalautlan impaseseg so pampulong panamegley na telepono, nagkalalo la ed saramay maedad la.

¹¹ Sakey ya 86 años ya agin bii, ya agmakaakar lapud sakit to, so nampalista bilang auxiliary payunir. Diad kabuasan, gapoan to so manpulong panamegley na telepono ed pigaran oras legan ya akayurong diad kusina, manpainawan magano, insan ompawil pian ontawag lamet. Sakey a too ya atawagan to so inateyan na asawa tan duaran anak a manbalbalolaki a duay taon lay apalabas tan agto natalosan no akin ya aabuloyan na Dios a nagawa iratan a mauges a bengatla. Sikatoy apulongan, tan nigapo so panangiyaral na Biblia. Say pampulong diad labi panamegley na telepono et sakey ya epektibon paraan pian nakatongtong iray totoo a manaayam ed saray bilding odino lugar ya agnasasabi. Makatulong met itan ed saray manangipalapag pian nakatongtong da iray totoon andi ed ayaman da no agew.

¹² Sinampotan na saray mamatatken so report da diad impangikuan: “Awalaan kami na ontanlan abig ya oras tan pisalamatan mi iray pribilehyo tan panamendisyon nen Jehova ed balang sakey ed sikami.” Diad suston panangiplano, napanggayagaan met na kongregasyon yo iratan a bendisyon.

¹³ Manseet Pian Sigpot a Makapibiang Diad Ministeryo: Say panangaro tayo ed Dios tan ed kaparan too so mamakiwas ed sikatayon manganamot ed panaon kada bulan pian inabang ed arum so maong a balita. (Mat. 22:37-39) Saray manangasikaso na Panagaral na Kongregasyon ed Libro tan saray assistant da so kaukolan a manseet a mangasisti ed grupo ra a mibiang diad ministeryo kada bulan. Say maabig a paraan pian nagawaan iya et diad masakbay lan pitarato a mankimey diad ministeryo a kaiba so espesipiko iran indibidual diad grupo. Igapo lan masakbay, imbes ya iyalagar ni ed pansampot na bulan so panggawa ed satan. Saya so mamawala ed sikayo na malaem a pankanawnawa pian mangiter na maaron pananulong.

¹⁴ Kasin walaray maedad lan manangipalapag diad grupo yo a naiirapan a mibiang diad ministeryo? No arum ed sikara so wala ed saray nursing home odino wala labat ed abung da, natalosan a limitado so pankanawnawa ra a makapanpulong. Balet diad panganamot ed saray pankanawnawa, anggaman limitado, pian nisindag so liwawa ra, nayarin napakiwas da iramay makakaimano ed maabig a kimey da a nawalaan na peteg ya interes ed katuaan. (Mat. 5:16) Kaukolan a seguroen na saray manangasikaso na panagaral ed libro ya amta na saratan a nayarian day mangireport ed kimey da diad lawak a serbisyo na tunggal 15 minutos. Napaseseg irayan matoor a manangipalapag no sikaray makapangireport ed oras a nausar da ed panagpulong, tan mangitarok ed sikara na gayaga tan inkapnek. Ontulong met itan pian naseguro a susto so sankamundoan a report na saray kimey na totoo na Dios.

¹⁵ Saray Kalangweran ya Okupado ed Panggagawa na Maabig! Agaylan makapaliket a nanengneng iray Kristianon kalangweran a manguusar ed biskeg da ed panaglingkor ed si Jehova! (Uli. 20:29) No sakey kan kalangweran, panon mon nipatnag so seseg mo parad si Jehova legan na sarayan espisyal a bulan na kimey?

¹⁶ No aliwa ka nin bautismadon manangipalapag diad kongregasyon, nayarian mo kasin dampoten itan a pribilehyo? Itepet mo ed inkasika iray onggendan: ‘Kasin walaan ak na manunan pikakabat ed katuaan ed Biblia? Kasin labay ko so mibiang ed serbisyo ed Panarian? Kasin napanuliranan so konduktak? Kasin personal kon nibalikas so pananisiak diad pitongtong ed arum nipaakar ed maong a balita? Kasin say pusok so mamapakiwas ed siak pian gawaen so ontan?’ No positibo so ebat mo ed saratan a tepet, sirin itongtong mo ed atateng mo so pilalek mon magmaliw a manangipalapag. Nayarin asinggeran na atateng mo so sakey ed saray mamatatken diad service committee.

¹⁷ No sakey ka lan manangipalapag na maong a balita, kasin naanamot mo so bakasyon ed paneeskuela pian makapibiang kan nagkalalo diad ministeryo? Lapud walaan iray maabig ya eskedyul tan pananuporta na atateng da tan saray arum, dakel a bautismadon kalangweran so akapan-auxiliary payunir legan na bakasyon ed tiagew. No ag-itan posibli, sirin magmaliw kan determinado a mibiang a nagkalalo diad lawak na ministeryo. Mangiletneg ka na kalat mo. Nilikud ed kalat mon mangusar na pigaran oras diad lawak na ministeryo, mangiletneg ka na sananey nin kalat a misiglaotan ed kalidad na ministeryom. Nayarin manseet kan manginabang na sakey a teksto diad kada puerta, manggawa na epektibo iran panagpawil, mangigapo na panangiyaral ed Biblia, odino mamalaknab ed ministeryom a laktip so pampulong panamegley na telepono odino arum nin nengneng na serbisyo. Komusta met so kalat mon mangitagar na kaabay, kaklase, odino kanayon diad Memoryal ed sayan taon? Say sigpot a pakapibiang ed saray teokratikon aktibidad so makagunggona tan seguradon mamaseseg ed arum diad kongregasyon.​—1 Tes. 5:11.

¹⁸ Tulongan ya Onaligwas Iray Balo ni: Diad imbeneg a serbisyon taon, wala so promedyo na 97,456 ya inyaralan na Biblia ed abung kada bulan diad Pilipinas. Nasabi panaon, dakel ed sarayan iyaaralan so onaligwas ya anggad sikara lay mangidedika tan manpabautismo. Balet, antis dan nadampot itan a kalat, kaukolan tayon tulongan ira ya onkualipika bilang manangipalapag na maong a balita. Saya so importantin kundang ed pangibangat ed saray balo ni pian magmaliw a papatumbok nen Jesu-Kristo. (Mat. 9:9; Luc. 6:40) Walaan kayo ta na iyaaralan na Biblia ya akaparaan lan manggawa ed satan a kundang?

¹⁹ No agkayo segurado ed aligwas na iyaaralan yo, patulongan kayo ed manangasikaso na panagaral ed libro odino say manangasikaso na serbisyo. Nayarin paibaan kayo ed sikato a mangiyaral. Sarayan agagi so walaan na makanan eksperiensya a naalig tayo pian nausisa tayo so iyaaligwas ed espiritual na iyaaralan tayo. Nayarin walaray suhestion da ya ontulong ed iyaaralan tayo pian mantultuloy ya onaligwas ed espiritual.

²⁰ Sano ipapatnag na iyaaralan yo so interes a magmaliw ya agbautismadon manangipalapag tan moriaen yon sikatoy kualipikado, mitongtong ed manangasikason manangimaton. Sikatoy mangiasain na duaran mamatatken a mitongtong ed sikayo a kaiba so iyaaralan yo pian konsideraen no kasin sikatoy kualipikado, ya usaren so impormasyon diad pahina 98-9 na libron Our Ministry. (Nengnengen so The Watchtower, Nobyembre 15, 1988, pahina 17.) No naabobonan so iyaaralan yo a magmaliw a manangipalapag, kaukolan a sikatoy ipasal yon tampol. Bektaman a sikatoy nanreport la ed lawak na serbisyo, napakabatan so kongregasyon a say iyaaralan yo so agbautismado lan manangipalapag. Ilaloan mi a nilibo ed saray balon manangipalapag, malangwer man odino matakken, so makadampot ed sayan importantin gapoan na iyaligwas da ed espiritual legan na sayan espisyal iran bulan na kimey.

²¹ Makatulong so Panagplano Pian Nagawaan so Sankaabigan: Makatulong so masakbay a panagplano ed iyaligwas na saray teokratikon aktibidad tayo diad sayan panaon na Memoryal. (Uli. 21:5) Dakel iran pamaakaran so nakaukolan ya imanoen na saray mamatatken.

²² Pian natulongay kongregasyon a nagawaan so sankaabigan diad lawak na ministeryo, saray mamatatken so kaukolan a mangiyuksoy na saray pantitipon a praktikal parad lawak na kimeyan diad interon simba tan diad sampot-simba. Say manangasikaso na serbisyo so mangidaulo ed panggawa na sarayan uksoyan. Kasin niyarunsa so kaaruman niran pantitipon diad kabkabuasan, diad ngarngarem la, odino mansirunget? Kaukolan a napakabatan so kongregasyon ed saray uksoyan. Makatulong met no ipeket so eskedyul ed information board.

²³ Kaukolan a seguroen na mamatatken a niyarunsa lan maong iray uksoyan parad Memoryal sakbay na Abril 16. Laktip ed saraya so pitalosan ed arum a kongregasyon a nayarin mangusar ed parehon Kingdom Hall, panlinis ed Kingdom Hall, pamili na saray attendant tan managserbi, tan pangiparaan ed saray emblema. Kaukolan a napakabatan so kongregasyon nipaakar ed oras tan pasen na Memoryal tan ed antokaman a pananguman ed eskedyul na miting ed satan a simba. No maseet ya asikasoen irayan bengatla, say selebrasyon so ‘nagawa ed kasimpitan tan mauksoy.’​—1 Cor. 14:40.

²⁴ Nayarin anamoten na saray ulo na pamilya so panagaral da bilang pamilya pian singbaten no panon a makapibiang so pamilya diad apadaak a kimey legay panaon na Memoryal. Kasin makapan-auxiliary payunir so interon pamilya? Odino kasin nasuportaan na pamilya so sakey a membro odino onsulok ni a man-auxiliary payunir? No ag-itan posibli, mangiletneg na espesipiko iran kalat bilang pamilya pian makapangusar na dakel a panaon diad ministeryo. Kasin walay malangwer nin membro na pamilya, a diad samet labat a panamaseseg tan pananulong et onkualipika la bilang agbautismadon manangipalapag? Pigara so naimbitaan na pamilya yo diad Memoryal ed sayan taon? Say maabig a panagplano so mangitarok na dakel a bendisyon tan gayaga ed pamilya yo.

²⁵ Sigpot ya Anamoten so Nakekeraan a Panaon: Sanen sinulat nen apostol Pedro iray inmunan-siglon Kristiano, pinanonotan to ira nipaakar ed inkaganatan na panaon lapud asingsingger la so anggaan na Judion sistema na bengabengatla. (1 Ped. 4:7) Amin ya ebidensya natan so pakapatnagan ya asingger la so anggaan na peles a sankagloboan a sistema na bengabengatla. Kaukolan a say paraan na kabibilay tayo so mangipatnag ed satan a kombiksion diad kada agew. Bilang maseseg iran lingkor nen Jehova, nepeg ya akateen so kanonotan tayo ed maganat a kimey a panangiyabawag ed maong a balita.​—Tito 2:13, 14.

²⁶ Natan la so panaon pian sikatayoy onseseg tan onkiwas! Dalepdepen iray gagawaen nen Jehova ed biang yo, ed pamilya yo, tan diad kongregasyon. Anggaman agtayon balot nabayaran si Jehova ed dakel a paraan a pamebendisyon to ed sikatayo, nayarian tayon iter so interon kamarerwan panagdayew ed sikato. (Sal. 116:12-14) Saray impasyan sagpot tayo so natumangan na dakel a bendisyon a manlapud tagey. (Uli. 10:22) Amin tayo komon so magmaliw a “maseseg ed no anto so maabig” legan na sayan espisyal a panaon na apadaak a kimey, “pian diad amin a bengatla et nigloria so Dios panamegley nen Jesu-Kristo.”​—1 Ped. 3:13; 4:11, NW.

[Kahon ed pahina 3]

Saray Inmatendi ed Memoryal Diad Sankamundoan

1999 14,088,751

2000 14,872,086

2001 15,374,986

2002 15,597,746

[Kahon ed pahina 4]

Sioparay Imbitaan Mo Diad Memoryal?

□ Saray kapamilya tan kakanayon

□ Saray kakaabay tan kabkabat

□ Saray katrabahoan tan kaklase

□ Saray papawilen tan iyaaralan na Biblia

[Kahon ed pahina 5]

Asistian Iraman so Onatendi ed Memoryal

□ Sikaray makaaron abrasaen

□ Pawilen iran tampol kayari Memoryal

□ Iyopresi ya iyaralan ira na Biblia

□ Imbitaan ira diad espisyal a paliwawa

[Kahon ed pahina 6]

Antoray Kalat Mo ed Panaon na Memoryal?

□ Nawalaan na sakey a naimbitaan ya onatendi ed Memoryal

□ Onkualipika bilang manangipalapag na maong a balita

□ Mangusar na dakel ya oras diad ministeryo

□ Onaligwas ed sakey ya aspekto na ministeryo

□ Manlingkor bilang auxiliary payunir