Itultuloy ya Itongtong so Nipaakar ed Makapakelaw Iran Kimey nen Jehova

1. Anto so pigara ed saray makapakelaw a kimey nen Jehova a nagkalautlan papablien mo?

¹ Anggapo so makapipara ed matalonggaring a Dios tayo, si Jehova! Insulat nen David: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ira ed sikami: ag-ira nisalaysay a mauksoy ed sika.” (Sal. 40:5) Saray kabiangan ed makapakelaw a kimey nen Jehova et say impamalsa to ed uniberso, say Mesianikon Panarian, saray gawa na maaron-kaabigan parad totoo to, tan say sankamundoan a kimey a panagpulong. (Sal. 17:7, 8; 139:14; Dan. 2:44; Mat. 24:14) Napakiwas itayon itongtong ed arum so nipaakar ed si Jehova no sikato so aaroen tayo tan aapresyaen tayo so amin a gagawaen to. (Sal. 145:5-7) Legan na Marso, Abril, tan Mayo, nawalaan itayo na pankanawnawan manggawa ed saya a nagkalalo.

2. Panon itayon personal a nagunggonaan diad pan-auxiliary payunir?

² Bilang Sakey ya Auxiliary Payunir: Kasin niyarunsam so eskedyul mo a mangusar na 50 oras diad ministeryo legan na sakey odino onsulok ni ed sarayan bulan na espisyal a kimey? Seguradon makagunggona so antokaman iran pananguman a gawaen mo ed rotinam. (Efe. 5:16) Napapaneknekan na dakel a lapud panag-auxiliary payunir et napapaaligwas da so kalidad na ministeryo ra. Sikara so mas mainomay ya onasingger ed puerta tan mas dakel so pankanawnawa ran mangusar ed Biblia. Say pangusar na dakel a panaon diad ministeryo so mamainomay ed sikaran nabayuboan so antokaman ya interes ya aromog da, tan arum a datin andian na iyaaralan na Biblia so akapangigapo na sakey legan iran manu-auxiliary payunir. Lapud lalanoren na pan-auxiliary payunir so pangisekar tayo ed inkasikatayo nisesengeg ed arum, saya so makapaliket a kimey.​—Gawa 20:35.

3. Panon ya akapan-auxiliary payunir so arum anggaman ed mairap iran sirkumstansya?

³ Ag-iisipen a tampol a saray sirkumstansyam so agmangiyabuloy ed sikan makapibiang. Sakey a matatken a nan-auxiliary payunir nen katantaon so walaan na duaran anak tan sigpot-panaon a trabaho. Panon itan ya agawaan na sayan okupadon agi? Lapud sikatoy mantratrabaho ed loob na limay agew, implano to so sanagew a panlingkor diad saray sampot-simba, ya onggagapon manpulong ed karsada diad 7:00 na kabuasan kapag no Sabado. Nampayunir met so pigara ed kongregasyon a mipara so sirkumstansya ra, tan sikaray nantutulongan tan nampapasesegan. Diad sananey a kongregasyon, denesidi na sakey a 99-años ya agin bii so manpayunir ed Mayo kayarin pinaseseg na anak ton bii a miulop ed sikato. Arum ya agagi ed kongregasyon so tinmulong ed sayan akulaw lan agi diad panagkabkaabungan tan panangiyaral na Biblia diad pangitutulak da ed wheelchair to. Sikato met so mibibiang ed panagpulong panamegley na telepono, panagpulong diad karsada, tan panagsulat. Sikatoy kombinsido ya agawaan to itan, aliwan diad dilin biskeg to, noagta diad panamegley lambengat na tulong nen Jehova.​—Isa. 40:29-31.

4. Antoran bengatla so nayarin ikonsidera sano manggawa na eskedyul ed pan-auxiliary payunir?

⁴ Salien so manggawa na eskedyul a matukotukoy ed saray sirkumstansyam. Nayarin makatulong iray pangaligan ya eskedyul a nitekep ed sayan paway. Kasin sigpot-panaon so trabahom odino maneeskuela ka? Say eskedyul a manunan nausar iray sampot-simba so nayarin praktikal a tuloy ed sika. No walaray problemam ed bunigas tan agmo nayarian so mankimey a sanagewan diad ministeryo, nayarin sankaabigan so eskedyul a mankaukolan na daiset a panaon ed kada agew. Itongtong ed arum so pilalek mon man-auxiliary payunir. Nayarin gawaen da met a kalat itan.

5. Antoran kalat so nayarin gawaen na saray kalangweran parad Marso, Abril, tan Mayo?

⁵ Saray Paraan a Makapibiang Iray Kalangweran: Naliliketan si Jehova sano itongtong na saray kalangweran so nipaakar ed makapakelaw iran kimey to. (Sal. 71:17; Mat. 21:16) No sakey kan bautismado a kalangweran, nayarin makapan-auxiliary payunir ka legan na sakey odino onsulok ni a bulan a bakasyon ed eskuelaan. No agka makapan-auxiliary payunir, kasin makapangiletneg ka na saray espesipikon kalat pian makapibiang ka a nagkalalo tan napaaligwas so kalidad na ministeryom legan na sarayan bulan? No mimila ka la ed saray ateng mo diad ministeryo balet ta aliwa ka nin agbautismadon manangipalapag, natan la so maabig a panaon pian sikay onkualipika. Agmo kaukolan ya isipen a nepeg a marunong kan onebat ed saray tepet ed Biblia odino kaukolan a dakel so amtam a singa saray wala la’d edad a bautismado. Kasin natatalosan mo iray manunan bangat na Biblia? Kasin tutumboken mo iray estandarte na Biblia nipaakar ed moral? Kasin labay mo so nabidbiran bilang sakey a Tasi nen Jehova? Sirin itongtong itan ed saray ateng mo. Sikara so makapangiba ed sika ya onasingger ed saray mamatatken pian naamtaan da no kasin nakakapet mo iray kakaukolanen.​—Nengnengen so libron Our Ministry, pahina 98-9.

6. Panon tayon natulongan iray iyaaralan na Biblia a magmaliw a manangipalapag na maong a balita?

⁶ Tulongan so Arum a Makapanpulong: Saray maaligwas ya iyaaralan na Biblia so nayarin onkualipika a mibiang ed sikatayo bilang manangipalapag diad arapen iran bulan na espisyal a kimey. No walaan ka na iyaaralan na Biblia a maabig so iyaaligwas to, patulongan ed manangasikaso yo na panagaral ed libro odino ed manangasikaso na serbisyo. Sakey ed sikara so makapangiba ed sika a mangiyaral pian nanengneng so iyaaligwas na iyaaralan mo. No onkualipika so iyaaralan mo tan pilalek toy magmaliw a manangipalapag, nayarin say mangidadaulon manangasikaso so mangiyarunsa na duaran matatken a mitongtong ed sika tan say iyaaralan mo. (Nengnengen so Say Panag-Bantayan, Disyembre 1, 1988, pahina 15.) Bektaman a naabobonan so iyaaralan mo, sikato so ipasal mon tampol diad ministeryo.

7. Panon a natulongan iray iregular tan inaktibo a manangipalapag?

⁷ Saray manangasikaso na panagaral ed libro so kaukolan a mangimano ed siopaman ya inaktibo odino iregular ed grupo ra. Sikayoy personal a mangitagar ed sikara a mikimey ed sikayo diad ministeryo. No sikaray abayag lan inaktibo, maabig no mitongtong nin unona so duaran matatken ed sikara pian naamtaan no kasin onkualipika ira. (Nengnengen so “Tepet” diad Nobyembre 2000 a Ministeryo Tayo ed Panarian.) Say inkaseseg na kongregasyon legan na sarayan bulan na espisyal a kimey so nayarin managyat ed sikara pian gawaen lamet a regular a kabiangan na bilay da so ministeryo.

8, 9. Anto so nagawaan na saray mamatatken pian napabiskeg so entusiasmo parad espisyal a kimey?

⁸ Manparaan la Natan Parad Apadaak a Kimey: Saray mamatatken so onggapo la natan a mamabiskeg ed entusiasmo na kongregasyon parad panag-auxiliary payunir. Baleg so nagawaan yo panamegley na makapaseseg iran komento tan maabig ya alimbawa yo. (1 Ped. 5:3) Pigara so pantok ya auxiliary payunir na kongregasyon nen katantaon? Kasin napalumbasan itan natan? Saray manangasikaso na panagaral ed libro tan saray katulongan da so kaukolan a mananap na saray paraan pian pasesegen so amin ed grupo a mamadaak ed kimey da. Saray manangasikaso na serbisyo so nayarin mangiyeskedyul na kaaruman iran pantitipon parad lawak na serbisyo. Pakabatan lan masakbay so kongregasyon nipaakar ed uksoyan. Seguroen a saray makayarin manangipalapag so niasain a mangidaulo tan saray pantitipon parad kapapaway so onggapo tan manampot ed suston oras. (Nengnengen so “Tepet” diad Setyembre 2001 a Ministeryo Tayo ed Panarian.) Nepeg met a seguroen na manangasikaso na serbisyo a wala so magenap a teritorya, magasin, tan literatura.

⁹ Nen imbeneg a taon et saray mamatatken ed sakey a kongregasyon so entusiastiko tan masakbay lan angipaseseg ed panag-auxiliary payunir, a pigara ed sikara so angisubmite na saray aplikasyon da. Sikaray angiyarunsa na kaaruman a pantitipon parad lawak na serbisyo​—a say sakey et diad 5:30 na kabuasan parad pampulong diad karsada, tan say sananey et diad 3:00 na ngarem parad saramay manlapud eskuelaan, tan say komatlo et diad 6:00 na labi parad saramay manlapud trabaho. Nilikud ed satan et taloran pantitipon ed lawak na serbisyo so inyarunsa diad Sabado. Kinmiwas so kongregasyon a wala so 66 a nampalista bilang auxiliary payunir nen Abril!

10. Panon a makapanparaan so pamilya pian napadaak so kimey da?

¹⁰ Akin ya ag-ipanaon so pangiletneg na saray realistikon kalat parad arapen iran bulan diad ontumbok a panaral yo bilang pamilya? Tekep na maabig a pitutulongan tan panagplano, arum odino amin ed pamilya so makapan-auxiliary payunir. No ag-itan posible, mangiletneg na saray kalat a mamadaak ed kimey yo diad pangarum ed kaslakan lan oras na panlilingkor yo odino ompaway diad arum niran pankanawnawa. Ipikasi iyan pamaakaran bilang pamilya. Makapanmatalek kayo a bendisyonan nen Jehova iray sagpot yo.​—1 Juan 3:22.

11. (a) Antoran makapakelaw a bengatla so sinumpal na bagat nen Kristo? (b) Kapigan tan iner so panselebraan na Memoryal?

¹¹ Say Makapakelkelaw a Gawa nen Jehova: Say sankatalonggaringan ya impangipatnag nen Jehova ed panangaro to et diad impangiregalo to ed Anak to bilang dondon nisesengeg ed sikatayo. (1 Juan 4:9, 10) Say dondon bagat so angitarya na legal a basiyan pian narondon so katooan manlapud kasalanan tan ipapatey. (Roma 3:23, 24) Inmepekto so balon sipanan lapud nipaagus a dala nen Jesus, a nanggawan posible parad ag-ayadyarin totoo a magmaliw a tagibin ilalak na Dios tekep na ilalon manuley diad mangatatawen a Panarian. (Jer. 31:31-34; Mar. 14:24) Sankaimportantian, say naspot a katutulok nen Jesus so amasanto ed ngaran nen Jehova. (Deut. 32:4; Uli. 27:11) Diad Simba, Abril 4, kaselek na agew, say Memoryal na impatey nen Kristo so selebraan diad interon mundo.

12. Panon a say iyatendi ed panselebra na Pangdem na Katawan so mangunggona ed saray interesado?

¹² Say panselebra ed Pangdem na Katawan so mangitandoro ed saray makapakelaw a kimey nen Jehova. Say paliwawa so mamabiskeg na apresasyon ed ginawa nen Jehova diad impangitarya to na dondon. Saray interesado ya onatendi so makaimaton ed arum nin makapakelaw iran kimey na Dios. Sikaray makaimano ed pankakasakey tan maabig ya aroan ya imbangat nen Jehova ya ipatnag na saray totoo to. (Efe. 4:16, 22-24; Sant. 3:17, 18) Say iyatendi ed sayan importantin okasyon so peteg a walaan na epekto ed panag-isip na sakey a too, kanian labay tayo a dakdakel so makaatendi anggad posible.​—2 Cor. 5:14, 15.

13, 14. Siopara so nepeg ya imbitaan diad Memoryal, tan panon?

¹³ Imbitaan so Arum ya Onatendi: Manparaan lan tampol diad pangilista ed saraman so imbitaan. Nepeg a kabiangan ed listaan yo iray membro na pamilya, kakaabay, saray kabkabat yo ed trabaho odino eskuelaan, saray dati odino peles ya iyaaralan na Biblia, tan amin a papawilen yo. Nepeg a kabiangan ed listaan na saray manangasikaso na panagaral ed libro iray siopaman ya inaktibo lan manangipalapag.

¹⁴ Usaren iray inimprintan imbitasyon ed Memoryal, tan imakinilya odino isulat a malinew ed saratan so oras tan pasen na Memoryal. Odino nayarian yon usaren so imbitasyon a wala ed beneg ya apis na Marso 15, 2004, a Panag-Bantayan odino ed Marso 22 ya Awake! Legan a manasingger so Abril 4, panonotan iramay walad listaan yo, balanglan pegdaten iran mismo odino tawagan ira ed telepono.

15. Panon tayon nipatnag so inkamaparawes diad labi na Memoryal?

¹⁵ Diad Memoryal: Panggunaetan so onsabin masakbay diad labi na Memoryal. Ipatnag so inkamaparawes diad makaaron pangibano ed saray bisita. (Roma 12:13) Walaan kayo na espisyal a responsabilidad ed saray inimbitaan yo. Sikaray maaron abrasaen, tan ipakabat ira ed arum diad kongregasyon. Nayarian yo iran payurongen ed abay yo. Tan no walay siopaman ya andian na Biblia odino libron panagkantaan, itaryaan ira na saratan. Kayari na selebrasyon, magmaliw ya akaparaan a mangebat ed antokaman a nayarin itepet da. No walaray balobalon inmatendi, tepeten no kasin labay da so makaaral ni a nagkalalo nipaakar ed Salita na Dios tan ed gagala to. Iyopresi so pangiyaral na Biblia ed sikara.

16. Anto so nayarin gawaen pian natulongan iramay inmatendi ed Memoryal ya onaligwas ed espiritual?

¹⁶ Itutuloy a Tulongan Iramay Inmatendi: Diad saray simba kayari na Memoryal, saramay inmatendi so nayarin mankaukolan na kaaruman a tulong. Kabiangan ed saya iramay datin regular ya onaatendi ed saray miting balet ta mataltalag la a milimog ed kongregasyon. Nepeg a seguroen na saray mamatatken a saratan so agnapaulyan, a panggunaetan dan determinaen no akin ya ag-ira la onaaligwas ed espiritual. Ipurek ed sikara so inkaganatan la na panaon. (1 Ped. 4:7) Amin so tulongan a makamoria ed gunggona na itulok ed Makasulatan a simbawa a mantitipon a regular kaiba so totoo na Dios.​—Heb. 10:24, 25.

17. Akin a nepeg tayon itultuloy ya itongtong so nipaakar ed makapakelaw iran kimey nen Jehova?

¹⁷ Makapakelaw a tuloy iray kimey nen Jehova a saratan so agtayo sigpot a narandan anggano manbilay itayo ed ando lan ando. (Job 42:2, 3; Ecl. 3:11) Sirin, ag-itayon balot naupotan na rason a mangidayew ed sikato. Diad sayan panaon na Memoryal et nipatnag tayo so apresasyon tayo ed makapakelaw iran kimey nen Jehova diad panggawa na nikaduman sagpot a napalaknab so ministeryo tayo.

[Tsart sa pahina 4]

Kasin Makapan-auxiliary Payunir Ka Diad Pangusar ed Sakey ed Sarayan Eskedyul?

Marso  Si L* Ma* Mi* Hu Bi Sa Dagup ed Bulan

Kada Agew 2 1 1 1 1 1 5 51

Duaran Agew 0 5 0 5 0 0 0 50

Abril  Si L Ma Mi Hu* Bi* Sa Dagup ed Bulan

Kada Agew 2 1 1 1 1 1 5 50

Duaran Agew 0 0 0 0 5 5 0 50

May Si* L* Ma Mi Hu Bi Sa* Dagup ed Bulan

Kada Agew 2 1 1 1 1 1 4 51

Duaran Agew 0 5 0 0 0 0 5 50

* Limara diad sakey bulan