Panangapresya ed Saray Probisyon nen Jehova
1 Si Jehova so mangitatarya na probisyon pian peneken iray espiritual a pankaukolan tayo panamegley na matoor ya “aripen.” (Mat. 24:45-47) Laktipen na sarayan dakel a probisyon iray libro, Biblia, saray tomo, video, audiocasette, tan saray kompyuter disc parad pansukimat ed Biblia. Peteg a nibaga tayon daakan a natataryaan itayo na nakaukolan tayo diad espiritual a paraan!
2 Amin irayan probisyon so napapawala panamegley na abalbaleg a gastos. Sarayan gastos so susuportaan na sankamundoan ya impanaagi. Nagkalautlan tua iya kayarin inletneg so uksoyan na donasyon nen taon 2000, manlapula’d satan say pansalipotpot ed sarayan gastos so sigpot lan mandedependi ed boluntaryo iran kontribusyon. Satan a maaron uksoyan so akatulong ed amin ya agagi a nawalaan na nakaukolan da ed saray miting tan ed lawak na kimeyan anggaman arum so nayarin walaan na limitado lambengat ed pinansyal.
3 Panon Itayon Makatulong: Nayarian tayoy onkiwas ed simbawa nen Pablo a manginabang ed arum unong “ed saray nakaukolan” da. (Roma 12:13) Sano mandonasyon itayo parad sankamundoan a kimey, direktan inanabang tayo so wala’d sikatayo ed saray agagi ed interon mundo. Sankanonot iya, denesidi na dakel a “mangigana na bengatla” pian idonasyon a sinimba odino binulan, a singa gagawaen da ed saray gastos ed Kingdom Hall. (1 Cor. 16:2, NW) Diad panggawa ed saya, ipapanengneng da a bibidbiren da a sarayan pundo et aglabat uusaren parad pamawala na literatura noagta parad amin ya aspekto na sankamundoan a kimey. Kanian saray donasyon tayo so agnepeg a moriaen a basta bayar ed saray literatura, noagta donasyon tayo parad intiramintin sankamundoan a kimey.
4 Magmaliw a “Mabunlok ed KontribusyonYo”: Ipapanengneng na sarayan salita diad 2 Corinto 9:13, ed New World Translation, so nepeg ya awawey tayo. Saramay walaan na daakan so mabulos a mangiter na daakan nen saray arum ta pian saramay walaan na daiset so natulongan, diad ontan et mangitarok na “pampapara.” (2 Cor. 8:14, 15) Isisipan nen Jehova ya ikalbo to so “bendisyon anggad anggapo la so pankulangan” ed amin, balanglan mairap odino mayaman, sano mandonasyon ira ed nasarag da, diad sankamundoan a kimey. (Mal. 3:10, NW) Komon ta balang sakey ed sikatayo so napaneknekan a makana ed satan a bendisyon panamegley na pangipanengneng na panangapresya tayo bilang indibidual ed amin a mabunlok a probisyon nen Jehova!