Repaso ed Teokratikon Eskuelaan Parad Panagministro

Kaput-libron repaso ed materyal a kinobrian ed saray asainmin ed Teokratikon Eskuelaan parad Panagministro a para ed saray simba na Enero 7 ya anggad Abril 22, 2002. Usaren so akabiig a peligo na papel a pangisulatan ed saray ebat ed anggan panon a karakel na tepet a nayarian yo diad nigeter a panaon.

[Imanoen: Legan na insulat a repaso, say Biblia lambengat so nayarin usaren diad pangebat ed anggan anton tepet. Saray reperensya ya ontumbok ed saray tepet so para ed personal a pansukimat yo. Saray pahina tan numero na parapo so nayarin ag-ompatnag ed amin a reperensya ed Say Panag-Bantayan.]

Ebatan so kada onggendan iran balikas na Tua o Tila:

1. Diad Eclesiastes 2:2, ipapabitar nen Solomon a say panag-elek tan panliket so kaukolan a paliisan. [Sinimban babasaen ed Biblia; nengnengen so w87 9/15 p. 24 par. 5.] Tila. Ipapabitar lambengat nen Solomon a say pananap na tuan liket panamegley na panliliket so ‘inkaatiwel’ lapud anggapoy kakanaan na satan; mipadpara, say ontan a ‘panagliket’ so agmakaresolbi ed saray problema’d bilay.

2. Imbes a libro na inka-negatibo, say Eclesiastes so napno na saray mablin katuaan nipaakar ed kakabatan na Dios tan ipapanengneng na satan a say mapeligro iran kimey et saramay mangibabaliwala ed Dios. [si p. 114 par. 15] Tua.

3. Diad Isaias 1:7, tutukoyen na propeta so pankibalatar na Juda legan na uley nen Acaz. [Sinimban babasaen ed Biblia; nengnengen so ip-1 p. 17 par. 16.] Tila. Diad impangibalikas to ed saya, nayarin inusar nen Isaias so sakey a paraan ya inusar met ed arum a parte na Biblia​—salanti say panangideskribe ed sakey ya ebento ed arapen a singano agawa la itan, a mangidadanet sirin ed inkasegurado na kasumpalan na propesiya.

4. Singa abitla ed Apocalipsis 7:9, say ‘iyalagey ed arap na trono, tan ed arap na Kordero’ so mangipapabitar ed mangatatawen a pasen. [rs p. 167 par. 5] Tila. Say balikas ya “arap na trono” so literal a mankabaliksay “nabantag manlapud trono”; ipapanengneng na satan a say “baleg ya ulop” so wala’d naabobonan a kipapasen; satan so agmanutukoy ed mangatatawen a pasen.

5. Say mabunlok a pangusar ed saray kayarian tayo diad ‘pangigalang ed si Jehova’​—say panaon, abilidad, biskeg, tan materyal a kaykayarian tayo​—so mangitatarok na mayaman ya espiritual a bendisyon manlapud si Jehova. (Uli. 3:9, 10) [w00 1/15 p. 25 par. 1] Tua.

6. Say modernon-agew a ‘kimey a makapakelaw tan gawa a makapakelaw’ ya impasakbay ed Isaias 28:21 so manutukoy ed kadederal na saray nasyon diad Armagedon. [Sinimban babasaen ed Biblia; nengnengen so ip-1 p. 295 par. 16; p. 301 par. 28.] Tila. Tutukoyen na satan so kadederal na Kakristianoan, a mankuan a manlilingkor ed Dios.

7. Singa ipapanengneng na Mateo 24:38, 39, say impanaakan tan impaniinum, katekep so arum nin aktibidad na too, so sengegan na inkiyanor na totoo diad Delap ed agew nen Noe. [w00 2/15 p. 6 par. 6] Tila. Aliwan mauges iray asalambit ya aktibidad diad teksto; saray totoo so basta angisentro ed bilay da ed sarayan “normal” a bengatla tan ‘ag-angimimano’ ed pasakbay nen Noe.

8. Lawas ipapagamor nen Jehova iray kerew na mapaabeba iran lingkor to ya agsinisiblet a manlilingkor ed sikato. [w00 3/1 p. 4 par. 3] Tila. Anggaman ondedengel si Jehova a Dios ed saray pikakasi na saramay mapaabeban manlilingkor ed sikato, agto lawas ipapagamor iray kerew da; lapud malaknab so panmoria to ed saray pamaakaran, sikato so lawas onkikiwas parad pankaabigan tayo, a mitunosan ed nibalikas to lan gagala to.

9. “Saray nasyon” ya atukoy ed Isaias 60:3 so sinansakey iran mapolitikan nasyon a nasasagyat ed inter-Dios a liwawa. [Sinimban babasaen ed Biblia; nengnengen so w00 1/1 p. 12 par. 4.] Tila. Tutukoyen na saratan so “baleg ya ulop” na totoo ed amin a nasyon a walaan na mangaraldalin ya ilalo tan papaibangat ed si Jehova. (Apoc. 7:9)

10. “Pinasanto” nen Jehova si Jeremias sakbay a niyanak, ya inggetar To la so arapen nen Jeremias. (Jer. 1:5) [Sinimban babasaen ed Biblia; nengnengen so w88 4/1 p. 10 par. 2.] Tila. “Pinasanto” nen Jehova si Jeremias diad paraan a denesidi Ton napili si Jeremias parad nikaduman kimey bilang sakey a propeta.

Ebatan so onggendan iran tepet:

11. Diad Eclesiastes 11:1, anto so kabaliksan na ‘pangibantak na tinapay’? [Sinimban babasaen ed Biblia; nengnengen so w87 9/15 p. 25 par. 11.] Say tinapay so manunan tagano a pambilay; say pangibantak ed satan diad “saray danum” so panginabang na bengatlan mabmabli; ingen, ‘wala so makaromog ed satan,’ lapud diad ag-inilaloan a paraan, samay mabunlok so natumangan. (Luc. 6:38) (Magenap la so segek)

12. Diad Isaias 6:8, siopa so ilalaktip nen Jehova sanen inkuanton “sikatayo”? [Sinimban babasaen ed Biblia; nengnengen so ip-1 p. 93-4 par. 13.] Say “sikatayo” so manutukoy ed si Jehova tan say bogbogtong ya Anak to, a nagmaliw ed saginonor a too a Jesu-Kristo; ipapabitar na saya a say bogbogtong ya Anak so nilitrato ed pasingawey a walad dikingan nen Jehova diad mangatatawen iran ayaman. (Juan 1:14; 12:41)

13. Bilang kasumpalan na Isaias 9:2, panon a sinminag so “baleg a silew [“liwawa,” NW]” diad Galilea? [Sinimban babasaen ed Biblia; nengnengen so ip-1 p. 126 par. 17.] Say kimey nen Jesus legan a wadiad dalin tan saray bendisyon lapud impansakripisyo to so matukotukoy ya adeskribe bilang ‘baleg a liwawa’; sanen pinmatnag so Mesias, alukasay kamataan na saray mauyamon totoo ed makapakelkelaw a paraan. (Juan 1:9, 12) (Magenap la so segek)

14. Anton modernon-agew a kasimbangan so niyaplika nipaakar ed inkagba na Babilonia nen 539 K.K.P. tan say sigpot a pankibalatar to ed kaunoran? (Isa. 13:19, 20; 14:22, 23) [Sinimban babasaen ed Biblia; nengnengen so ip-1 p. 188 par. 30-1.] Nen 1919, asagmak na Babilonia a Baleg so inkagba, ta andian la na panangontrol ed saray totoo na Dios; agla manbayag et say sankamundoan ya empiryo na palson relihyon so sigpot lan naderal.

15. Panon a say “matoor tan makabat ya aripen” so kinmiwas bilang “bantay” a singa adeskribe ed Isaias 21:6? (Mat. 24:45) [Sinimban babasaen ed Biblia; nengnengen so ip-1 p. 221-2 par. 11.] “Say matoor tan makabat ya aripen” so nansiansian manbabantay, ya ibabaga to no anto so naiimano to nipaakar ed kinaasingger la na agew na panangukom na Dios.

16. Anton makabat a simbawa parad balolaki a manaanap na asawaen to so naromog ed Uliran 31:10? [w00 2/1 p. 31 par. 1] Lapud mankaukolan na sagpot so pananap na “makayarin asawan bii,” a singa pananap ed mabli iran korales, kaukolan na balolaki so malaem a panaon tan magmaliw a mapili ta pian pabpablien toy mablin naromog to.

17. Diad Isaias 43:9, anton angat so inyarap ed saray dirios na nasyones? [Sinimban babasaen ed Biblia; nengnengen so w88 2/1 p. 16 par. 3.] Aangaten nen Jehova iray dirios na nasyones a paneknekan dan sikaray dirios diad suston panagpropesiya tan diad pamawala ra na tastasi pian napamintuan so inkanapanmatalkan da tan kanepegan dan nadayew.

18. Diad anton dalan a saray sali na saray mangitatarok na saray magayaga a balita na Panarian na Dios et “alay karakpan”? (Isa. 52:7) [Sinimban babasaen ed Biblia; nengnengen so w97 4/15 p. 27 par. 6.] Lapud saray sali so mamapakiwas ed sakey ya onlan manpulong ed arum, saratan a sali so peteg a mangirerepresenta ed sakey a too a say mensahe ton maong a balita so manggawa’d sikaton masanting a nenengnengen parad saray dumerengel to.

19. Anto so kapilitan a gawaen tayo ta pian naamper so kapusoan tayo a mamalikdo ed sikatayo? (Jer. 17:9) [w00 3/1 p. 30 par. 4] Nepeg a magmaliw itayo a matua ed inkasikatayo, ya agmanbabaraan no nalingo itayo; ontan met, kaukolan a mabulos tayon awaten so panaggugol tan pananubok nen Jehova, anggaman mankabaliksan itan na pamidbir ed singa dutak iran walna a kaukolan a talonaan. (Sal. 26:2)

20. Antoy nepeg a gawaen na saramay ‘manakar ed dalan nen Jehova’? (Jer. 7:23) [Sinimban babasaen ed Biblia; nengnengen so w99 8/15 p. 29 par. 6.] Nepeg a determinado iran mangisaklang na nikabiig a debosyon ed si Jehova, tekep na nagnap a pananisia ed saray sipan to tan ag-onkasipan katutulok ed saray ganggan tan atagey iran estandarte to. (Sal. 11:7)

Iter so salita o balikas a nakaukolan pian nakompleto so kada onggendan iran balikas:

21. “Say puso na makabat a too so wala ed kawanan a lima to” diad pantalos a say “kawanan a lima” so mabetbet a mangipabitar na ․․․․․․․․; diad ontan, ipapanengneng na saya a say ․․․․․․․․ to so mamapakiwas ed sikaton gegemtanen so maong, naabobonan a kurang. (Ecl. 10:2; Mat. 25:33) [Sinimban babasaen ed Biblia; nengnengen so w87 9/15 p. 25 par. 8.]

22. Arum ed saray makagunggonan leksion a nibabangat ed Kanta nen Solomon et ․․․․․․․․, ․․․․․․․․, tan ․․․․․․․․ ed saray maridios a prinsipyo. [si p. 117 par. 16]

23. Say managsamsam ed syudades na Juda, ya adeskribe ed Isaias 33:1 et say ․․․․․․․․, a diad kaunoran et satan a mismo so atalo nen 632 K.K.P., a manaynan na dakerakel a samsam parad saray manaayam ed ․․․․․․․․, a ‘mantipon ed satan a singa saray asipet.’ (Isa. 33:4, NW) [Sinimban babasaen ed Biblia; nengnengen so ip-1 p. 343 par. 4; p. 345 par. 6.]

24. Say pangikompara ed Isaias 54:1 diad Galacia 4:26, 27 so mangiparungtal a say ‘lepes a bii’ so mangililitrato ed “․․․․․․․․”; tan say ‘biin naasawa,’ et say ․․․․․․․․. [Sinimban babasaen ed Biblia; nengnengen so w95 8/1 p. 11 par. 8.]

25. Sano makaabet itayo na panagludlurey tan kipulisay diad mapublikon ministeryo tayo, kaukolan tayon nonoten a diad katuaan to et nipapaarap itan ya isusumpa, aliwan diad ․․․․․․․․, noagta ed ․․․․․․․․, say Lapuan na mensahe tayo. (2 Cor. 4:1, 7) [w00 1/15 p. 21 par. 2]

Pilien so dugan ebat ed kada onggendan iran balikas:

26. Sanen insulat nen Pablo so nipaakar ed pasingawey to’d mangatatawen a gloria nen Jesus, tinukoy to so inkasikato a singa sakey “a lukon a nakal,” a kabaliksan na satan a (sikatoy balo nin nailalak-ed-espiritu; naawat to so asasakbay lan inkaturo to bilang apostol na nasyones; singa nipagamor ed sikato so galang ed pagmaliw a nianak, odino napaoli, ed maespiritun bilay). (1 Cor. 9:1; 15:8) [w00 1/15 p. 29 par. 6]

27. Say titulon “Andi-anggaan ya Ama” so ontutukoy ed pakayari tan autoridad na Mesianikon Ari a mangiter ed totoo na (espiritual ya inkabiskeg; imortal a bilay ed tawen; ilalon magnayon a bilay ed dalin). (Isa. 9:6; John 11:25, 26) [Sinimban babasaen ed Biblia; nengnengen so ip-1 p. 131 par. 26.]

28. Diad modernon kasumpalan na Isaias 66:7, say “anak a laki” a nianak so mangilalaman ed (si Jesu-Kristo; say Mesianikon Panarian; sakey a balon espiritual a nasyon nen 1919). [Sinimban babasaen ed Biblia; nengnengen so w95 1/1 p. 11 par. 3.]

29. Diad maalwar a pambasa ed Mateo 10:28, natalosan tayo a say mangapuy-apoy a Gehena so (pasen a nalikna so panagpairap; mangirerepresenta ed magnayon a kadederal; mangipapabitar na kisian ed Dios). [rs p. 173 par. 3]

30. Diad modernon-agew a kasumpalan, say “nasyon ya agtinmalineng ed boses nen Jehova,” ya asaglawi ed Jeremias 7:28 so manutukoy ed (Babilonia a Baleg; Kakristianoan; say komapiton pakayari ed mundo). [Sinimban babasaen ed Biblia; nengnengen so w88 4/1 p. 18 par. 10.]

Ipetek so onggendan iran teksto ed saray balikas a nilista ed leksab:

Uli. 24:16; Ecl. 3:11; Isa. 40:8; Roma 10:15; 1 Ped. 4:6

31. Say manepeg a pasen a no iner et matukoy so kada kimey na Dios parad gagala to so niparungtal ed dugan panaon na satan. [Ecl. 3:11] [Sinimban babasaen ed Biblia; nengnengen so w87 9/15 p. 24 par. 8.]

32. Say pangipulong na maong a balita ed saramay inatey ed espiritual so mangiiter ed sikara na pankanawnawa pian magbabawi. [1 Ped. 4:6] [rs p. 163 par. 5]

33. Anggaman agnapaliisan iray isasaew ed bilay, say maridios ya indibidual so ag-onsusuko diad panggugunaet ton manggawa na maabig. [Uli. 24:16] [w00 2/1 p. 5 par. 1]

34. Say salita, odino nibalikas a gagala na Dios, so agnayarin nauman odino naamper ed pakasumpal na satan. [Isa. 40:8] [Sinimban babasaen ed Biblia; nengnengen so ip-1 p. 401-2 par. 10.]

35. Saray apostol nen Jesus so angusar a maong ed propesiya nen Isaias, ya inyaplika da itan ed ministeryo ra. [Roma 10:15] [si p. 123 par. 37]