“Say Pangiteen na Nonot ed Espiritu et Mangitonton ed Bilay tan Kareenan”

1, 2. Akin ya say Roma kapitulo 8 et nepeg ya ikday imano na saray alanaan ya Kristiano?

NO PANAON na memoryal na impatey nen Jesus, kasin babasaen moy Roma 8:15-17? Posible. Ipapaliwawa na satan ya teksto no panon ya naamtaan na saray Kristiano ya alanaan ira—say masanton espiritu so mantatasi a kaiba na espiritu ra. Tan diad gapo na satan ya kapitulo et abitla iramay “akikasakey ed si Kristo Jesus.” Balet, kasin say Roma kapitulo 8 et para labat ed saray alanaan? Odino makatulong met itan ed saray Kristiano ya say ilalo da et manbilay diad dalin?

² Sayan kapitulo et manunan parad saray alanaan ya Kristiano. Inawat da so “espiritu” legan dan “aalagaren so pakatagibi bilang ananak, say kibulos ed saray laman” da. (Roma 8:23) On, say ilalo ra et magmaliw iran ananak na Dios diad tawen. Nagmaliw ya posible itan lapud sikaray abautismoan bilang Kristiano, tan arondon ira, aperdona iray kasalanan da, tan inyabawag a matunong bilang espiritual ya ananak.—Roma 3:23-26; 4:25; 8:30.

3. Akin ya say Roma kapitulo 8 et nepeg met ya ikday imano na saray Kristiano ya diad dalin so ilalo ra?

³ Balet, say Roma kapitulo 8 et nepeg ya imanoen met na saray Kristiano ya say ilalo ra et manbilay diad dalin lapud impasen met ira na Dios ya matunong. Nanengneng tayo itan ed akaunan insulat nen Pablo. Diad kapitulo 4 et binitla toy Abraham, ya kabkabat a mabiskeg so pananisia to. Sikatoy nambilay antis ya inter nen Jehova so Ganggan ed Israel tan antis ya inatey si Jesus parad sikatayo. Balet, siansian naimano nen Jehova so nikadkaduman pananisia nen Abraham tan sikatoy impasen ton matunong. (Basaen so Roma 4:20-22.) Sarag met nen Jehova ya ipasen a matunong iray matoor a Kristiano natan ya say ilalo ra et manbilay ya anggapoy anggaan diad dalin. Kanian makatulong met ed sikara so Roma kapitulo 8 ya manunan insimbawa ed saray matunong.

4. No babasaen tayo so Roma 8:21, anto ray itepet tayod sarili tayo?

⁴ Ipapaseguro na Roma 8:21 ya talagan onsabi so balon mundo. Impromisa na sayan bersikulo ya “saray pinalsa et nibulos met manlapud impakaaripen ed kabubulok tan nawalaan na maglorian kawayangan bilang ananak na Dios.” Balet, wadman ka kasi? Naawat mo kasi itan ya bendisyon? Kombinsido ka kasi ya niwalad sika iratan? Makatulong ed sika iray simbawan nabasa ed Roma kapitulo 8.

“PANGITEEN NA NONOT ED LAMAN”

5. Diad Roma 8:4-13, anton seryoson bengatla so tinukoy nen Pablo?

⁵ Basaen so Roma 8:4-13. Diad Roma kapitulo 8 et nabasa so pandumaan na saramay manaakar “unong ed laman” tan manaakar “unong ed espiritu.” Nayarin isipen na arum ya say tutukoyen na saya et saray anggapod katuaan tan saray walad katuaan, saramay aliwan Kristiano tan Kristiano. Balet, say sinulatan nen Pablo et “amin ya inad-aro na Dios a walad Roma, a tinawag pian magmaliw a masanto.” (Roma 1:7) Kanian say pankokomparaen nen Pablo et saray Kristianon manaakar unong ed laman tan saray Kristianon manaakar unong espiritu. Antoy pandumaan da?

6, 7. (a) Anto ray pigaran angusaran ed salitan “laman” diad Biblia? (b) Anton “laman” so tutukoyen nen Pablo diad Roma 8:4-13?

⁶ Pantongtongan tayo ni so salitan “laman.” Antoy tutukoyen nen Pablo? Nandurumay impangusar na Biblia ed salitan “laman.” No maminsan et nausar iya parad literal a laman. (Roma 2:28; 1 Cor. 15:39, 50) Ontutukoy met iya ed sankapamilya. Saray Judio et inturing nen Pablo ya ‘kakanayon tod laman.’—Roma 9:3.

⁷ Balet, nalinewan tayod insulat nen Pablo ed kapitulo 7 no anto ’tay “laman” ya tutukoyen to diad Roma 8:4-13. Imbaga to ya say ‘pambilay unong ed laman,’ et walay koneksion tod “saray makasalanan a pilpilalek” ya saratan et “onkikiwas ed laman” da. (Roma 7:5) Lapud satan et atalosan tayon “saramay manbibilay unong ed laman” ya tinukoy nen Pablo et saramay “pinonot da ray bengatlan nipaakar ed laman.” Say tutukoyen to et saray totoon pakokontrol ed pilalek da tan tendensia na agperpekton too. Diad antikey ya salita, sikara iramay totoon unor-unor ed pilalek, panlabayan, tan pirpirawat da, balanglan nipaakar ed sekso tan arum ni ra.

8. Akin et pinasakbayan nen Pablo iray Kristiano nipaakar ed panakar “unong ed laman” anggano alanaan ira?

⁸ Balet ompan mankelaw so arum no akin a kaukolan ya bilinen nen Pablo iray alanaan ya Kristiano nipaakar ed kapeligroan na pambilay “unong ed laman.” Tan kasin posible ya nagawa met itan ed saray Kristiano natan ya inawat na Dios bilang kakaaro to tan impasen ton matunong? Makapaermen ta anggan siopan Kristiano et nayarin natukson manakar unong ed makasalanan ya laman. Singa bilang, insulat nen Pablo ya wala ray pigaran agagi ed Roma ya nagmaliw ya “ariripen na saray mismon eges da,” a nayarin ontutukoy ed pilalek ed sekso, panangan, iinumen, odino ed arum ni. Wala ni ingen iray ‘aayaten da ray inosente.’ (Roma 16:17, 18; Fil. 3:18, 19; Jud. 4, 8, 12) Tan wala met so sakey ya agi ed Corinto ya ‘inyamong toy asawa nen ama to.’ (1 Cor. 5:1) Kanian natatalosan tayo no akin ya ingganggan na Dios si Pablo ya pasakbayan iray Kristiano nipaakar ed “pangiteen na nonot ed laman.”—Roma 8:5, 6.

9. Antoy agkaiba ed pasakbay nen Pablo ya walad Roma 8:6?

⁹ Sayan pasakbay et importante ni anggad natan. Anggano abayag lan manlilingkor ed Dios so sakey a Kristiano, posiblin natukso nin siansia ya nonoten iray bengatlan unong ed laman. Agkaibad saya so sagpaminsan ya pannonot na sakey a Kristiano ed panangan, trabaho, panrelaks, odino pangasawa. Normal labat ya nonoten iratan na saray lingkor na Dios. Anggan si Jesus et na-enjoy toy mangan tan mamakan. Amta ton kaukolan tayo met so manrelaks. Tan insulat nen Pablo ya walay dugan panaon parad pangipatnag na panangaro ed asawa.

10. Diad Roma 8:5, 6, antoy tutukoyen na salitan “pangiteen na nonot”?

¹⁰ Anto sirin so tutukoyen nen Pablo ed salitan “pangiteen na nonot ed laman”? Say Griegon salitan inusar to et mankabaliksay “pannonot tan pangipapuso ed sakey a bengatla, pampokus ed sakey a plano.” Saramay manbibilay unong ed laman et manpapaimpluensya rad makasalanan ya tendensia. Oniay inkomento na sakey ya iskolar nipaakar ed satan ya salitan nausar ed Roma 8:5: “Say sankanonot da—paniinteresan dan maong, bungay sangi ra, gagawaen tan irarayew da—et saray bengatlan nipaakar ed laman.”

11. Anto ray nepeg tayon nonoten no itetepet tayod sarili tayo, ‘Antoy labalabay ko?’

¹¹ Duga labat ya usisaen na saray Kristiano ed Roma no antoy akapokusan dad bilay. Kasin iimpluensyaan odino akapokus so bilay dad saray “bengatlan nipaakar ed laman”? Tan duga labat ya usisaen tayo met so bilay tayo. Antoy labalabay ko, tan antoy bungay sangik? Antoy naynay kon gagawaen? Nayarin namoria na arum ya say pampopokusan da manaya et diad pan-inum na nanduruman klase na alak, pamparakep na abung, pananap na balon desinyo na kawes, pampuunan, pampasyar, tan arum ni. Aliwa met iratan ya mauges; kabiangan na bilay iratan. Singa bilang, aminsan et nanggaway alak si Jesus, tan binilin nen Pablo si Timoteo ya oninum na “daiset ya alak.” (1 Tim. 5:23; Juan 2:3-11) Balet kasin si Jesus tan si Pablo et “bungay sangi ra, gagawaen tan irarayew da” so pan-inum na alak? Kasin naynay dan pipirawaten tan atan so “bungay sangi ra”? Andi. Sikatayo balet ey? Antoy labalabay tayo?

12, 13. Akin ya seryoson bengatla no antoy sankanonot tayo?

¹² Importante ya usisaen tayoy sarili tayo. Akin? Ta oniay insulat nen Pablo: “Say pangiteen na nonot ed laman et mangitonton ed ipapatey.” (Roma 8:6) Seryoso itan—pateyen na satan so sakey ed espiritual natan tan literal ya ompatey ed arapen. Balet aglabay ya ibaga nen Pablo ya no say sakey et ginapoan ton ‘iteen so nonot to ed laman,’ segurado lan ompatey. Sarag to ni manguman. Singa samay imoral ya laki diad Corinto ya tinumbok toy pilalek na “laman” to kanian adispelosip. Balet, sarag toy manguman tan onman so ginawa to. Intunda toy manakar unong ed laman tan impetek toy kabibilay to.—2 Cor. 2:6-8.

¹³ No asarag na saman ya laki so manguman, sarag met na saray Kristiano natan so manguman, lalo no aliwa met ya onman kagrabe so agawaan da kompara ed samay ginawa na laki ed Corinto. Seguradon napakiwas iray Kristiano ya manguman ed samay impasakbay nen Pablo a pansumpalan na siopaman ya ‘iteteen toy nonot to ed laman’!

“PANGITEEN NA NONOT ED ESPIRITU”

14, 15. (a) Imbes ya ‘iteen tayoy nonot tayod laman,’ antoy nepeg tayon nonoten? (b) Antoy aglabay ya ibaga na “pangiteen na nonot ed espiritu”?

¹⁴ Kayarin amasakbay so apostol nipaakar ed “pangiteen na nonot ed laman,” angiter na panamaseguro: “Say pangiteen na nonot ed espiritu et mangitonton ed bilay tan kareenan.” Talagan marakdakep itan ya resulta odino bendisyon—bilay tan kareenan! Panon tayon nagamoran itan?

¹⁵ “Say pangiteen na nonot ed espiritu” et agto labay ya ibagan say sakey et kaukolan ya masansanto odino talagan nikadkaduma. Aliwan puros nipaakar ed Biblia, panangaro ed Dios, odino ilalo ed arapen so sankanonot tan ibabaga to. Tandaan ya si Pablo tan saramay Kristiano nen inmunan siglo ya apaliket day Dios et nambilay iran normal. Angan tan inminum ira. Dakel ed sikaray angasawa tan nampamilya, tan nantrabaho pian walay pambilay da.—Mar. 6:3; 1 Tes. 2:9.

16. Anggano ginawa met nen Pablo iray normal a kabiangan na bilay, antoy manunad sikato?

¹⁶ Balet, ag-inabuloyan na saraman ya totoo na Dios ya magmaliw lan manunad sikara iray normal ya kabiangan na bilay da. Kayarin nipaamta ya managgaway tolda si Pablo, nabasa tayo no antoy manuna ed bilay to: Inyuna toy panagpulong tan panagbangat a kimey. (Basaen so Gawa 18:2-4; 20:20, 21, 34, 35.) Tan saratan a kimey so impaseseg tod saray agagi ed Roma. On, akasentroy bilay nen Pablo ed saray espiritual ya kimey. Kaukolan ya aligen na saray agagi ed Roma so alimbawa to, tan ontan tayo met.—Roma 15:15, 16.

17. No ‘iteen tayoy nonot tayo ed espiritu,’ antoy pagmaliwan na bilay tayo?

¹⁷ Antoy resulta no manpokus tayod espiritual? Malinew so ebat na Roma 8:6: “Say pangiteen na nonot ed espiritu et mangitonton ed bilay tan kareenan.” Say labay ya ibaga na satan et abuloyan tayo so nonot tayon impluensyaan odino igiya na masanton espiritu, tan mitunosan ed panlabayan tan kanonotan na Dios. Makapanilalo tayo ya no iteen tayoy nonot tayod “espiritu,” magmaliw ya maliket tan makabaliksan so bilay tayo natan. Tan diad arapen et nawalaan tayoy bilay ya anggapoy anggaan, balanglan diad tawen odino diad dalin.

18. Panon ya say “pangiteen na nonot ed espiritu” et manresultad kareenan?

¹⁸ Imanoen tayoy panamaseguro ya “say pangiteen na nonot ed espiritu et mangitonton ed . . . kareenan.” Dakel ya totoo so aliwan mareen so nonot da. Pipirawaten da itan, balet wala la itan ed sikatayo. Lapud walad sikatayo so ontan ya klase na kareenan, pansasagpotan tayoy mikareenan ed saray kapamilya tan kakongregasyon tayo. Natatalosan tayo ya anggapod sikatayoy perpekto. Kanian no maminsan et wala ray problema, tan no nagawa itan, naaralan tayon tumboken iyan simbawa nen Jesus: ‘Mikareenan ka ed agim.’ (Mat. 5:24) Mas mainomay tayon tumboken itan no tandaan tayon saray agagi tayo et manlilingkor met ed “Dios a mangiiter na kareenan.”—Roma 15:33; 16:20.

19. No iteen tayoy nonot tayo ed espiritu, anton importantin klase na kareenan so nagamoran tayo?

¹⁹ Tan wala ni sakey ya importantin klase na kareenan. Lapud ‘iteteen tayo so nonot tayo ed espiritu,’ walay pikakareenan tayod Nanggawa ed sikatayo. Oniay insulat nen Isaias ya onaplikad panaon to balet mas baleg so kasumpalan to natan: “Salimbengan mo [Jehova] iramay sigpot a manmamatalek ed sika; ikdan mo ra na mantultuloy a kareenan, lapud sika so panmamatalekan da.”—Isa. 26:3; basaen so Roma 5:1.

20. Akin ya misalsalamat kad simbawa na Roma kapitulo 8?

²⁰ Kanian, balanglan alanaan itayo odino walay ilalo tayon manbilay ya anggapoy anggaan diad paraison dalin, misalsalamat itayo ed simbawa na Dios ya walad Roma kapitulo 8. Aapresyaen tayo so panamaseseg ya agtayo aabuloyan so “laman” ya magmaliw lan manunad bilay tayo! Imbes, natatalosan tayon makabat so pambilay base ed sayan panamaseguro: “Say pangiteen na nonot ed espiritu et mangitonton ed bilay tan kareenan.” No gawaen tayo itan, nagamoran tayo ray anggapoy anggaan ya bendisyon, ta oniay insulat nen Pablo: “Say bayar na kasalanan et patey, balet say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.”—Roma 6:23.