Onapit ed Dios
Ama na Saray Naulila ed Ama
‘SAY Ama na saray ulila ed ama et say Dios a walad masanton ayaman to.’ (Salmo 68:5) Sarayan pinuyanan a balikas et mangibabangat ed sikatayo na marakdakep a leksion nipaakar ed si Jehova a Dios, salanti, naiimano tan itatarya to ray pankaukolan na saray nanairapan. Mapatpatnag ed Ganggan ya inter to’d Israel so panangiyansakit to ed saray ulila. Usisaen tayo pa so sankaunaan ya impanukoy na Biblia nipaakar ed “ulila ed ama,” a nabasa ed Exodo 22:22-24.
Oniay impasakbay na Dios: “Ag yo pabpairapen so siopaman ya . . . ulila ed ama.” (Bersikulo 22) Aliwa iyan basta labat kerew pian tulongan iray ulilan nanairapan, noagta sakey iyan ganggan na Dios. Say ugaw a naulila’d ama et naandian la na managprotekta tan managsustento kanian mainomay a naabuso. Anggapoy siopaman a naabuloyan a ‘mamairap’ ed ontan ya ugaw diad antokaman a paraan. Diad arum a bersion na Biblia, say salitan “pabpairapen” et impatalos ya “abusoen,” “maltratoen,” tan “biktimaen.” Say panaglames ed ugaw a naulila’d ama et seryoson bengatla ed Dios. Panon kaseryoso?
Oniay intuloy ya imbaga na Ganggan: “No pabpairapen mo ra, et ontawag ira kalamor ed siak, dengelen ko so tagleey da.” (Bersikulo 23) Diad bersikulo 22 et “yo” so inusar, balet diad bersikulo 23 et nagmaliw lan “mo.” Pareho sirin a responsabilidad na interon nasyon tan kada indibidual ya unoren iyan ganggan na Dios. Onnenengneng si Jehova; dedengelen toy ey-ey na saray naulila’d ama tan lawas akaparaan ya ontulong ed sikara.—Salmo 10:14; Uliran 23:10, 11.
Kanian, antoy nagawa no say sakey a naulila’d ama et abusoen na arum, a sengegay iyey-ey la laingen na ugaw ed Dios? “Say sanok ko ompetang naani,” so inkuan nen Jehova, “tan pateyen ta kayo naani ed kampilan.” (Bersikulo 24) Unong ed sakey a libron komentaryo ed Biblia, say literal a kabaliksan na saya et “‘say eleng ko manaspok,’ a malabor a pananalita parad graben sanok.” Imanoen ya ag-impiya nen Jehova ed saray totoon ukom ed Israel so pangipaakseb na sayan ganggan. Say Dios a mismo so manusa ed siopaman a manlalames ed ugaw ya agto nadepensaay inkasikato.—Deuteronomio 10:17, 18.
Agmanguuman si Jehova. (Malaquias 3:6) Kaskasian to ray ugugaw a naandian na sakey ya ateng odino sigpot lan ulila. (Santiago 1:27) Makatunongan labat a say Ama na saray naulila’d ama et onsanok sano nabibiktima so inosentin ugugaw. Agnatakasan na saramay mangaabuso ed andiay-pakayarin ugugaw so “sanok nen Jehova.” (Sofonias 2:2) Naamtaan na saratan a mauge-uges a totoo a “makapataktakot a pamaakaran so napelag ed saray lima na Dios a mabilay.”—Hebreos 10:31.