Tepetepet na Saray Manbabasa

Anto so kabaliksan na saray salita nen Pablo nipaakar ed sakey a balo a nepeg ya “asawa na saksakey a laki” pian kualipikadon mangawat ed tulong na Kristianon kongregasyon?​—1 Timoteo 5:9, NW.

Lapud sakey a balo so tutukoyen nen apostol Pablo, say balikas ya “asawa na saksakey a laki” so mapatnag ya ontutukoy ed samay kipapasen to antis ya abalo. Kabaliksan kasi na saya a say balo et nepeg ya aminpinsan labat ya akiasawa? Odino wala ni labay ya ibaga na saray salita nen Pablo?a

Ibabaga na arum a say tutukoyen nen Pablo et saray balo ya aminpinsan labat ya akiasawa. Tua a diad dakel a kultura tan sosyedad et ipapasen a maptek ed moral so sakey a balon aglan balot akiasawa. Balet, say ontan a panmoria so agmitunosan ed saray salita nen Pablo diad arum nin sulat to. Singa bilang, impalinew to ed saray Kristianon taga-Corinto ya anggano moriaen ton mas maliket so sakey a balo no agla miasawa lamet, “sikato so bulos a miasawa ed labay to; dia ed linawa na Katawan lambengat.” (1 Corinto 7:39, 40; Roma 7:2, 3) Niarum ni, diad sulat to ed si Timoteo, onia so imbaga nen Pablo: “Pirawat ko lanti a saray ugugaw a balo miasawa ra komon.” (1 Timoteo 5:14) Kanian, agnabalaw so sakey a balo no labay toy miasawa lamet.

Anto sirin so kabaliksan na saray salita nen Pablo ed si Timoteo? Say balikas ya “asawa na saksakey a laki” so naromog ed sayan bersikulo labat. Diad orihinal a Griegon lenguahe, literal a mankabaliksan itan na “bii a kien na sakey a laki.” Makapainteres ta mipadpara iyan balikas ed samay aminpigan inusar nen Pablo diad saray sulat to ya, “asawa na saksakey a bii,” odino “laki a kien na sakey a bii” diad orihinal a lenguahe. (1 Timoteo 3:2, 12; Tito 1:6) Inusar nen Pablo so balikas ya “asawa na saksakey a bii” sanen indatak to iray kualipikasyon parad Kristianon manangasikaso tan ministeryal iran lingkor. Diad satan a konteksto, sayan balikas so manunan mankabaliksan a say sakey a laki, no de-asawa, so nepeg a mansiansia tan manmatoor ed asawa to tan anggapoy pakabalawan to ed moral pian onkualipika parad responsabilidad ed Kristianon kongregasyon.b Lapud ontan, nayarin say balikas ed 1 Timoteo 5:9 so walaan na parehon kabaliksan: Pian kualipikadon mangawat ed tulong na kongregasyon, say sakey a balo so nepeg a nansiansia, matua, tan nanmatoor sanen mabilay ni asawa to tan nepeg ya anggapoy pakabalawan ed sikato no nipaakar ed moral. Say kaaruman niran kualipikasyon ya indatak nen Pablo et onaplika ed ontan a klase na balo.​—1 Timoteo 5:10.

[Saray paimano ed leksab]