Say Intalona tan Insaew na “Saray Eksperto”

DIAD mundo natan, saramay manguusar na kompyuter so makapansukimat na saray simbawan parad atateng diad Internet tan makaromog iran tampol na masulok a 26 milyon a reperensya nipaakar ed sayan tema.” No mangusar kayo labat na sakey minuto diad pannengneng tan pambasa ed kada sakey a reperensya, binmaleg la tan naandi la’d pudir yo so anak yo balet agyo ni asumpal iratan ya abasa.

Sanen anggapo ni iray pediatrician, sikolohista na ugaw, tan Internet, iner so tutuplegan na atateng parad simbawa? Kaslakan et mantetepet ira ed asingger nin kapamilyaan da. Saray kainaan, kaamaan, panginaen, tan pangamaen so akaparaan tan makayari a mangigiya, ontulong ed pinansyal, tan mankomis. Balet diad dakel a daldalin et ngalngalin asian lan amin so ontan a maapit a siglaotan na pamilya lapud dakel a manaayam ed saray baryo et inmalis la diad syudad. Kaslakan lan tuloy natan a saray kainaan tan kaamaan so kaukolan a mangarap a bukor ed saray angat bilang ateng.

Maseguron saya so rason no akin a mapmaples a dinmakel iray mangiyoopresi na serbisyo ed pangasikaso ed anak. Say sakey nin rason et amayamay la so manmamatalek ed siensia. Nen mansamposampot so dekada na 1800, saray Amerikano so nakokombinsi la a sarag na siensia a paaligwasen so amin ya aspekto na bilay na too—laktip lay panamabaleg ed anak. Kanian nen 1899, sanen inyey-ey ed publiko na American National Congress of Mothers (kabkabat natan bilang Parent-Teacher Association) so “agpakasarag na saray ateng,” dakdakel ya “eksperto ed siensia” so tampol a pinmarungtal ed eksena. Insipan da a tulongan da iramay naiirapan a kainaan tan kaamaan a mamabaleg na ananak.

Atateng a Papaigiya ed Saray Libro

Ingen, anto so agawaan na sarayan eksperto? Kasin agla tanton napapagaan tan mas akaparaan la so kaatengan natan a mangasikaso ed ananak da nen saramay diad apalabas a taon? Aliwan ontan so kipapasen unong ed agano nin impansurbi ed Britanya. Niparungtal a manga 35 porsiento na atateng ya angkekelag ni ananak da so manaanap nin siansia na simbawan napanmatalkan da. Iisipen na arum ya anggapo lay nagawaan da noag say tumboken so sipor lan kakabatan da bilang ateng.

Diad libro nen Ann Hulbert a Raising America: Experts, Parents, and a Century of Advice About Children, sinuri to so awaran na propesyonal a literatura nipaakar ed panamabaleg ed anak. Impabitar nen Hulbert, a walaan a mismo na duaran anak, a pigpigara ed saray nalmoan na saray eksperto so nibase ed panmamatalkan a siensia. Imbes, ompatnag a maslak ed saray simbawa ra et nibase ed dilin eksperiensya ra ed bilay imbes a diad antokaman ya aktual a nagagawa. No motekteken so apalabas, singano maslak ed saray insulat da et inmaplika labat ed sakey a panaon, mansusumlangan, tan no maminsan et sigpot ya agmatukoy.

Kanian anto so pagmamaliwan na atateng natan? Diad tua et dakel la ingen natan so nawewetwet lapud kinarakel na simbawa, opinyon, tan mansusumlangan a panmoria. Balet, aliwan amin ya ateng et makakaliknan andian ira na giya. Saray ateng ed interon mundo so nagugunggonaan ed abayag lan lapuan na kakabatan a siansia nin napapaneknekan a maabig a lapuan na napanmatalkan a simbawa, unong ya ipabitar na ontumbok ya artikulo.