Seryoson Bengatla so Pangamta ed Kabaliksan na Saray Tanda!
“Diad primero et abaloan ko labat ya ansakit so ulo na anak min si Andreas. Balet ta anggapoy ganas ton mangan tan atagey so petang to. Linmoor so sakit na ulo to kanian naaburido ak. Kasempet nen masiken ko, impadoktor mi si Andreas. Sinuri na doktor iray sintomas tan tampol ton impa-ospital si Andreas. Aliwa labat a sakit na ulo manaya so nalilikna to noagta mas grabe ni. Si Andreas et walaan na meningitis. Sikato so atambal tan agnambayag et inmabig lamet.”—Gertrud, sakey ya ina ed Alemanya.
NAYARIN kabisado na dakel ya ateng so naeksperiensya nen Gertrud. Naiimano da iray sintomas a mangipapatnag a walay sakit na anak da. Anggaman aliwan grabe so amin a sakit, agnayarian na atateng ya ibaliwala iray sintomas na sakit a nalilikna na ananak da. Baleg so nagawaan no imanoen iray sintomas tan onkiwas unong ed satan. Seryoso itan a bengatla.
Aliwa labat a nipaakar ed bunigas so kiyaplikaan na satan. Sakey lan matukoy ya alimbawa et samay agawan tsunami nen Disyembre 2004 diad saray lugar ya akapaliber ed Indian Ocean. Naamtaan na saray ahensia ed Australia tan Hawaii so kakasil na yegyeg ya agawa ed mamaamianen a Sumatra tan anengneng da so posiblin kapeligroan ya epekto na satan. Ingen ta anggapo so paraan pian saray totoon walad napepeligro iran lugar et napasakbayan odino makakiwas ed antokaman a pasakbay. Bilang resulta, masulok a 220,000 a bilay so abalang.
Saray Tanda a Walaan na Babaleg a Kaimportantian
Sanen wadiad dalin si Jesus, inter to ed saray onderengel ed sikato so sakey a leksion nipaakar ed panimano ed saray tanda tan ikiwas unong ed satan. Sinaglawi to so bengatlan walaan na baleg a kaimportantian. Oniay insalaysay na Biblia: “Sinmabi so saray Fariseos tan Saduceos, et diad impanukso ra’d sikato kinerew da’d sikato ya ipanengnengan to ra na sakey a tanda a nanlapu ed tawen. Balet sikato inmebat tan inkuan to’d sikara, No ngarem, kuan yo, Maong naani panaon: ta say tawen ambalanga. Tan no kabuasan, Mauges so panaon natan: ta say tawen ambalanga tan malurem. Amta yo ya ibiig so nengneng na tawen; bangbalet agyo nayari’n ibiig iray tanda na saray panaon.”—Mateo 16:1-3.
Sanen sinalambit nen Jesus “iray tanda na saray panaon,” impabitar to ya amta la komon na saray Judion onderengel ed sikato nen inmunan-siglo so pankaganatan ed panaon a pambibilayan da. Say Judion sistema na bengabengatla so asingger lan managmak ed saman na baleg a desyang a mangapekta ed sikaran amin. Pigaran agew sakbay na impatey nen Jesus, sinaglawi to ed saray babangatan to so sananey nin tanda—say tanda na kiwawala to. Say imbaga to ed saman et importantin tuloy ed sikatayon amin natan.