Ilalo Anggaman ed Pakaskasin Kipapasen—Sakey ya Asamblea ed Loob na Refugee Camp
SAY refugee camp ed Kakuma so wala’d bandad amianen na Kenya, ya asingger ed ketegan na Sudan. Masulok ya 86,000 a totoo so manaayam ditan. Amagamaga so dalin ditan tan say temperatura ed kaagwan et onaabot ed 50 degrees Celcius. Kasmak so karawalan ed baetan na saray takas a komunidad. Say kampo so pakaskasin pasen parad dakel. Balet, walaan na ilalo so arum ed sikara.
Kabiangan ed saray refugee so pigaran Tasi nen Jehova a maseseg a mangiyaabawag na maong a balita na Panarian. Sikara so manutugyop ed melag a kongregasyon ed Lodwar, a 120 kilometro ed manpaabalaten. Say onsublay a sankaasinggeran a kongregasyon et waloy-oras a biaheen na luluganan.
Lapud agnayarin ompaway ed kampo iray refugee, dakel so agmakakaatendi ed saray asamblea tan kombension na saray Tasi nen Jehova. Lapud satan et inyarunsa so pakagawa na agew na espisyal ya asamblea diad loob na kampo.
Impanbaroy ed Amianen
Pian nasuportaan so asamblea, 15 a Tasi ed baley na Eldoret, a 480 kilometro ed abalaten na kampo, so namboluntaryon nambaroy ed mair-irap a nasabin lugar ed amianen, a kaibay sakey ya iyaaralan na Biblia ya angiyopresi ed van to tan say drayber to. Say impapuson pilalek da et say pamaseseg tan pamabiskeg ed agagi ra.
Ginapoan day nambaroy legan na ambetebetel a palbangon diad nipalpalandey a lugar ed sagur na Kenya. Say makitog a dalan et manpatatdang ed kaumaan tan katakelan antis a manpalasur diad ampetapetang a desierto a karikaan. Saray pulok na kanding tan kamelyo so mansisibsib kalamor diad amagamagan dalin. Walaray manaakar a kabiangan na tribu ya akabeel tan maslak et di-awit na saray bambo, bekang, tan pana. Kayari na 11-oras ya impanbaroy, akasabi iray Tasi ed Lodwar, ya ampetapetang tan maraborabok a komunidad na ngalngalin 20,000 a totoo. Saray Tasi ya amarawes ed saray sankaili so maliket ya angabrasa ed sikara, tan nampainawa ira ta pian maksil ira parad sanagew ya aktibidad ed sampot-simba.
Diad kaimbuasan, saray sankaili so nampasyar ed pigaran lugar. Say manunan nila ra et diad Lake Turkana, say sankaawangan a linok ed Kenya. Apaliberan itan na minilya-milyan kasupokan ed desierto tan ditan so sankarakelay buwaya ed interon mundo. Say maasin a danum so manusustuni ed pigaran totoo a manaayam ed gilig na linok. Diad labi et nanggayagaan na saray sankaili so inyatendi ra ed Teokratikon Eskuelaan Parad Ministeryo tan Pantitipon Parad Panagserbi ed lokal a kongregasyon. Marakdakep so Kingdom Hall da, ya impaalagey nen 2003 diad panamegley na proyekton panagpaalagey na saray Tasi diad saray bansa a limitado iray pundo.
Say Agew na Espisyal ya Asamblea
Inggana so Simba parad agew na espisyal ya asamblea. Say Kongregasyon na Lodwar tan saray sankailin agagi so inabuloyan ya onloob ed kampo diad alas-8 ed kabuasan, kanian magunaet iray Tasi a makagapon masakbay. Say karsada so linmiko-liko ed naklangan a dalin a mamaarap ed ketegan na Sudan. Saray asagasag a kapalandeyan ed gilig na dalan et atataragey. Kasabi ra ed baryo na Kakuma, inmawang so banbantagen da. Onuuran ed saman, tan walaray pasen ya adelap diad mapitek a dalan a mamaarap ed kampo. Maslak a kaabungan so gawa ed laryo tan inatepan na saray yero odino tarapal. Nambibiigan so panaayaman na saray grupo na Etiope, Somali, Sudanese, tan arum nira. Saray refugee so malikeliket ya angabrasa ed saray sankaili.
Say nan-asamblean da et diad training center. Saray drowing ed padir so mangililitrato ed makapataktakot a bilay na saray refugee, balet ta napatnagan so ilalo ed awawey na saramay walad loob na hall. Kada paliwawa so imparungtal ed Ingles tan Swahili. Walaray espiker a makapansalita ed satan a duaran lenguahe tan sikara ni ingen so angipatalos ed dilin paliwawa ra. Say primeron paliwawa ya “Usisaen so Piguratibon Puso Tayo” so imparungtal na sakey ya agin laki a refugee a taga-Sudan. Impabtang so arum a parte ed saray bisitan mamatatken.
Say bautismo so espisyal a kabiangan na kada asamblea. Diad sampot na paliwawa parad bautismo, amin so akalingaw ed sakey a kandidato sanen sikatoy inmalagey. Si Gilbert so tinmakas a kaiba nen ama to manlapud bansan nianakan da legan na palanit a panamatey nen 1994. Diad gapo et inilaloan dan makaromog ira na maligen a pasen ed Burundi, balet agnambayag et amoria ran wala niran siansia ed kapeligroan. Tinmakas si Gilbert ed Zaire, insan diad Tanzania—a walay panaon a nanamot-amot ed katakelan—tan say unor et diad Kenya. Sanen sikatoy inabrasa na espiker bilang kabiangan la na kongregasyon, dakdakel so akalua. Diad imaton na 95 a totoon nandaragup, inebatan nen Gilbert so duaran tepet na espiker diad malinew tan maksil ya “Ndiyo!”—salitan Swahili a mankabaliksay “On!” Sikatoy inibaan na pigaran agagi ya angotkot na melag a bobon insan da inapisan itan na tarapal a datin isasakbong to ed mismon ayaman to diad kampo. Lapud sikatoy magunaet a nabautismoan, diad saman a mismon kabuasan et sikaton bukor so amano ed bobon diad impan-asul to na tinimba-timban danum!
Sakey ed saray importantin parte na sesyon ed ngarem et say impangisalaysay ed saray eksperiensya nipaakar ed nikadkaduman kipapasen na saray Tasin refugee. Insalaysay na sakey ya agin laki no panon ton inasinggeran so sakey a lakin manpapainawa ed silong na kiew.
“Antoy padesir yo, kasin maligen so onyurong ed silong na kiew diad amin a panaon?”
“On,” so inyebat na laki. Insan inyarum to, “Balet ta andi no labi.”
Imbasa na agin laki ed sikato so Miqueas 4:3, 4: “Onyurong ira naani balang sakey ed silong na kiew to ya ubas tan ed silong na kiew to ya higos; et anggapo naani manaktakot ed sikara.” Oniay impaliwawa to: “Naimano yo ta a diad balon mundo na Dios et maligen la diad amin a panaon.” Inawat na laki so sakey a katulongan ed panagaral na Biblia.
Walay sakey ya agin bii a linma ed Kakuma ya agano nin inateyan na taloran maapit a kapamilya to. Oniay inkomento to nipaakar ed saray agagi ed kampo: “Pirmi so kairapan diad sayan pasen; ingen, pansiasiansiaen dan mabiskeg so pananisia ra. Anggaman agmaliket a pasen so panaayaman da, maliket iran manlilingkor ed si Jehova. Walaan ira na mareen a siglaotan ed Dios. Apaseseg ak a mansiansian mareen tan manlingkor ed si Jehova. Anggapo la so nireklamok!”
Maples a linmabas so agew na espisyal ya asamblea. Diad sampot a paliwawa, impaimano na espiker a walaray inmatendi a mangilalaman ed waloran bansa. Inkuan na sakey ed saray Tasin refugee a sayan asamblea so paneknek ed pankakasakey tan aroan ed limog na saray Tasi nen Jehova diad sakey a naapag-apag a komunidad. Ipapatnag da so tuan Kristianon impanaagi.—Juan 13:35.
[Kahon/Litrato ed pahina 25]
SARAY NISIAN YA UGUGAW ED SUDAN
Manlapu la’d inggapo na guerra sibil ed Sudan nen 1983, limaran milyon a totoo so apaskar ya ontaynan ed ayaman da. Kabiangan ed sikara so manga 26,000 ya ugugaw a nisian ed pamilya ra. Nilibo ed sikara so binmatik ed saray refugee camp ed Etiopia, a nanayam ira ditan ed loob na ngalngalin taloy taon. Lapud apaskar iran onalis lamet, sikaray nanakar ed loob na sakey taon a papawil ed Sudan anggad amianen a Kenya, tan sikaray pinapairap na saray sundalo, tulisan, sakisakit, tan masesebeg ya ayayep. Kapaldua labat so bilang na ugugaw ya akaliktar ed sarayan makapakesaw ya impanbaroy, kanian diad kaunoran et sikara so manunan aasikasoen ed loob na kampo ed Kakuma. Sikara so tinawag na saray ahensian ontutulong bilang nisian ya ugugaw ed Sudan.
Say refugee camp ed Kakuma so panaayaman la natan na saray refugee a nanlalapud pigaran bansa a singa say Sudan, Somalia, Etiopia, tan arum nira. Sano walay onsabin refugee diad kampo, sikatoy ikdan na manunan materyales parad pampaalagey na ayaman to tan sakey a tarapal ya iyatep to. Mamiddua ed sakey bulan ya iikdan so kada refugee na 6 kilo ya arina, 1 kilo ya agayep, tan taba tan asin. Dakel a refugee so mangisasalat ed pigaran nabebetangan da pian makala na arum iran nakaukolan da.
Arum ed sarayan ugugaw a nisian so akapilimog lamet ed saray pamilya ra odino niyalis ed ayaman diad arum a bansa. Balet unong ed Office of Refugee Resettlement, “nilibo nin siansia so manaayam ed marabok tan maapangat a refugee camp diad Kakuma, a ditan et mananap-anap ira kalamor na naakan da tan pinasyan mankikimey pian makapanaral.”
[Credit Line]
Diad panangiyabuloy na Refugees International
[Mapa ed pahina 23]
(Parad aktual a format, nengnengen so publikasyon)
KENYA
Kampo ed Kakuma
Lake Turkana
Lodwar
Eldoret
Nairobi
[Litrato ed pahina 23]
Mairap so panagbilay diad kampo
[Litrato ed pahina 23]
Say danum et irarasyon diad kampo ed Kakuma
[Litrato ed pahina 23]
Saray Tasin taga-Kenya so nambaroy ed mair-irap a nasabin lugar ed amianen pian pasesegen so agagi ra
[Litrato ed pahina 24]
Sakey a misionaryo a mangipapatalos ed paliwawa na sakey a lokal ya espisyal payunir
[Litrato ed pahina 24]
Bobon a nambautismoan
[Picture Credit Line ed pahina 23]
Panagrasyon na danum tan Refugee Camp ed Kakuma: Diad panangiyabuloy na Refugees International