Tepetepet Manlapud Saray Managbasa
Sanen binilin nen Jesus iray patumbok to a ‘mamabayes ira [ya agpaaabangan], ya ag-ira manalagar anggan kapigan,’ kasin kabaliksan to ya agda la singilen anggan say kapital?
Natalosan a maong iray salita nen Jesus a nikurit ed Lucas 6:35 no ikonsidera so Mosaikon Ganggan. Ditan et ingganggan na Dios iray Israelita a mamautang ya anggapoy abang ed kapara ran Israelita a naukolan ed pinansyal tan mankakaukolan na tulong. (Exodo 22:25; Levitico 25:35-37; Mateo 5:42) Sarayan utang et aliwan pannegosyo, odino pan-anapan. Imbes, saratan ya utang ya anggapoy abang et onkanan mangagwat ed kairapay-bilay odino inkaduka. On, aliwan maaro so panganamot ed kairapan na panagbilay na kaparan too. Anggaman ontan, walaan na kanepegan so sakey a mamapautang a singilen so kapital, a no maminsan et onkerew na kaletan (seguridad parad inutang).—Deuteronomio 15:7, 8.
Diad panusuporta nen Jesus ed Ganggan, pinalaknab to so kiyaplikaan na satan, ya inkuan ton say ontutulong so nepeg ya agla manalagar “anggan kapigan” ed antokaman ya ompawil. Singa saray Israelita, saray Kristiano no maminsan so onirap ed panagbilay tan magmaliw ni ingen a pakaskasi lapud saray krisis ed ekonomya odino arum niran sirkumstansya. No onkerew na pinansyal a tulong so sakey a Kristianon agi a walad ontan a mairap a kipapasen, agkasi maabig so panulong ed sikato? Peteg a say tuan panangaro so managdag ed kaparan Kristiano a tulongan so agi to a nidunget ed pirmin kairapan ed pinansyal ya agto met kasalanan. (Uliran 3:27) Nayari met a regaloan la itan ya agin mankaukolan, anggaman nayarin memelag itan nen say nayarin ipautang na sakey.—Salmo 37:21.
Nen inmunan siglo K.P., si apostol Pablo tan si Bernabe so niganggan a mangawit ed saray donasyon na saray Kristiano ed Asia Minor a parad saray agagi ra ed Judea lapud niwalay eras. (Gawa 11:28-30) Ontan met natan, sano walay nagawan desyang, saray Kristiano so mabetbet a mangipapawit na saray regalo parad saray agagi ran mankaukolan. Diad panggagawa ra ed satan, sikara met so mangiiter na maabig a pantasi ed arum. (Mateo 5:16) Siempre, nepeg ya ikonsidera so awawey tan kipapasen na sakey a mankakaukolan na tulong. Akin a sikatoy mankakaukolan? Makatantanda iray salita nen Pablo: “Say agmankimey, agmet komon mangan.”—2 Tesalonica 3:10.
No say sakey ya agi a labay toy onutang et aliwa met a pirmin mankakaukolan noagta kaliktan to labat so temporaryon tulong pian makabangon ed niwalan kairapan ed pinansyal, ompatnag a matukoy so pamautang ed sikato ya anggapoy abang. Diad ontan iran sirkumstansya, say pamautang diad gagalan pabayaran so amin ya impabayes et aliwan sumlang ed saray salita nen Jesus a nikurit ed Lucas 6:35. Nepeg a kaletan so nampaknaan, tan say inmutang so nepeg a manggawa na amin a nayarian to pian bayaran itan unong ed saray nampaknaan da. On, say Makristianon aro so nepeg a managdag ed inmutang a bayaran itan no panon a say amautang so pinakiwas met na aro pian manpabayes.
Say sakey a mannononot a mamautang (odino mangiregalo) so kaukolan met a mangusisa ed situasyon na dilin pamilya to. Singa bilang, kasin naapektaan so pakayari ton mangasikaso ed saray pankaukolan na pamilya to, a nepeg ya iyuna unong ed Kasulatan? (2 Corinto 8:12; 1 Timoteo 5:8) Siansia ni, saray Kristiano so mananap na saray pankanawnawa a nipanengneng so aro ed balang sakey, ya ipatnag da so ontan ya aro diad praktikal iran paraan a mitunosan ed saray prinsipyo ed Biblia.—Santiago 1:27; 1 Juan 3:18; 4:7-11.