Intandoro na Korte Suprema so Tuan Panagdayew Diad “Dalin na Ararat”

Sakey ya ubanan lan ama a taga Armenia a walaay taloran ilalak so akatalindeg ed arap na sankatageyan a korte ed bansa to. Niiyan ed kapeligroan so kawayangan to ontan met ed dakel a kapananisiaan to. Sikatoy tatalinengen na Korte legan a mangaaon ed Biblia pian ipaliwawa iray sisiaen to. Pian naamtaan tayo no panon a nansumpal so bista diad pirmin impanalo parad tuan panagdayew ed satan a bansa, usisaen tayo pa iray inkagawan angipaarap ed sayan bista.

SAY Armenia so walad bukig na Turkey tan bandad abalaten na maawang a kapalandeyan na Caucasus. Panaayaman itan na masulok a taloran milyon a totoo. Diad kabisera na nasyon a Yerevan et napanggayagaan so itangay ed pandinayewan a duaran toktok na Palandey Ararat, ya unong ed tradisyon et ditan sinmakda so biong nen Noe kayari na sankagloboan a Delubio.​—Genesis 8:4.a

Nanlapula’d 1975 et saray Tasi nen Jehova so manusumpal ed kimey da bilang Kristiano ed Armenia. Kayarin agamoran na Armenia so kawayangan manlapud datin Unyon Sobyet nen 1991, aporma so State Council for Religious Affairs a pangirehistroan ed saray relihyoson organisasyon. Balet sayan konsilyo so aminpigan ag-angirehistro ed saray Tasi nen Jehova, manuna et lapud isyu na Kristianon neutralidad. Kanian manlapu la nen 1991 et masulok a 100 a tobonbalo iran Tasi diad Armenia so asentensiaan tan maslak et impriso lapud nibase’d Biblia a talindeg da nipaakar ed serbisyo militar.

Kinerew met na Konsilyo ed opisinay piskal na gobierno ya imbestigaan da so relihyoson aktibidad nen Lyova Margaryan, sakey a Kristianon matatken tan makulin abogado ya empleyado na lokal a planta na koryenti. Diad kaunoran et si Brother Margaryan so inakusa unong ed Artikulo 244, a karaanan lan ganggan na Sobyet a nipasa legan na panaon na Khrushchev, diad gagalan amperen tan sigpot a patundaen iray Tasi nen Jehova tan arum niran relihyoson grupo.

Pinagmaliw na satan a ley a krimen so pangorganisa odino pangidaulo na sakey a relihyoson grupo, diad pankuankuanan ya ipupulong iray sisiaen ed relihyon balet ta ‘sasagyaten iray kalangweran ya onatendi ed saray relihyoson miting ya agnirehistro’ tan ‘iimpluensyaan iray membro ya agda sumpalen iray obligasyon da bilang ombaley.’ Pian pekderan so ibabaga to, impabitar na piskal so presensia na saray minor-de-edad diad saray miting ya indauloan nen Brother Margaryan diad syudad na Mestamor. Inyakusa met na piskal a pinaskar nen Brother Margaryan iray kalangweran a membro na kongregasyon ya agmansundalo.

Ginmapo so Bista

Ginmapo so bista ed Biernes, Hulyo 20, 2001, diad korte na distritoy Armavir ya indaulo na Huis a si Manvel Simonyan. Nantultuloy itan anggad Agosto. Diad testimonya ra et inamin ed kaunoran na saray testigon sumpad akusado a sikaray diniktaan na saray membro na National Security Ministry (datin KGB) ed labay dan paisulat iran balikas a sumpad Brother Margaryan tan pinilit da iran manpirma ed saraman a balikas. Singa bilang, inaksobi na sakey a bii a sikatoy ingganggan na sakey ya opisyal na Security Ministry a mangibagan “saray Tasi nen Jehova so sumpad gobierno tayo tan relihyon tayo.” Impatua na bii ya anggapoy kabkabat ton Tasi nen Jehova noagta nadngel to labat iray akusasyon sumpad sikara diad telebisyon na Estado.

Sanen sikato lay sinmublay, pinaneknekan nen Brother Margaryan ya onaatendi iray minor-de-edad ed pantitipon na saray Tasi nen Jehova diad permiso na atateng da. Insalaysay to met a say panagsundalo et personal a desisyon. Nantultuloy ni ed pigaran agew so impan-usay ed sikato na piskal. Diad impangusar nen Brother Margaryan ed Biblia, kalmadon inebatan to iray tepet nipaakar ed saray sisiaen to, ya inusisa met na piskal iray Kasulatan ed mismon Biblia to.

Nen Setyembre 18, 2001, inyanunsio na huis ya “anggapoy kasalanan” nen Margaryan, ya inkuanton “anggapoy pakasuysoyan na krimen” ed aktibidad to. Sakey a makatantandan report nipaakar ed kaso so impalapag ed Associated Press. A nabasa ditan so onia: “Inabsuelto natan so sakey a lider na saray Tasi nen Jehova ed Armenia ed kasalanan a panagproselitismo tan ed panamaskar ed saray kalangweran ya agmansundalo. Kayari na duay-bulan a bista, inkuan na Korte a kulang so ebidensya sumpad lider, a si Levon Markarian [Lyova Margaryan]. Sikatoy nipaarap ed posibilidad a kipriso ed loob na limay taon. . . . Anggaman igagarantiya na Konstitusyon na Armenia so kawayangan ed relihyon, mairap ya irehistro iray balon grupo na relihyon tan pabor iray ley ed Apostolikon Iglesia na Armenia.” Onia so nikuan ed opisyal a salaysay na Organization for Security and Cooperation in Europe (OSCE) a nipaway ed peryodiko tan arum nin media nen Setyembre 18, 2001: “Anggaman aawaten so desisyon, pagbabawian ni na Opisina na OSCE so impangigapon tampol ed prosekusyon.”

Nantultuloy so Prosekusyon

Anggaman kuan, inmapela iray piskal, tan say bista na apela so binmayag ni na apatiran bulan. Kagapo na bista, sanen asabin mantestigo la si Brother Margaryan, say inmunan tepet ed sikato so impakonsidera na sakey a huis ed grupo. Sanen onebat la si Brother Margaryan, sinmalet so tsirman pian sikatoy komprontaen. Manlapu la’d saman et agto lan balot pinasumpal si Brother Margaryan ya ebatan so anggan sakey a tepet. Agto anggan imbaga iray rason ed impangekal to ed rekord na maslak ya intepet ed sikato na manangidepensan abogado to. Legan na bista et saray panatiko a sumpad-Tasi a wadman ed korte so aminpigan nansalitay mabanday ed si Brother Margaryan. Kayari na sesyon, dakerakel a palso tan pikewet iran report ed bista so nipalabas ed telebisyon, a singa bilang et nibabaga ya inamin nen Brother Margaryan diad kaunoran so mismon kasalanan to.

Diad kapegleyan la na bista, say tsirman na grupo na taloran huis so anurprisa ed saray wadman diad impangiparungtal ed sulat na State Council for Religious Affairs a mangigaganggan ed opisinay piskal a manggawa na saray kundang a sumpa ed si Brother Margaryan. Lapud ontan a kiwas da, abigla iray internasyonal a maniimaton ed bista, lapud ta nen akimembro itan ed Council of Europe, inaksobi na Armenia so obligasyon to a “mangipaseguro ya amin ya Iglesia odino relihyoso iran komunidad, nagkalautla ed saramay natutukoy bilang ‘aliwan-tradisyonal,’ so makaagamil ed relihyon da ya andian na panangidumaduma.”

Lalon linmoor so situasyon diad impantultuloy ni na bista ed ontumbok niran simba. Tuloy niray onsusumpa a manisigensigen tan mangaataki ed saray Tasi diad loob tan paway na korte. Dinedepakan iray bibiin Tasi ed bikking da. Sanen sakey a Tasi so inataki balet ta agto labay so ombawi, sikatoy dinapmeg a sengegay inka-ospital to.

Ambegya, sakey a balon manangidaulo a huis so aturo a mangasikaso’d kaso. Anggaman ed pansasagpot na pigaran wadman a manisigensigen ed manangidepensan abogado, pinansiansia na sayan balon tsirman so deen, ya ingganggan to ni ingen ed polis a papawayen so sakey a biin mamapagyaw ed manangidepensan abogado.

Nipasabi so Kaso ed Sankatageyan a Korte na Armenia

Kaunoran et nen Marso 7, 2002, say korte na apela so inmabobon ed desisyon na korte na bista. Makapakelaw ta diad agew sakbay a niyanunsio iyan desisyon, say State Council for Religious Affairs so abuyak. Inyapela lamet na prosekusyon so desisyon, natan et diad sankatageyan a korte na Armenia​—say Korte na Cassation. Kinerew natan na saray piskal ya ipawil ed Korte so kaso pian nabista lamet tan “nipasa so desisyon a nankasalanan.”

Say grupo na anemiran-membron huis, ya indauloan nen Huis a si Mher Khachatryan, so nantitipon diad 11:00 n.k. nen Abril 19, 2002. Diad manangilukas a balikas na sakey ed saray piskal, pirmi so insanok to ed inmunan duaran korte lapud agda apaneknekan a nankasalanan si Brother Margaryan. Balet, diad sayan bekta et sinmalet tan diretsaan a tinepetan na apatiran huis so piskal. Kinastigo na sakey a huis so piskal lapud dederalen to so Korte diad impangilaktip to’d panagpulong a kimey tan agrehistradon kipapasen na saray Tasi nen Jehova dia ed say parerepaso to sumpad si Brother Margaryan​—ya anggapo’d saratan so nipasen a krimen unong ed Artikulo 244. Kanian deneskribe na huis iray kiwas na piskal bilang “panamasegsegang panamegley na kriminal a kaso.” Sakey a huis so analambit ed nanduruman kaso ed European Court a binidbir iray Tasi nen Jehova bilang “kabkabat a relihyon” a makanepegan na proteksion na European Convention on Human Rights. Kaleganan na satan et imbelyaw na sakey a pari diad loob na korte a saray Tasi nen Jehova so mamubuyak ed bansa. Sikatoy ingganggan na Korte ya ondeen.

Insan tinawag na saray huis si Lyova Margaryan manlapud saray wadman ya akayurong​—sakey a nikadkaduman kiwas na sayan atagey a korte. Angiter na maabig a pantasi si Brother Margaryan nipaakar ed posisyon na saray Tasi nen Jehova bilang Kristiano ed nanduruman isyu. (Marcos 13:9) Kayari na antikey a singbatan, impawil tan nankakasakey ya intandoro na Korte so desisyon ya “agnankasalanan.” Akainawan maong si Brother Margaryan. Diad insulat dan desisyon, oniay inkuan na Korte: “Sayan kimey [nen Lyova Margaryan] so aliwan krimen unong ed ley, tan sayan klase na akusasyon so misumlangan ed Artikulo 23 na Armenian Constitution tan Artikulo 9 na European Convention.”

Saray Epekto na Desisyon

No bilang ta tinmalona so prosekusyon, satan so basiyan na pangidemanda la ed arum nin mamatatken a Tasi diad saray kongregasyon ed interon Armenia. Komon ta say mabitar a desisyon na Korte so mangamper na ontan a panaggulo. Say agpaborabli a desisyon so nayarin magmaliw met a baraan pian siansian ag-irehistro iray Tasi nen Jehova. Maong ta say Korte so angekal la ed satan a palson baraan.

Panaon lambengat so makapangibaga no kasin nipagamor so kirehistro na masulok a 7,000 iran Tasi nen Jehova diad sayan bansa. Ambegya say tuan panagdayew so siansia nin mabilay tan ombubulaslas diad “dalin na Ararat.”

[Paimano ed Leksab]

[Litrato ed pahina 12]

Si Lyova Margaryan legan na bista to

[Litrato ed pahina 13]

Si Brother Margaryan tan say pamilya to