Kasin Say Pananisia so Nepeg ya Ibase ed Inkatudio?

“Dakel a ‘relihyoson’ totoo so nagmaliw lan madeboton tuloy pian napaliisan da lay mannonot,” so insulat na dean ed sakey a teolohikon seminaryo diad Estados Unidos. “Basta aawaten da labat so amin a bengatlan ‘nipaakar ed sisiaen da,’” so inyarum to.

IPAPATNAG na saya ya ag-uusisaen na maslak a totoon mankuan a relihyoso no antoy basiyan na sisiaen da odino no kasin walaan na magenap a basiyan so pananisia ra. Agpankelawan no akin a masuyat so dakel a pantongtongan so relihyon.

Makapaermen ta saray agamil a singa say panangusar na relihyoson im-imahen tan pangulit-ulit ed impatlep a pikakasi so agmet mangipapaseseg na panagkatunongan. Angga labat ed sarayan agamil, katekep la so makapadinayew ya arkitektura, mararakep a bintana a walaan na di-kolor a salming, tan makapaingganyon musika, so aagamilen na minilyon nipaakar ed relihyon. Anggaman ibabaga na arum a relihyon a nibase so pananisia ra ed Biblia, say mensahe ran ‘manisia ka ed si Jesus et naliktar ka’ so agmangipapaseseg ed masimoon a panagaral na Biblia. Arum so mangikakalar ed ebanghelyon nipaakar ed sosyedad odino politika. Antoy resulta na amin na saya?

Nipaakar ed say kipapasen ed Abalaten Amerika, sakey a managsulat nipaakar ed relihyon so angikuan: “Say Inkakristiano . . . so magmamaliw a paspasaray, [tan] saray patumbok na satan et agtanton nibabangat nipaakar ed pananisia.” Mas alabas ni ingen so impaneskribe na sakey a managsurbi ed Estados Unidos bilang “say bansan ag-akaaral ed Biblia.” Diad tua et onia met so naoobserbaan ed arum a bansan ontatalona so tatawagen ya Inkakristiano. Dakel a relihyon ya aliwan-Kristiano so agmangipapaseseg met ed panagkatunongan tan mas ipupurek na saratan iray panagkantores, ritualistikon panagdasal, tan nanduruman nengneng na panagdalepdep a lalanoren toy mistisismo, imbes a say pannonot a makatunongan tan makapabiskeg.

Ingen, diad inagew-agew a panagbilay da, saratan lanlamang a totoo ya agtanton mangokonsidera ed inkasusto odino inkapeteg na relihyoson sisisiaen da so mabetbet a mangokonsideran maong ed sananey iran pamaakaran. Agmo ta ipasen a nikadkaduma a say sakey a toon mansusukimat a maong pian makasaliw labat na kotsi​—a nasabi panaon et igarahe lanlamang itan ed iskrapan​—so mangikuan nipaakar ed relihyon ton, ‘No maong itan parad atateng ko, maong itan parad siak’?

No labalabay tayon paliketen so Dios, agta nepeg tayon konsideraen a masimoon so inkasusto na papanisiaan tayo nipaakar ed sikato? Tinukoy nen apostol Pablo iray relihyoson totoo ed panaon to a wala so “seseg da ed Dios, bangbalet aliwa ya unong ed kakabatan.” (Roma 10:2) Nikompara tayo iratan ed sakey ya inupaan a managpinta a sineetan ton pintaan so abung balet aliway inusar toran kolor lapud agto tinumbok iray bilin na makan-abung. Nayarin nanliketan na managpinta so kimey to, balet kasin makapaliket itan ed makan-abung?

Anto so makapaliket ed Dios nipaakar tuan panagdayew? Oneebat so Biblia: “Saya sikato so maong tan makapalikliket ed arap na Dios a Manangilaban tayo. A sikato labay to a saray amin a totoo nilaban ira komon, tan ondago ra ed pakapikabat ed katuaan.” (1 Timoteo 2:3, 4) Liknaen na arum ya imposiblin naromog so ontan a pikakabat diad limog na dakel a relihyon natan. Balet isipen pa​—no linawa na Dios ya ondago komon so totoo pian nagamoran da so suston pikakabat ed katuaan, kasin iyamot to itan ed sikara diad agmakatunongan a paraan? Aliwan ontan so kuan na Biblia, a mangibabagan: “No [say Dios] so anapen mo, sikato so naromog mo.”​—1 Awaran 28:9.

Panon ya ipapakabat na Dios so inkasikato ed saraman so masimoon a manaanap ed sikato? Itarya na ontumbok ya artikulo so ebat.