Say Sankaimportantian ya Ebento ed Awaran

SATAN imay impatey nen Jesu-Kristo. Akin ya ontanlan importante? Lapu itan ed pigaran rason.

Say inkamatoor nen Jesus ya anggad ipapatey so amaneknek a say too et nayarian ton pansiansiaen so integridad to ed Dios.

Say impatey nen Kristo so angiter na pankanawnawa parad arum pian magmaliw iran kaiba to a manuley diad tawen. Inlukas met na satan so dalan parad dakel ni pian panggayagaan da so andi-anggaan a bilay diad mangaraldalin a paraiso.

Diad samay labi sakbay na impatey to, inusar nen Jesus so andi-lebaduran tinapay tan ambalangan alak bilang simbolo na maaron atooan a bagat to. Tan imbaga to ed saray babangatan to: “Gawa yo’ya a pakanodnonotan ed siak.” (Lucas 22:19) Kasin nodnonoten yo iyan importantin ebento?

Ampetapetang kayon iimbitaan na saray Tastasi nen Jehova a kaiba ran mannodnonot ed Memoryal na impatey nen Jesus. Diad sayan taon et say petsa na sayan selebrasyon et diad kaselek na agew na Huebes, Marso 28. Nayarin onatendi kayo ed sankaasinggeran a Kingdom Hall ed panaayaman yo. Ipangasin amtaen ed saray Tastasi nen Jehova diad lugar yo so eksakton oras tan pantitiponan.