Impanbiktorya Diad Federal Constitutional Court

AGAMORAN na saray Tastasi nen Jehova ed Alemanya so makatantandan impanbiktorya diad Federal Constitutional Court ed Karlsruhe. Diad ontan et agawa ray makanakanan kundang a nansumpal ed impamidbir ed sikara.

Saray Tastasi nen Jehova so aktibo diad Alemanya ed loob la na masulok a 100 taon. Asungdoan da so alay irap a panamasegsegang diad silong na duaran diktador ya uley ed koma-20 a siglo​—saray Sosyalista Nasyonal tan Komunista. Nanlapula nen 1990, nanggunaetan na saray Tastasi a nagamoran so legal a panamidbir bilang sakey a legal a korporasyon. Kayari na duaran paborablin desisyon na korte tan sakey ya impanguman, inmapela iray Tastasi diad Federal Constitutional Court, ya angideklara ed desisyon to nen Disyembre 19, 2000.

Nankakasakey a Desisyon Parad Tastasi nen Jehova

Amin a pitoran huis ed korte so nandesisyon a pabor ed Tastasi. Binaliktad na saray husgado so 1997 a pormal a desisyon na Federal Administrative Court tan ingganggan da a konsideraen lamet na satan a korte so aplikasyon na saray Tastasi.

Inanamot na Federal Constitutional Court so pankanawnawa pian mankomento ed manunan siglaotan na Estado tan saray relihyoson grupo. Manuna’d amin, say kipapasen na sakey a relihyon “so nadetermina, aliwan diad sisisiaen na satan, noagta diad kagagawa na satan.”

Naobserbaan met na korte a sano aagamilen na Tastasi so “Kristianon neutralidad,” sikaray “agmanederal ed prinsipyo na demokrasya” tan “[agda] pirawat a salatan so demokrasya na sananey a porma na gobierno.” Kanian, say agpibibiang ed mapolitika iran eleksion so nepeg ya ag-ibilang ya ebidensya sumpad saray Tastasi diad ikekerew da na kanepegan parad legal a panamidbir.​—Juan 18:36; Roma 13:1.

Intuloy ya inkuan na korte a say sakey a mananisia​—balanglan Tasi odino kabiangan na sananey a relihyon​—so sagpaminsan a nidudunget ed situasyon a mankontraan iray ganggan na Estado tan saray kakaukolanen na relihyon to. No tuloken na indibidual so konsiensia to diad “pangunor ed relihyoson sisisiaen to a nagkalalo nen say ganggan,” moriaen iya na Estado bilang makatunongan tan unong ed nasasakopan na relihyoson kawayangan.​—Gawa 5:29.

Say desisyon na korte so nagmaliw a paulon balita. Amin lawarin peryodiko ed Alemanya so angibalita ed kaso. Impalabas na amin a manunan istasyon na telebisyon tan radio iray report tan interbio. Natan labat a say ngaran a Jehova so naikdan na ontan a malaknab ya inkiyabawag diad Alemanya.

[Picture Credit Line ed pahina 8]

AP Photo/Daniel Maurer