“No Say Dios Gampi ed Sikatayo, Siopa ni Kasi Onsumpa ed Sikatayo?”
“Anto sirin so kuan tayo ed sarayan bengatla? No say Dios gampi ed sikatayo, siopa ni kasi onsumpa ed sikatayo?”—ROMA 8:31.
1. Siopa so akila ed saray Israelita sanen tinmaynan ira ed Ehipto, tan anto so amakiwas ed saratan a miulop?
SANEN nibulos laray Israelita manlapud Ehipto kayari na 215 a taon, a maslak ed satan a panaon et naaripen ira, “akila met ed sikara so dakerakel a nanlalaok ya ulop.” (Exodo 12:38, NW) Asagmak na sarayan aliwan-Israelita so samploran makapakelaw a salot a pirmin angapekta ed Ehipto tan nanludlurey ed saray palson dirios na satan. Naimatonan da met ed saman—nagkalalo la ed komapat anggad mika-samplon salot—so pakayari nen Jehova a manalimbeng ed totoo to. (Exodo 8:23, 24) Anggaman limitado so pikakabat da ed saray gagala nen Jehova, maseguro ira ed sakey a bengatla: Ag-asalimbengan na saray dirios na Ehipto iray Ehipsio, bangta pinaneknekan nen Jehova so inkabiskeg to nisesengeg ed saray Israelita.
2. Akin a sinuportaan nen Rahab iray nansimasim ya Israelita, tan akin a susto so impanmatalek to ed Dios da?
2 Kayari na apataplon taon, antis na inloob na saray Israelita ed Insipan a dalin, si Josue, a sinmalat ed si Moises, so angibaki na duaran lalaki a mansimasim ed dalin. Diman da akabat si Rahab, a manaayam ed Jerico. Lapud nadngelan to laray nipaakar ed makapanyarin impanalimbeng nen Jehova ed saray Israelita kaleganan na 40 a taon nanlapu la’d intaynan da ed Ehipto, amta to a no labay ton nagamoran so bendision na Dios, kaukolan ton tulongan iray totoo To. Lapud makabat a desisyon to, sikato tan say sankaabungan to so niliktar ed kadederal sanen say syudad so kinobkob na saray Israelita ed saginonor. Say mamilagron inkiliktar da et agnasuppiat ya ebidensia a walad dapag da so Dios. Kanian, susto so impanmatalek nen Rahab ed Dios na saray Israelita.—Josue 2:1, 9-13; 6:15-17, 25.
3. (a) Anton milagro so ginawa nen Jesus ed asingger na nipaalagey lamet a syudad na Jerico, tan anto so reaksion na saray kleron Judio? (b) Anto so amoria na saray Judio, tan say dakel ed saray aliwan-Judio ed saginonor?
3 Kayari na labinliman siglo, pinaabig nen Jesu-Kristo so sakey a bulag a mipapayabol diad asingger na nipaalagey lamet a syudad na Jerico. (Marcos 10:46-52; Lucas 18:35-43) Sayan too so akikaskasi ed si Jesus, a pakapatnagan a binidbir ton walay pananulong na Dios ed si Jesus. Diad biek a dapag, saray Judion relihyoson lider tan saray patumbok da, so inkalapagan ya angipulisay ed saray milagron ginawa nen Jesus bilang prueba a gagawaen to so kimey na Dios. Imbes, sikato ni ingen so sinita ra. (Marcos 2:15, 16; 3:1-6; Lucas 7:31-35) Anggano naamtaan da ya apaoli si Jesus kayari na impamatey da ed sikato, agda binidbir a ginawa itan na Dios. Noag ingen, indaulo ra so panamasegsegang ed saray patumbok nen Jesus, a sasalien da iran amperen ed kimey dan ‘panangiyabawag ed maong a balita nipaakar ed Katawan a Jesus.’ Balet arum ed saray Judio, tan diad saginonor et dakel ed saray aliwan-Judio, so nanmotektek ed sarayan agawa tan sinuri ran maong iratan. Parad sikara et mapatnag ya impulisay la na Dios so mantunongtunongan iran Judion lider tan tutulongan toray mapaabeban patumbok nen Jesu-Kristo.—Gawa 11:19-21.
Siopa Natan so Tutulongan na Dios?
4, 5. (a) Panon so liknaan na arum a totoo nipaakar ed pampili na relihyon? (b) Sano ibibiig so tuan relihyon, anto so importantin tepet?
4 Diad tepet a nipaakar ed tuan relihyon, oniay inkuan na sakey a klerigo ed agano nin inka-interbio to ed TV: “Ipilit ko a tua so sakey a relihyon no pagmaliwen na satan a magmaong so sakey a too sano sikatoy manbilay a mitunosan ed satan.” On, say tuan relihyon so makapasimbalo ed totoo. Balet kasin say relihyon a mamapawala na magmaong a totoo so mismon paneknek a satan so tutulongan na Dios? Kasin satan so alenleneg a basiyan pian naamtaan a tua so sakey a relihyon?
5 Papablien na amin so personal a pakapampili, pati say pampili ed no anton relihyon so pimembroan. Balet say pakawalaan na kawayangan a manpili so agmangarantiya a susto so napili na sakey a too. Alimbawa, arum a totoo so mamipili na sakey a relihyon base ed karakel, kayamanan, maparayag iran seremonya na satan, odino ed malet iran siglaotan da ed pamilya. Diad antokaman a paraan et anggapo ed sarayan bengatla so makadetermina no kasin tua odino andi so sakey a relihyon. Say importantin tepet ed sayan pamaakaran et: Dinan a relihyon so mamapaseseg ed saray patumbok to a manggaway linawa na Dios tan mangiiter na putel ya ebidensia a tutulongan ira na Dios, kanian saray membro na satan so matalek a makapangibagan say, ‘Dios so gampi ed sikami’?
6. Antoran salita nen Jesus so mangipalinew nipaakar ed tua tan palson relihyon?
6 Indatak nen Jesus so totontonen ed pakapangibiig ed tuan panagdayew manlapud palso sanen inkuanto: “Manalwar kayo ed saray aliwan tuan propeta, ya onla’rad sikayo a sikakawes na kawes na karnero, balet dia ed loob da sikaray lobon mangasiba. Napatnagan yo ra lapud saray bunga ra.” (Mateo 7:15, 16; Malaquias 3:18) Repasoen tayo so pigara ed “saray bunga,” odino ed saray pakabidbiran, na tuan relihyon, ta pian peteg a nadetermina tayo no siopa natan so tutulongan na Dios.
Saray Pakabidbiran ed Saramay Tutulongan na Dios
7. Anto so kabaliksan na pangibangat lambengat ed walan nibase ed Biblia?
7 Ibabase ra ed Biblia iray bangat da. Inkuan nen Jesus: “Say bangat ko agko kien, balet kien na angibaki ed siak. No siopaman a too a manlinawa a gawaen to so linawa To, nakabatan to so bangat ko, no nanlapu kasi ed Dios, ono mansalita ak kasi na manlapu ed inkasiak.” Tan ontan met: “Say kayarian na Dios dengelen to so saray salita na Dios.” (Juan 7:16, 17; 8:47) Diad makatunongan a paraan, nepeg ya ibangat lambengat na sakey no anto so ipaparungtal na Salita to tan ipulisay toray bangat a nibase ed kakabatan odino tradisyon na too ta pian napanggayagaan toy pananulong na Dios.—Isaias 29:13; Mateo 15:3-9; Colosas 2:8.
8. Akin ya importantin usaren so ngaran na Dios ed panagdayew?
8 Uusaren tan ipapakabat da so ngaran na Dios, a Jehova. Oniay impasakbay nen Isaias: “Misalamat kayo ed Jehova, tawagan yo so ngaran to, ipaliwawa yo so saray gawa to ed nanleleetan na balbaley, uliten yo a say ngaran to nitandoro. Kantaan yo si Jehova; ta nanggawa na ankabli ran bengabengatla: saya komon so nakabatan na amin a dalin.” (Isaias 12:4, 5) Oniay imbangat nen Jesus ya ipikasi na saray patumbok to: “Ama min wala ka ed tawen, nagalang komon so ngaran mo.” (Mateo 6:9) Kanian, balanglan Judio odino aliwan-Judio, saray Kristiano so manlingkor bilang “totoo a nipaakar ed ngaran [na Dios].” (Gawa 15:14) Say Dios so mapatnag a naliliketan ya ontulong ed saramay manggagayagan magmaliw a “totoo a nipaakar ed ngaran to.”
9. (a) Akin a napatnagan so gayaga ed saray kabiangan na tuan relihyon? (b) Panon a pinandumaan nen Isaias so tuan relihyon tan palson relihyon?
9 Ipapatnag da so maliket a personalidad na Dios. Bilang autor na “maong a balita,” si Jehova so “maliket a Dios.” (1 Timoteo 1:11, NW) Kanian panon nin magmaliw a maermen odino tuloytuloy a negatibo iray mandadayew ed sikato? Anggaman ed gonigon ed mundo tan personal iran problema, pansiasiansiaen na saray tuan Kristiano so maliket ya awawey lapud regular iran ondurungo ed daakan ya espiritual a tagano. Sikaray induma nen Isaias manlapud saramay mangaagamil na palson relihyon: “Onia so kuan nen Katawan a Jehova, Nia, saray aripen ko mangan ira naani, balet sikayo naerasan kayo; nia, saray aripen ko oninum ira naani, balet sikayo napgaan kayo naani; nia, saray aripen ko manliket ira naani, balet sikayo nabaingan kayo naani. Nia, saray aripen ko mankanta ra naani a nisengeg ed liket na puso, balet sikayo manakis kayo naani a nisengeg ed ermen na puso, tan managogol kayo naani a nisengeg ed irap na espiritu.”—Isaias 65:13, 14.
10. Panon a napaliisan na tuan relihyon so pakaaral panamegley na metodon salien-no-epektibo?
10 Ibabase ray kondukta tan saray desisyon da ed saray prinsipyo na Biblia. “Manmatale’ka ed Jehova ed simoon a pusom, tan agka onsaral ed tapew na dili a pakatalos mo,” so isisimbawa ed sikatayo na managsulat na Uliran, “dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:5, 6) Tutulongan na Dios iramay papaiwanwan ed sikato tan agmanmamatalek ed saray mansusumlangan a teorya na totoon mangibabaliwala ed maridios a kakabatan. Diad lalon inkamabulos na sakey a toon mangitunos ed bilay to diad Salitay Dios, paliisan to so pakaaral diad panamegley na metodon salien-no-epektibo.—Salmo 119:33; 1 Corinto 1:19-21.
11. (a) Akin a saray kabiangan na tuan relihyon et agnaapag ed klero tan laygon klase? (b) Anton alimbawa so nepeg ya ipanengneng ed pulok, na saramay mangidadaulo ed totoo na Dios?
11 Naorganisa ira unong ed paraan na inmunan-siglon Kristianon kongregasyon. Indatak nen Jesus so prinsipyo: “Agkomon patatawag na Rabbi; ta sakey so managbangat ed sikayo, et sikayo ya amin sanaagi kayo. Tan anggapoy tawagen yo na ama ed dalin; ta sakey so Ama yo, a sikatoy wala ed tawen. Tan agkayo met patatawag na katawan; sakey so Katawan yo a salanti si Kristo. Ingen saman so kabalbalgan ed sikayo sikato naani aripen yo.” (Mateo 23:8-11) Anggapo ed kongregasyon na sanaagi so mapaatagey a kleron klase a padederleng panamegley na nikadkaduman titulo tan itatandoro ray inkasikara manlapud saray laygo. (Job 32:21, 22) Abilin iramay manpapastol ed pulok na Dios a manpastol ira “ya ag-iparalan ed kabiskegan, noag dia ed kalakal a mabulos unong ed linaway Dios; aliwa a lapud mabanday a pananubo noag lapu ed ataryan kalakal. Ni say pakatawan kayo ed nimatalek a nitanda’d sikayo, noag ingen gawaen yoy inkasikayo a panagkauliran a tumboken na saray pulok.” (1 Pedro 5:2, 3) Agpanggugunaetan a pakatawan iray puron Kristianon papastol ed pananisia na arum. Bilang kaparan komikimey a manlilingkor ed Dios, panggugunaetan da lambengat so mangipanengneng na maabig ya alimbawa.—2 Corinto 1:24.
12. Anton asimbang a panmoria nipaakar ed saray gobierno na too so kakaukolanen na Dios ed saramay manpipilalek a nawalaay pananulong to?
12 Manpapasakop ira ed saray gobierno na totoo, ingen ta mansiansia iran neutral. Siopaman ya ‘agmanpasakop ed saray atagtagey a pakauley’ so agmakapanilalo ed pananulong na Dios. Akin? Lapud “saray kaplesan ya autoridad so impasen na Dios ed saray relatibon posisyon da. Kanian siopaman ya onsunggay ed autoridad so onsusumpa’d uksoyan na Dios.” (Roma 13:1, 2, NW) Balet, binidbir nen Jesus so posibilidad na pankontraan ed no dinan la so unaen sanen inkuanto: “Bayaran yo ed Cesar so bengabengatlan kien nen Cesar, tan ed Dios so saray kien na Dios.” (Marcos 12:17) Saramay manpipilalek ed pananulong na Dios so nepeg a ‘mananap nin unona ed panarian [na Dios] tan say inkatunong to,’ bangta ontutulok met ed saray ley na bansa a mitunosan ed atagtagey iran responsabilidad da ed Dios. (Mateo 6:33; Gawa 5:29) Indanet nen Jesus so neutralidad sanen inkuanto ed saray babangatan to: “Ag-ira taga mundo, salanti unong ya agak taga mundo.” Inyarum to ni ed saginonor: “Say panarian ko aliwan taga dia ed mundo.”—Juan 17:16; 18:36.
13. Anto so betang na aro ed panangibiig ed totoo na Dios?
13 Anggapoy lalabien da diad panggagawa ray “maabig ed saray amin.” (Galacia 6:10) Say aro na Kristiano et anggapoy lalabien, ya aawaten da so amin a totoo antokaman so kolor na baog da, kipapasen da ed bilay tan edukasyon, nasyonalidad, odino lenguahe. Say panggawa na maabig ed amin tan nagkalalo la ed saramay kapananisiaan da so ontulong pian nibiig iramay tutulongan na Dios. Inkuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.”—Juan 13:35; Gawa 10:34, 35.
14. Kasin nepeg ya ilaloan na saray totoon aabobonan na Dios so pakagamor na inkalapagan a panangabobon? Ipaliwawa.
14 Mabulos iran managmak na panamasegsegang diad panggagawa ra na linawa na Dios. Pinasakbayan la nen Jesus iray patumbok to: “No pinasegsegang da ak, pasegsegangen da kayo met; no inunor da so salitak, unoren da met naani salita yo.” (Juan 15:20; Mateo 5:11, 12; 2 Timoteo 3:12) Saramay tutulongan na Dios so lawas ipupulisay, a singa si Noe, ya angondena ed mundo panamegley na pananisia to. (Hebreos 11:7) Natan, saramay manpipilalek a tulongan na Dios so agmangibaliwala ed salita na Dios nisay mangikokompromiso ed maridios iran prinsipyo pian napaliisan da lambengat so panamasegsegang. Diad matoor a panlilingkor da ed Dios, amta ran say totoo so “mankelaw tan maabuson mansalita” nipaakar ed sikara.—1 Pedro 2:12; 3:16; 4:4.
Panaon la Pian Moriaen Iray Katuaan
15, 16. (a) Antoran tepet so ontulong ed sikatayo pian nibiig tayo so relihyoson grupo a manggagayaga ed pananulong na Dios? (b) Anto so konklusyon na minilyon a totoo, tan akin?
15 Tepetan yo pay inkasikayo, ‘Anton relihyoson grupo so naiimano a maapit a manutumbok ed Salitay Dios, anggano saray bangat na satan et midumaan ed saray sisiaen na karaklan a totoo? Sioparay mangipupurek ed kaimportantian na personal a ngaran na Dios, ya uusaren da ni ingen itan pian ipakabat day inkasikara? Sioparay magunaet a mangipapabitar ed Panarian na Dios bilang say alenleneg a solusyon na amin a problema na totoo? Sioparay mangitatandoro ed saray estandarte na Biblia nipaakar ed kondukta, anggano ipapasen na karaklan a karaanan la? Anton grupo so kabkabat ya andian na suesueldoan a klero, ya amin na saray membro ra et manpupulong? Sioparay pandidinayewan lapud sikara et mibabaley a mapasakop ed ley, anggano ag-ira mibibiang ed saray politika? Sioparay maaron manguusar na panaon tan biskeg da pian tulongan so arum a makaaral nipaakar ed Dios tan saray gagala to? Tan anggaman ed amin na sarayan makapadinayew a bengatla, siopa niran siansia so iyaabeba, luludlureyen, tan papasegsegangen?’
16 Minilyon a totoo diad intiron mundo so makakamoria ed saray katuaan tan nakokombinse a saray Tastasi nen Jehova lambengat so mangaagamil na tuan relihyon. Ontan so konklusyon da makasengeg ed saray ibabangat tan kondukta na saray Tastasi nen Jehova, ontan met ed saray nitatarok na relihyon da. (Isaias 48:17) Bilang segek et oniay singa ibabaga na minilyon, unong a nikuan ed Zacarias 8:23: “Sikami mila kami ed sikayo, ta sikami nadngelan mi a say Dios wala ed sikayo.”
17. Akin ya aliwan inkamapaatagey so pangibagan saray Tastasi nen Jehova so tuan relihyon?
17 Inkamapaatagey kasi ed biang na saray Tastasi nen Jehova no ibaga ran sikara labat so tutulongan na Dios? Diad tua, mipara so panmoria ra ed saray Israelita a walad Ehipto a sikara so tutulongan na Dios anggaman ed pananisia na Ehipsio, odino ed panmoria na saray inmunan-siglon Kristiano a sikara so tutulongan na Dios, aliwan saray relihyonistan Judio. Pekderan itan na saray katuaan. Diad 235 a daldalin et gagawaen na saray Tastasi nen Jehova so kimey ya impasakbay nen Jesus a gawaen na saray tuan patumbok to ed panaon na anggaan: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.”—Mateo 24:14.
18, 19. (a) Akin ya anggapo so makapatunda ed saray Tastasi nen Jehova ed panagpulong a kimey da, anggano nasusumpa ira? (b) Panon a susuportaan na Salmo 41:11 so katuaan a saray Tastasi so tutulongan na Dios?
18 Itultuloy na saray Tastasi nen Jehova a sumpalen iyan ganggan, ya agdan balot abuloyan so panamasegsegang odino isusumpa a manebel ed kimey da. Nepeg a gawaen tan sumpalen so kimey nen Jehova. Sinmaew lanlamang so amin a getma nen apalabas a siglo a patundaen iray Tastasi ed panusumpal da ed kimey na Dios, lapud oniay insipan nen Jehova: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak.”—Isaias 54:17.
19 Say lalon ibibiskeg tan iyaaktibo na saray Tastasi nen Jehova nen say kapiganman—tan anggaman ed sankamundoan ya isusumpa—so paneknek a naliliketan si Jehova ed gagawaen da. Inkuan nen Arin David: “Lapu ed saya amtak a sika et abobonan moak, nisengeg lanti ed agpanalo na kakabusol ko ed siak.” (Salmo 41:11; 56:9, 11) Agbalot makakelyaw na pananalo iray kakabusol na Dios ed saray totoo nen Jehova, lapud say Lider da, si Jesu-Kristo, so mamapaarap la’d unor a pambiktorya!
Kasin Naebatan Yo?
• Anto so pigaran alimbawa na totoo nensaman a walaan na pananuporta na Dios?
• Anto so pigaran pakabidbiran ed tuan relihyon?
• Akin a kombinsido kayon mismo a saray Tastasi nen Jehova so tutulongan na Dios?
[Litrato ed pahina 13]
Saramay manpipilalek a tulongan na Dios so nepeg a mangibase ed bangabangat da diad Salita to lambengat
[Litrato ed pahina 15]
Onkakanan alimbawa ed pulok iray Kristianon mamatatken