Sakey a Sankamundoan ya Asosasyon a Mangiyaansakit ed Sakey tan Sakey
NO onnengneng anggad arawi et walaray totoo. Dakel laray maedad, ya arum et baldado la ya agla ra makaakar. Wadtan met iray malukon tan saray kalangweran a sanaasawa a walaay ananak a sankatabin. Amin da so refugee—lalaki, bibii, tan ugugaw—ya apaskar a taynan iray kaabungan da lapud guerra sibil, natural iran desyang, odino arum niran sirkumstansia pian pasalimbengan ed kaabay a bansa. Arum so apaskar ya aminpigan taynan iray ayaman da. Bektaman a naimano ran walay sibil a panlalaban odino natural a desyang, alaen daray pigaran kagawaan da ed abung, tugyopen iray anak da, tan mamaarap la ra ed maligen a pasen. Insan, sano onkepa la iray kipapasen, dakel ed saray refugee so ompawil pian ipaalagey lamet iray abung da tan manbilay lamet a normal.
Diad loob na saray taon, say Central African Republic so angawat ed saray refugee a nanlalapud pigaran bansa. Diad agano ni et nilibon totoo, pati ed dakel a Tastasi nen Jehova, so apilitan a taynan so natatabek na bakal a Demokratikon Republika na Congo ed medyo maligen a Central African Republic.
Tinmulong Iray Agagi
Imbilang na Tastasi diad Central African Republic itan bilang pribilihyo so pangorganisa na pananulong ed totoo. Pinawala iray pampundoan parad saray onsasabin Kristianon agagi. Diad inmuna et nitarya iray kuarto diad saray pribadon ayaman, balet lapud ondarakel iray refugee, kapilitan iray malalaknab ya uksoyan. Pigaran Kingdom Hall so pinagmaliw a dormitoryo. Saray Tastasi diman so angipepeket na kaaruman a silew, angikakabit na saray tubo na gripo, tan nanse-semento na saray datal pian komportabli iray manpundo. Akiiba’d agagin taga diman iray refugee a nantrabaho pian nitarya irayan temporaryon dormitoryo. Inyuksoy so intiron programa na Kristiano iran miting ed lenguahen Lingala ta pian saray onsabi so nataryaan na mananustuni’d bilay ya espiritual a tagano. Say maapit a kooperasyon ed baetan na saray Tastasin taga diman tan ed saray bisita ra so pakapatnagan a peteg so internasyonal ya impanaagi.
Saray pamilya na refugee so aglawas onsasabin manbabansag. No maminsan et saray sankakapamilyaan ya ag-akapaniiba so makapannenengneng dia ed pugtaan da. Sakey a listaan na saramay akasabi lan maligen so niatol ed balang Kingdom Hall. Niyuksoy so pananap ed saramay nababalang ni. Say sangan opisina a mangiwawanwan ed kimey na Tastasi nen Jehova ed bansa so angipatulor na taloran luluganan kada agew pian mangabet ed saray Tastasi a mamapaarap ni tan anapen so siopaman a nayarin nababalang ni. Sarayan luluganan so nabidbir ed angkabaleg a karatula, a pakabasaan na “WATCH TOWER—Jehovah’s Witnesses.”
Isipen pa so gayagan naeksperiensia sanen apasikmatan na sakey a grupo na pitoran ugugaw, a nisian ed atateng da, so luganan a kayarian na Tastasi nen Jehova. Tamtampol dan inasinggeran so luluganan tan inkabat dan sikaray Tastasi. Inlugan ira na agagi tan inawit da ra ed sakey a Kingdom Hall, diman lara akapinengnengan ed pamilya ra.
Anto so tinmulong ed sarayan masimoon a Kristiano pian natalonaan iray ontan a sirkumstansia, ya aliwa lambengat ya aminsan, noagta aminpiga? Sigpot iran kombinsido a sikatayo lay manbibilay ed kaunoran iran agew a singa nipasakbay la ed Masanton Kasulatan.—2 Timoteo 3:1-5; Apocalipsis 6:3-8.
Kanian, kabat da ya agla manbayag et panganggaen nen Jehova a Dios iray bakal, panbusol, karawalan, tan panlalaban. Say problema nipaakar ed refugee so bengatlan naandi. Kaleganan ni, diad pitunosan ed simbawa nen apostol Pablo diad 1 Corinto 12:14-26, pambabanikelan na Tastasi nen Jehova ya iyansakit so sakey tan sakey. Anggaman sikaray niarawi nisesengeg ed saray ilog, ketegan, lenguahe, tan distansia, pampapagaan day sakey tan sakey, kanian onkiwas iran tampol sano walay mankaukolan.—Santiago 1:22-27.
[Mapa ed pahina 30]
(Parad aktual a format, nengnengen so publikasyon)
APRIKA
Central African Republic
Demokratikon Republika na Congo
[Credit Line]
Mountain High Maps® Copyright ©1997 Digital Wisdom, Inc.
[Saray litrato ed pahina 30]
Taloran Kingdom Hall ya inusar a “reception center”
[Litrato ed pahina 31]
Nikabit a tampol iray pasilidad parad kusina
[Litrato ed pahina 31]
Dakel iray sinmasabi
[Saray litrato ed pahina 31]
Kapangiyanak labat et refugee la ra