Imanoen so Propesiya nen Daniel!

Kapitulo Desi Otso

Insipan nen Jehova ed si Daniel so Makapakelkelaw a Tumang

1, 2. (a) Anton importantin kualidad so kaukolan na bumabatik pian ontalona? (b) Panon ya inkompara nen apostol Pablo so lumba ed say bilay a matoor a panaglingkor ed si Jehova?

INSABISABI na sakey a bumabatik ed sampot na lumba. Sikatoy alubluboy la, balet lapud sankanengneng to lay kalat to, inyupo-upot to lay peles to’d batik. Diad impakanatnat lay amin a masel to, akalampas a siansia ed linya! Napatnagan ed lupa to so inawa tan impanalo. Atumangan so impangipaot to anggad sampot.

² Diad kasampotan na Daniel kapitulo 12, nanengneng tayo so inad-aron propeta ya asingger la ed sampot na dili ton “lumba”​—say bilay ya impanlingkor ed si Jehova. Kayari impangisitas ed nanduruman alimbawa na pananisia ed limog na sakbay na Kristiano iran lingkor nen Jehova, insulat nen apostol Pablo: “Kanian sikatayo met, bangta wala ed liberliber tayo so sakey a sankabalegan a lurem na saray tasi, ikaindan tayo so amin a pakabelatan, tan say kasalanan ya akaliktob a sankainomayan ed sikatayo, tan batiken tayo a siaanos komon so babatiken [“lumba,” NW] a niyan ed arap tayo, a nengnengnengen tayo si Jesus a nanggawa tan manamayadyari na pananisia tayo, a sikato lapud gayaga a niyan ed arap to sinungdoan to so krus, ya imbantak to so baing, et imyurong ed kawanan na trono na Dios.”​—Hebreos 12:​1, 2.

3. (a) Antoy amakiwas ed si Daniel pian ‘ombatik a siaanos’? (b) Anton taloran nanduruman bengatla so imbaga na anghel nen Jehova ed si Daniel?

³ Kabiangan si Daniel ed ‘baleg a lurem na tastasi.’ Sikatoy peteg a sakey ed saramay ‘binmatik a siaanos,’ tan sikatoy apakiwas a gawaen itan lapud panangaro ton maong ed Dios. Dakel lay imparungtal nen Jehova ed si Daniel nipaakar ed arapen na saray gobierno ed mundo, balet impasabi To natan ed sikato iyan personal a panamaseseg: “Balet sika onla ka ed dalan mo angga ed kasumpalan; ta manpainawa ka naani, tan onalagey ka naani ed kapalaran mo, ed kasampotan na saray agew.” (Daniel 12:13) Imbaga na anghel nen Jehova ed si Daniel so taloran nanduruman bengatla: (1) si Daniel so ‘onla ed anggaan,’ (2) sikatoy “manpainawa,” tan (3) sikatoy “onalagey” lamet diad arapen a panaon. Panon a sarayan salita so mamaseseg ed saray Kristiano natan pian mansungdo anggad sampot diad lumba parad bilay?

‘Onla Ka ed Anggaan’

4. Antoy labay ya ibaga na anghel nen Jehova sanen inkuanton ‘onla ka ed anggaan,’ tan akin a nagmaliw itan ya angat ed si Daniel?

⁴ Anto so labay ya ibaga na anghel sanen inkuanto’d si Daniel: ‘Onla ka ed anggaan’? Anggaan na anto? Bueno, lapud ngalngali la 100 taon nen Daniel, mapatnag a tutukoyen na satan so anggaan na dilin bilay to, a nayarin asingsingger la.a Pinaseseg na anghel si Daniel a mansungdon matoor anggad patey. Balet aliwan mainomay so panggawa’d satan. Nambilay si Daniel ya anengneng toy inkagba na Babilonia tan say impawil ed Juda tan Jerusalem na saray nakdaan a Judion nibantak. Nanggayagaan komon itan na masiken lan propeta. Balet, anggapoy nirekord a sikatoy akiulop a nambiahe. Nayarin sikatoy masiken tan magapil lan maong ed satan a panaon. Odino ompan linawa ni nen Jehova ed sikaton mansiansia ed Babilonia. Antokaman so kipapasen, natural labat a panumamengan na sakey no kasin akailiw si Daniel sanen sinmempet ed Juda iray kabaleyan to.

5. Antoy mangipatnag a nansungdo si Daniel anggad anggaan?

⁵ Seguradon apabiskeg a maong si Daniel ed mapangasin balikas na anghel: ‘Onla ka ed anggaan.’ Nayarin nanonotan tayo iray balikas nen Jesu-Kristo, anemiran siglo ed saginonor: “Say misungdo ya angga ed kasampotan, sikato lanlamang so nilaban naani.” (Mateo 24:13) Seguradon ontan so ginawa nen Daniel. Sikatoy nansungdo anggad anggaan, a matoor a binmatik ed lumba na bilay anggad sampot na satan. Sakey itan a rason no akin a sikatoy paborablin atukoy ed Salitay Dios dia ed saginonor. (Hebreos 11:​32, 33) Antoy akatulong ed si Daniel a nansungdo anggad anggaan? Natulongan tayon naebatan itan unong ed rekord na impanbilay to.

Nansungdo Bilang Estudyante na Salitay Dios

6. Panon tayon amta a si Daniel et maseet ya estudyante na Salitay Dios?

⁶ Parad si Daniel, lanoren na say pansungdo anggad anggaan so pantultuloy a panaral tan panmorekdek a maong ed makapaliket iran sipan na Dios. Amta tayon si Daniel so masimoon ya estudyante na Salitay Dios. Ta no andi, panon ton naamtaan so sipan nen Jehova ed si Jeremias a say kibantak so manbayag na 70 a taon? Insulat a dili nen Daniel: “Siak . . . atalosan ko lapu ed saray libro so bilang na saray taon.” (Daniel 9:2; Jeremias 25:​11, 12) Andi duaruwa, sinukimat nen Daniel iray libro na Salitay Dios a wala ed saman. Saray sulsulat nen Moises, David, Solomon, Isaias, Jeremias, Ezequiel​—antokaman a walad sikato​—so maseguron angiter na dakel a makapaliket ya oras ed si Daniel a manbasa tan mandalepdep.

7. Sano ikompara tayoy panaon tayo ed panaon nen Daniel, antoray bentaha tayo diad panag-aral ed Salitay Dios?

⁷ Say panaral ed Salitay Dios tan panimatlek a maong ed satan, so makana pian nabayuboan tayoy panagsungdo natan. (Roma 15:​4-6; 1 Timoteo 4:15) Tan walad sikatayoy kompleton Biblia, a ditan et kaiba lay nisulat a rekord no panon ya asumpal iray propesiya nen Daniel ed inlabas na saray siglo. Niarum ni, abendito itayon manbibilay ed “panaon na anggaan,” a nipasakbay ed Daniel 12:​4, NW. Diad panaon tayo, abendito iray alanaan na maespiritual a pakatalos, ya onsisinag bilang silesilew na katuaan diad sayan abilungetan a mundo. Bilang resulta, dakel ed saray mairap ya ipatalos a propesiya diad libro na Daniel, ya arum et akakewkewan to, so makabkabaliksan ed sikatayo natan. Sirin, itultuloy tayon aralen ya inagew-agew so Salitay Dios, ya agbalot leglemewen irayan bengatla. Say panggawa’d satan so ontulong ed sikatayon mansungdo.

Nantultuloy a Nampikasi si Daniel

8. Anton alimbawa so impanengneng nen Daniel nipaakar ed pikakasi?

⁸ Tinmulong met ed si Daniel so pikakasi pian mansungdo anggad anggaan. Sikatoy inagew-agew a pinmanon ed si Jehova a Dios tan prangkan akitongtong ed sikato tekep na puson napnoy pananisia tan kompiyansa. Amta ton si Jehova so “Dumerengel na pikakasi.” (Salmo 65:​2, NW; ikompara so Hebreos 11:6.) Sanen naermenan a maong si Daniel lapud impanrebeldi na Israel, imbesngaw toy liknaan to ed si Jehova. (Daniel 9:​4-19) Anggan ingganggan nen Dario a sikato labat so pampikasian ed loob na 30 ya agew, ag-itan amatunda ed si Daniel a manpikasi ed si Jehova a Dios. (Daniel 6:10) Agta natenyeg so kapusoan tayo diad pangilitrato tayo’d kanonotan tayo a makpel ya inarap na matoor a masiken so kibuntok to ed abot a napno na saray leon imbes ya itunda to lay mablin pribilihyo a pampikasi? Andi-duaruwan si Daniel so matoor ed anggaan to, a manpipikasin masimoon ed si Jehova ya agew-agew.

9. Akin ya agtayo ibaliwala so pribilihyo a pampikasi?

⁹ Mainomay labat so pampikasi. Nayarian tayoy manpikasi ed amin a panaon, inerman, maksil odino makalna. Balet, agtayon balot ibaliwala iyan mablin pribilihyo. Insiglaot na Biblia so pikakasi ed panagsungdo, pantultuloy, tan pansiansian aliing ed espiritual. (Lucas 18:1; Roma 12:12; Efeso 6:18; Colosas 4:2) Agta alay abig ta walaan itayo na bulos tan lukas a paralanan na pitatalosan ed say sankatagyan a persona ed uniberso? Tan sikatoy ontalineng! Nonoten pa sanen nampikasi si Daniel, et bilang ebat angibaki na anghel si Jehova. Sinmabi so anghel leleg a manpipikasi ni si Daniel! (Daniel 9:​20-21) Agla nagagawa ed panaon tayo so ontan ya ibibisita na anghel, balet ta agni anguman si Jehova. (Malaquias 3:6) Singa ed impandengel to’d pikakasi nen Daniel, talinengen to met so pikakasi tayo. Tan no manpikasi tayo, onapit itayo ed si Jehova, a napawala so siglaotan ya ontulong ed sikatayon mansungdon angga ed anggaan, a singa ed ginawa nen Daniel.

Nansungdo Bilang Managbangat na Salitay Dios

10. Akin ya importanti ed si Daniel so pangibangat ed katuaan na Salitay Dios?

¹⁰ Diad arum a pantalos et kaukolan ya ‘onla [si Daniel] ed anggaan.’ Kaukolan a sikatoy mansungdo bilang managbangat na katuaan. Agton balot alingwanan a sikatoy sakey ed pinilin totoo a tinukoy na Kasulatan: “Sikayo so saray tasik, kuan nen Jehova tan say aripen ko a pinilik.” (Isaias 43:10) Ginawa nen Daniel so anggaay nayarian to pian nasumpal to itan a ganggan. Nayarin laktipen na kimey to so pambangat ed dilin kabaleyan to a nibantak ed Babilonia. Daiset so kabat tayo nipaakar ed impilimog to ed kapara toran Judio likud ed siglaotan to ed taloran atukoy ya ‘ibiba to’​—di Ananias, Misael, tan Azarias. (Daniel 1:7; 2:​13, 17, 18) Seguradon baleg so nitulong na maapit a pankakaaro ra pian makapansungdo so balang sakey ed sikara. (Uliran 17:17) Benendisionan nen Jehova si Daniel na nikabkabiig ya aralem a pakatalos, pian dakel so ibangat to ed kakaaro to. (Daniel 1:17) Balet wala ni arum ya ibangat to.

11. (a) Anto so nikabkabiig nipaakar ed kimey nen Daniel? (b) Panon kaepektibo si Daniel diad impanumpal to ed nikaduman kimey to?

¹¹ Nikabkabiig ed arum a propeta, ta say kimey nen Daniel et manpulong ed saray opisyal a Gentil. Anggaman mabetbet ya aliwan marakep iray mensahe to, agto impasen a sarayan manuley et kabkabusol odino singa abebbeba nen sikato. Sikatoy magalang tan marunong ya akitongtong ed sikara. Walay pigara​—singa saramay maimon tan managliput a satrapa​—a labay dan napapatey si Daniel. Ingen, sikatoy nirespeto na arum ya opisyal. Nibanbantog si Daniel lapud tinulongan nen Jehova ya ipaliwawa toray niyamot ya akakewkewan na saray arari tan makabat a lalaki. (Daniel 2:​47, 48; 5:29) Tua, lapud imamasiken to, aliwa lan mabiskeg a singa nen tobonbalo ni. Balet sikatoy seguradon linma ed anggaan to a siansia nin matoor a manggugunaet a makapanlingkor bilang tasi na inad-aro ton Dios.

12. (a) Antoran kimey na panagbangat so pibibiangan tayon Kristiano natan? (b) Panon tayon natumbok so simbawa nen Pablo a ‘mankurang ed karunongan ed saray wala ed paway’?

¹² Diad Kristianon kongregasyon natan, walaray matoor a kaulop ya ontulong ed sikatayon mansungdo, singa ed impantutulongan di Daniel tan saray taloran kaiba to. Manbabangatan itayo met tan ‘manpapasesegan.’ (Roma 1:​11, 12) Singa si Daniel, niganggan ed sikatayon pulongan iray agmananisia. (Mateo 24:14; 28:​19, 20) Kaukolan tayo sirin ya ubolen so dunong tayo pian ‘nausar a susto so katuaan a salita’ sano itongtong tayo ed totoo so nipaakar ed si Jehova. (2 Timoteo 2:15) Tan ontulong itan no tuloken tayo so simbawa nen apostol Pablo: “Mankurang kayo’d karunongan ed saray wala ed paway.” (Colosas 4:5) Laktipen na satan a kakabatan so asimbang a panmoria ed saramay agtayo kapananisiaan. Agtayo melmelagen iratan a totoo, ya ipasen ya atagtagey itayo. (1 Pedro 3:15) Imbes, panggunaetan tayon naayat ira ed katuaan, ya usaren so Salitay Dios diad mataktika tan marunong a paraan pian nasabi kapusoan da. Magaygayaga tayo sano walay matalonan napulongan tayo! Say ontan a gayaga so seguradon ontulong ed sikatayon mansungdo anggad anggaan, a singa si Daniel.

‘Manpainawa Ka’

13, 14. Akin a tatakotan na dakel a taga-Babilonia so ipapatey, tan panon a duma so panmoria nen Daniel?

¹³ Insan pinaseguroan na anghel si Daniel: ‘Manpainawa ka.’ (Daniel 12:13) Antoy kabaliksan na saratan a salita? Bueno, amta nen Daniel a sikatoy magano lan ompatey. Say patey so agnapaliisan ya anggaan na amin a katooan, manlapud agew nen Adan anggad natan. Sustoy impanawag na Biblia ed patey bilang “kabusol.” (1 Corinto 15:26) Balet, parad si Daniel say ilalon ipatey, duman tuloy so kabaliksan to ed saray taga-Babilonia a kalimog to. Lapud ta nigalet ira ed makawetwet a panagdayew ed ngalngali 4,000 a palson dirios, dakel so natatakot ed ipapatey. Panisiaan dan kayari ipatey et saramay nambilay a maermen odino mauges so impatey da et magmaliw iran manangibales ya espiritu a man-anyani ed saray mabilay. Panisiaan met na saray taga-Babilonia so makapakigtot ya ayaman na inaatey, a kawalaan na makapataktakot iran olimaw diad itsura na too odino ayep.

¹⁴ Aliwan ontan so pananisia nen Daniel ed ipapatey. Nilasus taon sakbay na panaon nen Daniel, pinuyanan na Dios si Arin Solomon a nankuan: “Saray inaatey agda amta so bengatla.” (Eclesiastes 9:5) Tan no nipaakar ed ompatey, inkanta na salmista: “Say panlinlinawa to ompaway, ompawil ed dalin to; dia ed satan lanlamang ya agew saray nonot to natawtaw ira.” (Salmo 146:4) Kanian amta nen Daniel a tua iray imbaga na anghel ed sikato. Painawa so kabaliksan na patey. Anggapoy kanonotan, anggapoy pirmin kaermenan, anggapoy panamairap​—tan seguradon anggapo iray olimaw. Mipadpara met so imbalikas nen Jesu-Kristo sanen inatey si Lazaro. Inkuanto: “Si kaaro tayon Lazaro naugip [“amainawa,” NW].”​—Juan 11:11.

15. Panon a say agew na ipatey et magmaong nen say agew na kianak?

¹⁵ Konsideraen so sananey a rason no akin a say ipapatey et agtinakotan nen Daniel. Inkuan na Salitay Dios: “Say sakey a maong a ngaran sikato so magmaong nen say mabli [“maong,” NW] a larak; tan say agew na ipatey, nen say agew na kianak.” (Eclesiastes 7:1) Panon a say agew na ipatey, a peteg a panaoy ermen et magmaong ni nen say magayagan agew na inkianak? Say tombok et lapud “ngaran.” Nayarin mabmabli so “maong a larak.” Aminsan et pinuyokan nen Maria ya agi nen Lazaro iray sali nen Jesus na pabalingit a manbili na ngalngalin sakey taon a sueldo! (Juan 12:​1-17) Panon ya ontanlan kamabli so ngaran? Diad Eclesiastes 7:​1, asalambit ed Griegon Septuagint so, “maong a ngaran.” Aliwan say ngaran labat so mabmabli noagta say ilalaman na satan. Diad inkianak to, anggapo ni so reputasyon, anggapoy rekord na maabig iran gawa, anggapo ni so pinabblin nanodnonotan ed personalidad tan saray kualidad na akanngaran. Balet diad pangangga na bilay, saglawien na ngaran irayan amin a bengatla. Tan no satan et maong a ngaran ed panmoria na Dios, lalon mabli itan nen say dinanman a materyal a kaykayarian.

16. (a) Panon a nanggunaetan nen Daniel a manggaway maong a ngaran ed Dios? (b) Akin a makapanpainawa si Daniel tekep na sigpot a kompiyansan sikatoy matalonan akagaway maong a ngaran ed si Jehova?

¹⁶ Diad intiron bilay to, ginawa nen Daniel so anggaay nayarian to pian makagawa na maong a ngaran ed Dios, et sankanonot itan nen Jehova. Sankanengneng toy Daniel tan inusisa To so puso to. Dakel so ginawa na Dios parad si Arin David, ya angikanta: “O Jehova, sika sinukayan moak, et akabatan moak. Sika antam so kayuyurong ko tan say kakaalagey ko; sika natalosan mo so nonot ko a wala ni ed arawi.” (Salmo 139:​1, 2) On, ag-ayadyari si Daniel. Sikato so kapolian nen nankasalanan ya Adan tan kabiangan na makasalanan a nasyon. (Roma 3:23) Balet ta nagbabawi si Daniel ed kasalanan to tan nanggunaet a manakar a kaibay Dios diad maptek a dalan. Sirin nanmatalek so matoor a propeta a perdonaen nen Jehova iray kasalanan to tan agto lan balot pan-ememan si Daniel. (Salmo 103:​10-14; Isaias 1:18) Nodnonoten nen Jehova iray maabig a gawa na matoor iran lingkor to. (Hebreos 6:10) Kanian, si Daniel so amiduan tinawag na anghel nen Jehova bilang “too a makapaay-ayat.” (Daniel 10:​11, 19, NW) Labay ton ibaga a si Daniel et inad-aro na Dios. Makapanpainawa si Daniel tekep na inkapnek, ta amta ton sikatoy akagawa na maong a ngaran ed si Jehova.

17. Akin a kakkaukolan a manggawa itayo na maong a ngaran ed si Jehova natan?

¹⁷ Maong no itepet na balang sakey ed sikatayo, ‘Kasin walaan ak la na maong a ngaran ed si Jehova?’ Manbibilay tayo ed magulon panaon. Aliwan makapasinagem itan noagta nepeg labat a bidbiren a nayarin nasabian itayoy ipapatey ed dinanman a panaon. (Eclesiastes 9:11) Makanakana sirin a determinado so balang sakey ed sikatayo a nawalaan na maabig a ngaran ed Dios natan, agla ipapaleen. No gawaen tayo itan, agtayo ontakot ed ipapatey. Sakey labat itan a painawa​—singa ugip. Tan singa ugip, tumbokan itan na iliing!

“Onalagey Ka Naani”

18, 19. (a) Antoy labay ya ibaga na anghel sanen impasakbay to’d si Daniel ya “onalagey” diad arapen? (b) Akin a kabisado la nen Daniel so ilalon kioli?

¹⁸ Nansampot so libro na Daniel ed sakey ed saray sankarakpan a sipan na Dios ed too. Inkuan na anghel nen Jehova ed si Daniel: “Onalagey ka naani ed kapalaran [“apag,” NW] mo, ed kasampotan na saray agew.” Antoy labay ya ibaga na anghel? Bueno, lapud say “painawa” a tinukoy to et say patey, say sipan ya “onalagey” si Daniel ed arapen a panaon et mankabaliksan lambengat na​—kioli!b Diad tua, pinekderan na pigaran iskolar a lugan na Daniel kapitulo 12 so pilimeron mabitar ya impanukoy ed kioli a naromog ed Hebreon Kasulatan. (Daniel 12:2) Balet, alingo ira’d saya. Kabkabisado nen Daniel so ilalon kioli.

¹⁹ Alimbawa, seguradon kabat nen Daniel irayan salita ya inrekord nen Isaias ed akadkaunan duaran siglo: “Saray inatey mo ombilay ira; saray inaatey a laman ko onalagey ira. Liing tan mankanta kayo, sikayo a manayam dia ed dabok; [Ta] . . . say dalin ipaway da naani so saray inatey.” (Isaias 26:19) Abayag la sakbay na satan, inikdan nen Jehova na pakayari si Elias tan Eliseo pian aktual a mamaoli. (1 Arari 17:​17-24; 2 Arari 4:​32-37) Asasakbay met ni, si Ana, say ina nen propeta Samuel, so amidbir a sarag nen Jehova a paolien so totoo manlapu ed Sheol, say lubok. (1 Samuel 2:6) Asasakbay ni, imbalikas nen matoor a Job so dilin ilalo to unong ed sarayan salita: “No say sakey a too ompatey, ombilay ta lamet? Amin iray agew na pibabakal ko alagden ko, angga ed say kabulos ko onsabi. Ontawag ka, et onebat ak ed sika. Manpilalek ka ed gawa na saray limam.”​—Job 14:​14, 15.

20, 21. (a) Anton kioli a seguradon kabiangan si Daniel? (b) Diad anton paraan so nayarin kagawa na kioli ed Paraiso?

²⁰ Singa si Job, walay rason a manmatalek si Daniel a tuan pilalek nen Jehova so kioli to ed arapen. Siansia, makapaligliwan tuloy so pakadngel ed sakey a mabiskeg ya espiritun pinalsa ya amekder ed satan ya ilalo. On, onalagey si Daniel diad “kioli ed bilay na saray matunong,” a nagawa legan na Milenyon Uley nen Kristo. (Lucas 14:14) Anto kasi nagawa ed satan parad si Daniel? Dakel so ibaga ed sikatayo na Salitay Dios unong ed satan.

²¹ Si Jehova so “aliwan Dios na kolkol, noag kareenan.” (1 Corinto 14:33) Mapatnag sirin a mauksoy so kagawa na kioli dia ed Paraiso. Nayarin daiset labat a panaon so onlabas kayari na Armagedon. (Apocalipsis 16:​14, 16) Amin a pakasuysoyan na daan a sistema na bengabengatla so napunas la, tan seguradon walaray preparasyon pian abeten iray inaatey. No nipaakar ed kagawa na ipawil na inaatey, inter iya na Biblia a pangaligan: “Balang sakey dia ed dilin bilang [“kipapasen,” NW] to.” (1 Corinto 15:23) Ompatnag a sano onsabi ‘so kioli na matunong tan agmatunong,’ unona nin onoli so matunong. (Gawa 24:15) Diad ontan a dalan, saray matoor a lalaki nensaman, singa si Daniel, so makatulong ed panangasikaso ed saray nagawa ed dalin, laktip lay pangibangat ed binilyon iran “agmatunong” ya onoli’d bilay.​—Salmo 45:16.

22. Anton pigaran tepet so seguradon pirawat nen Daniel a naebatan?

²² Sakbay ya akaparaan si Daniel a mangako ed saratan a responsabilidad, seguradon wala niray itepet to. Likud ni, no nipaakar ed pigaran malaknab a propesiya a nimatalek ed sikato, inkuanto: “Nadngel ko balet agko atalosan.” (Daniel 12:8) Agaylay liket to ta natalosan to lan siansia irayan sagradon sekreto! Maseguron labay ton narengelan so nipaakar ed Mesias. Mankelkelaw si Daniel a naaralan toy nipaakar ed impantutumbokan na saray sankamundoan a pakayari manlapud panaon to anggad panaon tayo, nipaakar ed pakabidbiran na “saray [matoor a] sasanto na Sankatageyan”​—a nansungdo anggaman ed panamasegsegang legan na “panaon na anggaan”​—tan nipaakar ed sigpot lan impanderal na Mesianikon Panarian na Dios ed amin a panarian na too.​—Daniel 2:44; 7:22; 12:4.

Say Apag nen Daniel Diad Paraiso​—Tan say Apag Yo!

23, 24. (a) Panon a say mundon panayaman naani nen Daniel kayari na iyoli to so miduma ed datin amta to? (b) Kasin walay pasen nen Daniel diad Paraiso, tan panon tayon amta?

²³ Labay nen Daniel a nakabatan so nipaakar ed mundon panayaman to ed satan a panaon​—mundon miduma ed panaon to. Anggapo lay pakasuysoyan ed saray guerra tan panamairap ya aneral ed mundon kabat to. Naani anggapo lay ermen, anggapo lay sakit, anggapo lay ipapatey. (Isaias 25:8; 33:24) Balet dakel naani so tagano, amayamay a panayaman, tan makapnek a kimey parad amin. (Salmo 72:16; Isaias 65:​21, 22) Mankakasakey tan maliket lan pamilya so katooan.

²⁴ Seguradon walay pasen nen Daniel ed satan a mundo. ‘Onalagey ka naani para ed apag mo,’ inkuan na anghel ed sikato. Say Hebreon salita a nipatalos dia ya “apag” et mipara ed nausar a parad literal a lote.c Nayarin kabisado nen Daniel so propesiya nen Ezequiel unong ed impangapag ed nipawil a dalin na Israel. (Ezequiel 47:13–48:35) No nasumpal itan diad Paraiso, anto so ipatnag na propesiya nen Ezequiel? Wala so pasen na amin a totoo na Dios diad Paraiso, a mauksoy tan parpareho ni ingen so kaapag na mismon dalin. Siempre, aliwa labat lan dalin so apag nen Daniel dia ed Paraiso. Laktipen na satan so betang to diad gagala na Dios diman. Nagarantiyaan so nisipan a tumang nen Daniel.

25. (a) Anton pigaran ilaloan a kabibilay diad Paraiso so makapasagyat ed sikayo? (b) Akin a nibagan say Paraiso so nakayarian na totoo?

²⁵ Balet, komusta met so apag yo? Onkana met ed sikayo irayan sipan. Labay nen Jehova ya “onalagey” so matulok a totoo parad apag da, a walaay pasen da dia ed Paraiso. Isipen yo pa labat! Seguradon makapaliket a nakatongtong si Daniel, kaibay arum nin matoor a lalaki tan bibii ed panaon na Biblia. Insan dakerakel naani so nabilay, a kaukolan ya ibangat ta pian naamtaan tan naaro ra si Jehova a Dios. Ilitrato yo pay inkasikayon mangaasikaso ed mangaraldalin ya ayaman tayo tan ontutulong kayon pagmaliwen itan a paraiso a walaay agmanganggan pandurumaan tan agnaumas a karakpan. Isipen ya ibabangat kayo nen Jehova, a naaralan so paraan na bilay a kinaliktan to parad katooan. (Isaias 11:9; Juan 6:45) On, walay pasen yo ed Paraiso. Anggaman singa agpanisiaan na arum natan so Paraiso, nonoten a sipor a denisinyo nen Jehova so katooan a manbilay ed satan a pasen. (Genesis 2:​7-9) Diad ontan a pantalos, say Paraiso so natural ya ayaman na binilyon diad dalin. Dia so panayaman da. Say pakagamor ed satan et singa say isempet ed abung da.

26. Panon a binidbir nen Jehova a mairap so panalagar tayo ed anggaan na sayan sistema na bengabengatla?

²⁶ Agta pantintindekan na kapusoan tayo tekep na apresasyon no nodnonoten tayo iyan amin? Agta pirawat yon wadman kayo naani? Sirin, agpankelawan no akin a magunaet ya amtaen na saray Tastasi nen Jehova no kapigay isabi na anggaan na sayan sistema na bengabengatla! Mairap so manalagar. Amta nen Jehova itan, ta pinaseseg to itayo ya ‘alagaren’ so anggaan ‘anggan satan so naabala.’ Labay Ton ibaga a no singa naabala itan unong ed panmoria tayo, ta diad satan met a teksto et apaseguroan itayon: “Agmanbayag.” (Habacuc 2:3; ikompara so Uliran 13:12.) On, onsabi anggaan ed aturon panaon.

27. Antoy nepeg yon gawaen ta pian makaalagey kayon andi-anggaan ed arap na Dios?

²⁷ Antoy nepeg yon gawaen leleg a manasingger so anggaan? Singa si Daniel ya inad-aron propeta nen Jehova, mansungdo a sitotoor. Maseet yon aralen so Salitay Dios. Masimoon kayon manpikasi. Simamaaro kayon milimog ed saray kapananisiaan. Maseseg yon ibangat ed arum so katuaan. Lapud agew-agew lan manasingger so anggaan na sayan marelmeng a sistema na bengabengatla, mansiansia kayon determinado a magmaliw a matoor a lingkor na Sankatageyan tan agnagiing a manangitandoro ed Salita to. Seguroen yon imanoen so propesiya nen Daniel! Tan ipagamor komon ed sikayo nen Soberanon Katawan a Jehova so pribilihyo na magayagan iyalagey ed arap to dia ed andi-anggaan!

[Saray paimano ed leksab]

ANTO SO ATEBEK YO?

• Antoy akatulong ed si Daniel a mansungdo anggad anggaan?

• Akin ya agtinmakot si Daniel ed ipapatey?

• Panon a nasumpal so sipan na anghel ed si Daniel a sikatoy ‘onalagey parad say apag to’?

• Panon kayon mismon agunggunaan diad impangimano yo ed propesiya nen Daniel?