Imanoen so Propesiya nen Daniel!

Kapitulo Desi Siete

Pangibiigan ed Saray Tuan Managdayew ed Panaon na Anggaan

1. Unong ed Daniel kapitulo 7, antoran nikadkaduman eksperiensia so sagmaken na daiset tan andiay salimbeng a grupo na totoo ed panaon tayo?

MARUKSAN inataki na mabiskeg a sankamundoan a pakayari so melag tan anggapoy salimbeng a grupo na totoo. Sikaray akaliktar tan apasimbalo ni ingen​—aliwan resulta na dilin biskeg da noagta lapud sikaray pinabli nen Jehova. Nipasakbay ed Daniel kapitulo 7 irayan ebento, ya agawa diad gapo na koma-20 a siglo. Balet, sioparayan totoo? Tinukoy iratan na saya lanlamang a kapitulo na Daniel bilang “saray sasanto na Sankatageyan,” si Jehova a Dios. Imparungtal met na satan a sarayan indibidual so magmaliw a kaiban manuley dia ed Mesianikon Panarian!​—Daniel 7:13, 14, 18, 21, 22, 25-​27.

2. (a) Komusta so liknaan nen Jehova nipaakar ed saray alanaan a lingkor to? (b) Antoy makabat a kurang a tumboken diad sarayan panaon?

² Singa naaralan tayo la ed Daniel kapitulo 11, manganggan siansia so ari na amianen kayari ton pinagyaw so maligen ya espiritual a dalin na sarayan matoor a totoo. (Daniel 11:45; ikompara so Ezequiel 38:18-23.) On, sasalimbengan a maong nen Jehova iray matoor ya alanaan to. Inkuan ed sikatayo na Salmo 105:14, 15: “Angekal [si Jehova] na arari nisengeg ed sikara, a kuan to, Agyo diwiten so saray pinuyokan ko, tan agkayo manggawa na duksa ed saray propetas ko.” Sirin, agta onabobon kayo a diad sarayan magulon panaon et makabat parad ondarakel a “baleg ya ulop” so maapit a miulop ed sarayan sasanto ed anggaay nayarian da? (Apocalipsis 7:9; Zacarias 8:23) Eksakton ontan so impaseseg nen Jesu-Kristo a gawaen na saratan a kinmarneron totoo​—a miulop ed saray alanaan ya espiritual ya agagi to diad pitulongan da ed kimey da.​—Mateo 25:31-46; Galacia 3:29.

3. (a) Akin ya aliwan mainomay ya anapen iray nakdaan a patumbok nen Jesus tan mansiansian onapit ed sikara? (b) Panon a makatulong so Daniel kapitulo 12 nipaakar ed saya?

³ Balet, say Kabusol na Dios, si Satanas, so pirmin mibabakal ed saray alanaan. Inyalibansa toy palson relihyon tan maaligwas ton pinano so mundo na alig-alig iran Kristiano. Bilang resulta, dakel a totoo so nibalang la. Adismaya so arum lapud agda naromog iramay mangilalaman na tuan relihyon. (Mateo 7:15, 21-23; Apocalipsis 12:9, 17) Anggan saramay akaromog ed “melag a pulok” tan akiulop ed sikara so nepeg a mipuligesgesan pian napansiansia so pananisia ra, ta lawas a panggugunaetan na sayan mundo a pakapuyen so pananisia. (Lucas 12:32) Komusta kayo met? Kasin aromog yo la ‘iray sasanto na Sankatageyan,’ insan mililimog kayo la ed sikara? Kasin kabat yoy malet ya ebidensia a mamaneknek a saramay aromog yo et talagan pinili na Dios? Say ontan ya ebidensia so mamaelet na pananisia yo. Nakinlongan kayo met pian tulongay arum a makatebek ed pakawetwetan ed relihyon ed mundo natan. Lugan na kapitulo 12 na Daniel iyan malaknab a manangisalbay-bilay a pikakabat.

Onkiwas so Matalonggaring a Prinsipe

4. (a) Anton duaran nandumaan a bengatla so impasakbay na Daniel 12:1 nipaakar ed si Miguel? (b) Diad Daniel, antoy mabetbet a kabaliksan na ‘panalalagey’ na ari?

⁴ Nabasa ed Daniel 12:1, unong ed New World Translation: “Legan na satan a panaon onalagey si Miguel, say baleg a prinsipe a sikatoy manalalagey dia ed biang na saray anak na totoo yo.” Impasakbay na sayan bersikulo iyan duaran nandumaan a bengatla nipaakar ed si Miguel: say sakey et sikatoy “manalalagey,” ya isusuheri toy nagawgawa ya onnatnat ed sakey a panaon; say komadua et sikatoy “onalagey,” ya isusuheri toy nagawa legan na satan a panaon. Unona, kaliktan tayon naamtaan no kapigan a “manalalagey [si Miguel] dia ed biang na saray ananak na totoo [nen Daniel].” Tandaan a say Miguel so ngaran a niiter ed si Jesus diad betang to bilang mangatatawen a Manuley. Say impanukoy ed ‘panalalagey’ to so mangipanonot ed sikatayo ed inkausar na satan a termino diad arum a parti na libro na Daniel. Mabetbet et tutukoyen na satan so kiwas na sakey ya ari, a singa say igapo to ed maarin pakayari.​—Daniel 11:2-4, 7, 20, 21.

5, 6. (a) Diad anton panaon ya onalagey si Miguel? (b) Kapigan tan panon ya “onalagey” si Miguel, tan antoray resulta?

⁵ Mapatnag ya ituturo dia na anghel so sakey a panat na panaon a sinaglawi diad propesiya na Biblia. Tinawag itan nen Jesus a “kiwawala” to (Griego, pa·rou·siʹa), sano sikato so manuley lan Ari diad tawen. (Mateo 24:37-39, NW) Atawag met itan a panaon a “saray kaunoran ya agew” tan “say panaon na anggaan.” (2 Timoteo 3:1; Daniel 12:4, 9 NW) Nanlapu la’d inggapo na satan a panaon nen 1914, manalalagey la si Miguel bilang Ari diad tawen.​—Ikompara so Isaias 11:10; Apocalipsis 12:7-9.

⁶ Balet, kapigan ya “onalagey” si Miguel? Sikatoy nikaduman onkiwas no sikatoy ontalindeg. Ontan so gawaen nen Jesus ed arapen. Mapropetikon deneskribe na Apocalipsis 19:11-16 si Jesus bilang makapanyarin Mesianikon Ari ya akakabayon mangidadaulo na armada na anghel pian deralen iray kakabusol na Dios. Intuloy na Daniel 12:1: “Wala naani sakey a panaon na gonigon, a sikato so anggapo nensaman anggan kapigan a nanlapu ed inkiwala na nasyon angga lanlamang ed satan a panaon.” Bilang Manunan Managderal a tinuro nen Jehova, panganggaen nen Kristo so intiron marelmeng a sistema na bengabengatla legan na nipasakbay a “baleg ya irap.”​—Mateo 24:21; Jeremias 25:33; 2 Tesalonica 1:6-8; Apocalipsis 7:14; 16:14, 16.

7. (a) Antoy ilaloan na saray matoor legan na isabi na “panaon na gonigon”? (b) Anto so libro nen Jehova, tan akin et makana a naromog itayo ed satan?

⁷ Komusta met iray totoon mangaagamil na pananisia legan na sayan makapasinagem a panaon? Intuloy ya inkuan ed si Daniel: “Dia ed satan a panaon say baley mo nilaban naani, balang sakey a naromog naani a nisulat ed libro.” (Ikompara so Lucas 21:34-36.) Anto iyan libro? Bilang segek, irerepresenta na satan so pannonot nen Jehova a Dios ed saramay manggagawa na linawa to. (Malaquias 3:16; Hebreos 6:10) Saramay nisulat ed sayan libro so sankaligenan a totoo ed mundo, ta panggagayagaan day salimbeng na Dios. Antokamay onsabin kasakitan da, naekal tan mangangga itan. Anggano ompatey nira sakbay ya onsabi iyan “panaon na gonigon,” mansiansia ira ed anggapoy anggaan a kanonotan nen Jehova. Nanonotan to ra insan to ra paolien legan na Sanlibon Taon ya Uley nen Jesu-Kristo.​—Gawa 24:15; Apocalipsis 20:4-6.

“Naliing” Iray Sasanto

8. Anton makapaliket ya ilalo so iyoopresi na Daniel 12:2?

⁸ Talagan makapaligliwa so ilalon kioli. Sinaglawi na Daniel 12:2 so ontan, a kuanto: “Dakel ed saray naugip ed dabok na dalin, naliing ira naani, say arum nipaakar ed maando a bilay tan say arum nipaakar ed kibabaing tan maando a gonigon.” (Ikompara so Isaias 26:19.) Ipanonot a maong ed sikatayo na sarayan salita so makapaliket a sipan nen Jesu-Kristo ya inkalapagan a kioli. (Juan 5:28, 29) Makapalikliket ya ilalo! Isipen pa ray kakaaro tan pamilya​—ya inatey la​—a naikdan na pankanawnawan nabilay lamet ed arapen! Balet sayan sipan ed libro na Daniel so manunan manutukoy ed sananey a klase na kioli​—ta samay sakey et agawa la. Panon ya ontan?

9. (a) Akin et makatunongan ya ilaloan a nasumpal so Daniel 12:2 diad saray kaunoran ya agew? (b) Anton klase na kioli so tinukoy na propesiya, tan panon tayon naamtaan?

⁹ Konsideraen so konteksto. Onaplika so pilimeron bersikulo ed kapitulo 12, singa anengneng tayo la, ya aliwa labat a diad anggaan na sayan sistema na bengabengatla noagta ontan met ed intiron panaon na saray kaunoran ya agew. Diad tua, maslak ed sayan kapitulo so nasusumpal la, aliwan diad onsabin mangaraldalin a paraiso, noagta legan na panaon na anggaan. Kasin walay kioli diad sayan panaon? Insulat nen Pablo so nipaakar ed kioli na “saray kien nen Kristo” a nagawa ‘legan na kiwawala to.’ Balet, saramay onoli ed bilay diad tawen so onolin “agnaderal.” (1 Corinto 15:23, 52) Ag-iratan napaoli “nipaakar ed kibabaing tan maando a kagonigon” a singa nipasakbay ed Daniel 12:2. Kasin wala ni sananey a kioli? Diad Biblia, no maminsan say kioli so walaay maespiritual a kabaliksan. Alimbawa, lugan na Ezequiel tan Apocalipsis iray mapropetikon balikas ya onaplika ed ibilay, odino iyoli ed espiritual.​—Ezequiel 37:1-14; Apocalipsis 11:3, 7, 11.

10. (a) Diad anton pantalos ya apaoli iray alanaan a nakdaan diad panaon na anggaan? (b) Panon a pigara ed saray alanaan so apaoli balet ta aliing ed “kibabaing tan maando a kagonigon”?

¹⁰ Kasin agawa lay imbilay ed espiritual na saray alanaan a lingkor na Dios diad panaon na anggaan? On! Tuan agawa itan unong ed awaran a nen 1918, say daiset a nakdaan na saray matoor a Kristiano so pirmin inataki kanian apaer so organisadon panagpulong da. Insan, anggaman singa mairap a nagawa, nen 1919 sikaray binmilay ed espiritual a pantalos. Ontukoy irayan agawa ed deskripsion na kioli a nipasakbay ed Daniel 12:2. Arum so ‘aliing’ ed espiritual diad satan a panaon tan diad kayari na satan. Balet, makapaermen ta aliwan amin so nansiansian mabilay ed espiritual. Impulisay na saramay aliing la so Mesianikon Ari tan intunda ra lay panlingkor ed Dios kanian agamoran day ‘kibabaing tan maando a gonigon’ ya adeskribe ed Daniel 12:2. (Hebreos 6:4-6) Balet, saray matoor ya alanaan, a maabig dan inusar so kipapasen da bilang binmilay ed espiritual, so matoor a nansuporta ed Mesianikon Ari. Diad kaunoran, say inkamatoor da so nansumpal ed “maando a bilay,” a singa inkuan na propesiya. Natan, say kasil da ed espiritual anggan diad arap na isusumpa so ontulong ed sikatayon nibiig iratan.

Sikaray ‘Onsinag a Singa Saray Bitewen’

11. Siopara natan ‘iray makabat,’ tan diad anton pantalos a sikaray onsinag a singa saray bitewen?

¹¹ Say ontumbok a duaran bersikulo na Daniel kapitulo 12 so lalo nin makatulong ed sikatayo pian nibiig ‘iray sasanto na Sankatageyan.’ Diad bersikulo 3 inkuan na anghel ed si Daniel: “Saray makabat onsinag ira naani a singa sinag na tawen; et saray mangipawit na dakerakel ed inkatunong singa ra naani saray bitewen ed ando lan ando lawas.” Siopa irayan “makabat” natan? Lamet, ipatnag na ebidensia a saratan met ‘iramay sasanto na Sankatageyan.’ Tutal, siopa ni likud ed matoor ya alanaan a nakdaan so walaan na aralem a pakatalos pian natebek dan si Miguel, say Baleg a Prinsipe, so inmalagey lan Ari nen 1914? Diad impangipulong ed saratan a katuaan a singa saya​—ontan met diad panmantini ed kondukta ra bilang Kristiano​—sikara lay “mansinag a singa saray silew” diad sayan ambilunget ed espiritual a mundo. (Filipos 2:15, NW; Juan 8:12) Nipaakar ed sikara, impropesiya nen Jesus: “Saman la onsinag so saray matunong a singa say banwa ed panarian nen Ama ra.”​—Mateo 13:43.

12. (a) Diad panaon na anggaan, panon ya apilanor iray alanaan a ‘mangawit na dakerakel ed inkatunong’? (b) Panon a naawit na saray alanaan so dakerakel ed inkatunong tan ‘onsinag a singa saray bitewen’ diad Sanlibon Taon ya Uley nen Kristo?

¹² Inkuan ni ed sikatayo na Daniel 12:3 so kimey a gagawaen na sarayan alanaan a Kristiano diad panaon na anggaan. Sikara so “mangipawit [“mangawit,” NW] na dakerakel ed inkatunong.” Inggapon tugyopen na saray alanaan a nakdaan so nakekeraan nin bilang na 144,000 a kaiban tomatawir nen Kristo. (Roma 8:16, 17; Apocalipsis 7:3, 4) Sanen asumpal itan a kimey​—nayarin diad kapegleyay dekada na 1930​—ginapoan dan tiponen so “baleg ya ulop” na “arum a karnero.” (Apocalipsis 7:9, Juan 10:16) Manisia met iraya ed dondon bagat nen Jesu-Kristo. Sirin, malinis so talindeg da ed arap nen Jehova. Sikaray manbilang la natan na minilyon tan panliliketan day ilalon makaliktar ed onsabin kaderal na sayan marelmeng a mundo. Legan na Sanlibon Taon ya Uley nen Kristo, ipagamor la nen Jesus tan saray 144,000 a kaiba ton arari tan saserdote ed matulok a katooan diad dalin iray nagnap a gungguna na dondon, diad ontan et natulongan ya amin iramay mangagamil na pananisia a naekal lan amin so epekto na kasalanan ya atawir ed si Adan. (2 Pedro 3:13; Apocalipsis 7:13, 14; 20:5, 6) Diad sigpot a pantalos, mibiang iray alanaan diad ‘pangawit ed dakerakel ed inkatunong’ tan ‘onsinag a singa saray bitewen’ diad tawen. Kasin papablien yo so ilalon manbilay diad dalin ed silong na maglorian mangatatawen a gobierno nen Kristo tan saray kaiba ton manuley? Agaylan pribilihyo a nakaiba ‘iray sasanto’ a mangipulong ed sayan maong a balita na Panarian na Dios!​—Mateo 24:14.

“Manpawilpawil” Ira

13. Diad anton pantalos ya atatakan tan niyamot iray salita ed libro na Daniel?

¹³ Mansampot lay deklarasyon na anghel ed si Daniel, a ginmapo la diad Daniel 10:20, ed sarayan makapaligsay-puson salita: “Balet sika O Daniel, kapotan mo so saray salita, tan talakan mo so libro angga lanlamang ed panaon na kasumpalan. Dakerakel naani so saray ombatik ya onla tan ompawil [“manpawilpawil,” NW], tan say pikakabat ondaak naani.” (Daniel 12:4) Karaklan ed apuyanan ya insulat nen Daniel so tuan niyamot tan atatakan ed pakatalos na too. Insulat a mismo nen Daniel ed saginonor: “Nadngel ko balet agko atalosan.” (Daniel 12:8) Unong ed saya nansiansian atatakan so libro na Daniel ed pigaran siglo. Komusta met natan?

14. (a) Diad “panaon na anggaan,” siopa so ‘nampawilpawil,’ tan iner? (b) Antoy ebidensia a benendisionan nen Jehova iyan ‘panpawilpawil’?

¹⁴ Pribilihyo tayoy manbilay ed “panaon na anggaan” a nipasakbay dia ed libro na Daniel. Singa nipropesiya la, dakel a matoor so ‘nampawilpawil’ diad saray pahina na Salitay Dios. Antoy resulta? Lapud panamendision nen Jehova, dinmaak so tuan pikakabat. Saray matoor ya alanaan a Tastasi nen Jehova so abendisionan tekep na aralem a pakatalos pian natalosan dan say Anak na too so nagmaliw lan Ari nen 1914, pian nabidbir da iray ayayep ed propesiya nen Daniel, pian napasakbayan ed “say makapadimlan bengatla a sengegan na pankibalatar”​—saraya labat so pigaran alimbawa. (Daniel 11:31) Sirin, sayan daakan a pikakabat so sakey nin pakapangibiigan a tanda na “saray sasanto na Sankatageyan.” Balet ta akaawat ni na kaaruman ya ebidensia si Daniel.

‘Nabuybuyak’ Ira

15. Antoy intepet natan na anghel, tan siopara so ipanonot ed sikatayo na sayan tepet?

¹⁵ Nanonotan tayo ya inawat nen Daniel irayan mensahe na anghel diad gilig na “baleg ya ilog” a Jidekel, a kabat met a Tigris. (Daniel 10:4) Dia to anengneng so taloran pinalsa iran anghel insan to inkuan: “Saman la siak, si Daniel, ninmengneng ak, et nia, inmalagey so saray duara a sananey, say sakey ed gilig na ilog ed saya a diking, et say sananey ed gilig na ilog ed satan a diking. Et say sakey inkuan to ed laki a nankawes na lienzo, a sikato so wala nensaman ed tagey na saray danum na ilog. Kaunongan naani kabayag to angga ed kasumpalan na saraya a pakpakelaw?” (Daniel 12:5, 6) Say intepet na anghel dia so nayarin mangipanonot ed sikatayo ed “saray sasanto na Sankatageyan.” Diad kagapo na “panaon na anggaan,” nen 1914, sikaray apagaan a maong ed say tepet no kaunongan kabayag ni so kasumpalan na saray sipan na Dios. Say ebat ed sayan tepet et mangipatnag a sikara so akasentroan na sayan propesiya.

16. Anton propesiya so imbalikas na anghel, tan panon ton indanet so inkaseguro na kasumpalan na satan?

¹⁶ Intuloy na salaysay nen Daniel: “Et nadngel ko so too a nankawes na lienzo, a sikato so wala nensaman ed tagey na saray danum na ilog, sanen intagey to so kawanan a lima to tan say kawigi a lima to ya impaatagey, tan insamba to ed saman so manbilay ed ando lan ando, a nipaakar naani ed sakey a panaon, saray panaon, tan sakey a kapaldua; et sano ginawa ra so kasumpalan na kabuybuyak na pakayari na masanto a baley, saray amin a bengabengatla nasumpal ira naani.” (Daniel 12:7) Seryoso iyan bengatla. Intagey na anghel so duaran lima to bilang samba, pian satan ya andawes et sankanengneng na duaran anghel ed nibaliw na maawang ya ilog. Indanet to sirin so nagnap ya inkaseguro na kasumpalan na sayan propesiya. Balet, kapigan irayan aturon panaon? Agtanto mairap a naromog so ebat a singa ed abaloan mo.

17. (a) Antoray naromog a pamparaan diad saray propesiyan nirekord ed Daniel 7:25, Daniel 12:7, tan Apocalipsis 11:3, 7, 9? (b) Kaunongan kabayag so talora tan kapaldua a panaon?

¹⁷ Sankaimano so pipara na sayan propesiya ed duara niran propesiya. Say sakey so kinonsidera tayo diad kapitulo 9 na libron Daniel’s Prophecy! sayan palapagan, a naromog diad Daniel 7:25; say sakey et diad Apocalipsis 11:3, 7, 9. Imanoen so pigaran pamparaan. Balang sakey so nagawa ed panaon na anggaan. Sayan duaran propesiya so nipaakar ed saray masanton lingkor na Dios, a nipanengneng a napasegsegang ira tan temporaryon ag-ira makapanpulong ed publiko. Ipapanengneng na balang propesiya a saray lingkor na Dios so binmilay insan intuloy day kimey da, a dinaeg daray amasegsegang ed sikara. Tan binitla na balang propesiya so kabayag na panaon ya impanirap na saray sasanto. Tinukoy na duaran propesiya na Daniel (7:25 tan 12:7) so ‘sakey a panaon, saray panaon, tan kapaldua a panaon.’ Kaslakan a binidbir na saray iskolar a say kabaliksan na saya et talora tan kapaldua a panaon. Tinukoy na Apocalipsis so miparan panaon bilang 42 a bulan, odino 1,260 ya agew. (Apocalipsis 11:2, 3) Pekderan na saya a say tutukoyen na talora tan kapaldua a panaon diad Daniel et talora tan kapaldua a taon, a 360 ya agew so kada taon. Balet kapigan so inggapo na sarayan 1,260 ya agew?

18. (a) Unong ed Daniel 12:7, anto so mananda ed anggaan na 1,260 ya agew? (b) Diad kaunoran, kapigay kabuyak na “pakayari na masanto a baley,” tan panon iyan nagawa? (c) Kapigay inggapo na 1,260 ya agew, tan panon a saray alanaan so ‘nampropesiyan akasulong na magasal ya abel’ diad satan a panaon?

¹⁸ Impabitar a maong na propesiya no kapigan a mangangga so 1,260 ya agew​—sano nagaway “kasumpalan na kabuybuyak na pakayari na masanto a baley.” Nen kapegleyay 1918, pinakasalanan na palson dalem insan senentensiaan na andukey a kapriso iray manunaan a membro na Watch Tower Bible and Tract Society, kaibay presidenti na satan a si J. F. Rutherford. Talagan anengneng na saray sasanto na Dios ya ‘abuybuyak’ so kimey da, kinmapuy ira. No pasener so pamilang ed talora tan kapalduan taon manlapud kapegleyan na 1918 et ompugta itayo ed sampot na 1914. Diad satan a panaon tatalaranan na daiset a grupo na saray alanaan so pirmin panamasegsegang. Binmetag so Guerra Mundial I, et linmoor so isusumpa ed kimey da. Parad taon na 1915, imbase ra ni ingen so teksto ra ed saman a taon ed sayan intepet nen Kristo ed saray patumbok to: “Sarag yoy oninum ed kopak?” (Mateo 20:22, King James Version) Singa nipasakbay ed Apocalipsis 11:3, say tinmumbok a 1,260 ya agew et agaway makapasinagem a panaon parad saray alanaan​—singano sikaray manpropropesiyan akasulong na magasal ya abel. Linmoor so panamasegsegang. Pigara ed sikara so nipriso, arum so nilusob na pangkat, tan say arum so pinairap. Dakel so adismaya ed impatey na inmunan presidenti na Sosyedad, si C. T. Russell, nen 1916. Balet, antoy nagawa kayari na sayan mauddiem a panaon ya anampot ed impamatey ed sarayan sasanto bilang managpulong ya organisasyon?

19. Panon a nipaseguro ed sikatayo diad Apocalipsis kapitulo 11 a magano labat so ag-iyesel na saray alanaan?

¹⁹ Ipapanengneng na miparan propesiya a naromog ed Apocalipsis 11:3, 9, 11 a kayarin ompatey so ‘duaran tastasi,’ magano labat so ipatey da​—talora tan kapaldua ya agew​—anggad sikara so nabilay lamet. Mipadpara, impanengneng na propesiya ed Daniel kapitulo 12 ya agnapatundan mansalita iray sasanto noagta dakel ni so kimey da ed arapen.

Sikaray ‘Alinisan, Apaputi, tan Agogolan’

20. Unong ed Daniel 12:10, antoran bendision so nagamoran na saray alanaan kayari na alay irap ya asagmakan da?

²⁰ Singa asaglawi la, insulat nen Daniel irayan bengatla balet agto atalosan iratan. Siansia, panumamengan to no talagan naderal iray sasanto diad lima na saray manamasegsegang, ta intepet to, “Anto so kasumpalan na saraya a bengatla?” Inmebat so anghel: “Onla ka ed dalan mo, Daniel; ta saray salita nakapotan ira tan natatakan ira angga ed panaon na kasumpalan. Dakel naani so manggogol na inkasikara lanlamang, tan paputien da so inkasikara lanlamang, tan nalinisan ira; balet saray marelmeng manggawa ra naani a mareldelmeng; et anggapo ed saray marelmeng so makatalos naani; balet saray makabat makatalos ira naani.” (Daniel 12:8-10) Walay seguradon ilalo na saray sasanto! Imbes a naderal, sikaray napaputi, a napalaboan na malinis a talindeg ed arap nen Jehova a Dios. (Malaquias 3:1-3) Say aralem a pakatalos da ed saray espiritual a bengatla so ontulong ed sikaran mansiansian malinis ed imaton na Dios. Midumaan, aglabay a talosan na marelmeng iray espiritual a bengatla. Balet kapigan so kagawa na sayan amin?

21. (a) Onggapo so panaon a nipasakbay diad Daniel 12:11 sano nagawa so antoran kipapasen? (b) Anto so “naynay a bagat,” tan kapigay inkaekal na satan? (Nengnengen so kahon ed pahina 25.)

²¹ Nibaga ed si Daniel: “Manlapu ed panaon a say naynay a bagat a poolan naekal naani, tan say kadimlaan a manggawa na pankibalatar nipasen, wala naani sanlibo duanlasus tan siamaplo ya agew.” Kanian onggapo iyan panaon sano nagawa laray nibagan kipapasen. “Say naynay a bagat”​—odino “mantultuloy a bagat”a​—so kaukolan a naekal. (Daniel 12:11, NW, paimano’d leksab) Anton bagat so tinukoy na anghel? Aliwan saray bagat ya ayep a niyapay ed dinanman a mangaraldalin a templo. Ta anggan say templo a datin akaalagey ed Jerusalem et sakey labat ya “alimbawa na matua”​—say baleg ya espiritual a templo nen Jehova, a kinmurang sanen si Kristo so nagmaliw ya Atagey a Saserdote na satan nen 29 K.P.! Diad sayan espiritual a templo, a mangirerepresenta ed uksoyan na Dios parad puron panagdayew, agla kaukolan so mantultuloy iran iyaapay parad kasalanan, ta “si Kristo nisaklang ed aminpinsan pian awiten to so saray kasalanan na saray dakel.” (Hebreos 9:24-28) Balet, amin a tuan Kristiano so mangibabagat ed sayan templo. Insulat nen apostol Pablo: “Lapu ed [si Kristo] sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.” (Hebreos 13:15) Kanian sayan pilimeron kipapasen na propesiya​—say kaekal na “naynay a bagat”​—so nitarok nen kapegleyan na 1918 sanen ngalngalin tinmunda so panagpulong.

22. Antoy managgaway pankibalatar a “makapadimlan bengatla,” tan kapigan itan niletneg? (b) Kapigay inggapo na panaon a nipasakbay ed Daniel 12:11, tan kapigay impangangga na satan?

²² Komusta balet so komaduan kipapasen​—say ‘kipasen,’ odino kipuesto, na ‘makapadimlan bengatla a sengegan na pankibalatar’? Singa anengneng tayo la ed impaningbat ed Daniel 11:31, sayan makapadimlan bengatla et say Liga na Nasyones tan diad saginonor et linmesa bilang say Nasyones Unidas. Saratan so makapadimla lapud sikaray indayew bilang alenleneg ya ilalo parad kareenan diad dalin. Kanian, diad kapusoan na dakel, sarayan institusyon so peteg a sinmalat ed Panarian na Dios! Opisyal a niletneg so Liga nen Enero 1919. Diad saman met a panaon, asumpal lay duaran kipapasen ed Daniel 12:11. Kanian say 1,290 agew so ginmapo diad kagapo na 1919 tan nantultuloy anggad otonyo (Northern Hemisphere) na 1922.

23. Panon ya inmaligwas iray sasanto na Dios diad malinis a talindeg legan na 1,290 ya agew a nipasakbay ed Daniel kapitulo 12?

²³ Diad satan a panaon, kasin apaputi tan alinisan iray sasanto dia ed imaton na Dios? Peteg ya ontan so agawa! Nen Marso 1919 nibulos ed prisoan so presidenti na Watch Tower Society tan saray maapit a kakaiba to. Naabsuelto ira ed saginonor ed say palson dalem ed sikara. Lapud kabat dan agni asumpal so kimey da, kinmiwas iran tampol, ya inorganisa ray sakey a kombension para ed Setyembre 1919. Diad satan met a taon, say kaiban magasin na The Watch Tower so inmunan nipalapag. Say datin atawag a The Golden Age (natan et Awake!), so lawas a manusuporta ed Say Panag-Bantayan a masebeg ya angiwalwal ed kaugsan na sayan mundo tan tinmulong ed totoo na Dios a mansiansian malinis. Sanen angangga lay nipasakbay a 1,290 ya agew, alinisan tan apasimbalo lay talindeg na saray sasanto. Nen Setyembre 1922, dugaruga ed panaon sanen angangga iyan panat na panaon, ginawa ra so makatantandan kombension diad Cedar Point, Ohio, E.U.A. Satan so baleg a panamaseseg parad panagpulong a kimey. Balet, walay pankaukolan pian lalon onaligwas. Satan so parad ontumbok a nikabiig a panaon.

Liket Parad Saray Sasanto

24, 25. (a) Anton panaon so nipasakbay diad Daniel 12:12, tan kapigay mapatnag ya inggapo tan impangangga na satan? (b) Anto so espiritual a kipapasen na alanaan a nakdaan sanen ginmapo so 1,335 ya agew?

²⁴ Sinampotan na anghel nen Jehova so propesiya to ed sarayan salita nipaakar ed saray sasanto: “Mapalar [“maliket,” NW] so manalagar, tan onsabi ed sanlibo talonlasus tan talomplo tan lima ya agew!” (Daniel 12:12) Ag-angiter so anghel na panandaan no kapigan ya onggapo odino mangangga iyan panaon. Ipatnag na awaran a satan et basta labat la ontumbok a tampol kayari na akadkaunan panaon. Lapud satan, onggapo itan ed otonyo na 1922 ya anggad unor a primabera na 1926 (Northern Hemesphire). Kasin manliket laray sasanto no mangangga itan a panaon? On, diad saray importantin maespiritual a paraan.

²⁵ Anggan kayari la na kombension nen 1922 (a nipanengneng ed pahina 302 na libron Daniel’s Prophecy!), panil-iliwan ni na pigaran sasanto na Dios so apalabas. Say manunan aaralen a materyal ed saray miting da et say Biblia tan saray tomo na Studies in the Scriptures, nen C. T. Russell. Diad saman a panaon, kaslakan a minoria a say 1925 so taon ya igapo na kioli tan ed kipawil la na Paraiso diad dalin. Kanian, dakel a manlilingkor so mannononot la’d satan a petsa. Walaray masugnar ya agla manpulong ed publiko. Ag-iya makapaseseg a kipapasen.

26. Diad ilalabas na 1,335 ya agew, panon ya anguman so espiritual a kipapasen na saray alanaan?

²⁶ Balet, diad ilalabas na 1,335 ya agew, anguman iyan amin. Inyuna lay panagpulong, a niletneg bilang maparanay ya uksoyan parad amin a mibiang ed lawak na ministeryo. Niyeskedyul iray miting pian aralen so The Watch Tower a kada simba. Lugan na paway na Marso 1, 1925, so maawaran ya artikulon “Birth of the Nation,” ya angiter ed totoo na Dios na nagnap a pakatalos ed agawa nen panaon na 1914-19. Kayari na 1925, manlilingkor iray sasanto aliwan lapu ed kinasingger tan ed sakey a pihon petsa. Imbes, manunaan la’d sikaray kapasantos na ngaran nen Jehova. Nipabitar iyan makanan katuaan, ya agnin balot agawa, diad Enero 1, 1926, ya artikulo na Watch Tower a “Who Will Honor Jehovah?” Diad kombension nen Mayo 1926, nipaway so libron Deliverance. (Nengnengen so pahina 302 ed libron Daniel’s Prophecy!) Sakey iya ed serye na saray balon libro ya adesinyon isalat ed Studies in the Scriptures. Agla il-iliwen na saray sasanto so apalabas. Matalek da lan tatalaranan so arapen tan say nagawa nin kimey. Singa nipropesiya, sirin say 1,335 ya agew so angangga ed maliket a kipapasen na saray sasanto.

27. Panon a say segek na Daniel kapitulo 12 so ontulong ed sikatayon sigpot a nibiig iray alanaan nen Jehova?

²⁷ Siempre, aliwan amin so nansungdo ed sayan magulon panaon. Andi-duaruwan satan so rason no akin ya indanet na anghel so kaimportantian na ‘panalagar.’ Pirmin abendisionan iramay nansungdo tan nanalagar. Nipabitar iya ed segek na Daniel kapitulo 12. Singa nipasakbay, saray alanaan so abilay, odino apaoli, diad espiritual a pantalos. Naikdan iray nikabkabiig ya aralem a pakatalos ed Salitay Dios, ya ayarian dan ‘pinawilpawil’ so lugan na satan tan, diad giya na masanton espiritu et niparungtal da iray abayag lan misteryo. Nilinisan ira nen Jehova tan pinasinag to ra ed espiritual a paraan, a singa kamasnag na bibitewen. Lapud satan, dakel so nitarok da dia ed matunong a talindeg ed Dios.

28, 29. Antoy nepeg a determinasyon tayo diad asingger lan panampot na “panaon na anggaan”?

²⁸ Lapud sarayan amin a mapropetikon tanda a pangibiigan ed “saray sasanto na Sankatageyan,” wala ni kasi baraan ya ag-ira bidbiren tan agmiulop ed sikara? Makapakelkelaw iran bendision so manatalaran ed baleg ya ulop, a sikaray miuulop ed mandaiset lan alanaan a klase diad panaglingkor ed si Jehova. Amin tayo so nepeg a mantalaran ed kasumpalan na saray sipan na Dios. (Habacuc 2:3) Diad panaon tayo si Miguel, say Baleg a Prinsipe, so manalalagey la ed pigaran dekada diad biang na totoo na Dios. Sikato lay maganon onkiwas bilang tinuro na Dios a maneral ed sayan sistema na bengabengatla. Sano gawaen to itan, iner so talindegan tayo?

²⁹ Say ebat ed satan a tepet so mandependi no labay tayoy manbilay a matoor natan. Pian onelet so determinasyon tayon gawaen itan leleg a manasingger so “panaon na anggaan,” konsideraen tayo so unor a bersikulo na libro na Daniel. No singbaten tayo itan dia ed ontumbok a kapitulo, ontulong itan ed sikatayon natalosan no panoy inyalagey nen Daniel ed arap na Dios tan panon itayon onalagey ed arap To diad arapen.

[Paimano ed leksab]

ANTO SO ATEBEK YO?

• Diad anton panaon a “manalalagey” si Miguel, tan panon tan kapigan a sikatoy “onalagey”?

• Anton klase na kioli so tinukoy na Daniel 12:2?

• Antoran petsa so panandaan na igapo tan anggaan na

talora tan kapaldua a panaon ya abitla ed Daniel 12:7?

1,290 ya agew a nipasakbay ed Daniel 12:11?

1,335 ya agew a nipropesiya ed Daniel 12:12?

• Panon a say pangimano ed Daniel kapitulo 12 so ontulong ed sikatayon nibiig iray tuan managdayew ed si Jehova?

[Kahon ed pahina 25]

PAKAEKAL ED NAYNAY A BAGAT

Diad libro na Daniel, aminliman asaglawi so terminon “naynay a bagat.” Tinukoy na satan so bagat na panangidayew​—“say bunga na saray bibil”​—a maparanay ya iyaapay ed si Jehova a Dios na saray lingkor to. (Hebreos 13:15) Say nipasakbay a pakaekal to so atukoy ed Daniel 8:11, 11:31, tan 12:11.

Legan na duaran sankamundoan a guerra, pirmin pinasegsegang iray totoo nen Jehova diad sakop na “say ari na amianen” tan “say ari na abalaten.” (Daniel 11:14, 15) Say impakaekal ed “naynay a bagat” so agawa ed anggaan na Guerra Mundial I sanen ngalngalin tinmunda so panagpulong a kimey nen kapegleyay 1918. (Daniel 12:7) Legan na Guerra Mundial II, “say naynay a bagat” so mipadparan ‘nakal’ ed loob na 2,300 ya agew panamegley na Anglo-Amerikanon Sankamundoan a Pakayari. (Daniel 8:11-14; nengnengen so Kapitulo 10 na libron Daniel’s Prophecy!) Inekal met itan na “saray inayuraan” na Nazi ed panaon ya agnibaga ed Kasulatan.​—Daniel 11:31; nengnengen so Kapitulo 15 na libron Daniel’s Prophecy!

[Tsart sa pahina 27]

MAPROPETIKO IRAN PANAON DIAD DANIEL

Pitoran panaon (2,520 a taon): Oktubre 607 K.K.P. ya anggad Oktubre 1914 K.P.