Imanoen so Propesiya nen Daniel!
Katuloyan na Kapitulo Dose
Pinabiskeg na Mensahero na Dios
Apabiskeg so ‘Too a Makapaay-ayat’
14. Anton tulong so kaukolan nen Daniel ta pian naawat to so mensahe na anghel?
14 Makabaliksan tan masuliwet so mensahe na anghel nen Jehova parad si Daniel. Sakbay a naawat itan nen Daniel, nakaukolan a sikatoy natulongan manlapud inkapuy to ed pisikal tan mental. Lapud kabat to itan, simamaaron tinulongan tan pinaseseg a mismo na anghel si Daniel. Imanoen tayoy mismon salaysay nen Daniel ed inkagawa.
15. Antoy ginawa na anghel pian tulongan si Daniel?
15 “Sanen nadngel ko so bosis na saray salita to, naplag ak la ed sakey ya ugip a maitlek, a say lupak usdong ed dalin.” Nayarin atameeng si Daniel lapud takot tan kapagaan. Antoy ginawa na anghel pian tulongan si Daniel? “Nia!” kuan nen Daniel, “sakey a lima diniwit to ak, tan inggaton to ak ed saray pueg ko tan saray dakulap na saray lima.” Niarum ni, pinaseseg na anghel so propeta ed sarayan salita: “O Daniel, sika too ya inad-aro a maong, talosan mo so saray salita ya imbagak ed sika, et onalagey ka a maptek; ta dia ed sika nibaki ak natan.” Lapud impanulong tan makaligliwa iran salita et binmiskeg si Daniel. Anggaman sikatoy “sigigiwgiw,” “inmalagey” si Daniel.—Daniel 10:9-11.
16. (a) Panon a natalosan a si Jehova so tampol ya onkiwas ed pikakasi na saray lingkor to? (b) Akin a naabala so insabi na tulong na anghel ed si Daniel? (c) Anto so mensahe na anghel parad si Daniel?
16 Impabitar na anghel a sikatoy sinmabin mamabiskeg ed si Daniel. “Agka antakot, Daniel, ta nanlapu nen inmuna ya agew ya impasen mo so pusom a makatalos, tan impaabebam so inkasika lanlamang ed arap na Dios mo, saray salitam atalineng ira; et linma ak dia lapu ed saray salitam.” Insan impaliwawa na anghel no akin a walay inkaabala. Inkuanto: “Balet say prinsipe na panarian na Persia sinmumpa ed siak ed duamplo tan sakey agew, balet nia, si [Miguel] a sakey ed saray prinsipe, sinmabi pian tulongan to ak; et tinmilak ak diman ed saray arari na Persia.” Diad tulong nen Miguel, ayarian ya asumpal na anghel so niganggan ed sikato, a linma’d si Daniel tekep na sayan apuradon maong a mensahe: “Linma ak dia a mangipatalos ed sika no anto naani so nagawa ed baley mo ed saray kaunoran ya agew; ta say pasingawey nipaakar lambengat ed saray dakel ya agew.”—Daniel 10:12-14.
17, 18. Panon ya atulongan si Daniel ed mikaduan pankanawnawa, tan lapud satan, antoy ayarian ton gawaen?
17 Imbes a nasagyat si Daniel lapud pakaawat ed ontan a makapasagyat a mensahe, ompatnag a sikatoy pirmin naapektaan ed saray bengatlan nadngel to. Inkuan na salaysay: “Et sanen nibaga to ed siak so unong na saraya a salita, intuek ko so lupak ed dalin, tan naemel ak.” Balet say mensaheron anghel so akaparaan a mangiter na maaron tulong—ed mikaduan pankanawnawa. Inkuan nen Daniel: “Nia, sakey a kaulibay na saray anak na saray totoo diniwit to so saray bibil ko; saman la nilukasan ko so sangik, tan nansalita ak.”a—Daniel 10:15, 16a.
18 Apabiskeg si Daniel sanen diniwit na anghel iray bibil to. (Ikompara so Isaias 6:7.) Lapud sikato lay makapansalita, nipaliwawa la nen Daniel ed mensaheron anghel so irap a susungdoan to. Inkuan nen Daniel: “O katawan, lapu ed pasingawey saray ermen ko pinmawil ira ed siak, tan anggapo so napokpokan ko a biskeg. Ta panon so pisalita na aripen na saya a katawan ko ed saya a katawan ko? Ta no nipaakar ed siak, aganggano ya anggapo so atilak a biskeg ed siak, anggapo met so panlinawa ya atilak ed siak.”—Daniel 10:16b, 17.
19. Panon ya atulongan si Daniel ed mikatlon pankanawnawa, tan antoy resulta?
19 Agmanrereklamo odino manbabaraan si Daniel. Ibabaga to labat so problema to, et inawat itan na anghel. Kanian, diad mikatlon pankanawnawa et tinulongan na mensaheron anghel si Daniel. “Saman la diniwit ak lamet na sakey a singa nengneng na sakey a too, et pinabiskeg to ak,” kuan na propeta. Pinatumbokan na mensahero itan a makapabiskeg a diwit diad sarayan makatambayon salita: “O too ya inad-aro a maong, agka antakot: wala komon ed sika so deen, ombiskeg ka, on, ombiskeg ka.” Satan a maaron diwit tan saraman a makapabiskeg a salita so kakkaukolan nen Daniel. Antoy resulta? Inkuan nen Daniel: “Sanen nansalita ed siak apabiskeg ak, et inkuan ko, Mansalita komon so katawan ko; lapu ed pinabiskeg mo ak.” Akaparaan la natan si Daniel ed sananey a makapaangat ya asainmin.—Daniel 10:18, 19.
20. Akin a nakaukolan so sagpot pian nasumpal na mensaheron anghel so nipabtang ed sikato?
20 Kayari ton pinabiskeg si Daniel tan tinulongan ton napapawil lamet so pakasarag to ed mental tan pisikal, sinaglawi lamet na anghel so gagala na misyon to. Inkuanto: “Agmo ta amta no anto so sengeg to a linma ak dia ed sika? Et natan ompawil ak a mamakal ed prinsipe na Persia. Et sano onla ak, nia, say prinsipe na Gresya onsabi naani. Balet ibagak naani ed sika so satan a nilugan ed inkisulat na katuaan; et anggapo so mabiskeg ed siak nipaakar ed saraya noag [si Miguel] lambengat a prinsipe yo.”—Daniel 10:20, 21.
21, 22. (a) Manlapud eksperiensia nen Daniel, antoy naaralan tayo nipaakar ed pidedeneng nen Jehova ed saray lingkor to? (b) Anto lay amabiskeg ed si Daniel?
21 Agaylan maaro tan makonsidera si Jehova! Lawas a sikatoy midedeneng ed saray lingkor to unong ed saray pakasarag tan limitasyon da. Diad sakey a dapag, papabtangan to ra unong ed amta ton nagawaan da, anggaman no maminsan et isipen dan agda nasarag. Diad biek a dapag, mabulos to iran talinengen insan to ra ikdan na nakaukolan dan tulong pian nasumpal daray nipabtang ed sikara. Komon lawas tayon aligen so mangatatawen ya Ama tayo, si Jehova, diad maaron pamaseseg tan pamabiskeg ed saray kapara tayon managdayew.—Hebreos 10:24.
22 Apaseseg a maong si Daniel lapud makapaligliwan mensahe na anghel. Anggaman masiken lay Daniel, sikatoy apabiskeg tan akaparaan lan mangawat tan mangirekord na nagkalalon makatantandan propesiya a pakagunggunaan tayo.
[Saray paimano ed leksab]
a Anggaman nayarin say anghel a mitotongtong ed si Daniel et pareho ed samay aniwit ed saray bibil to tan amabiskeg ed sikato, say nibaga dia et walay posibilidad a sakey ya anghel, a nayarin si Gabriel, so nanggawa’d saya. Diad dinanman a kipapasen, pinabiskeg na sakey a mensaheron anghel si Daniel.
ANTO SO ATEBEK YO?
• Akin a naabala so insabi na anghel nen Jehova pian ontulong ed si Daniel nen 536/535 K.K.P.?
• Antoy ipatnag na kawes tan itsura na mensaheron anghel na Dios nipaakar ed sikato?
• Anton tulong so nakaukolan nen Daniel, tan panon itan ya inter na anghel ed amitlon pankanawnawa?
• Anton mensahe so inter na anghel ed si Daniel?