Akin a Mamerdona?

“INGGAPO na saray sientista so panag-research a mangipapabitar a marakep so epekto na panamerdona ed emosyon​—tan nayarin ontan met ed pisikal​—a bunigas,” irereport na The Toronto Star na Canada. Balet, unong ed si Propesor Carl Thoresen na Stanford University, E.U.A., ya angidaulo ed panag-resarch parad Stanford Forgiveness Project, so angikuan a “pigpigaray totoon makatalos no anto so panamerdona tan no panon a makagungguna itan.”

Say puron panamerdona et nipapasen ya importantin kabiangan na Inkakristiano. Unong ed report na The Toronto Star, say kabaliksan na satan et “pangaksobi a sika so alingo, ya ipulisay so amin a sakit na linawa, tan insan asinggeran so naopendi a too tekep na panangabagey tan panangaro ni ingen.” Nepeg a nibiig itan manlapud pangonsenti, pambaraan, pangilingwan, odino pangiburi ed sakey a kasalanan; nisay kabaliksan to et pawilen mo lay datin makapasakit a situasyon. Kuan na report a say tombok ed tuan panamerdona et say “pamalabas la ed sanok tan negatibo iran liknaan.”

Kuan na saray managsukimat a nakakaukolan so nagkalalon pansuri nipaakar ed saray gungguna na panamerdona diad pisikal. Ingen, irereport dan walaray sikolohikal a gungguna, pati lay “agtanton pakabanalan, kapagaan tan depresyon.” Say matalonggaring a rason ed pamerdona et say nibalikas ed Efeso 4:32, a mankuan: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.” No nipaakar ed panamerdona, a singa ed arum niran bengatla, napapaseseg itayon aligen so Dios.​—Efeso 5:1.

Say agpamerdona ed arum anta wala so basiyan pian mangasi so mangapektan tuloy ed personal a relasyon tayo ed Dios. Iilaloan nen Jehova a sikatayo so manpeperdonaan. Diad ontan et makapanpikasi itayon perdonaen to itayo met.​—Mateo 6:14; Marcos 11:25; 1 Juan 4:11.