Imanoen so Propesiya nen Daniel!

Kapitulo Otso

Niliktar ed Sangi na Saray Leon!

1, 2. Panoy impangorganisa nen Dario a Medo ed linmaknab ya empiryo to? (b) Deskribien iray kimey tan autoridad na saray satrap.

NAGBA la so Babilonia! Say karakpan to a nambayag na sakey a siglo bilang sankamundoan a pakayari so anampot la ed pigaran oras labat. Ginmapo so balon panaon​—salanti say panaon na saray Medo tan Persiano. Bilang sinmalat ed trono nen Belsasar, nipaarap ed mairap a kimey si Dario a Medo diad pangorganisa ed linmaknab ya empiryo to.

² Sakey ed saray unonan gawaen nen Dario et say panuro to ed 120 a satrap. Sisiaen a saramay manserbi ed sayan puesto so napili no maminsan manlapud saray kanayon na ari. Anggaman ontan, balang satrap so manguley ed baleg a distrito odino memelag a kabiangan na empiryo. (Daniel 6:1) Sikatoy mansingil na buis insan to iter so impuesto ed maarin palasyo. Anggaman kaukolan a sagpaminsan ya usisaen na ombibisitan manangilaman na ari, baleg so pakauley na satrap. Say kabaliksan na titulo to et “manalimbeng na Panarian.” Dia ed luyag to say satrap so impasen bilang nasasakopan ya ari, a walad sikato lawarin amin so pakayari.

3, 4. Akin a pinaboran nen Dario si Daniel, tan anton betang so anuroan ed sikato na ari?

³ Antoy betang nen Daniel ed sayan balon areglo? Kasin panretiroen la nen Dario iyan masiken a Judion propeta a masulok lan nobenta to? Andin balot! Maseguron amoria nen Dario a sustoy impangipasakbay nen Daniel a nabagbag so Babilonia tan satan a pasakbay et mankaukolay atagtagey nen say too a pakatebek. Niarum ni, dakel lan taon so eksperiensia nen Daniel diad pidedeneng ed nanduruman grupo na akautibo diad Babilonia. Getma nen Dario a pansiansiaen so marakep a relasyon ed saray balo nin akobkob ya uuleyan to. Sirin, maseguron labay ton walay sakey a toon singa ed kakabatan tan eksperiensia nen Daniel bilang managsimbawa ed ari. Diad anton betang?

⁴ Talagan makapasurprisa itan no turoen nen Dario so nibantak a Judio a Daniel bilang satrap. Balet isipen so kaguloan sanen inyanunsio nen Dario so desisyon to a magmaliw si Daniel a sakey ed taloran atagey ya opisyal a mangasikaso ed saray satrap! Aliwan satan labat noagta si Daniel so “miduma,” a paneknekan toy inkasikato a magmaong nen saray kapara ton atagey ya opisyal. On, naromog ed sikato so “nagnap ya espiritu.” Getma ni ingen nen Dario ya iter ed sikatoy puesto a manunaan a ministro.​—Daniel 6:2, 3.

5. Anto kasi so reaksion na saray atagey ya opisyal tan satrap ed inkaturo nen Daniel, tan akin?

⁵ Nayarin manngilngilet la’d sanok so arum ya atagey ya opisyal tan saray satrap. On, agda la nitepel a si Daniel​—ya aliwan sakey a Medo nisay Persiano nisay membro na maarin pamilya​—so nipueston manuley ed sikara! Panon ya itandoro nen Dario so sakey a sankaili ed ontanlan inkaprominenti, ya imbaliwala to so dili iran kabaleyan to, dilin pamilya to ni ingen? Singa aliwan makatunongan itan a ginawa to. Sakey ni, mapatnag a moriaen na saray satrap so integridad nen Daniel bilang makasbel ed mauges iran gawa ra. Ingen, antakot iray atagey ya opisyal tan satrap ya asinggeran si Dario nipaakar ed satan. Likud ni, seselengen a tuloy nen Dario si Daniel.

6. Panon a nanggunaetan na saray atagey ya opisyal tan satrap a deralan si Daniel, tan akin ya anggapoy nansumpalan na saray sagpot da?

⁶ Kanian nankokomplot irayan maimon a politiko. Nanggunaetan day ‘nananap na pangidaleman a sumpa ed Daniel nipaakar ed Panarian.’ Wala kasi kakapuyan ed paraan na panangasikaso to ed saray responsabilidad to? Kasin sikatoy agnapanpiyaan? Anggapoy naromog na saray atagey ya opisyal tan satrap a panamaulyan odino antokaman a nengneng na kaugsan ed panangasikaso nen Daniel ed saray kimey to. “Agtayo makaromog na bengatla a kibana a sumpa ed Daniel,” so inrason da, “nilikud a naromog tayo a sumpa ed sikato so nipaakar ed tunong na Dios to.” Lapud satan et amalesa na plano irayan masilib a lalaki. Inisip dan satan so pateyan la nen Daniel.​—Daniel 6:4, 5.

Nipakurang so Makapatey a Plano

7. Antoy insuheri na saray atagey ya opisyal tan satrap ed ari, tan diad anton paraan so ginawa ra?

⁷ Si Dario so inasinggeran na grupo na saray atagey ya opisyal tan satrap a ‘linmoob a nantitipon.’ Say Aramaiko a balikas dia et mankabaliksay maungol a kaguloan. Mapatnag ya apuradon maong irayan lalaki ya omparisi ed si Dario. Nayarin inkatunongan dan agto la suppiaten so isuheri no masimoon dan iyarap ed sikato tan bengatlan kaukolan ya asikasoen a tampol. Kanian, direktaan da lan inkuan: “Saray amin a pangulo na panarian, saray panagkalaman, tan saray manunaan, saray mananimbawa tan saray managuley nansisingbatan da so mamaalagey na sakey a maari a panontonan, tan manggawa na sakey a mabiskeg a bilin, ya angan siopa a mankerew ed siopaman a dios odino too ed loob na talomploy agew, ya aliwan dia ed sika, O ari, sikato naani nibantak ed ungib na saray leon.”a​—Daniel 6:6, 7.

8. Akin a nayarin makaayat ed si Dario so nisuheri a ganggan? (b) Antoy tuan motibo na saray atagey ya opisyal tan satrap?

⁸ Pekderan na saray maawaran a rekord a kaslakan ed arari diad Mesopotamia so momoriaen tan dadayewen bilang dios. Kanian maseguron alarogan si Dario ed sayan insuheri ra. Nayarin walay anengneng ton pankaabigan na saya. Nodnonoten, a parad saramay manaayam ed Babilonia et sankaili tan balo ni labat si Dario. Onkana iyan balon ganggan a mangiletneg ed inkaari to, tan mamaseseg itan ed saray karaklan a manaayam ed Babilonia ya iyabawag day katooran tan suporta ra ed balon uley. Balet, diad impangisuheri ed ganggan, saray opisyal tan satrap so ag-interesado ed pankaabigan na ari. Say tuan motibo ra et pian patitan si Daniel, ta amta ra ya ugali toy manpikasi ed Dios a mamitlo ed sanagew diad arap na lukas iran bintana ed silir na atep to.

9. Akin a say balon ganggan et aliwan problema parad saray kaslakan ya aliwan Judio?

⁹ Kasin sayan pananebel ed panagpikasi so mamalesa na problema parad amin a relihyoson komunidad diad Babilonia? Aliwa met ya ontan, nagkalalo la lapud say pananebel et sakey bulan labat. Sakey ni, pigpigara iray aliwan Judio a manmorian singa panangikompromiso so pandayew da ed sakey a too ed maganon panaon. Inkuan na sakey ya iskolar ed Biblia: “Say panagdayew ed ari so aliwan nikadkaduma ed saray pirmin managtalintao a nasyon; tan sirin sano niganggan ed saray taga-Babilonia a mandayew ed angobkob ed sikara​—si Dario a Medo​—singa sakey a dios, tamtampol iran tinmulok. Saray Judio labat so maingongot ed satan a ganggan.”

10. Panoy panmoria na saray Medo tan Persiano ed ganggan ya impaakseb na ari?

¹⁰ Dinanman so agawa, inkerew na saray pinmasyar ed si Dario ya ‘iletneg so bilin, tan pirmaan so sulat, pian agnayari ya umanen, unong ed tunong na saray Medo tan saray Persia, a sikato so agnauman.’ (Daniel 6:8) Diad Bukig nensaman, say panlabayan na ari so mabetbet ya ipasen ya absoluto. Saya so amalesa ed ideyan sikatoy agnalingo. Kaukolan ya ipaakseb itan anggan say ganggan et sengeg na pateyan na inosentin totoo!

11. Panon a naapektoan si Daniel ed ingganggan nen Dario?

¹¹ Pinirmaan la nen Dario so ganggan, ya agto la ninonot si Daniel. (Daniel 6:9) Diad impanggawa’d satan, agto naam-amtaan a pinirmaan to so autorisasyon ed ipatey na pinabpabli ton opisyal. On, seguradon apektado si Daniel ed sayan ganggan.

Apaskar si Dario a Mangipaakseb na Dusa

12. (a) Antoy ginawan tampol nen Daniel sanen akabatan to so balon ganggan? (b) Sioparay manbabantay ed si Daniel, tan akin?

¹² Agnambayag et naamtaan nen Daniel so ganggan ya isebel so panagpikasi. Tamtampol a sikatoy linmoob ed abung to tan linma ed silir ed atep to, a ditan et akalukas iray bintana to ya akaarap ed Jerusalem.b Ditan et ginmapon nampikasi si Daniel ed Dios to a “singa ginawa to [a maparanay] nen inmuna a panaon.” Abaloan nen Daniel a bukbukor to, balet ta sikatoy babantayan na saray nankokomplot. Bigbigla et ‘linmoob iray nantitipon,’ a seguradon singa ed samay maungol a paraan ya inyasingger da ed si Dario. Natan et anengneng da lan mismo​—si Daniel a “manggagawa na pankerew tan pikakasi ed arap na Dios to.” (Daniel 6:10, 11) Nagnap lay ebidensia na saray atagey ya opisyal tan satrap pian idalem si Daniel ed ari.

13. Antoy imbalita na kakabusol nen Daniel ed ari?

¹³ Masilib a tinepetan na saray kabusol nen Daniel si Dario: “Agmo ta pinirmaan so bilin, a balang too a manggawa na pankerew ed arum a dios odino too ed loob na talomploy agew, ya aliwan dia ed sika, O ari, nibantak ed ungib na saray leon?” Inmebat si Dario: “Saray bengatla sikato so tua, unong ed tunong na saray Medo tan saray Persia, a sikato so agnauman.” Tamtampol la’d satan ya inkuan na saray nankokomplot. “Si Daniel a sikato so sakey ed saray anak ed inkadakep na Juda, agto ka ingalngalep, O ari, ontan met so bilin a pinirmaan mo, noag ingen gawaen to so pankerew to a mamitlo ed sanagew.”​—Daniel 6:12, 13.

14. Mapatnag, akin et tinukoy na saray atagey ya opisyal tan satrap si Daniel bilang ‘kabiangan ed saray dinakep ed Juda’?

¹⁴ Mabitar a tinukoy na saray atagey ya opisyal tan satrap a si Daniel et ‘kabiangan ed saray dinakep ed Juda.’ Mapatnag a labay dan idanet a sayan Daniel ya intandoro nen Dario ed inkaprominenti so diad tua et sakey labat ya aripen a Judio. Sisiaen da a lapud satan et sikatoy nepeg ya ontulok ed ganggan​—anggan anto lay panmoria na ari ed sikato!

15. (a) Panoy inkiwas nen Dario ed imbalita ed sikato na saray atagey ya opisyal tan satrap? (b) Panon ya impanengneng na saray atagey ya opisyal tan satrap so pambusol da ed si Daniel?

¹⁵ Nayarin ilaloan na saray atagey ya opisyal tan satrap a tumangan ira na ari lapud masilib ya impansimasim da. No ontan, agmabayag et nabigla ira. Aburidon maong si Dario ed imbalita ra ed sikato. Imbes a manpasnok ed si Daniel odino tamtampol ton paipelag ed ungib na saray leon, sanagew a nanggunaetan nen Dario a sikatoy iliktar. Balet anggapoy nansumpalan na saray impansagpot to. Ag-abayag, pinmawil iray nankokomplot, tan andi-baing dan kinerew so dala nen Daniel.​—Daniel 6:14, 15.

16. (a) Akin ya inggalang nen Dario so Dios nen Daniel? (b) Antoy inilaloan nen Dario nipaakar ed si Daniel?

¹⁶ Amta nen Dario ya anggapo lay nagawaan to. Agla nauman so ganggan, nisay naperdonay Daniel ed “impakalukso” to. Say nibaga labat nen Dario ed si Daniel et “say Dios mo a sikato so panlingkoran mo a naynay, ilaban to ka.” Ompatnag ya inggalang nen Dario so Dios nen Daniel. Si Jehova so angiter ed si Daniel na abilidad ya ipasakbay so kageba na Babilonia. Inikdan met na Dios si Daniel na “nagnap ya espiritu,” a mangibiig ed sikato manlapud saray atagey ya opisyal. Nayarin kabat nen Dario a dakel lan dekada so linmabas, saya met a Dios so angiliktar ed taloran kalangweran a Hebreo diad mandarlang a palbaan. Nayari pa lagin inilaloan na ari ya iliktar nen Jehova si Daniel, lapud agla nauman nen Dario so ganggan a pinirmaan to. Kanian, imbuntok si Daniel ed ungib na saray leon.c Insan, “niyakar so sakey a bato, tan inggaton ed wangalan na ungib; et say ari sikato so tinelpekan to ed dili a telpek to, tan ed telpek na saray manunaan to; pian anggapo so nauman a nipaakar ed Daniel.”​—Daniel 6:16, 17.

(Ituloy ed ontumbok a paway.)

[Saray paimano ed leksab]