Dedikasyon na Watchtower Educational Center​—Sakey a Piesta ed si Jehova

NANLAPULAD nensaman, saray magayagan piesta so kabiangan la na tuan panagdayew. Arum ed saray piesta ya agawa ed kadaanan ya Israel et asabi toy pigaran agew tan inatendian na nilibu-libon managdayew ed si Jehova. Say inagurasyon na templo nen Solomon et asabi toy pitoy agew tan tinumbokan na sakey-simban Piesta na Kobongkobong. Saya so amawala ed saray Israelita na pankanawnawan manmolimoli ed makapakelaw a paraan na impideneng nen Jehova ed sikara. Sikaray pinmawil ed ayaman a “malikeliket tan magaygayaga ed puso lapu ed amin a kaabigan ya impatnag nen Jehova.”​—1 Arari 8:66.

Saratan a makapaliket a piesta nensaman so angipanonot ed saray bisita lapud walan agawa diad Watchtower Educational Center ed Patterson, New York, E.U.A., nen Mayo 17-22, 1999. Saya so sakey simba na espisyal ya aktibidad a niyapasakey ed dedikasyon na 28-bilding a complex a denesinyo pian iyalibansa so edukasyon na Biblia ed sankagloboan. Agawa iray probisyon parad amin a 5,400 a membro na saray headquarter staff diad Brooklyn, Wallkill, tan Patterson pian malaknab a man-tour ed saray pasilidad ed Patterson legan na saman a makatantandan simba. Kaiba ed saray sankaili so masulok a 500 a dati iran membro na staff ya akibiang ed impangipaalagey ed educational center, saray manangilaman a nanlalapud 23 a sanga na Watch Tower Society, tan arum a nanlalapud asingger iran kongregasyon​—a walay dagup dan ag-onkulang ed 8,100.

Saray Tour Display so Angitarya na Edukasyon

Niyuksoy iray espisyal a display, edukasyonal a video iran palabas, tan panpasyar ya anggapo lay mangigiya pian nakabisado na saray bisita so educational center. Diad main lobby, saray bisita so tampol ya asagyat ed sakey ya scale model na templo ed Jerusalem legan na mangaraldalin a ministeryo nen Jesus. Arum a display so mangipapabitar ed asasakbay ya awaran na Watchtower Bible School of Gilead, maawaran iran kombension, saray miting ed kongregasyon, say aligwas na modernon agew iran panangiyaral na Biblia​—a minilyon ed saratan so nikokondukta natan kada simba​—tan say kimey a gagawaen na Legal Department pian mansiansian lukas so dalan parad satan a kimey so pananulok ed ganggan nen Jesus.​—Mateo 28:19, 20.

Diad kaampar ya auditoryum, a komportablin makayurong so 1,700, saraman so binmisita legan na dedikasyon iran piesta so impambantay ed 33-minuto a video presentation ya atituloan na “Not by Power​—By My Spirit!” Sayan video so angipanengneng no panon a niwala so Watchtower Educational Center. Saray interbio so angiparungtal ed saray agawa a malinlinew a pakapatnagay panangiwanwan nen Jehova ed saray pamaakaran tan say impamendision to ed saray sagpot pian matalonan nisumpal iyan 15-taon a proyekto. Nilibo so akibiang ed aktual a panagpaalagey. Diad sakey a panaon nen 1994, walay 526 a nankimey ed pasen na pangipapaalageyan, a laktip lay 350 a sigpot-panaon a boluntaryo, 113 a temporaryon trabahador, tan 63 a mansesempet kada agew pian onayuda. Dakel ni so nansuporta ed kimey diad panamegley na saray donasyon. Moriaen dan amin ya agbalot iya nagawa no anggapoy panangiwanwan na espiritu nen Jehova.​—Zacarias 4:6.

Naimano na saramay manpapasyar a say manunan gagala na kimey a nagagawa diad educational center et say pangiyalibansa na madibinon bangat. Say display diad lolooban a mamaarap ed Gilead School ed unonan grado na bilding na eskuelaan so mangipapabitar ed mayaman ya espiritual a tawir tan awaran na eskuelaan. Say Gilead School so akapangipasal la na masulok a 7,000 ya estudyante parad panagmisionaryo nanlapulad inmunan klase nen 1943 diad orihinal a campus na eskuelaan diad South Lansing, New York. Diad saray display ed komaduan grado ed bilding na eskuelaan et walaray litrato na School parad saray Branch Committee Member tan say Eskuelaan parad Managbiahen Manangasikaso, a saratan a dua so panklaklasean. Nanlapulad inggapo na satan nen Nobyembre na 1995, say eskuelaan nipaakar ed sanga so akapangitarya la na modernon instruksion parad 360 a membro na Branch Committee a nanlalapud 106 a daldalin.

Diad impan-tour na saray bisita et tampol dan amoria a mas ni nen say display na saray litrato labat so anengneng da ed dakel iran pasen. Sikaray akaloob a mismo ed nanduruman departamento, bisitaen iray opisina tan arum niran pasen a pankikimeyan, tan naobserbaan dan maong so pakagagawa na kimey. Sakey a pabitar na tour et say Audio/Video Services a bilding. Alay santing iran pasilidad so walan nauusar pian iyalibansa so edukasyon ed Biblia! Diad panamegley na serye na pakaaralan iran display tan antikey iran video, atulongan iray bisita pian natalosan da no panon ya nirerekord iray bosis tan no panon a nipaparaan iray video. Naamtaan day nalalanor a malaknab a panagsukimat ed preparasyon na props tan saray costume. Anengneng da no panon a tinuop iray uusaren ya entablado a melag so nanggastosan balet ta walaan na nikaduman panangimano ed detalye. Naimatonan da met no panon a say musika so nauusar pian nalikna na totoo a singa ra walad aktual ya eksena a babantayan da. Nanlapulad nen 1990 say Sosyedad so akapawala la na samploran video ed 41 a lenguahe, a mangipapabitar ed nanduruman tema na Biblia, likud ed arum a video parad saraman so manguusar na American Sign Language.

Dakel a nan-tour so linma ed Photo Lab, say Art Department, Information Services, a mangitatarya na panangipasal tan suporta ed computer, say Service Department, a mangaasikaso ed aktibidad na 11,242 a kongregasyon tan 572 a managbiahen manangasikaso, tan Writing Correspondence, a ngalngali 14,000 iran tepet so aasikasoen kada taon. Sikaray nandinayew ed panagsukimat nipaakar ed saray sulat a nipapawit tan say masimoon a kapagaan a nipapanengneng parad saramay say tepet da so mangipapatnag a sikaray manggugunaet a manalona ed seryoso iran problema.

Sakey a tuloytuloy ya idaragsa na saramay nanto-tour so binmisita ed Translation Services. Sikaray asurprisa ed impakaamtan legan na apalabas a limaran taon, 102 nin lenguahe so niarum ed bilang a pangitataryaan na Sosyedad na literaturay Biblia. Diad sankamundoan, manga 80 porsiento na Tastasi nen Jehova so manbabasa na saray palapagan na Sosyedad ed saray lenguahe a nilikud ed Ingles. Pian nitarya iray pankaukolan da, walay masulok a 1,700 a boluntaryon mankikimey ed lawak na panagpatalos diad 100 a bansa. Saray display so mangipapanengneng ed Say Panag-Bantayan ed saray lenguahe na saray bansa ed Amerika, Europa, Asia, tan Aprika. Saray bisita so makanengneng ed say New World Translation na Biblia ed 31 a lenguahe a kipapalapagan na satan. Naamtaan da a saray palapagan na Watch Tower so wala la natan ed 332 a lenguahe tan say brosyur ya Anto so Kakaukolanen na Dios ed Sikatayo? so nipapalapag la ed 219 a lenguahe.

Impanengneng ed saray binmisita ed Legal Department so nanduruman lawak na aktibidad a mankakaukolan na legal a panangasikaso ed sankamundoan. Diad sakey a video, anengneng da so aktual a panbibista diad korte a ditan et say abogadon Tasi so miaargumentoan nipaakar ed sakey a kaso ya ilalanor toy panagpasaksak na dala. Naamtaan da met no anto so gagawaen pian mansiansian lukas so dalan parad publikon panangipulong ed maong a balita. (Filipos 1:7) Impaimano so desisyon na federal district court nen Marso na sayan taon, a mangigaganggan ed baley na Oradell, New Jersey, E.U.A., ya umanen da iray ley da ta pian naekal iray kakaukolanen a nawalaan na permit tan badge iray Tastasi nen Jehova a malabay a mibiang ed publikon ministeryo ra ed kabkaabungan ed satan a komunidad.

Aliwan satan labat ya amin so anengneng na saray bisita. Inusisa da iray display nipaakar ed panagpaalagey diad Precast Shop tan nan-tour ira ed Wastewater Treatment iran pasilidad, say Powerhouse, say Water-Softening Facility, tan dakerakel a maintenance shop, a pigara labat iratan ed arum. Satan so nikadkaduman pankanawnawa.

Indanet na Programa ed Dedikasyon so Madibinon Edukasyon

Say aktual a programa ed dedikasyon so agawa ed Mierkoles, Mayo 19, a ginmapo ed 4:00 na ngarem. Kaiba ed magayagan ulop na 6,929 iray membro na headquarters staff, saray sankaili na Sosyedad, tan 372 a nantitipon ed sanga na Canada, a nikonekta panamegley na electronic.

Saray dumerengel so aliketan a tuloy ed impakarengel ed makapaligsay puso iran balikas na panangabrasa nen Milton G. Henschel, say presidenti na Watch Tower Society. Si Theodore Jaracz, membro na Mananguley ya Ulop tan tsirman ed saman ya okasyon, so tinmumbok ya angiparungtal ed si William Malenfant. Diad impangipresenta to’d “Highlights of the Building Program,” ininterbio toray taloran agagin lalaki a walaan na importantin betang ed impamarakep, desinyo, tan impangipaalagey ed Watchtower Educational Center. Leleg na saray interbio, nibaga a diad saray taon na aktual a panagpaalagey et masulok ya 8,700 a temporaryon komikimey so linma diad gastos dan dili pian mankimey ed proyekto. Agaylan abig a paneknek ed pankakasakey tan inkamabunlok a pinagmaliw a posibli na madibinon bangat!

Insan sinmublay so sakey a simposium ya atituloan na “Divine Education on a Global Scale.” Imparungtal itan na apatiran membro na Mananguley ya Ulop. Indanet nen John E. Barr a say madibinon edukasyon so nibase ed Salitay Dios, say Biblia, a mamapaseseg ed saray Kristiano a “mamabunga ed ganaganan maabig a gawa, tan ombaleg ed [suston] kakabatan na Dios.” (Colosas 1:10) Insingbat nen Daniel Sydlik no panon a say madibinon edukasyon so naoorganisa ed teokratikon paraan manlapud ulo na Kristianon kongregasyon, si Jesu-Kristo, angga ed kada membro na sankamundoan ya impanaagi. (1 Corinto 12:12-27) Say unor a duaran parti na simposium, a tinibukel nen Gerrit Lösch tan Carey Barber, so angipanengneng no panon a say madibinon edukasyon so mamakualipika ed saray ministro a manabi ed totoo ed inerman a pasen tan bangatan ira ta pian sikara met so makapanakar ed dalan na Dios.​—Isaias 2:1-4; 2 Corinto 3:5.

Pian naamtaan na saray dumerengel so nanduruman eskuelaan a nagagawa diad sayan educational center, saray interbio tan diskusyon so ginawa kaiba iray instruktor ontan met ed arum a nalalanor ed kikukurang na saratan. Nipanengneng so betang na kada eskuelaan diad pangisusumpal ed madibinon edukasyonal a programa ed sankamundoan. Nipabitar a say Gilead School so mangiyaapasakey ed panagaral ed kada libro na Biblia, ed modernon agew ya awaran na totoo nen Jehova, tan ed panangiparaan parad panagmisionaryo. Say eskuelaan a nipaakar ed sanga so sakey a makapakelkelaw a malaknab a panagaral ed dakel a lawak na aktibidad a kalalanoran na saray membro na Branch Committee. Say Eskuelaan a parad saray Managbiahen Manangasikaso so aglambengat adesinyo pian mangiter ed saray pankaukolan na saray managbiahen agagi noagta pian nakinlongan met ira a mangitarya na nanduruman espiritual a tulong a nagkalalo lan mangungguna ed saray kongregasyon.

Pian sampotan so maabig a programa, si Lloyd Barry na Mananguley ya Ulop so angiter ed dedikasyon a paliwawa diad teman “Building With Our Grand Creator.” Indanet ton say Manamalsa, si Jehova, so naliliketan ed amin a pinalsa to tan iimbitaan to itayon migayagan kaiba to. (Isaias 65:18) Lapud ‘say amaalagey ed saray amin a bengatla et say Dios,’ diad si Jehova a Dios lambengat so kipaarapan na kagalangan parad amin na sayan impamaalagey. (Hebreos 3:4) Kayari impangibalikas ed saratan a punto, say espiker so impapuson nampikasi, ya angidedika ed Watchtower Educational Center ed si Jehova, say Baleg a Manamalsa tayo.a

Anggapoy duaruwa a say intiron sakey simban piesta so mabayag a sankanonot na saramay inmatendi. Akin ya ag-iyareglo so ibisita ed Watchtower Educational Center? Maseguro kami a diad ibisitam tan pan-tour mo et pakapasesegan mo diad saray gunaet mon makaaral ni na nagkalalo nipaakar ed maaron Manamalsa tayo tan manbilay unong ed matunong iran estandarte to.

[Paimano ed leksab]

[Saray litrato ed pahina 10]

Apusek ya auditoryum tan dakerakel nin dumerengel a walad dining room

[Saray litrato ed pahina 10]

Saray panag-tour so nagkalalo lan magayagan kabiangan