Talagan Walay Sakey a Mangiyaansakit

IPAPANENGNENG na nilibon totoo a talagan mangiyaansakit ira. Agda aagamilen so panmorian anggapoy pililikna tan sinisiblet ya anggapoy pibabali ra ed saray problema na arum. Imbes, gagawaen da so amin a nayarian da​—a no maminsan et irisga ra ni ingen so bilay da​—pian nabawasan so paniirap. Abalbaleg iyan kimey, sakey a bengatlan papalooren na saray mabiskeg a puersa a diad satan et anggapoy nagawgawaan da.

Saray pansesengegan a singa say agum, mapolitikan panagliput, bakabakal, tan natural iran desyang so makakaamper ni ingen ed “inkabisado tan deneterminan maong iran sagpot pian paandien so eras,” so inkuan na sakey ya aid worker. Say pamaandi ed eras so sakey lambengat ed dakerakel a probleman aarapen na mangiyaansakit iran totoo. Pibabarangkaan da met iray bengatlan singa say sakit, inkaduka, ag-inkahustisya, tan say abalbaleg a paniirap a papawalaen na bakal. Balet kasin ontatalona ira?

Inkuan na chief executive na sakey ya ahensian ontutulong a saramay manggagaway ontan iran “inkabisado tan deneterminan maong iran sagpot” pian napakepa so eras tan ot-ot so miulibay ed samay maabagey a Samaritano ya adeskribe ed ilustrasyon nen Jesu-Kristo. (Lucas 10:29-37) Balet inkuanto ya antokaman so gawaen da et siansian ondarakel so bilang na saray nabibiktima. Kanian intepet to: “Anto lay nepeg a gawaen na maong a Samaritano no diad agew-agew a pambiahe to’d parehon rota ed loob na pigaran taon et kada simban walay naromog ton abiktima na saray matatakew diad gilig na dalan?”

Main-inomay so kisagmak ed tatawagen a “makapatey a sakit ed kakesawan lan ontulong” insan basta onsuko ed pakadismaya. Parad kagalangan da, ag-onsuko iramay talagan mangiyaansakit. (Galacia 6:9, 10) Alimbawa, kinomendaan na sakey a toon nansulat ed Jewish Telegraph na Britanya iray Tastasi nen Jehova, a legay panaon na Nazi Alemanya et “tinmulong [ira] ed nilibo iran Judio pian makaliktar ed saray panamairap ed Auschwitz.” “Sanen kalkalamor so tagano,” inkuan na managsulat, “innabang da so tinapay da ed saray [Judion] agagi mi!” Intultuloy a ginawa na Tastasi so anggaay nayarian da tekep na saray kayarian da.

Balet, diad tua et agsigpot a napaandi so paniirap na totoo anggan panon lay panginabang na tinapay. Aliwa iyan panmelmelag ed agawaan la na maabagey iran totoo. Makanakana so antokaman a gawan manepeg a mamakepa ed paniirap. Anggan panon et apakepa na saraman a Tastasi so ot-ot na kapara ran priso, tan diad kaunoran et aderal so Nazismo. Balet ta mantutultuloy ni so sistema na mundon pansesengegan na ontan a panaglames, tan siansian ondarakel ni so agmangiyaansakit a totoo. On, “wala so kailalakan a say ngipengipen da sikara so singa saray kampilan, tan saray pangal da singa saray yuro, pian akmonen da so duka a manlapu ed dalin, tan say naukolan ed saray totoo.” (Uliran 30:14) Nayarin uumamengen mo no akin ya onia so kipapasen.

Akin a Walay Inkaduka tan Panaglames?

Aminsan ya inkuan nen Jesus: “Saray duruka wala ra ed sikayo lawas, tan bangno kaliktan yo nayarian yo so manggawa ed sikara na maong.” (Marcos 14:7) Say labay kasin ibaga nen Jesus et agla mangangga so inkaduka tan panaglames? Kasin anisiaan to, a singa say arum a totoo, a say ontan a paniirap et kabiangay plano na Dios pian nawalaay pankanawnawa iray maabagey a makapangipatnag na pangiyaansakit da? Andi! Ag-itan panisiaan nen Jesus. Impabitar to lambengat a say inkaduka et kabiangan na bilay legan a wala ni iyan sistema na bengabengatla. Balet amta met iya nen Jesus: Aliwan orihinal a gagala na mangatatawen ya Ama to a niwala so ontan iran kipapasen diad dalin.

Pinalsa nen Jehova a Dios so dalin pian magmaliw a paraiso, aliwan sakey a pasen a sasaloten na inkaduka, ag-inkahustisya, tan panaglames. Impanengneng toy pangiyaansakit ton tuloy ed sankatooan diad impangitarya toy alay abig iran probisyon a mangarum ed panliketan ed bilay. Agayla, nonoten pa so mismon ngaran na harden a nanayaman na inmunan atateng tayo, si Adan tan Eva! Tinawag itan ya Eden, a mankabaliksay “Liket.” (Genesis 2:8, 9) Agnilimitaan nen Jehova so totoo nipaakar ed saray pankaukolan labat pian makapambilay diad sakey a kaliberliber ya andiay liket tan walaay panaglames. Diad inkasumpal na panamalsa to, inusisa nen Jehova so ginawa to tan inyabawag ton “maong iran tuloy.”​—Genesis 1:31.

Bueno sirin, akin ya onkakasmak ed sankadalinan natan so inkaduka, panaglames, tan arum nin pansesengegay irap? Niwala so kaplesan a marelmeng a sistema na bengabengatla lapud ta nanrebeldi ed Dios so inmuna-unan atateng tayo. (Genesis 3:1-5) Amalesa iya na tepet no kasin manepeg a kaukolanen na Dios ed saray pinalsa to so katutulok. Kanian inabuloyan nen Jehova iray kapolian nen Adan a nawalaay limitadon panaon na inka-independenti. Siansian angiyansakit so Dios lapud nagagawa ed sankatooan. Sikatoy angitadia na probisyon pian paandien so epekto na amin a desyang a resulta na impanrebeldi ed sikato. Tan maganggano la, panganggaen nen Jehova so inkaduka tan panaglames​—diad tua et amin a paniirap.​—Efeso 1:8-10.

Sakey a Probleman Agnasolbar na Totoo

Diad inlabas na saray siglo nanlapula’d inkapalsa na too, lalo la ingen a kinmasipa so katooan manlapud saray estandarte nen Jehova. (Deuteronomio 32:4, 5) Lapu ed tuloytuloy a pangipupulisay da ed saray ganggan tan prinsipyo na Dios, nambabakal iray totoo, tan say ‘too so awalaan na pakayari ed sananey pian pankaugsan to.’ (Eclesiastes 8:9) Amin na saray sagpot pian pawalaen so sosyedad a walay peteg ya inkahustisya, a bulos manlapud amin a bengatlan manasalot ed maniirap a katooan, so aderal lapud inkasiblet na saramay mankaliktan a manggawa na saray bengatla diad dilin paraan da imbes a manpasakop ira ed inkasoberano na Dios.

Walay sananey nin problema​—sakey a nayarin ibaliwala na dakel bilang maaniton ideya ya anggapoy kakanaan. Say angisugsog na impanrebeldi ed Dios so siansia nin manatangguyor ed totoo diad inkauges tan inkasiblet. Sikato si Satanas a Diablo, a tinawag nen Jesu-Kristo bilang “manuley na sayan mundo.” (Juan 12:31, NW; 14:30; 2 Corinto 4:4; 1 Juan 5:19) Diad puyan a niiter ed si apostol Juan, nipabidbir si Satanas bilang say manunaan a pansesengegay kairapan​—say manunan responsabli ed ‘katitilaan na lapag a sankamundoan.’​—Apocalipsis 12:9-12.

Anggan panon lay pangiyaansakit na arum ed kapara ran totoo, agdan balot nasarag a pagiten si Satanas a Diablo odino nasalatan iyan sisteman manadagdag ed idarakel lawas na saray nabibiktima. Anto sirin so nakaukolan pian nasolbar iray problema na katooan? Say solusyon et aliwan say basta walay mangiyaansakit. Nakakaukolan a walay sakey a walaan na panlabay tan say pakayarin mamagit ed si Satanas tan say intiron mauges a sistema to.

“Nagawa Komon so Linawam . . . ed Dalin”

Insipan na Dios a deralen to iyan marelmeng a sistema na bengabengatla. Sikato so walaan na panlabay tan say pakayari a nakaukolan pian nagawa itan. (Salmo 147:5, 6; Isaias 40:25-31) Diad mapropetikon libro na Biblia a Daniel et nipasakbay itan: “Say Dios na tawen mamaalagey naani na sakey a panarian ya anggan kapigan agnaani naderal tan say panag-uley to agnaani niiter ed sananey a baley: balet buybuyaken to naani tan upoten to naani so saraya ya amin a panarian, et sikato so mansiansia lawas”​—on, diad ando lan ando. (Daniel 2:44) Walad kanonotan nen Jesu-Kristo iyan magnayon tan mapalabon mangatatawen a gobierno sanen imbangat toray babangatan to ya ipikasi iya ed Dios: “Onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:9, 10.

Ebatan nen Jehova iratan a pikakasi lapud talagan iyaansakit to so sankatooan. Unong ed mapropetiko iran salita na Salmo 72, autorisaan na Dios so Anak to, si Jesu-Kristo, a mangitarok na magnayon a pakainawaan na saray duruka, manpapairap, tan nalalames ya onsusuporta ed uley nen Jesus. Kanian oniay inkanta na apuyanan a salmista: “Sikato [Mesianikon Ari na Dios] ukomen to so makabos na saray katooan, sikato ilaban to so saray anak na naukolan, tan betagbetagen to so saray manamairap. . . . Iliktar to so naukolan no oney-ey, say makabos met, ya anggapo so mananulong ed sikato. Sikato ilagak to so makabos tan naukolan, tan ilaban to so kamarerwa na naukolan. Sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.”​—Salmo 72:4, 12-14.

Diad sakey a pasingawey a manasaglawi ed agew tayo, anengneng nen apostol Juan so “sakey a tawen a balo tan sakey a dalin a balo,” sakey a sigpot a balon sistema na bengabengatlan inletneg na Dios. Agaylan panamendision ed maniirap a katooan! Diad pangipapasakbay ed gawaen nen Jehova, oniay insulat nen Juan: “Nadngel ko so sakey a baleg a bosis ed tawen, a kuanto, Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la. Tan say manyurong ed trono kuanto: Nia, siak gawaen ko a balo so saray amin a bengatla. Tan kuanto ed siak: Isulat mo; ta saraya a salita sikara so matoor tan matua.”​—Apocalipsis 21:1-5.

On, napanisiaan tayo irayan salita, lapud matoor tan matua iratan. Magano lan onkiwas si Jehova pian punasen to ed dalin so inkaduka, eras, panaglames, sakit, tan amin ya ag-inkahustisya. Diad mabetbet a pangipapabitar na sayan magasin manlapud Kasulatan, ipapanengneng na daakan ya ebidensia a manbibilay itayo la’d panaon a pakasumpalan na sarayan sipan. Asingsingger lay balon mundo ya insipan na Dios! (2 Pedro 3:13) Agla manbayag et “akmonen [nen Jehova] so patey ed ando lan ando” tan ‘punasen to naani iray lua ya onagus ed saray amin a lupa.’​—Isaias 25:8.

Anggad kagawa na satan, makapanliket itayo ta anggan natan et walaray totoon peteg a mangiyaansakit. Say babaleg a sengegay panliket et talagan mangiyaansakit a mismo si Jehova a Dios. Magano to lan ekalen so amin a panaglames tan paniirap.

Nawalaan kay nagnap a panagmatalek ed saray sipan nen Jehova. Maseguron ontan so impanmatalek na lingkor ton si Josue. Tekep na sigpot a panagmatalek, oniay imbaga to ed totoo na Dios nensaman: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.” (Josue 23:14) Sirin, legan a mansiasiansia ni iyan kaplesan a sistema na bengabengatla, agmo aabuloyay inkasika ya ontalaw ed saray subsubok a kidudungetan mo. Ibuntok mo ed si Jehova so amin a kapapagaan mo, lapud ta sikatoy talagan mangiyaansakit.​—1 Pedro 5:7.

[Saray litrato ed pahina 7]

Diad balon mundo ya insipan na Dios, anggapo la’d satan ed dalin so inkaduka, panaglames, sakit, tan ag-inkahustisya