Pakagungguna Manlapud “Tagano a Nanlapu ed Tawen”

KAYARIN tuloy na mamilagron inkiliktar da manlapud Ehipto, impanengneng na Israelitas so kakulangan a tuloy na pananisia ra ed Manangiliktar da, si Jehova. Bilang resulta, sikaray impanteyengteyeng nen Jehova ed loob na 40 taon diad kalawakan na Sinai. Legan na satan a panaon, saray Israelita tan saray akiulop ed sikaran ‘dakerakel’ a dayo so akiakan tan akiinum “angga ed kapesel.” (Exodo 12:37, 38) Isasalaysay ed sikatayo na Salmo 78:23-25 no akin a posibli iya: “Ginanggan [nen Jehova] so lurelurem a nanlapu ed tagey, tan nilukasan to so saray pinto na tawen; tan angiuran na mana ed sikara a kanen da, tan initdan to ra na tagano a nanlapu ed tawen. Say too angan na tagano na saray makapanyari: sikato angipawit ed sikara na tagano ya angga ed kapesel da.”

Bilang sakey ya angan met na mana, deneskribe nen Moises iyan nikadkaduman tagano. Insulat to a diad kabuasan kayarin “inmalimpokapok so linaew . . . , ta dia ed tapew na lawak, wala so sakey a melag a malimpek, melag a singa linaew a kinmigtel a malimpek ed tapew na dalin. Et sanen anengneng na saray anak na Israel iman, inkuan na sakey tan sakey ed iba to, Anto ’ya?” odino diad literal unong ed Hebreo et “man huʼ?” Sayan balikas anganko so lapuan na salitan “mana,” say impanawag na Israelitas ed tagano. Inkuan nen Moises a: “ Singa itan kaputi na bukel na kolantro, tan say taway to so singa bibingka ya ininan na dilo.”​—Exodo 16:13-15, 31, NW, paimano’d leksab.

Say mana et nikadkaduman tagano a singa ibabaga na arum. Asaglawi puersa a labas nen say natural pian nitarya itan. Alimbawa, say inkiwala na satan et ag-agetaran lapud lugar odino tiempo. No pansanlabien itan, nabigis tan onggapon ombanget; balet, say mamiduan karakel a nakopkop na balang pamilya ed samay agew sakbay na sinimban Sabaton so agnabulok anggan nansanlabi, kanian naakan itan ed Sabaton​—say agew ya anggapoy mana. Talagan say mana so mamilagron probisyon.​—Exodo 16:19-30.

Say impakasalambit ed “saray makapanyari,” odino “angheles,” diad Salmo 78 so mangisusuherin nayarin inusar nen Jehova iray anghel a mangitarya na mana. (Salmo 78:25, NW, paimano’d leksab) Antokaman a paraan, makatunongan labat a kaukolan a pisalamatan na totoo so Dios lapud panangasi to. Balet ta maslak so andiay otang a linawa ed samay mismon Sakey ya angiliktar ed sikara manlapud inkaaripen diad Ehipto. Anggan sikatayo et nayarin naleglemew tayo met iray probisyon nen Jehova odino andiay otang a linawa itayo ni ingen no agtayo nodnonotey maaron-kaabigan to. Kanian misalamat tayo ta inlaktip nen Jehova so rekord a kililiktar na Israel pati saray tinmumbok ya agawa parad “kibangat tayo.”​—Roma 15:4.

Say Leksion ed Israel so Pakagunggunaan na Kristianos

Sanen intarya nen Jehova so mana, mas ni walad kanonotan to nen say basta pamenek ed saray pisikal a pankaukolan na manga taloran milyon ya Israelitas. Labay ton ‘pauyamoen tan suboken ira’ diad ontan et napino tan nadisiplina ira parad dilin pankaabiganan da. (Deuteronomio 8:16; Isaias 48:17) No sikaray papino tan padisiplina, si Jehova so maliket a ‘manggawa ed sikara na maong ed kaunoran ya anggaan da’ diad pangipagamor to ed sikara na deen, aligwas, tan liket ed Insipan a Dalin.

Sakey a makanan bengatlan kaukolan dan namoria et “say too [so] agnabilay ed tinapay labat, noag say amin a pamaakaran ya ombesngaw ed sangi nen Jehova so kabilayan na too.” (Deuteronomio 8:3) No ag-ira inikdan nen Jehova na mana, naerasan ira komon​—katuaan a talagan binidbir da. (Exodo 16:3, 4) Saray maapresian Israelita so inagew-agew ya apanonotan ed sigpot a pandependi ra ed si Jehova tan sirin et nampaabeba ira. Bektan wala lara’d Insipan a Dalin a daakan so materyal, sikara so maseguron agmakalingwan ed si Jehova tan say pagmaliw dan akadependi ed sikato.

Singa saray Israelita, nepeg a mansiansian sinononot iray Kristiano ed pandependi ra ed Dios nipaakar ed saray pankaukolan da ed bilay​—pisikal tan espiritual. (Mateo 5:3; 6:31-33) Bilang ebat ed sakey ed saray tukso na Diablo, inaon nen Jesu-Kristo iray salita nen Moises a singa naromog ed Deuteronomio 8:3, a mankuan: “Walan nisulat, Aliwa a say tinapay labat so napambilay na too, noag say amin a salitan ombesngaw ed sangi’ Dios.” (Mateo 4:4) On, natatagano iray tuan managdayew ed Dios diad pambasa ed saray balikas nen Jehova a naromog ed Salita to. Niarum ni, napapabiskeg so pananisia ra sano naeksperiensia daray makagunggunan epekto na sarayan balikas ed bilay da legan na panaakar dan kaibay Dios tan iyuuna daray interes na Panarian.

Nayarin nabalang na saray ag-ayadyarin totoo so apresasyon da ed saray bengatlan nagmaliw lan apasakey ed bilay​—anggamano sarayan bengatla so pakapatnagay maaron panangiyansakit nen Jehova. Alimbawa, say labas nen natural a probisyon a mana so diad gapo et amakelaw tan amenek ed Israelitas, balet ta asabin dakel ed sikara so nanreklamo. “Say linawa mi atama la ed saya so anlemew a tinapay,” so andiay respeton inngorongoro ra​—pakapatnagan a sikara lay ‘onaarawi ed Dios a mabilay.’ (Numeros 11:6; 21:5; Hebreos 3:12) Kanian, say alimbawa ra so onkakana bilang “bilin ed sikatayo, ya asabian da so kasumpalan na sayan panaon.”​—1 Corinto 10:11.

Panon tayon nipapuso iyan manamasakbay ya alimbawa? Say sakey a paraan et diad agbalot pangiyabuloy ed saray bangat ed Biblia odino ed saray probisyon ya aawaten tayo diad panamegley na matoor tan makabat ya aripen a klase a magmaliw lan ordinaryo, odino apasakey la. (Mateo 24:45) Bektan leglemewen ti laray regalo nen Jehova odino onsasawa ti la, say pisisiglaotan tayo ed sikato so ombetel met la.

Tekep na gagalan ag-itayo tuloytuloy a dedelapen nen Jehova na saray makapasagyat tan balon bengatla. Imbes, sikatoymangisisindag na liwawa na Salita to diad paraan a kalkalna tan progresibo. (Uliran 4:18) Diad ontan et natalotalosan tan niyaplika na totoo to iray bengatlan naaaralan da. Tinumbok nen Jesus so alimbawa nen Ama to sanen imbangat toray inmunan babangatan to. Insalaysay toy Salita na Dios ed sikara “unong na nayarian dan dengelen,” odino “talosan,” a singa inusar na arum a patalos.​—Marcos 4:33; ikompara so Juan 16:12.

Pabiskeg Moy Apresasyon Mo’d Saray Probisyon na Dios

Inusar met nen Jesus so panangulit. Siempre, nayarin natalosan a tampol na kanonotan so sakey a punto​—singa bilang et sakey a prinsipyo ed Biblia​—balet say pangipapuso tan panggawa’d satan a kabiangan na Kristianon “balon personalidad” so mankakaukolan na andukdukey a panaon, nagkalalo la no saray datin minumundon ugali tan awawey et nigalet a maong. (Efeso 4:22-24) Ontan so maseguron kipapasen na saray babangatan nen Jesus no nipaakar ed pananalona ed inkamapaatagey tan panamayubo ed panagpaabeba. Kaukolan a bangatan nira nen Jesus a maminpiga nipaakar ed panagpaabeba, kada bekta et parehon manunan punto so ipurek to diad nanduruman anggulo ta pian nipasepsep itan ed sikara, a diad kaunoran et atalosan da.​—Mateo 18:1-4; 23:11, 12; Lucas 14:7-11; Juan 13:5, 12-17.

Diad modernon panaon, naaalig diad saray Kristianon miting tan diad saray palapagan na Watch Tower so alimbawa nen Jesus diad inas-asigtan panangusar na panangulit. Kanian moriaen tayo iya a panangipatnag na maaron panangiyansakit na Dios parad sikatayo tan agbalot onsasawa ed aawaten tayo, a singa saray Israelita a sinmawa ira ed mana. On, diad maanos tayon pangisekar ed inkasikatayo a mangawat ed naynay a panonot nen Jehova, naimano tayo iray maabig a bunga ed bilay tayo. (2 Pedro 3:1) Say ontan a maapresian awawey et nipanengneng tayo a “natatalosan” tayo so Salita na Dios ed kapusoan tayo ontan met ed kanonotan tayo. (Mateo 13:15, 19, 23) Nipaakar ed satan, walaan itayo na maabig ya alimbawa ed si salmistan David, ya anggaman andian na nanduruman espiritual a taganon singa ed naaawat tayo et deneskribe toray ganggan nen Jehova a “masamsamit met nen say dilo tan say ubong na dilo”!​—Salmo 19:10.

Say “Mana” a Mangiter na Andi-Anggaan a Bilay

“Siak so tinapay na bilay,” inkuan nen Jesus ed saray Judio. “Saray atateng yo angan ira na mana ed kalawakan, et inatey ira. ... Siak so tinapay a mabilay a linmasor a nanlapu ed tawen; no wala so mangan ed saya a tinapay, manbilay lawas; ... say tinapay ya iter ko sikato so laman ko, nipaakar ed bilay na mundo.” (Juan 6:48-51) Say literal a tinapay odino mana so ag-akapangiter tan agmakapangiter na andi-anggaan a bilay. Balet saramay aagamilen day pananisia ed dondon bagat nen Jesus so diad kaunoran et panggayagaan day bendision ya andi-anggaan a bilay.​—Mateo 20:28.

Karaklan ed saramay nagugunggunaan ed dondon nen Jesus et panggayagaan day andi-angaan a bilay ed paraison dalin. “Say baleg ya ulop” na saraya​—ya inyanino na ‘dakerakel’ a dayon akiulop ed saray Israelita ed Impaway da manlapud Ehipto so makaliktar ed onsabin “baleg ya irap” a mangekal ed amin a karelmengan ed tapew na dalin. (Apocalipsis 7:9, 10, 14; Exodo 12:38) Walay babaleg nin tumang a panggagayagaan na saramay iyaaninon mismo na Israelitas. Deneskribe nen apostol Pablo irayan manbilang na 144,000, a manitibukel ed espiritual ya Israel na Dios. Say tumang da ed ipapatey et say kikioli ed bilay diad tawen. (Galacia 6:16; Hebreos 3:1; Apocalipsis 14:1) Diman ira ikdan nen Jesus na nikadkaduman klase na mana.

Say Kabaliksan na “Mana ya Inyamot”

Inkuan na apaolin Jesus ed espiritual ya Israel, ‘say manalo, pakanen ko naani mana ya inyamot.’ (Apocalipsis 2:17) Ipapanonot na sayan simbolikon niamot a mana so ingganggan na Dios ed si Moises ya iyatol itan ed sakey a gawa’d balitok a buyog ed loob na sagradon kaban na sipanan. Say Kaban so niyatol ed sankasantosan a dibisyon na tabernakulo. Diman ya inyan pian agnanengneng, a singano niyamot. Niyatol bilang pakanodnonotan, sayan muestra na mana so ag-abulok legan a wadman ed loob na Kaban, kanian matukotukoy itan a simbolo na agmibubulok a suplay na tagano. (Exodo 16:32; Hebreos 9:3, 4, 23, 24) Diad pangiter na niyamot a mana ed 144,000, gagarantiyan nen Jesus so pakaawat da na ag-ipapatey tan agkabubulok bilang espiritun ananak na Dios.​—Juan 6:51; 1 Corinto 15:54.

“Dia ed sika [Jehova] so kawalaan na subol na bilay,” inkuan na salmista. (Salmo 36:9) Agaylan sayan probisyon a mana et mamepekder ed satan ya importantin katuaan​—nampara diad literal tan simbolikon paraan! Say mana ya inter na Dios ed kadaanan ya Israel, say piguratibon mana ya intarya to ed pormay laman nen Jesus ya inter ed biang tayo, tan say simbolikon niyamot a mana ya iiter to ed 144,000 diad panamegley nen Jesus so mangipapanonot ed sikatayon amin nipaakar ed sigpot a pandependi ed Dios nisesengeg ed bilay. (Salmo 39:5, 7) Mapaabeba tan masimpit tayo komon tan naynay tayo komon a bidbiren iyan pandependi. Diad ontan et si Jehova so ‘manggawa ed sikatayo na maong ed kaunoran ya anggaan tayo.’​—Deuteronomio 8:16.

[Saray litrato ed pahina 26]

Pian nagamoray andi-anggaan a bilay, amin a totoo so mandependi ed ‘tinapay a mabilay a linmasor a nanlapu ed tawen’

[Litrato ed pahina 28]

Say iyaatendi ed amin a Kristianon miting so pakapatnagan na apresasyon tayo ed saray panonot nen Jehova