Sikayoran Pamilya, Idayew so Dios Bilang Kabiangan na Kongregasyon To
“Dia ed saray muyong igalang ko si Jehova.”—SALMO 26:12.
1. Antoy sakey ya importantin kabiangan na tuan panagdayew likud ed panagaral tan pikakasi diad abung?
SAY panagdayew ed si Jehova et laktipen toy aliwa labat a pikakasi tan panagaral na Biblia ed abung noagta ontan met ed aktibidad bilang kabiangay kongregasyon na Dios. Ingganggan ed kadaanan ya Israel a ‘pantitiponen so totoo, saray lalaki tan bibii, tan saray angkelag,’ ya aralen so ganggan na Dios ta pian makapanakar ed dalan to. (Deuteronomio 31:12; Josue 8:35) Saray maedad la tan ‘tobonbalon lalaki tan saray birhin’ so pinaseseg a mibiang ed panangidayew ed ngaran nen Jehova. (Salmo 148:12, 13) Saratan a mipadparan uksoyan so onaaplika ed loob na Kristianon kongregasyon. Diad saray Kingdom Hall ed sankadalinan, saray lalaki, bibii, tan ananak so mabulbulos a mibibiang ed saray sesyon ya ipipibali iray dumerengel, tan dakel so naliliketan a tuloy ed pakapibiang.—Hebreos 10:23-25.
2. (a) Akin ya importanti so panagparaan ed panulong ed saray kalangweran pian panggayagaan iray miting? (b) Siopan alimbawa so importanti?
2 Tua, makapaangat so panulong ed saray kalangweran pian napibali ed mabunigas a rotina na aktibidad na kongregasyon. No walaray ugugaw ya onaatendin kaibay atateng da tan ompatnag ya agda panggagayagaan iray miting, antoy nayarin problema? Siempre, maslak ya ugugaw so agmakabayag ya ontalineng tan misasawaen. Makatulong so panagparaan pian nasolbar iyan problema. No anggapoy panagparaan, agmakapibiang so ugugaw ed saray miting ed makabaliksan a paraan. (Uliran 15:23) No anggapoy panagparaan, mairap iran onaligwas ed espiritual a mangitarok na kapenek. (1 Timoteo 4:12, 15) Antoy nayarin gawaen? Unona, kaukolan na atateng ya itepet no kasin sikaray manpaparaan a mismo parad saray miting. Say alimbawa ra so maksil a makaimpluensia. (Lucas 6:40) Say maalwar a panangiplano ed panagaral na pamilya so importanti met a sengegan.
Pamabiskeg ed Puso
3. Legan na panagaral na pamilya, akin a nakaukolan so nikaduman sagpot diad pamabiskeg ed kapusoan, tan antoy kakaukolanen na saya?
3 Say panagaral na pamilya so nepeg ya aliwa labat a panaon pian mangalay pikakabat noagta pian mamabiskeg met ed kapusoan. Mankakaukolan iya na pangamta ed saray problema a kipapaarapan na saray membro na pamilya tan say maaron kapagaan ed balang sakey. Si Jehova so ‘managsalsali na puso.’—1 Awaran 29:17.
4. (a) Antoy kabaliksan na pagmaliw ya “andian na pakatalos”? (b) Antoy nalalanor ed ‘pakarandan na kakabatan’?
4 Antoy naiimano nen Jehova sano usisaen toy kapusoan na ananak tayo? Maslak ed sikara so mangikuan ya inaro ray Dios, tan nakomendaan itan. Ingen, say sakey a malangwer ni odino balo nin makakaaral nipaakar ed si Jehova so walaan na limitadon eksperiensia ed saray dalan nen Jehova. Lapud sikatoy andian na eksperiensia, nayarin sikatoy magmaliw ya “andian na pakatalos,” a singa impangikuan na Biblia. Anganko et aliwan amin a motibo to et mauges, balet mankaukolan na panaon so pangondisyon ed puso na sakey a talagan mamaliket ed Dios. Lalanoren na saya so pangitunos ed saray kanonotan, pilalek, liknaan, emosyon, tan kalat na sakey ed bilay unong ed aabobonan na Dios, ed laknab a posibli ed ag-ayadyarin totoo. No gagawaen na sakey so ontan a panagmoldi ed akindalem na too ed maridios a dalan, sikatoy “makarandan na kakabatan.”—Uliran 9:4; 19:8.
5, 6. Panon a natulongan na atateng iray ananak da pian “makarandan na kakabatan”?
5 Kasin natulongan na atateng so ananak da pian “makarandan na kakabatan”? Tua, anggapoy toon makapangiyan na maong a kipapasen na puso ed sananey a too. Balang sakey ed sikatayo so naikdan na kawayangan a mandesisyon, tan mandependin tuloy ed no antoy aabuloyan tayon nonoten. Balet, tekep na pakatebek et lawas a napapaway na atateng so walad puso na anak da tan no antoy nakakaukolan a tulong. Mangusar na saray tepet a singa say ‘Panoy panmoriam nipaakar ed saya?’ tan ‘Anton talagay labay mon gawaen?’ Insan, ontalineng a maong. Ag-onsasanok. (Uliran 20:5) Importanti so kipapasen a walay panangasi, pakatalos, tan panangaro no labay mon nasabi puso.
6 Pian pabiskegen so maabig iran inklinasyon, mabetbet a singbaten iray bunga na espiritu—kada aspekto na satan—tan mankakaiban pankimeyan bilang pamilya a bayuboan itan. (Galacia 5:22, 23) Paeleten so panangaro ed si Jehova tan ed si Jesu-Kristo, aliwa labat ya ibagan inaro tayo ra noagta singbaten iray rason no akin ya inaro tayo ra tan no panon tayon nipanengneng itan a panangaro. (2 Corinto 5:14, 15) Pabiskegen so pilalek a manggaway duga diad pangikatunongan ed saray pansumpalan a gungguna. Pabiskegen so pilalek pian ipulisay so mauges iran kanonotan, panagsalita, tan kondukta diad pangisingbat ed mauges iran epekto na saratan a bengatla. (Amos 5:15; 3 Juan 11) Ipanengneng no panon a saray kanonotan, panagsalita, tan kondukta—balanglan maong odino mauges—so mangapekta ed relasyon na sakey ed si Jehova.
7. Antoy nagawaan pian tulongan so ananak a mangarap ed saray problema tan mandesisyon ed paraan a mamasiansia ed sikaran maapit ed si Jehova?
7 Sano walay problema na ugaw odino kaukolan toy manggaway importantin desisyon, nayarian tayon tepetan: ‘Antoy nikuan mo ed panmoria nen Jehova nipaakar ed saya? Antoy antam nipaakar ed si Jehova no akin a nibagam so ontan? Impikasim ta la itan ed sikato?’ Masakbay lan igapo no posibli so panulong ed ananak mo pian ipaalagey so padron na bilay a lawas mankaukolan na sagpot pian naseguro so linawa na Dios insan gawaen itan. Diad pakakawalaan da na maapit, personal a relasyon ed si Jehova, panggayagaan day panakar ed saray basbas to. (Salmo 119:34, 35) Saya so mamabiskeg ed apresasyon da ed pribilihyon pakapipilimog ed kongregasyon na tuan Dios.
Panagparaan Parad Saray Miting ed Kongregasyon
8. (a) Antoy ontulong ed sikatayo’d pangilaktip ed amin a bengatlan kaukolan ya imanoen diad panagaral na pamilya tayo? (b) Panon kaimportanti iyan panagaral?
8 Walaray dakel a pamaakaran a mankaukolan na imano legan na saray panaon na panagaral na pamilya. Panon yon nakapet ya amin iratan? Imposiblin napambabansag a gawaen iray amin a bengatla. Balet nayarin naimano yon makatulong so panggaway listaan. (Uliran 21:5) Panapanaon, repasoen itan tan nonoten iray kaukolan ya ikday nikaduman imano. Iteen so interes ed iyaaligwas na balang membro na pamilya. Sayan uksoyan parad panagaral na pamilya so importantin kabiangan na Kristianon edukasyon, a manginlong ed sikatayo parad bilay natan tan mangiparaan ed sikatayo parad magnayon a bilay ed arapen.—1 Timoteo 4:8.
9. Antoran kalat nipaakar ed panagparaan ed miting so nayarin kalkalnan pankimeyan legan na saray panagaral na pamilya tayo?
9 Kasin say panagaral na pamilya yo et laktipen toy panagparaan parad saray miting ed kongregasyon? Walaray dakel a proyekto a nayarin progresibon pankimeyan legan kayon mankakaiban manaral. Arum ed saraya so nayarin mankaukolan na pigaran simba, bulan, odino taon ni ingen pian nagawaan itan. Konsideraen pa irayan kalat: (1) manparaan so balang sakey ed pamilya ed pankomento diad saray miting ed kongregasyon; (2) panpelengan na balang sakey so pankomento ed dili toran salita; (3) ilaktip iray teksto ed saray komento; tan (4) analisaen so materyal a sinononot ed personal a kiyaplikaan. Amin na saya so makatulong ed indibidual ed pangayarian to’d katuaan.—Salmo 25:4, 5.
10. (a) Panoy pangimano tayo ed balang sakey ed saray miting tayo ed kongregasyon? (b) Akin a makanakana iya?
10 Anggano say panagaral na pamilya yo et kaslakan a nibabase ed leksion ed Panag-Bantayan parad simba, ag-ibabaliwala so kaimportantian na personal odino sankapamilyaan a panagparaan parad Panagaral na Libro ed Kongregasyon, say Teokratikon Eskuelaan Parad Panagministro, tan say Service Meeting. Saraya met so importantin kabiangan na programa ed panangibangat ed sikatayo pian manakar ed dalan nen Jehova. Nayarin panapanaon a makapanparaan kayo parad saray miting bilang sankapamilyaan. Diad pankimey yon saniiba, napaaligwas iray dunong ed panagaral. Bilang resulta, dakel niran kaabigan so naala manlapud saray mismon miting. Arum niran bengatla et singbaten iray gungguna ed regular a panagparaan parad sarayan miting tan say kaimportantian na pakawalaan na pihon panaon ya igana parad satan—Efeso 5:15-17.
11, 12. Panon a makagungguna ed sikatayo so panagparaan parad panagkansion ed kongregasyon, tan panon a nagawaan iya?
11 Diad say “Dalan na Dios ed Bilay” iran Kombension, apaseseg itayon manparaan parad sananey nin kabiangan na saray miting tayo—salanti say panagkansion. Kasin ginawaan yo la itan? Say panggawa ed satan so makatulong ed pangipaslep ed saray katuaan na Biblia ed kaisipan tan kapusoan tayo tan ontan met napalaknab so gayaga tayo ed saray miting ed kongregasyon.
12 Makatulong ed impapuson panagkansion tayo so panagparaan a laktipen toy pamabasa tan paningbat ed kabaliksan na saray salita ed pigaran niyeskedyul a kanta. Diad kadaanan ya Israel, manunaan ya inusar iray instrumento ed musika diad panagdayew. (1 Awaran 25:1; Salmo 28:7) Wala ta ed pamilya yo so makapantogtog na sakey ya instrumento ed musika? Akin ya ag-usaren itan ya instrumento pian ipasal so sakey ed saray kanta na Panarian ya usaren ed satan a simba, insan kansionen so kanta bilang pamilya. Say sananey nin posibilidad et say pangusar ed nirekord iran kanta. Diad arum a daldalin et alay dakep na panangansion na agagi tayo ya anggano anggapoy babansagan a musika. Legan iran manaakar odino mankikimey ed kaumaan da, mabetbet dan panggagayagaan so pangansion ed saray kanta ya aka-eskedyul parad saray miting ed kongregasyon ed satan a simba.—Efeso 5:19.
Panparaan na Pamilya Parad Lawak na Kimeyan
13, 14. Akin a makana so pantotongtong na pamilya a mangiparaan ed kapusoan tayo parad lawak na ministeryo?
13 Say panpulong ed arum nipaakar ed si Jehova tan ed gagala to so importantin kabiangan na bilay tayo. (Isaias 43:10-12; Mateo 24:14) Balanglan malangwer odino maedad la, panggayagaan tayo iyan aktibidad a nagkalalo tan mas baleg so nagawaan tayo no akaparaan itayo. Panon tayon nagawaan iya ed loob na pamilya?
14 Singa ed amin a pamaakaran a manasaglawi ed panagdayew tayo, importanti so pangiparaan ed kapusoan tayo. Kaukolan tayo met a singbaten no akin a gawaen tayo itan ya aliwa labat lan no antoy gawaen tayo. Diad panaon nen Arin Josafat, naikdan iray totoo na instruksion ed madibinon ganggan, balet ibabaga ed sikatayo na Biblia ya ‘agda met impasen iray kapusoan da.’ Saya so amainomay ed sikara ed saray pakasagyatan ya angiyarawi ed sikara manlapud tuan panagdayew. (2 Awaran 20:33; 21:11) Say kalat tayo et aliwa labat lan say pakapanreport na saray oras ya inusar ed lawak na kimeyan, nisay basta labat pakapangipalima na literatura. Say ministeryo tayo so nepeg a balikas na panangaro tayo ed si Jehova tan panangaro tayo ed totoo a mankaukolan na pankanawnawan mamili ed bilay. (Hebreos 13:15) Satan so aktibidad a sikatayoy “kakimeyan na Dios.” (1 Corinto 3:9) Agaylan pribilihyo! Legan itayon mibibiang ed ministeryo, gagawaen tayo itan bilang pitutulongan ed saray masanton anghel. (Apocalipsis 14:6, 7) Anggapo lay magmaong a panaon pian napabiskeg so apresasyon tayo ed saya likud ed pantotongtong na pamilya, balanglan diad sinimban panagaral odino sano sisingbaten so matukoy a teksto manlapud Usisaen so Kasulatan ya Inagew-agew!
15. Kapigan so nayarin panparaan tayo parad lawak na kimeyan bilang pamilya?
15 Kasin tunggal paminsan et ipapanaon yoy panagaral na pamilya yo pian tulongan iray membro na sankaabungan yo a manparaan parad lawak na kimeyan ed satan a simba? Say panggawa ed satan so makagunggunan tuloy. (2 Timoteo 2:15) Makatulong itan ed pagmaliw a makabaliksan tan mabunga so kimeyan da. Sagpaminsan, nayarin mangigana kayo na intiron sesyon ed panagaral parad ontan a panagparaan. Mas mabetbet, nayarin saglawien yoray aspekto ed lawak na ministeryo ed mas antikey iran diskusyon diad sampot na panagaral na pamilya odino diad arum a panaon legan na simba.
16. Singbaten so kablian na balang sakey ed saray kundang a nilista ed parapo.
16 Saray pantotongtong na pamilya so nayarin iyapasakey ed mantutumbokan iran kundang, a singa say onggendan: (1) Pangiparaan ed impasal a maong a presentasyon pati sakey a teksto a basaen ed Biblia no iyabuloy na pankanawnawa. (2) Seguroen a balang sakey so walaan, no posibli, na dili ton bag parad panpulong, Biblia, notebook, tan pansulat, tracts, tan arum a literatura a presentabli. Say bag ed panagpulong so agkaukolan a mabli, balet nepeg a malinis itan. (3) Singbaten no iner so napanpulongan ya impormal. Itultuloy a gawaen so balang kundang na sayan instruksion ed saray panaon legan kayon mankakaiban mankimey ed lawak na kimeyan. Mangiter na makatulong iran suhestion, balet agmangiiter na dakel a tuloy iran punto.
17, 18. (a) Anton nengneng na panagparaan bilang pamilya so makatulong ed pagmaliw a lalon mabunga ed lawak na ministeryo tayo? (b) Anton aspekto na sayan panagparaan so nagawaan kada simba?
17 Say baleg a kabiangan na kimey ya impabtang nen Jesu-Kristo ed papatumbok to et say panaggaway babangatan. (Mateo 28:19, 20) Say panggaway babangatan et aliwa labat lan basta manpulong. Kakaukolanen toy panagbangat. Panon a say panagaral na pamilya yo et ontulong ed sikayo pian magmaliw ya epektibo ed panggawa’d saya?
18 Bilang pamilya, singbaten no siopay kaukolan a pawilen lamet. Arum ed sikara so nayarin angawat na literatura; arum so nayarin basta labat dinmengel. Nayarin nabet ira ed panagkabkaabungan a kimey odino ed impormal a panagpulong diad tindaan odino diad eskuelaan. Paigiya kayo ed Salita na Dios. (Salmo 25:9; Ezequiel 9:4) Desidien no siopa ed balang sakey ed sikayo so malabay ya ondalaw ed satan a simba. Antoy itongtong? Say pantotongtong na pamilya so makatulong ed kada membro pian manparaan. Manginota na espisipiko iran teksto ya inabang ed saray interesado ontan met ed matukoy iran punto manlapud brosyur ya Antoy Kakaukolanen na Dios ed Sikatayo? odino say libron Pikakabat a Mangitonton ed Andi-anggaan a Bilay. Agsasalien a kobrian so dakerakel ed sakey labat ya idalaw. Itilakan so onabung na tepet ya ebatan ed ontumbok ya ibisita. Akin ya aggawaen itan bilang kabiangan na sinimban rotina na pamilya pian iplano no sioparay pawilen na balang sakey, kapigan so panggawa to ed saratan, tan antoy iilaloan ton nasumpal. Say panggawa ed saya so ontulong ed pagmaliw a lalon mabunga so lawak na ministeryo na intiron pamilya.
Itultuloy ya Ibangat ed Sikara so Dalan nen Jehova
19. No saray membro na pamilya so mantultuloy a manakar ed dalan nen Jehova, antoy nepeg dan naeksperiensia, tan antoy ontulong ed saya?
19 Sakey ya angat so pagmaliw ya ulo na pamilya ed sayan marelmeng a mundo. Si Satanas tan saray demonyo to so manggugunaet a maneral ed espiritualidad na saray lingkor nen Jehova. (1 Pedro 5:8) Sakey ni, natan et dakel iray desdes ed sikayon atateng, nagkalalo la ed sikayon mansusulon atateng. Magmairap so pakapangipanaon ed panggawa’d amin a bengatlan labay yon gawaen. Balet ta makanakana so sagpot, anggano sansakey labat so niyaplika yon suhestion et kalkalnan onaligwas so programa na panagaral na pamilya yo. Makapaligsay-puso a tumang so pakanengneng ed saramay maapit ed sikayo a sitotoor a manaakar ed dalan nen Jehova. Pian matalonan manakar ed dalan nen Jehova, saray membro na pamilya so kaukolan a makapanggayaga ed pagmaliw a presenti ed saray miting na kongregasyon tan ed pibibiang ed lawak na ministeryo. Pian magmaliw a tua iya, kakaukolanen so panagparaan—panagparaan a mamabiskeg ed puso tan manginlong ed balang sakey pian nawalaan na makabaliksan a betang.
20. Antoy lalon makatulong ed dakel ya atateng pian naeksperiensia so gayagan nibalikas diad 3 Juan 4?
20 Nipaakar ed saramay atulongan la ed espiritual a paraan, insulat nen apostol Juan: “Anggapo so babaleg a liket ko nen say saya, salanti say pakadngel ko a saray ana’ko manaakar ira ed katuaan.” (3 Juan 4) Saray panagaral na pamilya a nikokonduktan walaay malinew iran gagala ed kanonotan tan saray ulo na pamilya a midedeneng ed mapangasi tan makatulong a paraan ed saray pankaukolan na indibidual iran membro na pamilya et baleg so nagawaan to ed pannanabang na pamilya ed satan a gayaga. Diad pamayubo ed apresasyon parad dalan na Dios ed bilay, natulongan na atateng so pamilya ra pian panggayagaan so sankaabigan a dalan na bilay.—Salmo 19:7-11.
Kasin Nipaliwawa Yo?
◻ Akin ya importantin tuloy ed ananak tayo so panagparaan ed miting?
◻ Panon a natulongan na atateng iray ananak da a “makarandan na kakabatan”?
◻ Panon a makatulong so panagaral na pamilya tayo ed panagparaan parad amin a miting?
◻ Panon a say panagparaan parad lawak na kimeyan bilang pamilya et ontulong ed sikatayon lalon epektibo?
[Litrato ed pahina 20]
Nayarin laktipen na panagaral na pamilya yo so panagparaan parad saray miting ed kongregasyon
[Litrato ed pahina 21]
Makagungguna so panagpasal parad panagkansion diad saray miting