Say Kristianon Kongregasyon​—Lapuan na Panamabiskeg

PIRMI kaermenan la nen Popi, sakey a marikit a mantaon na kulang a 25, ed makapasyodot a kipapasey pamilya lapud ta aglukas so komunikasyon to’d atateng to.a Kayari ton imbesngaw so liknaan to ed Kristianon matatken tan asawa to, sinulat tora: “Misalamat ak a tuloy ta impanaonan yoak a kinatongtong. Agyo labat amta no panon kaimportanti so panangiyansakit yo’d siak. Pisalsalamatan koy Jehova ta inikdan toak na totoon napanmatalkan tan napitongtongan ko.”

Si Toula, ya agano nin abiyuda tan walaay duaran tin-edyer ya ananak, so nigalet ed makapaaburido iran problema ed emosyon tan ed pinansyal. Sikaran saniina so naynay a napapabiskeg ed ibibisita na Kristianon sanasawan kakongregasyon da. Kayarin atalonaan toy situasyon to, pinawitan tora na sakey a kard, a nankuan: “Lawas ta kayon ilalaktip ed saray pikakasik. Sankanonot koray aminpigan impanulong tan impanuporta yo’d siak.”

Kasin no maminsan et naliliknam a “nabebelatan” ka lapud ompapalalon pananesdes na sayan mundo? (Mateo 11:28) Kasin naapektaan na “panaon tan kapalaran [a] nagawa” so bilay mo lapud alay irap iran eksperiensia? (Eclesiastes 9:11) Agmo bukbukor. Balet singa saray nilibon nadedetdetan ya akaromog la na makanakanan tulong diad loob na Kristianon kongregasyon na Tastasi nen Jehova, nagamoran mo met itan. Nen inmunan siglo K.P. et aromog nen apostol Pablo a walaray kapananisiaan a nagkalalo lan “ligliwa” ed sikato. (Colosas 4:10, 11) Naeksperiensiam met itan.

Suporta tan Tulong

Diad Kristianon Griegon Kasulatan, say salitan “kongregasyon” so nipatalos manlapud Griegon terminon ek·kle·siʹa, a say kabaliksan to et sakey a grupo na totoo a pinaniiba. Nisipor ed satan a salita iray ideyan pankakasakey tan pantutulongan.

Say Kristianon kongregasyon so mangiyaalibansa ed katuaay Salita na Dios tan mangiyaabawag ed maong a balita na Panarian to. (1 Timoteo 3:15; 1 Pedro 2:9) Balet, itatarok met na kongregasyon so espiritual a suporta tan tulong ed saramay mililimog ed satan. Ditan a naromog na sakey so grupo na maaro, mapaga, tan manangiyansakit a kakaaro, ya akaparaan tan mabulos ya ontulong tan manligliwa ed arum diad panaon na pakadetdetan.​—2 Corinto 7:5-7.

Saray managdayew nen Jehova so lawas makakaromog na inkaligen tan proteksion ed loob na kongregasyon to. Impabitar na salmista a naeksperiensia toy gayaga tan proteksion ed limog na nandaragup a totoo na Dios. (Salmo 27:4, 5; 55:14; 122:1) Ontan met natan, say Kristianon kongregasyon so sakey ya asosasyon na saray kapananisiaan a manpapabiskegan tan manpapasesegan.​—Uliran 13:20; Roma 1:11, 12.

Nibabangat iray membro na kongregasyon a “manggawa na maabig ed saray amin, nagkalalo ed saray kaamong [da ed] pananisia.” (Galacia 6:10) Say kibabangat da unong ed Biblia so mamapakiwas ed sikaran mangipatnag na inaagin aro tan inkamatamoy ed balang sinansakey. (Roma 12:10; 1 Pedro 3:8) Saray agagi ed espiritual diad loob na kongregasyon so napapakiwas a magmaliw a mapangasi, mikareenan, tan maabagey. (Efeso 4:3) Imbes a pormalidad labat so panagdayew da, nipapanengneng day maaron panangiyansakit ed arum.​—Santiago 1:27.

Diad loob na kongregasyon sirin so pakaromogan na saray nabebelatan ed sakey a maligsa tan singa pamilyan kipapasen. (Marcos 10:29, 30) Say pakakaliknan sikaray kabiangan na sakey a maapit tan maaron grupo so mamapabiskeg ed sikara. (Salmos 133:1-3) Diad panamegley na kongregasyon, itatarok na “matoor tan makabat ya aripen” so masustansian espiritual a “tagano ed panaon a kinepeg to.”​—Mateo 24:45.

Tulong a Manlalapud Saray Maaron Manangasikaso

Makapanilalo iray membro na Kristianon kongregasyon a naromog da ditan iray maaro, makatalos, tan kualipikadon pastol a mangitatarya na suporta tan panamaseseg ed espiritual. Saray pastol a walaan na saratan a kualidad so aliling day “sakey ya amotan [ed] dagem, tan sakey a siruman ed bagyo.” (Isaias 32:1, 2) Saray aturoy-espiritun mamatatken odino manangasikaso so manatalima ed kinmarneron totoo na Dios, mamapaseseg ed saray mansasakit tan walad depresyon, tan manggugunaet a mangipawil ed saramay nankasalanan.​—Salmos 100:3; 1 Pedro 5:2, 3.

Siempre, say ulop na mamatatken ed kongregasyon et aliwa iran propesyonal a therapist odino mantatambal nipaakar ed bunigas, a sarag dan paabigey beblay ed laman odino ed kanonotan a nasasagmak na saray kapananisiaan. Diad sayan sistema na bengabengatla et “kaukolan [na saray agmakayari] so mananambal.” (Lucas 5:31) Anggaman kuan, saratan a pastol so makatulong ed saramay mankakaukolan ed espiritual a paraan. (Santiago 5:14, 15) Kapiganman a posibli, iyuuksoy met na mamatatken so pakatulong ed arum a paraan.​—Santiago 2:15, 16.

Siopa so walad benegan na ontan a maaron uksoyan? Si Jehova a Dios a mismo! Ililitrato nen propetan Ezequiel si Jehova diad impangiyabawag toy: “Siak, manusisa ak naani nipaakar ed saray karnerok, tan anapen ko ra naani. Et ilaban ko ra naani ed saray amin a pasen a nitayakan da . . . Siak met lanlamang so manpastol ed saray karnerok, et parukolen kora naani . . .” Panpapagaan met na Dios iray maletey tan makapkapuy a karnero.​—Ezequiel 34:11, 12, 15, 16.

Tudtuan Tulong ed Dugan Panaon

Talaga ta a walay tulong ed loob na Kristianon kongregasyon? On, tan iyiilustra na onggendan iran alimbawa so nanduruman sirkumstansia ya apaneknekan a makatulong so kongregasyon.

◆ Impatey na inad-aro. Inatey so masiken nen Anna kayari nambayag a sakit. “Nanlapulad saman et naeeksperiensiak so ampetang a panangaro na Kristianon impanaagi,” kuanto. “Saray tuloytuloy a mapangasin salita na pananuporta tan panamaseseg na saray kapananisiaan ko, pati ed masimoon a lakap, so amabiskeg ed siak imbes ya onkapuy, kanian pisalamatan koy Jehova. Nipalikna na panangaro ra’d siak ya atulongan ak a tuloy, apabiskeg, tan ataliman maong.” Anganko ta nanermenan mo met lay impakaandi na inad-aro lapud ipapatey. Diad saratan a panaon, say kakkaukolan a ligliwa tan pakatambayo ed liknaan so sarag ya itarok na saray membro ed kongregasyon.

◆ Sakit. Si Arthur, sakey a managbiahen manangasikason taga-Polandiya, so naynay ya ombibisita ed saray kongregasyon ed Sentral Asia pian pabiskegen ira ed espiritual. Aminsan ed sarayan ibibisita et pirmiy impansakit to tan asagmak toy graben komplikasyon sanen manpapaabig la. “Labay kon ipaamta ed sikayo no panoy impanasikaso ed siak na saray agagi [ed syudad na Kazakhstan],” kuan nen Arthur tekep na pisasalamat a maong. “Agagin lalaki tan bibii, dakel ed sikara so agko kabat​—pati ni ingen iray interesado​—so angitarok na kuarta, tagano, tan medisina. . . . Tan ginawa ra itan a sigagayaga.

“Isipen pay aliknak sanen akaawat ak na sobren nankargay kuarta tan sakey a sulat: ‘Pinablin Agi, ipapasabik ed sikayo so ampetang a panangomustak. Inikdan ak nen Nanay na kuartan pan-sorbetis ko, balet ta denisidik ya iter ed sikayo parad tambal. Manpakasil kayo. Kaukolan itayo nen Jehova ed andukey a panaon. Saya la. Tan istoryaan yo kami ni na marakep tan makaibangat iran istorya. Vova.’” On, singa nipanengneng ed sayan kaso, ugaw man odino matakken ed kongregasyon et nayarian day mangiter na panamabiskeg ed panaon na pansakit.​—Filipos 2:25-29.

◆ Depresyon. Labalabay nen Teri so manlingkor bilang payunir, odino sigpot-panaon a manangiproklama na Panarian. Balet lapud saray problema, kaukolan toy ontunda’d panpapayunir to. “Nakokonsiensia ak ed impanalik a manserbi ed sayan paraan balet ta agko labat asabi anggan sakey a taon,” kuanto. Say amta nen Teri et say panangabobon nen Jehova so mandedependin tuloy ed oras na panseserbi to’d sikato. (Ipareng ed Marcos 12:41-44.) Lapud medyo nagogonigon, inyarawi toy inkasikato. Balet ta walay makaligliwan tulong a nanlapud kongregasyon.

Nanonotan ni nen Teri: “Sakey ya akulaw lan payunir so tampol a tinmulong ed siak tan tinmalineng legan ya imbesngaw koray liknaan ko. Kaalis ko’d abung to et linmemew so liknaan ko. Nanlapulad saman, sayan payunir tan say masiken to, sakey a matatken ed kongregasyon, so angiter na mabmablin tulong. Inagew-agew da ak a tatawagan tan kokomustaen. . . . No maminsan et pigrugrupoen da ak ed panagaral da bilang pamilya, ya angidanet ed siak na kaimportantian na pansiansian maapit na sankapamilyaan.”

Kaslakan la anggan ed saray dedikadon Kristiano so pakaeksperiensia na depresyon, inkadismaya, tan inkabegtebegtew. Agaylay pisalamat tayo ta walay maaro tan mabunlok a tulong ed kongregasyon na Dios!​—1 Tesalonica 5:14.

◆ Saray desyang tan aksidenti. Ompasen ka pan kapamilyaan moy sakey a pamilya na apatiran naandian na kaykayarian lapud inkapoolan na abung da. Kamangta et awalaan ira na tatawagen dan “makapaseseg ya eksperiensian magnayon ya anenyeg ed sikami tan angipaslep ed sikami ed tuan panaaroan ed limog na totoo nen Jehova.” Insalaysay da: “Sikamin tampol so akaawat na saray masimoon ya intatawag na agagi tayo ed espiritual nipaakar ed pananuporta tan piaambegya ra. Agmanunday ikikiriring na telepono. Say masimoon a panangiyansakit tan panangaro na amin so makapatenyeg a tuloy ya akalua kami lapud otang a linawa.”

Ag-abayag et inorganisa na mamatatken ed kongregasyon so sakey a baleg a grupo na agagin lalaki, tan kayari pigaran agew et nipaalagey da so balon abung parad sayan pamilya. Inkelyaw na sakey a kaabay da: “Nengneng mo! Wadtan ya amin so nengneng na totoon mankikimey​—lalaki, bibii, saray andeket, Kastila!” Mabitar iyan ebidensia na inaagin panangaro.​—Juan 13:35.

Inikdan met na kaparan Kristianos so pamilya na saray kawes, tagano, tan kuarta. Inkomento na ama: “Agawa iya ed tiempoy Krismas sano amin so manreregalo, balet ta mapekder min nibaga a samay klase na inkasimoon tan inkamabunlok a nanggayagaan mi et ag-agawa ed arum.” Tan inyarum da ni: “Saray pakanonotan ed inkapoolan so naaandi la tan nasasalatan na saray pinabpablin pakanonotan lapud saray mapangasin gawa tan maong a kakaaro. Pisalsalamatan mi maaron mangatatawen ya Ama tayo, si Jehova, ta walaan kami na makapakelaw, nankakasakey a pamilya na agagi ed dalin, tan pisalamatan min tuloy so pakapibilang ed satan!”

Siempre, say ontan ya isasalet so agposibli, nisay kaukolan ya ilaloan, ed amin a trahedya. Balet seguradon iyiilustra na sayan inkagawa so pananuportan nitarok na sakey a kongregasyon.

Kakabatan a Manlalapud Tagey

Aromog met na dakel so tulong tan biskeg diad loob na Kristianon kongregasyon. Anto itan? Saray palapagan ya ipaparaan na “say matoor tan makabat ya aripen.” Manuna ed saraya et saray dyurnal a Say Panag-Bantayan tan Awake! Ta pian makapangiter na nantekep ya aralem a pakatalos a konseho tan praktikal a bilin, mandedependin tuloy irayan palapagan ed madibinon kakabatan a naromog ed Biblia. (Salmo 119:105) Napalaknab so Makasulatan ya impormasyon diad panamegley na napandependian tan napanmatalkan ya impan-research ed saray tema a singa say mental depression, pananalona ed impakaabuso, nanduruman problema ed sosyal tan ekonomya, saray angat ya aarapen na saray kalangweran, tan ir-irap a partikular ed onaaligwas lan daldalin. Manuna’d amin, iyaalibansa na sarayan palapagan so dalan na Dios bilang say sankaabigan a dalan ed bilay.​—Isaias 30:20, 21.

Kada taon et makakaawat so Watch Tower Society na nilibon sulat na pisasalamat. Singa bilang, sakey ya artikulo na Awake! a nipaakar ed panagbikkel et oniay insulat na balolakin taga-Russia: “Lapud inomay kon na-depress, . . . aminpigan ninonot koy manbikkel. Pinabiskeg na sayan artikulo so talek kon tulongan ak na Dios a resolbien iray problemak. Labay ton manbilay ak. Sikatoy pisalsalamatan ko ed tulong to diad panamegley na sayan artikulo.”

No bilang ta say agnapokpokan a gonigon ed sayan mundo so mairap lan talonaan, makapanseguro ka a walay maligen a lugar diad loob na Kristianon kongregasyon. On, no say naklangan lan desierto na sayan andiay-aron sistema so mamakapuy ed sika, naromog moy makapabiskeg a pasen a pakainawaan ed loob na organisasyon nen Jehova. Diad pakaeksperiensiam ed ontan a suporta, nibalikas mo met so singa ed alikna na sakey a Kristianon biin atalonaan toy graben pansasakit na masiken to tan nansulat: “Lapud nipanengneng ya aro tan panangiyansakit ed sikami, liknaen kon singa kami inampatot nen Jehova ed dakulap to pian nalabasan mi iyan krisis. Agaylay pisalamat ko ta kabiangan ak na makapakelaw ya organisasyon nen Jehova!”

[Paimano ed leksab]

[Saray litrato ed pahina 26]

Sarag tayon pabiskegen iray mansasakit, inateyan, tan arum ni