Determinadon Manumbok ed Dalan na Dios ed Bilay

Say “Dalan na Dios ed Bilay” iran Kombension so walaan na dakel a niiter ed saramay mankaliktan a manlingkor ed Dios! Deneskribe na sakey a delegado so kombension bilang “alay abig a panaon parad instruksion, panamaseseg, tan pakaliwawaan.”

INKUAN met na sakey ni a “dakerakel so panggayagaan, imatleken tan awaten.” Konsideraen tayo la sirin so programan mismo.

Si Jesu-Kristo​—Say Dalan, say Katuaan, tan say Bilay

Saya so tema na inmunan agew na kombension. (Juan 14:6) Indatak na inmunan paliwawa so gagala na pandaragup tayo diad kombension: pian lalon nibangat nipaakar ed sankaabigan a dalan na bilay, say dalan na Dios ed bilay. Babangatan nen Jehova so totoo to no panoy panakar da ed saray dalan to. Gagawaen to iya diad panamegley na Biblia, “say matoor tan makabat ya aripen,” tan say masanton espiritu. (Mateo 24:45-47; Lucas 4:1; 2 Timoteo 3:16) Agaylan pribilihyo so nabangatan na Soberano ed uniberso!

Mitukoyan ed tema ed saman ya agew, say pinagka-teman paliwawa so “Dondon nen Kristo​—Dalan na Dios ed Kilalaban.” Diad pitunosan ed dalan na Dios ed bilay, importantin bidbiren so betang nen Jesu-Kristo ed gagala nen Jehova. Inkuan na espiker: “No anggapoy dondon bagat nen Jesu-Kristo, anggapoy too, antokaman iray sisiaen odino pansasagpotan to a makaawat na andi-anggaan a bilay manlapud Dios.” Insan inaon toy Juan 3:16, a kuanto: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” Say pangagamil na pananisia ed dondon bagat nen Kristo et kakaukolanen toy pakarateng tayo’d suston pikakabat ed katuaan. Lalanoren to met so pangidedika tayoy bilay tayo ed si Jehova, ya isimbolo itan diad bautismo ed danum, tan manbilay unong ed alimbawan inter nen Jesu-Kristo.​—1 Pedro 2:21.

Say sesyon ed ngarem so ginmapo’d paliwawan atituloan na “Say Dalan na Aro so Agbalot Onsaew.” Laktipen na saya so bersikulo por bersikulon impaningbat ed makapasagyat a deskripsion nen Pablo ed aro, a nirekord diad 1 Corinto 13:4-8. Apanonotan iray dumerengel a say dilin-panagsakripisyon aro so pakabidbiran a kabiangan na Inkakristiano tan say aro ed Dios tan ed kaparan totoo so makanan kabiangan na panagdayew ya aabobonan nen Jehova.

Insan tinmumbok so taloran-parti na simposium ya atituloan na “Atateng​—Ipurek so Dalan na Dios ed Ananak Yo.” Natulongan na atateng iray anak da a manlingkor ed Dios diad pangipanengneng na maabig ya alimbawa ed panagbasa tan panagaral na Salita to. Nayarian dan ipurek so katuaan ed ananak da diad panamegley na regular a panagaral na pamilya, ya itukoy itan pian nakapet iray nakakaukolan na pamilya. Importanti met so panulong ed ananak a mibiang ed aktibidades na kongregasyon tan ed lawak na ministeryo. Anggaman sakey ya angat so pamabaleg na matakot ed Dios ya ananak ed sayan marelmeng a mundo, say panggawa’d satan so mangitarok na baleg iran tumang.

Ontumbok ed sayan simposium et say paliwawan “Pamoldi Ka ed si Jehova Parad Mapagalang a Pakausaran.” No panon a say domadamili et momoldien toy pitek a baseha, ontan met so panmomoldi na Dios ed saramay manpirawat a manlingkor ed sikato. (Roma 9:20, 21) Gagawaen to iya diad pangitatarya na simbawa ed Salita to tan panamegley na organisasyon to. Tulongan itayo nen Jehova ya usaren tayoray abilidad tayo a sigpot no akaparaan itayo, onkiwas unong ed saray pankanawnawa, tan mabulos itayon paiwanwan ed sikato.

Tinmumbok ed satan so makapaligsan kabiangan na programa a​—“Serbisyo ed Lawak a Panagmisionaryo.” Say peles a manlilingkor ed sankadalinan diad 148 a bansa et 2,390 a Kristianon ministros a nikokonsideran misionaryo. Mangipapanengneng ira na matalonggaring ya alimbawa na katooran tan seseg tan misalsalamat a tuloy ed pribilihyo ran panlingkor ed arum a bansa. Legan na sayan parti ed programa diad internasyonal iran kombension, sinalambit na saray misionaryo iray angat tan gayaga ed panagmisionaryo.

Say unor a paliwawa ed pilimeron agew so atituloan na “Wala Ta so Bilay Kayari Ipatey?” Sayan tepet so manwewetwet ed katooan ed loob la na saray milenyo. Panuumamengay totoo ed amin a sosyedad itan a tema. Dakerakel iray ibabagan ebat. Nanduruma iratan a singa ed saray kustombre tan relihyon na saramay mangiyoopresi ed saratan. Ingen, kaukolan ya aralen na totoo so katuaan.

Ontan met, inyanunsio na espiker so kipaway na makolor a balon 32-pahinan brosyur ya Antoy Nagagawa ed Sikatayo Sano Inatey Itayo? Ipapaliwawa na sayan brosyur so lapuan na bangat ya ag-ipapatey na kamarerwa tan ipapanengneng to no panon a say ideya so nagmaliw a manunan bangat na ngalngalin amin lawarin relihyon ed mundo natan. Diad malinew tan makapasagyat a paraan, uusisaen toy ibabaga na Biblia nipaakar ed kamarerwa, no akin ya ompapatey itayo, tan antoy nagawa ed sikatayo diad ipapatey. Ipapaliwawa met na brosyur no antoy ilalo na saray inatey tan mabilay. Agaylan bendision iyan publikasyon parad saray manaanap na katuaan ed amin a pasen!

Mansiansian Pirmin Bantayay Kakukurang Yo

Agaylan matukoy iyan tema parad komaduan agew na kombension! (Efeso 5:15) Say programa ed kabuasan so mangiyaapasakey ed panagpulong tan panaggaway babangatan a kimey. Kayari na diskusyon ed teksto parad saman ya agew, intuloy so programa tekep na paliwawan “Pananulong ed Totoon Manakar ed Dalan ya Ompugta’d Bilay.” Diad panggawa’d sayan maganat a kimey, importanti so pakawalaan na positibon awawey, a bibidbiren a say panginabang ed katuaan ed arum et namparan pribilihyo tan obligasyon. Nen inmunan siglo K.P., maslak a totoo so angipulisay ed Salita na Dios. Balet, anggaman ed isusumpa et walaray ‘suston nikiling parad andi-anggaan a bilay tan nagmaliw a mananisia.’ (Gawa 13:48, 50, NW; 14:1-5) Mipadpara met so kipapasen natan. Anggaman dakel so mangipupulisay ed katuaan na Biblia, itutultuloy tayon aanapen iramay onkiwas a paborabli.​—Mateo 10:11-13.

Siningbat na tinmumbok a paliwawa so angat ed panabi’d arum tekep na mensahe na bilay. Lapud mas mairap natan a nasabi iray totoo ed ayaman da, kaukolan tayon gawaey anggaay nayarian tayo tan mapamaraan ta pian nasabi tayoy dakel anggad nayari tekep na mensahe na Panarian. Diad dakel a daldalin, saray manangipalapag na maong a balita so makakagamor na maabig iran resulta diad panamegley na panagtasi ed telepono tan diad panagpulong ed pasen na pannenegosyoan, diad ontan et nasabi iraman so mairap a nakatongtong.

Say paliwawan atituloan na “Ibangat Iray Babangatan ed Amin ya Ingganggan nen Kristo” so mangiyaapasakey ed kaimportantian na pagmaliw a larino ed ministeryo tayo. Saray dunong tayo ed panagbangat so napatarem legan a makakaaral itayo manlapud arum tan iyaaplika so ekselentin panangipasal a naaawat diad saray miting ed kongregasyon. Legan ya ondudunong itayo ed panagbangat tayo, lalon magayaga tan napepenek itayo ed kimey tayon pananulong ed totoo a makaaral na katuaan na Biblia.

Sinampotan so sesyon ed kabuasan ed paliwawan nipaakar ed kabaliksan na dedikasyon tan bautismo. Sakey ed saray punton impabitar na espiker et no sigpot itayon manmatalek ed Dios tan masimoon a pambanikelan tayon gawaen so linawa to, bendisionan tan sustunien to itayo. Onia so insulat na makabat a laki: “Dia ed saray amin a dalan mo sikato [say Dios] so bidbiren mo, et sikato itonton to so saray basbas mo.” (Uliran 3:6) Say mismon magayagan bautismo so sakey a pabitar na kombension a mangipapanengneng a dakel so ginmapo lan ontumbok ed dalan na Dios ed bilay.

Kayari na ugto, say sesyon ed ngarem so ginmapo ed paliwawan “Panaglingkor Tekep na Ilalon Bilay ya Andi-Anggaan.” Say gagala na Dios a nawalaan na matulok a totoo a manlingkor ed sikato ed ando lan ando ed dalin so nasumpal. Sirin, agaylan matukotukoy ya isentro tayoy panag-isip, plano, tan ilalo tayo ed panlingkor ed si Jehova tekep na ilalo ed inkamagnayon! Bangta labay tayon lawas nonoten so “agew na Dios,” importantin tandaan a say kalat tayo et say panlingkor ed ando lan ando. (2 Pedro 3:12) Say agtayo pakaamta ed eksakton panaon na pangipaakseb nen Jesus ed panangibales na Dios so mamasiansia ed sikatayon akabantay tan mangiter ed sikatayo na inagew-agew iran pankanawnawa pian paneknekan a panlilingkoran tayoy Jehova tekep na andi-siblet iran motibo.

Say duaran paliwawa a tinmumbok so angusisa ed koma-4 a kapitulo na sulat nen Pablo ed saray taga-Efeso. Arum ed saray bengatlan asingbat et say bendision a walad sikatayon “langkap a totoo,” kualipikado ed espiritual a lalaki a tuturoen na masanton espiritu. Sarayan mamatatken so mangitatarya na konseho tan panangiwanwan parad espiritual a gungguna tayo. Say apuyanan a sulat nen Pablo so mamapaseseg met ed saray Kristiano a mangisulong ed “too a balo.” (Efeso 4:8, 24) Say maridios a personalidad so mangilalaktip ed saray kualidad a singa say maabagey, mapangasi, kaabebaan ed nonot, kaumildian, andukey a panagtepel, tan aro.​—Colosas 3:12-14.

Say pansiansian pirmin akabantay ed no panoy panakar tayo so mangilalanor ed pansiansia tayon ag-amatikan na mundo​—so tema na tinmumbok a paliwawa. Kakaukolanen so inkasimbang ed panagpili na panligliwaan, sosyal iran aktibidad, tan materyal iran gegemtan. Diad pangiyaplika ed simbawa diad Santiago 1:27 ed pansiansian ag-amatikan na mundo, panggayagaan tayoy malinis a talindeg ed Dios tan maong a konsiensia. Makapambilay itayo met a walaan na gagala tan nabendisionan na kareenan, iyaaligwas ed espiritual, tan alay abig iran kalimog.

Insan sinmumblay so taloran-parti na simposium ya atituloan na “Sikayoran Tobonbalo​—Tumboken so Dalan na Dios.” Diad pakaamtan aaroen ira na Dios tan aapresiaen toy sagpot da pian itandoro so puron panagdayew, kaukolan ya ipasal na saray kalangweran so pakayari na pakatebek da a manlingkor ed sikato a sitotoor. Sakey a paraan a nabayuboan iray pakayari na pakatebek et diad pambasay Salita na Dios ya inagew-agew tan pandalepdep ed satan. No gawaen tayo iya, naamtaan tayoray dalan nen Jehova. (Salmo 119:9-11) Saray pakayari na pakatebek so nabayuboan met diad pangawat ed matakken a konseho manlapud atateng, mamatatken, tan saray publikasyon na Sosyedad. Diad panamegley na pangusar da’d saray pakayari na pakatebek da ed dugan paraan, naresistian na saray kalangweran so pirmin kapagaan ed materyal iran kayarian, agmalinis a panagsalita, tan alablabas a panligliwaan ya ipapanengneng na sayan mundon nisian manlapud Dios. Diad panumbok ed dalan na Dios ed bilay, saray kalangweran ontan met ed mamatakken so makapanggayaga ed tuan itatalona.

Say unor a paliwawa ed komaduan agew so “Say Manamalsa​—Say Personalidad tan Saray Dalan To.” Kayari impangipabitar a binilyon a totoo so agmakaamta ed Manamalsa, inkuan na espiker: “Say peteg a kabaliksan na bilay et mitukoyan ed pangamta’d Manamalsa, say personal a Dios tayo; say pamidbir ed personalidad to; tan pikoopera ed saray dalan to. . . . Walaray bengatlan nipaakar ed mundo tayo tan nipaakar ed sikatayon mismo a nausar yo pian tulongay totoo a mamidbir ed Manamalsa tan pian nawalaay gagalan misiglaotan ed sikato.” Insan siningbat na espiker so paneknek a mangituturo ed kiwawala na makabat tan maaron Manamalsa. Say paliwawa so amantok ed kipaway na balon libro​—Is There a Creator Who Cares About You?

“Saya so Dalan. Ondalan Kayo ed Sikato”

Saya so tema na komatlon agew na kombension. (Isaias 30:21) Ginapoan so programa ed makapasagyat a simposium na taloran paliwawa, ya akasentro’d pasingawey nen Ezequiel nipaakar ed templo. Sayan pasingawey so walaan na baleg a kabaliksan parad totoo na Dios natan, ta ontutukoy itan ed puron panagdayew ed panaon tayo. Say tombok ed pakatalos ed pasingawey et saya: Say matalonggaring ya espiritual a templo nen Jehova so mangirerepresenta ed uksoyan to parad puron panagdayew. Legan a nasisingbat iray kabiangan na pasingawey, inumameng na saray dumerengel so aktibidad da diad panusuporta ra’d kimey a gagawaen na saray maaron manangasikaso a kabiangan na saray alanaan a nakdaan tan na saray prospektibon membro na pangulon klase.

Diad onkakaagwan, wala so marakep a drama unong ed Biblia tekep na walay costume iran angipalabas. Say drama so atituloan na “Sikayoran Pamilya​—Iyugali Yoy Inagew-agew a Panagbasay Biblia!” Inlitrato toy pananisia tan inkakpel na taloran Hebreo ya agdinmakmomo ed binalitokan ya imahen ya impaalagey nen Arin Nabucodonosor na Babilonia. Say gagala na drama et pian ipanengneng ya aliwa labat a libro na kadaanan ya awaran so Biblia noagta say konseho to so talagan makagungguna ed namparan kalangweran tan saray wala la’d edad ed panaon tayo.

Say sesyon ed ngarem so oras parad publikon paliwawa “Say Mogmon Dalan a Mamaarap ed Andi-Anggaan a Bilay.” Kayarin sinuysoy so awaran na inkaplag na katooan ed kasalanan tan ipapatey, sinampotan na espiker ed sarayan makatenyeg-kanonotan a salita: “Say teksto ed Biblia a pinagka-tema parad sayan agew na kombension et inaon ed Isaias kapitulo 30, bersikulo 21, a kuanto: ‘Saray layag mo makadngel ira naani na sakey a salita ed beneg mo, a kuanto: “Saya so dalan, ondalan kayo ed sikato,” sano onarap kayo ed kawanan odino sano onarap kayo ed nikawigi.’ Panon tayon narengel iyan bosis? Diad italineng ed Salitay Dios, say Masanton Biblia, tan diad itumbok ed panangiwanwan na Engranden Instruktor tayo, si Jehova a Dios, a nitatarya panamegley na satan tan diad panamegley na modernon-agew a Kristianon organisasyon to. On, say panggawa’d saya so mogmon dalan a mamaarap ed andi-anggaan a bilay.”

Kayari na sumaryo ed panagaral ed artikulo na Panag-Bantayan parad saman a simba et sinmublay so pinal a paliwawa, ya atituloan na “Mansiansian Manakar Diad Dalan nen Jehova.” Diad kabiangan, nirepaso toy manuna iran punto na programa. Insan impresenta na espiker so sakey a resolusyon a nibalikas ditan so determinasyon a mantultuloy a manbilay ed dalan na Dios.

Say resolusyon so sinampotan tekep na sarayan makasagyat a salita: “Kombinsido itayon say pambilay diad panamegley na Makasulatan iran prinsipyo, konseho, tan simbawa so manggawan sankaabigan ed dalan na bilay natan tan mangiletneg na maabig a pundasyon parad arapen, ta pian nabembenan tayon malet so peteg a bilay. Manuna’d amin, ginawa tayo iyan resolusyon lapud inaro tayo si Jehova a Dios tekep na intiron puso, kamarerwa, nonot, tan biskeg!” Amin ya inmatendi so amekder ed piabobon da tekep na impangikelyaw na on!

[Kahon/Litrato ed pahina 8]

Is There a Creator Who Cares About You?

Say balon libro a walaan na onian titulo so mangipaparungtal ed makakombinsin paneknek ed kiwawala na Manamalsa, si Jehova, tan sisingbaten toray kualidad to. Denisinyo itan nagkalautla parad saramay edukadon tuloy ed sekular a pamaakaran balet ta agmanisia ed Dios. Sayan 192-pahinan libro so mamabiskeg met ed pananisia na saray indibidual a manisia la ed Dios, mamaelet na apresasyon ed personalidad tan ed saray dalan to.

Say Is There a Creator Who Cares About You? so agmangipasen a manisia la ed Dios so managbasa. Imbes, sisingbaten to no panon a saray agano nin sientipikon diskobre tan ideya so mamaneknek ed kiwawala na Manamalsa. Arum ed saray kapitulo so atituloan na “What Can Add Meaning to Your Life?,” “How Did Our Universe Get Here?​—The Controversy,” tan “How Unique You Are!” Sisingbaten na arum a kapitulo no akin a makaseguro itayon say Biblia so pinuyanan na Dios. Say balon libro so mangiiter met na intiramintin panmoria ed Biblia, a mangipaparungtal ed personalidad tan saray dalan na Manamalsa. Aglabat sisingbaten na libro no akin ya aabuloyan na Dios so pirmin kairapan noagta ipapaliwawa to met no panon ton panganggaen itan ed ando lan ando.

[Saray litrato ed pahina 7]

Dakel so abautismoan

[Saray litrato ed pahina 7]

Say balon brosyur so impaway nen A. D. Schroeder, membro na Mananguley ya Ulop na Tastasi nen Jehova

[Saray litrato ed pahina 8, 9]

Ipapaseseg na makatenyeg a drama so inagew-agew a panagbasa na Biblia