Walaan Ka Ta na Anghel de la Guardia?
KASIN panisiaan mon walaan ka na anghel de la guardia? Isipen na dakel a totoo a walaan ira. Nipaakar ed satan, sakey a bii ed mamasagur na Canada so ibabagan walaan na espisyal a langkap nipaakar ed saray anghel. No iter mo’d sikatoy kompleton ngaran mo tekep na $200 na Canada, ikuan ton ipasen to ka ed pakapitalosan ed anghel de la guardiam. Primero, sikatoy mandalepdep ya akaapasakey ed dalang na kandila. Insan, sikatoy walaan na pasingawey ya iter na anghel mo ed sikato so mensahe pian ipasabi ed sika. Bilang bonus, say bii so mangidrowing no antoy itsura na anghel mo.
Parad pigara, ompatnag a miulibay iya ed istorya nipaakar ed Ari na Pransyan si Louis IX. Sikatoy pinanisiaan ya analiw na mabmabli iran bago ya apagpag kuno manlapud saray payak nen Miguel Arkanghel. Anggaman susuppiaten iyan istorya, dakel so tampol a mangawat ed ibabaga na biin taga-Canada.
Makapaay-ayat ed Saray Anghel
Diad agano niran taon et wala so pirmin interes ed saray anghel. Diad telebision tan ed saray pelikula, libro, magasin, tan pampleta et nibabaga ed sikatayo so nipaakar ed saray anghel a manliligliwa ed saramay graben mansasakit, manatambayo ed inateyan, manginanabang na kakabatan, tan mangiyaagel ed totoo ed patey. Diad Estados Unidos, ngalngalin 20 milyon so manbabantay na sinimban serye ed telebision a mangipapalabas na anghelikon isasalet ed bilay na totoo. Sakey a lakoay libro so walaay listaan na masulok a 400 libro nipaakar ed saray anghel.
Isasalaysay na agano nin libro iray eksperiensia nipaakar ed no panon a saray anghel de la guardia so angisalba’d bilay na saray sundalo ed bakal. Akasulat ed saray istiker ed bamper na luluganan a saray drayber so proprotektaan na saray anghel de la guardia. Saray organisasyon, komperensia, tan seminar so mangidadalangirang ed panagaral nipaakar ed saray anghel tan ibabagan ontulong ed totoo a mitalosan ed sikara.
Si Eileen Freeman so nansulat na taloran libro nipaakar ed saray anghel tan say manangipalapag na dyurnal a nikabkabiig a nideboto ed sikara. Ipipilit to: “Panisiaan ko a kada anghel ed tawen et wala met so anghel de la guardia ed Dalin, sakey a persona a saray kimey to et aliwa labat lan say pangidayew ed Dios diad mangatatawen ya ayaman noagta ed aktual a pangasikaso ed totoo tan arum a nengneng na bilay ed Dalin. Sakey ya anghel de la guardia so niasain ed balang sakey ed sikatayo sanen inginginew itayo tan mamabantay ed sikatayo legay ibabaleg tayo ed panag-anakan, legay kianak tayo, legay bilay tayo ed sayan mundo, anggad iwanwan itayo na anghel manlapud sayan mundo a paonla ed gloria ed tawen.” Saya so manideskriben maong ed popular a panmoria nipaakar ed saray anghel de la guardia.
Diad sarayan makapadesdes tan mairap a panaon, makaligliwa so panisia a walaan itayo na dilin anghel de la guardia, a say kimey to et protektaan itayo. Antoy ibabaga na Salitay Dios, say Biblia, nipaakar ed saya? Kasin nepeg tayon saliey pitalosan ed saray anghel? Kasin mapaga ira ed saray moral ya estandarte tan relihyoson sisiaen tayo? Anton tulong so nailaloan tayo manlapud sikara? Sarayan tepet so naebatan ed ontumbok ya artikulo.