Panaayam Tan Panpupulong ed Kabangibang na Sakey a Bolkan

“MAKAPAKEBBIEW ya eksperiensia. Nayarin niyaliling itan a tuloy ed anggaan na mundo a sasaglawien na Biblia. Nepeg a mansiansia itayon alerto tan walad maong a talindeg ed arap nen Jehova a Dios ed amin a bekta.” Saratan so salita nen Víctor, sakey ed Tastasi nen Jehova, diad pangisasalaysay toy eksperiensia ton panaayam ed asingger ed bolkan a Popocatépetl, bantog a tatawagey Popo, ed Mexico.

Sayan manungol a bolkan so internasyonal lan nibabalita nanlapulad nen 1994.a Inkuan na saray autoridad ya amin a bengatla ed nasasaknapan na 30 kilometro a paliber manlapud bungangay bolkan so walad mapeligron kipapasen. Say abalaten a diking na bolkan so nagkalalo lan mapeligro lapud say bungangay bolkan so akapaarap ed satan a direksion tan walaray araralem a letak a nayarin agosan na lava tan pitek a manlalapud bungangay bolkan.

Natural labat, panumamengan na dakel no antoy nagawa ed Syudad na Mexico no bilbilang ta ombetag lan pirmi so bolkan. Kasin walad kapeligroan so syudad? Insan walara met so totoo ed estado na Morelos ed abalaten na bolkan. Kasin amin a manaayam ed satan a lugar so wala met ed kapeligroan? Tan antoy aliling na panaayam ed kabangibang na bolkan, ya ag-amta so nayarin nagawa antokaman ya agew?

Say Panesesga na Bolkan

Say baley na Syudad na Mexico et ngalngali 70 kilometro ed amianen-sagur na Popocatépetl, balet arum a distrito to so 40 kilometro so kinaasingger da. Diad katuaan to, say intiron nasasakopan na metropolitan, a walaan na populasyon a 20 milyon, so agla nasasakopay mapeligron lugar. Balet, dependi ed arap na dagem, sayan lugar so naapektoan no mangibugay bolkan na makapal a dapol.

Saray epektoy dapol na bolkan so kaslakan a mas mapalalo ed bandad bukig na bolkan. Sayan lugar et sakopen toy syudad na Puebla tan pigaran angkelag a syudad tan balbaley, a walaan na ngalngali 200,000 a manaayam ed nasasakopan na mapeligron tuloy a lugar. Diad Simba, Mayo 11, 1997, angibuga so bolkan na tinolinadan dapol tan kinmayat ed sayan intiron lugar, ya asabi toy anggad estadoy Veracruz, masulok a 300 kilometro a mamabukig. Diad lugar ya abalaten na bolkan, diad estadoy Morelos, walay pigaran syudad tan balbaley a walaan na dagup a populasyon na ngalngali 40,000 so nayarin niiyan met ed kapeligroan.

Anggaman ed amin na saya, manaayam tan mantratrabaho iray Tastasi nen Jehova. Diad Syudad na Mexico, walay masulok a 90,000 ed sikara ed manga 1,700 a kongregasyon. Say sangay Watch Tower Society so walad paway na Syudad na Mexico ed amianen-bukig, a ngalngali 100 kilometroy kaarawi to ed bolkan. Walay masulok a 800 boluntaryon manlilingkor ed sanga, likud ed manga 500 a boluntaryo a mantratrabaho ed baleg a proyekton panagpaalagey. Amin da so agnasasakopan na mapeligron lugar.

Diad estadoy Morelos, walay ngalngali 50 kongregasyon na Tastasi nen Jehova a walaan na masulok a 2,000 manangipalapag na Panarian. Arum ed saraya, a naromog ed Tetela del Volcán tan Hueyapan, so ngalngalin 20 kilometro manlapud bungangay bolkan. Niarum ni, diad bandad bukig, ed estadoy Puebla, walaray kongregasyon a walaan na ngalngali 600 a manangipalapag a manaayam ed 20-30 kilometro manlapud bolkan. Siempre, nayarin saraya so niiyan ed kapeligroan.

Mansiasiansian Aktibo Iray Tastasi nen Jehova

Anggaman ed tuloytuloy a sesga, ag-ontutunda iray Tastasi nen Jehova ed panpupulong da ed sayan lugar. Pansiasiansiaen da met so eskedyul da ed saray Kristianon miting, a mangiiter ed sikara na liknaan na pankakasakey tan kompiyansa ed silong na sarayan mairap a sirkumstansia. (Hebreos 10:24, 25) Onia so inkuan na sakey a report a nanlapud sakey ed saray kongregasyon: “Walay sankaimanon panguumay awawey na totoo nipaakar ed maong a balita na Panarian. Singa bilang, diad melag a baryo, 18 totoo so agano nin impaiyaralan na Biblia.”

Onia so inreport ni na sananey a kongregasyon, a naromog ed 20 kilometro manlapud bolkan: “Say ibubulaslas so matalonggaring. Sayan kongregasyon so niletneg nen Nobyembre 1996. Legan na ontumbok ya anemiran bulan, 10 indibidual so kinmualipikan mibiang ed lawak a ministeryo. Arum a manangipalapag so manaayam labat ed manga 20 kilometro manlapud bungangay bolkan. Saray Kristianon miting so gagawaen ditan, tan manga 40 so onaatendi.”

Si Magdalena, a manaayam ed San Agustín Ixtahuixtla, Puebla, 25 kilometro labat manlapud bolkan, so siansian aktibon tuloy a mangiyaaral na Biblia. Insalaysay toy agawa kayari na sakey a baleg ya imbetag.

“Apakabatan kami a kaukolan min taynanan so kaabungan mi, a ginawa mi​— anggaman peles na pelag na dapol. Anggaman ed kalimbuatan a situasyon, anonotan koy pamilyan Dorado ya iyaaralan koy Biblia. Siak tan pigaran agagi so linma ed abung na pamilyay Dorado pian tulongan iran manibakwit ed maligen a lugar. Diad asingger a syudad na Puebla, say relief committee na Tastasi nen Jehova so ginmapo lan onkukurang. Nandinayew a maong so pamilyan Dorado ed impakatrato min amin diman. Walaan kami na saray panpundoan ed nanduruman lugar, ya imparaan lan akauna na saray Kristianon agagi parad sikami. Agkami apaulyanan, anggaman arawi kami ed abung. Sayan pamilya so akaatendi la’d pigaran miting diad Kingdom Hall, balet ta sikaray asurprisa ed aron impanengneng na agagi ed sikara ya agda nin balot akabat. Pigaran simba kayari impawil ed kaabungan mi, sayan pamilya so regular lan onaatendi ed amin a miting. Ag-abayag et kinmualipika ira a magmaliw a manangipalapag na maong a balita. Duara ed sikara so abautismoan la natan. Sikaray manlilingkor bilang auxiliary payunir a ministro ed pigaran bulan tan manplaplanon onloob ed regular payunir a serbisyo.”

Si Martha, mantaon na 20 a manaayam ed 21 kilometro manlapud bungangay bolkan, so ag-impaamper ed agpakayari ed panganamot ed amin a pankanawnawa a manpulong. Naaralan toy katuaan taloy taon lay apalabas sanen inmaktibo lamet so bolkan. Imbes a mangusar na wheelchair, a mairap a kontrolen ed nipukpukdol a lugar da, sikatoy linmugan ed sakey ya asno pian mibiang ed panagpulong. Luluganan to met itan ya asno sano miaral. Misalsalamat a tuloy si Martha ed si Jehova ed impagmaliw ton kabiangan na maaron impanaagi, lapud sikatoy mandedependi ed tulong na agagin bibii ed kongregasyon diad ilugan tan iyepas ed asno. Binulan, sikatoy makakapangusar na masulok a 15 oras ed ministeryo.

Diad sarayan nisulinek a lugar, mabetbet a nipapaarap iray Tastasi nen Jehova ed desdes manlapud kakaabay da pian mibiang ed sikara ed panagselebray relihyoso iran holiday. Diad Tulcingo, sakey a baryo a naromog ed ngalngali 20 kilometro manlapud bolkan, sakey a laki so naasain ya ombisita ed Tastasi pian mangolekta na saray donasyon parad saray selebrasyon. Maan-anos ya impaliwawa na agagi no akin ya ag-ira nayarin mibiang ed saraman a relihyoson holiday. Diad paneteger na laki a makakolektay pundo manlapud agagi et sikatoy akilimoglimog ed sikara, ya aamtaen iray arum ed sisiaen da. Nanggayagaan toy pakakaromog na saray ebat ed tepetepet to diad mismon Katolikon Biblia to. Kaibay asawa tan anak ton bii, sikatoy onaatendi la ed saray miting a maparanay ed loob la na sakey taon tan imbalikas toy pilalek ton magmaliw a manangipalapag na maong a balita.

Panon Kan Magmaliw ya Akaparaan?

Indaulo na saray volcanologist so panaaral da tan mangipapaway na saray opisyal a report nipaakar ed mapeligron Popocatépetl, balet ta talagan anggapoy makaamta no antoy nagawa odino no kapigan. Unong ed saray balita ed media tan ed totoon manaayam ed asingger, say bolkan so nayarin ombetag anggan anton oras. Walan talagay kapeligroan. Siempre, saray autoridad so mapagan tuloy tan malabay a manggaway amin a bengatlan nagawaan da pian akaparaan bilbilang ta walay emerhensia. Balet ta natalosan a sikaray nepeg a magmaliw a maalwar ed panamasakbay, lapud agda labay a nalagyat so baleg ya ibakwit no anggapo met so kapeligroan. Anto, sirin so kaukolan a gawaen na sakey?

“Say masimpit a too nanengneng to so mauges, tan yamot to so inkasikato; balet say karaklan ontuloy, tan manlikna nipaakar ed sikato,” kuan na proberbioy Biblia. (Uliran 22:3) Sirin, say makabat a kurang et say pangalay nakakaukolan iran kundang pian naseguro so kaligenan na sakey legan a wala ni pankanawnawa, ya ag ‘ontutuloy’ a singano anggapoy nagawan balot, nisay sigagalan alagaren ni ibetag sakbay ya onkiwas. Onia so panmoria na Tastasi nen Jehova a taga ditan nipaakar ed pamaakaran.

Agano ni, saray manangilaman a nanlapud sangan opisina na Watch Tower Society so akiabet ed saray managbiahen manangasikaso diad estado na Puebla, a maapit a makapitalosan ed saray kongregasyon ed mapeligron lugar. Ginawa iray plano parad saray managbiahen manangasikaso tan saray membro na relief committee pian ombisita ed kada sakey ed saray pamilya a manaayam ed 25 kilometro manlapud bungangay bolkan. Tinutulongan irayan pamilya a mangonsidera ed itaynan ed mapeligron lugar sakbay na ibetag. Saray transportasyon tan panpundoan so inyareglo ta pian walay alisan na 1,500 a totoo ed syudad na Puebla. Arum a pamilya so inmalis pian miamong ed kakanayon da ed arum a syudad.

Panamasakbay ed Babaleg a Sukat

Say asewek, apuy, tan panungol manlapud Popocatépetl so malinew a pakapatnagan a say ibetag et magano la. Amin na saramay malabay a makalegyas so nepeg ya ontalineng ed saray pasakbay ya impaway na saray autoridad tan mangalay manepeg a kiwas. Saray Tastasi nen Jehova ed asingger a lugar na bolkan so mansiasiansian malikas pian naseguro day dilin kaligenan da ontan met pian natulongan day arum a makaimano ed kapeligroan tan onkiwas sakbay ya atrasado lan tuloy.

Diad babaleg a sukat, alerto met iray Tastasi nen Jehova ed saray ebento ed mundo diad liwawa na saray propesiya na Biblia. Saray bakal, yegyeg, eras, sakit, tan krimen so makabkabaliksan a singa ed saray sinyalis na bolkan. Saratan so kabiangan na tugyop na tanda ya impasakbay nen Jesu-Kristo a mananda ed “anggaan na mundo.” Anggaman anggapoy makapikabat ya eksakto ed no kapigan onsabi itan ya anggaan, anggapoy duaruwan onsabi itan tan asingsingger lan maong.​—Mateo 24:3, 7-14, 32-39.

Say maganat a pankaukolan natan et say pangipasen a seryoso na totoo ed inerman a pasen ed pasakbay nen Jesus: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit.” (Lucas 21:34) Saya so malinew a makabat a kurang ya alaen. No panon a saray manamasakbay a sinyal na bolkan et agnepeg a leglemewen, nepeg ya agtayo ibaliwala so panasingger na Anak na too, si Jesu-Kristo, ya angipaseseg: “Kanian, manparaan kayo met komon; ta dia ed oras ya agyo isisipen onsabi Anak na too.”​—Mateo 24:44.

[Paimano ed leksab]

[Saray litrato ed pahina 23]

Si Martha (akalugan ed asno) tan arum nin nantasi ed kabangibang na Popocatépetl