Espisyal a Tuloy a Kasal

DIAD amianen na Mozambique so kawalaan na mabunan patar a dalin ya aliber na mararakep a palandey​—arum so mabato, bangta say arum so asakbongan na mabunan tantanaman. Dia so pakaromogan ed baryo na Fíngoè. Diad maliwawan ambetel iran labi, mankirlap so katawenan lapud saray bitewen, tan say bulan so managaag a liliwawaan toray inatepay dayamin kaabungan na ombaryo. Diad sayan alay dakep ya eksena so akagawaay nikadkaduman kasal.

Nilasus a totoo so nanakar na dakel ya oras, pigaran agew ni ingen, pian onatendi ed sayan espisyal ya okasyon. Arum so ameltang ed anggapoy nasiruman tan mapeligro iran rehyon a panaayaman na saray hyena, leon, tan elepante. Nilikud ed personal a bagahe, dakel a bisita so angaawit na saray manok, kanding, tan pisipising. Kasabi ra’d baryo, sikaray linma ed mapalaway a lugar a gendat ya uusaren parad Kristiano iran kombension. Anggaman naksawan ed impanbiahe, sikaray malikeliket, tan say makakaimis a kalupaan da so pakapatnagan na magunaet a panatalaran ed onsumblay a nagawa.

Sioparay mankakasal? Dakerakel ira! On, amayamay a sanaasawa. Ag-iraya kabiangan na sakey a makasagyat-imanon nambabansag a pankakasal. Diad kasunian, sikaray masimoon tan dugay-inkamotibon sanaasawa a diad apalabas et agda niparehistro iray panamaley da lapud sikaray manaayam ed nisulinek iran rehyon ya arawi ed saray panagparehistroan. Naamtaan la na sarayan amin a sanaasawa iray madibinon estandarte ed panangasawa sanen inaral day Biblia a kaibay Tastasi nen Jehova. Naaralan dan kaukolan day nakasal unong ed saray ley na bansa pian paliketen so Manamalsa ra, say Manangigapo na panangasawa, no panon a di Jose tan Maria so tinmulok ed kakaukolanen ed panagparehistro diad panaoy inkianak nen Jesus.​—Lucas 2:1-5.

Panagprepara Parad Ebento

Say sangan opisina na Tastasi nen Jehova diad Mozambique so nandesiden ontulong. Unona, saray Ministry of Justice and Interior diad kabisera na bansa, a Maputo, so tinupleg pian determinaen no antoran totontonen so kakaukolanen na ley. Insan, saray misionaryo ed kabiseran syudad na luyag na Tete so akitongtong ed lokal iran autoridad pian lalon nitunos iray areglo. Niganay petsan pambiahe na saray misionaryo tan opisyales na Notary tan say Civil Identification Department ed baryo na Fíngoè. Kaleganan, say sangan opisina so angipawit na sulat na panangisalaysay a mangitataryay instruksion ed amin a nalalanor a kongregasyon. Magunaet a tinalaranan na Tastasi tan lokal ya opisyales so nikadkaduman ebento.

Diad Simba, Mayo 18, 1997, sinmabi so taloran misionaryo kaibay opisyales na gobierno ed Fíngoè. Saray lokal ya autoridad so angiprepara na komportablin panpundoan na opisyales ya asingger ed administration building. Balet, nandinayew a tuloy iray ombibisitan opisyal ed inkamaparawes na Tastasi nen Jehova a mas nilabay day mipundo ed saray misyonaryo ed saray ginawan alolong. Asurprisa ira ed impakaamtan sakey ed saray kusinero et sakey a matatken ed lokal a kongregasyon tan sakey a managbiahen manangasikaso so kaiba ed saramay nanboluntaryo ed abebbeba iran kimey bilang preparasyon ed kasal. Naimano ra met so inkamapaelek na saray misionaryo, ya, anggapoy reklamo, et nanpundo ed alolong labat tan nanames panamegley na kaor. Agniran balot akanengneng na ontan kaelet a bedber ed baetan na totoon walaay nanduruman abenegan. Balet, say akasagyatan dan tuloy et say pananisian nipatnag diad baleg iran impansakripisyo pian makapitunosan ed ley na bansa tan ed areglo na Dios.

Magayagan Okasyon

Kasabi na saray sanasawa, tampol iran namparaan parad unonan kundang ed kasal: panangalay birth certificate. Amin so maanos a nanalagar ya akalinya ed arap na grupoy Civil Registry pian iter so personal ya impormasyon nipaakar ed sikara. Insan linma ira ed sananey a linya ta pian manpalitrato, kasumpal to et linma ira ed grupon nanlapud Civil Identification Department pian mangalay identity card da. Ontumbok, pinmawil ira ed grupoy Civil Registry parad panangiparaay pilpilalek a tuloy a marriage certificate. Kayari to, maanos iran akaalagey a nanalagar ed katawag na kangaranan da diad panamegley na megaphone. Say panangiyawat na saray marriage certificate so makatenyeg ya eksena. Walay baleg a gayaga sanen sankabembenan la na balang sanasawa so marriage certificate da a singano mablin tropeo.

Amin na saya so agawa’d pataktak. Ingen, say gayaga na okasyon so ag-inamper na petang tan dabok.

Amisteng iray lalaki, dakel so aka-tsaketa tan aka-korbata. Nanaysing iray bibii ed tradisyonal a paraan, tekep na andukey, makolor ya abel a tinawag a capulana ya akabariber ed kaawakan da. Pigara so akaeba na ugugaw ya aponggos na mipadparan abel.

Maabig so inkagaway bengabengatla, balet pinasyay prosesoen ed sanagew labat. Sanen mansirunget la, saray opisyales na gobierno so sipapangasin nandesiden ituloy ni pangasikaso ed saray sanasawa. Inkuan dan agda nataynanan “iray agagi tayo” a manaalagar kayari pirmin impansakripisyo na saraya pian makakar diman. Sayan espiritu na pikokoopera tan dilin-panagsakripisyo so lawas nanodnonotan.

Pirmi betel na labi. Bangta pigpigaray makapanpundo ed saray alolong, maslak a sanaasawa so walad paway, a nanmumungkog ed dangdangan. Ag-iya amawas na liket na okasyon. Mas maksil nen say pandanuldol na apuy et say paneelekan tan pankakansionan a walaay nankapat a harmoniya. Dakel so angiistorya ed impanbiahe ra, a bembembenan so kapkapan-alan papeles da.

Diad palbangon et arum so linma ed sentroy baryo pian ilako iray manok, kanding, tan pisipising da pian makasalipotpot ed ginastos ed panangiparehistro ed saray panamaley da. Dakel so talagan “angisakripisyo” ed saraman ya ayayep, ya inlalako iratan a mamudmura. Parad pobrin totoo, say sakey a kanding so sakey lan mabli tan mabalor a kayarian; ingen sikaray mabulos a mangisakripisyo ed satan pian nakasal tan napaliket so Manamalsa ra.

Saray Kairapan ed Biahe

Arum ed sanaasawa so nanakar na andukey pian makarateng diman. Onia so kaso di Chamboko tan say akulaw to, si Nhakulira. Insalaysay day istorya ra ed komaduan labi na ebento leleg ya idadangdang daray sali ra. Anggaman manedad lay 77, bulag so sakey a mata tan makapuy lay pakanengneng na pagpag a mata to, si Chamboko so taloy agew a nanakar a kasalisali ya inulop na arum a kakongregasyon to, a determinadon nalegal so 52-taon a panamaley to.

Si Anselmo Kembo, man-edad na 72, so miaamong la ed si Neri ed ngalngali 50 taon. Pigaran agew sakbay na biahe, graben aturok so bikking to na baleg a sabit legan ton bubukalkalen so tataneman to. Sikatoy imbatik ed sankaasinggeran ya ospital pian natambal. Anggaman kuan, dineside toy manakar a manbiahe, a mankitakit ya amaarap ed Fíngoè. Kinaukolan toy taloy agew. Agnapokpokan nen Anselmo so gayaga to leleg ton bembembenan so marriage certificate to.

Sananey nin makatantandan kapkapankasal et si Evans Sinóia, datin poligamista. Sanen naaralan toy katuaan na Salitay Dios, dineside ton nalegal so piaamong to ed sankaunaan ya akulaw to, balet ta aglinmabay, sikatoy tinaynan to tan akila’d sananey a laki. Say komaduan akulaw to, a manaaral met la na Biblia, so inmabobon a mikasal ed sikato. Sikaran dua so nanakar ed mapeligron rehyon a panaayaman na saray leon tan arum a maatap ya ayayep. Kayari taloy-agew a biahe, tinmalona met ira ed impakalegal na kasal da.

Diad Biernes, limay agew kayari inmunan impakasabi na saray misionaryo tan opisyales, say kimey so asumpal a siansia. Say resulta et 468 ya identity cards tan 374 a birth certificate so niiter. Say bilang na niiter a marriage certificate so 233! Say atmospera so sakey a makapaliket. Anggaman ed banal, amin so inmabobon a talagan abawi ray kesaw da. Agpanduaruwaan, mansiansian niukit itan ya okasyon ed kanonotan tan kapusoan na amin ya alanor. Talagan espisyal a tuloy a kasal!