Mangitarok na Dayew so Maabig a Kondukta

KINOMENDAAN na peryodiko ed Italya a La Gazzetta del Mezzogiorno iray Tastasi nen Jehova lapud impangipalapag ed artikulon “Matera​—City of Unique Cave Dwellings.” Pinmatnag iyan artikulo ed Hulyo 8, 1997 a paway na magasin ya Awake!, a malaknab so sirkulasyon to ed dakel a lenguahe. Nipapatalos la natan so Awake! ed 81 a lenguahe tan walaay sirkulasyon na masulok a 19 milyon a kopya ed sankamundoan. Say peryodiko so nankomenton say Awake! so angiletneg na agnapalumbasan a bilang nen tiagew “no nipaakar ed panangiyabawag ed kiyalibansay maawaran tan artistikon tawir na syudad [a Matera].”

Kinomendaan na peryodiko iray Tastasi mikonektaan ed say “Pananisia ed Salita na Dios” a Distriton Kombension ya agawa ed Matera nen 1997. Impaimano na artikulo ya ayarian na Tastasi “a pinantitipon so 4,000 a totoo ed XXI Settembre Stadium [na syudad] diad kapegleyay tiagew tan diad mansasnit ya agew; inasikaso ray impanlinis, panpinta lamet, tan pinarakep so sports center (nagkalautla ed saray kasilyas) a sigpot ya andi bayar, a sinalipotpotan dan mismo so agastos ed impanaliw na nakaukolan a materyales.”

Pambabanikelan na Tastasi nen Jehova so pagmaliw a maong a kakaabay. (Mateo 22:37-39) Tutumboken da met so Makasulatan a simbawa: “Masimpit komon so tongtongan yo ed utel na saray bugkalot, pian . . . nitandoro ra so Dios ed agew na idalaw to, lapu ed saray maong a ginawgawa yo a naimatonan da.”—1 Pedro 2:12.