Panabi’d Kapusoan Tekep na Arte na Pananangguyor

SAY salitan “pananangguyor” so makapainap ed dakel a totoo. Nayarin diad kanonotan na sakey et tukoyen toy managpilit ya agresibon ahente odino patalastas ya adesinyon mamalikdo odino mangimaneobra ed managsaliw. Anggan diad Biblia, say ideyan pananangguyor so no maminsan et walaay negatibon kabaliksan, a mangipapabitar na panangiyabeba odino panangibalang. Alimbawa, insulat na Kristianon apostol Pablo ed saray taga-Galacia: “Mambabtik kayo nensaman a maong. Siopa so anebel ed sikayo, pian agyo unoren so tua? Sayan pangukuyong [“pananangguyor,” NW] aliwan lapu ed saman so mantawtawag ed sikayo.” (Galacia 5:7, 8) Pinasakbayan met nen Pablo iray taga-Colosas ya agda aabuloyay siopaman a ‘mamalingo ed sikara diad makaayat a salita.’ (Colosas 2:4) Say ontan a pananangguyor so mandedependi ed masilib iran argumento a nibase ed palso iran pundasyon.

Balet, diad komaduan sulat to ed si Timoteo, inusar nen apostol Pablo so ideya na pananangguyor ed duman pantalos. Insulat to: “Mansiansia ka ed saray bengatla ya inaral mo tan sinisiam [“akatangguyoran mon manisia,” NW] ya antam no siopa so nanaralan mo ed sikara.” (2 Timoteo 3:14) Diad ‘impakatangguyor ton manisia,’ si Timoteo so agkinontrol na ina tan bai to, ya akaaralan to ed saray Makasulatan a katuaan.​—2 Timoteo 1:5.a

Legan a walad guardiadon abung ed Roma, nagnap a nantasi si Pablo ed karaklan, a “nanlapu ed kabuasan angga ed ngarem, . . . kinalaran [“tinangguyor,” NW] tora nipaakar ed Jesus dia ed panamegley na ganggan nen Moises tan saray Propeta.” (Gawa 28:23) Kasin papalikdoen nen Pablo iray dumerengel to? Andin balot! Malinew, sirin a say pananangguyor et aliwan lawas makapuy.

Nausar ed positibon pantalos, say lamot a salita ed Griego a nipatalos a “tangguyor” so mankabaliksay kombinsien, umanen so nonot diad panamegley na mabunigas, lohikon panagkatunongan. Diad ontan et niletneg na sakey a managbangat so Makasulatan a pundasyon, ya uusaren so pananangguyor pian ipaslep ed arum so kombiksyon ed katuaay Biblia. (2 Timoteo 2:15) On, saya so pakabidbiran na ministeryo nen Pablo. Anggan si Demetrio, ya impasen ton palso iray Kristianon bangat et naimano to ya: “Aliwa labat ed Efeso, noag dia ed ngalngali a lapag na Asia, a sayan Pablo nankuyong tan pinapaliis to so dakel ya ombaley, ya inkuanto ya aliwa irayan dios kuno so ginawa na saray lima.”​—Gawa 19:26.

Panangusar na Pananangguyor Diad Ministeryo

Binilin nen Jesu-Kristo iray patumbok to: “Onla kayo sirin, tan manggawa kayo na saray babangatan ed amin a nasyones, a binyagan yora ed ngaray Ama, tan say Anak, tan say espiritu santo, ya ibangat yo ran mangunor na amin a bengabengatla ya ingganggan ko ed sikayo. Tan, nia! Walaak a naynay ed sikayo, ya angga ed kasampotan na mundo.” (Mateo 28:19, 20) Diad masulok a 230 daldalin, tutuloken na Tastasi nen Jehova iyan ganggan. Kada bulan legan na 1997 a serbisyon taon da, akapangikondukta ira na promedyon 4,552,589 panangiyaral na Biblia diad sankamundoan.

No apribilihyoan kan mangikondukta na sakey a panangiyaral na Biblia, nailaloan mo iray angat a mankaukolay pangusar na arte na pananangguyor. Alimbawa, no bilang ta diad ontumbok a panaral yo, onlesa so tepet nipaakar ed Trinidad. Panon to no kabat mon papanisiaan na iyaaralan mo iyan doktrina? Nayarin ikdan mo na publikasyon a manisingbat ed satan a tema. Kayari ton basaen, naromog mon sikatoy natangguyor lan say Dios tan si Jesus et aliwan pareho. Balet no wala niran siansiay tepet to, panon mon ituloy?

Ontalineng a maong. Ontulong iya ed sikan manetermina no anto so papanisiaan lay iyaaralan mo nipaakar ed sakey a tema. Alimbawa, no inkuan na iyaaralan mo, “manisia ak ed Trinidad,” nayarian mon tampol ya igapoy Makasulatan a diskusyon pian suppiaten iyan doktrina. Balet ta walaray nanduruman sisiaen nipaakar ed Trinidad. Nayarin say papanisiaan na iyaaralan mo et duman tuloy ed uukeran mon doktrinay Trinidad. Mipara met itan ed arum niran sisiaen, a singa say reinkarnasyon, say imortalidad na kamarerwa, tan kilalaban. Kanian ontalineng a maong sakbay a mansalita. Agpapalbengan no antoy sisisiaen na iyaaralan mo.​—Uliran 18:13.

Ontepet. Nayarin nilaktip iraya: ‘Lawas mo ta’n papanisiaay Trinidad? Kasin inaral mo lan maong so ibabaga na Biblia ed satan a tema? No say Dios et kabiangan na trinidad, agta say Salita to, say Biblia, so malinew tan direktan mangibaga la’d satan ed sikatayo?’ Legan ya ibabangat so iyaaralan, panapanaon ya ontunda pian itepet iray tepet a singa saraya: ‘Kasin say kinonsidera ta et makatunongan ed sika?’ ‘Kasin onabobon ka ed sayan eksplinasyon?’ Diad marunong a panangusar moy tepetepet, ipipibalim so iyaaralan ed proseson pakaaral. Kaukolan a sikatoy aglambengat ontatalineng ed pangiyusa-usam ed tema.

Usaren so mabunigas a panagkatunongan. Alimbawa, diad pangisingbat ed doktrinay Trinidad, naibagam ed iyaaralan mo: ‘Sanen abautismoan si Jesus, walay nadngel a bosis a nanlapud tawen, a kuanto: “Ana’ko ya inadaro.” No say Dios et talagan walad dalin a babautismoan, kasin paaniwengen to ni bosis to ed tawen ta pian narengel iratan a salita ed dalin? Agta satan et panangibalang? Kasin say Dios, “ya agto nayari manburi,” so makapanggawa na ontan a panamalikdo?’​—Lucas 3:21, 22: Tito 1:1, 2.

Say mabunigas a panagkatunongan a nipresinta ed mataktikan paraan so mabetbet ya epektibo. Konsideraen pay alimbawa na sakey a biin pangaranan tayoy Barbara. Diad intiron bilay to, papanisiaan ton si Jesus et Dios tan kabiangan na trinidad a mangilaktip ed masanton espiritu. Balet ta inkuan ed sikato na sakey ed Tastasi nen Jehova a say Dios tan si Jesus et duaran mandumaan ya indibidual, tan impanengneng toray kasulatan ed sikato pian paneknekan iyan balikas.b Agnasuppiat nen Barbara so Biblia. Ontan met, sikatoy sinmaew. Anggaman ed satan ya amin, say doktrinay Trinidad so papablien to.

Maananos ya akikatunongan so Tasi ed si Barbara. “No sasalien mon ibangat ed siak a nampara so duaran persona,” so intepet to, “anton siglaotan ed pamilya so nayarin usaren mo pian iyilustra itan?” Nanisip ya agano insan inmebat: “Nayarin usaren ko so duaran sanagi.” “Susto,” so inyebat na Tasi. “Anganko et mankalupan lason ni ingen. Balet diad pangibabangat to ed sikatayo a moriaen so Dios bilang say Ama tan sikaton mismo bilang say Anak, anto so mensahen ipapasabi nen Jesus?” “Atalosan ko la,” so inyebat nen Barbara, ya akamulagat. “Dedeskribien to so sakey a papanguloan tan walaay nagkalalon autoridad.”

“On,” so inyebat na Tasi, “tan say Judion dumerengel nen Jesus, a manaayam ed sosyedad na patriarka, so nagkalalo lan akasabi ed ontan a konklusyon.” Pian idanet so punto to, inkuan na Tasi: “No akapawala ta na ontan a dugarugan ilustrasyon pian ibangat so inkaparpara​—na say sanagi odino mankalupan lason​—maseguron ontan met so gawaen nen Jesus, say Baleg a Managbangat. Imbes, inusar toray terminon ‘ama’ tan ‘anak’ pian deskribien so siglaotan to tan say Dios.”

Atalosan a siansia nen Barbara so punto, tan inawat to itan. Asabi so puso to tekep na arte na pananangguyor.

Pidedeneng ed Saray Emosyon

Saray nigalet lan maong a relihyoson sisiaen so mabetbet a mangilalanor ed emosyonal ya aspekto. Konsideraen pay kaso nen Edna, sakey a debosyonadon Katoliko. Saray tin-edyer lan apo to so angipresinta ed sikato na malinew a paneknek ed Kasulatan a say Dios tan si Jesus et aliwan saksakey a persona. Atalosan nen Edna so nadngel to. Anggaman kuan, sikatoy mapangasi balet ta mapekder ya angikuan: “Manisia ak ed masanton Trinidad.”

Nayarin walaan kay mipadparan eksperiensia. Momoriaen na dakel iray doktrina na relihyon da a singano kabiangan iraya na mismon inkatoo ra. Pian tangguyoren so ontan iran iyaaralan na Biblia, kaukolan so mas ni nen say andiay liknaan a lohiko odino serye na saray kasulatan a mamepekder a lingo so punto de bista na sakey. Maabig a resolbien so ontan iran situasyon diad pamalansi ed arte na pananangguyor tekep na panangabagey. (Ikompara so Roma 12:15; Colosas 3:12.) Tua, say managbangat so kaukolan a walaay mabiskeg a kombiksyon. Alimbawa, inusar nen Pablo iray balikas a singa say “sisiaen ko a peteg” tan “siak amtak, tan sisiaen ko ya agpanduaruwaan ed Katawan a Jesus.” (Roma 8:38; 14:14) Balet, diad pangibabalikas ed saray kombiksyon tayo, agtayo nepeg a mansalitan dogmatiko tan magmaliw a dilin matunong, nisay magmaliw itayon sarkastiko odino manangiyabeba diad pangipresinta na saray katuaan na Biblia. Maseguron agtayo labay ya opendien odino insultoen ni ingen so iyaaralan.​—Uliran 12:18.

Mas epektibon tuloy a respetoen iray sisiaen na iyaaralan tan bidbirey kanepegan to ed impakawalaan na saratan. Say tombok et inkamapaabeba. Say managbangat a walaay kaabebaan na nonot so agnepeg a manisip a sikatoy sipor lan mamaong nen say iyaaralan to. (Lucas 18:9-14; Filipos 2:3, 4) Say maridios a pananangguyor so mangilalaktip ed inkamapaabeba a, bilang resulta, et mangikuan: ‘Si Jehova so mapangasin tinmulong ed siak pian natalosan iya. Abuloyan moak pan manginabang ed sika.’

Diad saray kapara ton Kristiano ed Corinto, insulat nen Pablo: “Say ayura na saray pibabakal [tayo] aliwa ran kien na mangaraldalin, balet makapanyari ra ed arap na Dios a mamagbag na saray malet a fortalezas. Bagbagen [tayo] so kaisipan, tan balang atagey a bengatla ya onalagey ya onsumpa ed kakabatan na Dios, tan itarok [tayon] arakep so balang kanonotan ed katutulok nen Kristo.” (2 Corinto 10:4, 5) Natan, uusaren na Tastasi nen Jehova so Salitay Dios pian puligaren iray nigalet a maong iran palson doktrina ontan met ed nilamot iran maong ya agamil tan walna ya agmamaliket ed sikato. (1 Corinto 6:9-11) Diad panggawa’d saya, nononoten na Tastasi a si Jehova so simamaaron manaanos ed sikara. Agaylay liket da’d impakawalaay Salita to, say Biblia, tan usaren iyan mabiskeg ya uusaren pian bagoten iray palson bangat tan sabien so kapusoan tekep na arte na pananangguyor!

[Saray paimano ed leksab]

[Kahon ed pahina 23]

Panabi ed Puso na Iyaaralan Mo

◻ Ipikasi so panangidirehi nen Jehova diad panabi’d puso na iyaaralay Biblia.​—Nehemias 2:4, 5; Isaias: 50:4.

◻ Tebeken no antoy papanisiaan na iyaaralan tan no akin a satan a palson sisiaen et makapasagyat ed sikato.​—Gawa 17:22, 23.

◻ Diad mapangasi, maanos a paraan, iletneg so lohiko, Makasulatan ya argumento legan a mamantinien so pantotongtongan.​—Gawa 17:24-34.

◻ No posibli, suportaan iray katuaan na Biblia tekep na saray epektibon ilustrasyon.​—Marcos 4:33, 34.

◻ Ipanengneng ed iyaaralan iray gungguna na panangawat na suston pikakabat manlapud Biblia.​—1 Timoteo 2:3, 4; 2 Timoteo 3:14, 15.