Akin ya Agmiulop ed Sikara?

SI NDJAUKUA ULIMBA so 73 años, tan nen imbeneg a taon et sikatoy nambaroy na manga 450 kilometro. Inakar to so intiron distansya, tan asabi toy 16 ya agew.

Andukey so biniahe na sayan mapagalang a masiken ta pian atendiay sakey ed saray tinaon a kombension na Tastasi nen Jehova. Kayari na kombension, nanggayagan tuloy tan apabiskeg ed espiritual, sikatoy nanakar lamet a pasempet​—kaaruman a 16 ya agew. Kasin makana so impansagpot? On, peteg! Oniay tinaon a biabiahien nen Ndjaukua Ulimba ed loob lay pigaran taon.

Sayan Aprikano so sakey ed masulok a 15 milyon a nanlapud masulok a 230 a daldalin ya inmatendi’d saray kombension na Tastasi nen Jehova nen imbeneg a taon. Siempre, maslak so agla nanakar na pigaran agew pian onla’d pasen na kombension. Akasabi so karaklan diad panamegley na kotsi, bus, tren, odino eroplano. Kasin sakey ka’d sikara?

Diad 1998, nagawa lamet iray kombension ed intiron mundo, maslak et legan na saray bulan na tiagew (odino legay kuwarisma). No abuloyay bunigas to, maseguron ontan lamet so andukey ya akaren nen Ndjaukua Ulimba pian makaatendi. Sikato tan say minilyon nin arum so makadngel na praktikal, makapabiskeg-pananisia, tan makapaligsan programa. Parad amin ya onatendi, say kombension so magmaliw ya imporantin ebento ed taon. Sikayo met so ampetapetang a naimbitaan ya onatendi. Saray Tastasi nen Jehova diad lugar yo so maliket a mangibaga’d sikayoy pasen na kombension a sankaasinggeran ed sikayo.