Kasin Deralen na Dios so Mundo?
UNONG ed si Papa Juan Pablo II, makapanilalo iray totoo ed arapen tekep na kompiyansa. Diad intiron awaran, inkuanto, “saray totoo so mantutultuloy a manggagawa na kasalanan, ompan mas alabas ni nen say saramay adeskribe sakbay na delap.” Anggaman ontan, impaliwawa na papa, “manlapud saray salita na impisipanan na Dios ed si Noe et namomoria tayon anggapo natan so kasalanan a mamaskar ed Dios a deraley mundon pinalsa ton mismo.”
Tua ta ya agbalot deralen na Dios so mundo? Ibabaga na Biblia a kayari na Delubio, inkuan na Dios ed si Noe: “Agla natawtaw naani so amin a laman lapu ed saray danudanum na sakey a delap; nisay wala ni naani sakey a delap a maneral na dalin.” (Genesis 9:11) Ibabaga na papa a diad saratan a salita, say Dios “inobliga toy inkasikaton isalbay [dalin] ed kadederal.”
Ipapalinew na Biblia ya ag-abuloyan na Manamalsa a naderal so planeta tayo. “Say dalin mansiansia lawas,” kuan na Biblia. (Eclesiastes 1:4) Balet dakel ni naaralan manlapud Delubio—bengatlan agkinomentoan na papa.
Inkuanen Jesus a saray kipapasen ed dalin diad panaon na arapen a kiwawala to et magmaliw a “[singa] ed saray agew nen Noe,” sanen saray totoo “agda akabkabatan angga ed sinmabi delap et inyanor to ra ya amin.” (Mateo 24:37-39) Mipadpara, insulat nen apostol Pedro ya unong a “say mundo nensaman, dia ed inkayanep to na danum atawtaw,” ontan met “dia ed kaderal na saray mangaruksan totoo” a mamipeligro ed kaplesan a mundo.—2 Pedro 3:5-7.
Alingwanan ta nen Jesus tan Pedro so sipanan na Dios ed si Noe? Andin balot! Unong ya inkuanto ed impisipanan to’d si Noe, agla usaren na Dios so delap ed paneral ed sayan marelmeng a sistema na bengabengatla. Imbes, usaren to so pakapanyari na “Ari na saray arari, tan Katawan na saray kakatawan,” si Jesu-Kristo. (Apocalipsis 19:11-21) Sirin, unong ed Biblia, say dalin so agnaderal, noagta say “mundo” na mauges a katooan so andi-saew a mangangga. (Uliran 2:21, 22; Apocalipsis 11:18) Kayari na satan, “say matunong tawiren to so dalin tan manayam diman lawas.”—Salmo 37:29.