Talaga Ta’n Aapresiaen Moray Panamendision nen Jehova?

SI Kenichi, sakey a walad kapegleyan ya edad a magalang a laki, so linma’d sakey a parmasya pian manaliw na tambal parad samet a panateng. Sanen tinomar toy tambal, ginmatel tan linmulottak so intiron laman to. Agmakapasurprisa, panduaruwaan la nen Kenichi no kasin inimanon maong na parmaseutiko so pankaukolan to.

Nayarin ontan so kaisipan na arum ed si Jehova a Dios a singa ed impanmoria nen Kenichi ed parmaseutiko. Panduaruwaan da no kasin talagan interesado ed sikatayo bilang indibidual so makapanyarin-amin a Dios, a si Jehova. Anggaman aksobien da a maong so Dios, ag-ira kombinsido a sikatoy personal a manatalima ed sikatayo. Nagkalalo lan tua iya sano agmaabig iray bengatla ed sikara odino sano say panutumbok da ed saray prinsipyo na Biblia et tinumbokay mairap iran problema. Lapud kakulangan na pakatebek, momoriaen daray problema ra a singa gatel tan lutlottak ya ag-inilaloan nen Kenichi ya onlesa a singano saratan so kasalanan na Dios.​—Uliran 19:3.

Agnikompara si Jehova ed ag-ayadyarin totoo. Limitadoy pikakabat tan abilidad na totoo. Agda sigpot a natebek iray talagan nakakaukolan na arum, a singa ginawa na parmaseutiko nen Kenichi. Diad kasunian to, anggapoy makalegyas ed imaton nen Jehova. Mabetbet a tutulongan itayo nen Jehova ya agtayo labat natetebek tan namomoria itan a katuaan lapud walaan itayo na tendensia ya anapey anggapo’d sikatayo tan ibaliwalay dakel a bendision a naaawat tayo. Imbes a bengat-bengat a tetelen si Jehova ed antokaman a probleman aarapen tayo, kaukolan tayon panggunaetan a tebeken iray bendision a manlalapud si Jehova a panggagayagaan tayo.

Unong ed Webster’s Ninth New Collegiate Dictionary, say “bendision” so nayarin ukeran bilang “sakey a bengatlan makatulong ed liket odino pankaabigan.” Aapresiaen mo ta a nagkalalo lan tua iya ed saray bendision manlapud si Jehova?

Andiay Kapara Bilang Manangitarya

Sano ibabaga na asawan bii a say asawa to et maong a manangitarya, inkalapagan a tutukoyen ton magenap ton aasikasoen so pankaukolan na pamilya, itataryaan na magenap a tagano, siruman, tan kawes parad panliket tan pankaabigan na pamilya. Kaunongan kamaong si Jehova bilang Manangitarya tayo? Imanoen pan maong so planeta tayon Dalin, say ayaman na too. Satan so nipasen a 150,000,000 kilometro manlapud banwa, dugarugan distansya parad kabkaabigan a temperatura a pagmaliwen ton posibli bilay ed dalin. Say 23.5-degree ya inkabanking na globo tayo so adesinyon nasnaspot, a nanresulta ed nanduruman tiempo a mangiiter na daakan ya ani. Bilang resulta, natatagano na dalin so masulok a limaran bilyon a totoo. Si Jehova so talagan makapakelkelaw a Manangitarya!

Sakey ni, ipapaseguro ed sikatayo na Biblia ya interesadon tuloy si Jehova ed sikatayo bilang indibidual tan ed pankaabigan tayo. Isipen pa labat, kabat nen Jehova ed ngaran so kada sakey ed binilyon a bibitewen, tan anggapoy anggan sakey ya anuyaw a napelag ed dalin ya agto amta. (Isaias 40:26; Mateo 10:29-31) Agaylan mas ni so panatalima to’d katooan a mangaaro ed sikato tan asaliw diad mablin dala na inad-aro ton Anak, si Jesu-Kristo! (Gawa 20:28) Maabig so impangiyabawag na makabat a too: “Say bendision nen Jehova makapayaman; tan agmangarum na ermen.”​—Uliran 10:22.

Saray Bendision a Mamayaman ed Sikatayo

Walaan itayoy kayarian a baleg so balor to a nepeg tayon pisalamatan a tuloy. Anto itan? Ipapaamta itan na Biblia sanen inkuanto: “Say ganggan na sangim magmaong ed siak nen saray nilibo a balbalitok tan pilapilak.” (Salmo 119:72; Uliran 8:10) Singa kabalor man na atagey a kalidad a balitok, say ganggan nen Jehova so mas panpilalekan. Say suston pikakabat ed ganggan to tekep na aralem a pakatalos tan pakatebek ya ipapanabang nen Jehova ed masimoon iran manaanap na katuaan so bengabengatlan kaukolan a pablien. Saratan so mangikinlong ed sikatayo pian salimbengan tayoy inkasikatayo, pian natalonaan iray mairap a situasyon, pian napiarapan iray problema, tan diad ontan et makapankontento tan makapanliket.

Tua iya anggan ed saray ugaw nin tuloy. Isipen pa no panon a niresolbi na ugaw nin bii iray problema to diad impanumbok ed ganggan nen Jehova. Say ugaw nin bii, si Akemi, so manaayam diad asingger ed Tokyo. Inyaplika na ama tan ina to iray prinsipyo ed Biblia diad pangipapasal ed sikato tan atulongan day anak dan bii a mamayubo’d aro ed si Jehova tan ed kaparan too diad panamegley na salita tan ehemplo ra. Lapud pakakanengneng lan unona ed saray probleman naabet to diad eskuelaan, nanggunaetan dan iparaan diad sankaabigan a paraan a nayarian da. Anggaman ontan, sanen nan-elementarya si Akemi, sikatoy impasen na arum a kaklase to a “duma” lapud sikatoy manpipikasi sakbay na panangan tan papaliisan toy pigaran agmakasulatan ya aktibidad lapud konsiensia. Ag-abayag sikatoy puntirya a tambangan na grupoy managpekpek kayari na eskuela tan manampal ed sikato, mamuliwes ed saray taklay to, tan manludlurey ed sikato.

Agbinmawi si melag ya Akemi, nisay sikatoy pinmayakot ed saray manuduksa’d sikato. Imbes, nanggunaetan ton iyaplikay naaralan to. Bilang resulta na maabig a kondukta tan pakpel to, sikatoy nirespito na dakel ed kapara ton eskuela. Impaimano ray pamaakaran ed titser, tan nanlapulad saman ya agew, agla akaeksperiensia si Akemi na panangabuso diad eskuelaan.

Antoy tinmulong ed si Akemi pian talonaan so mairap a situasyon ed labas na pakayari to? Say suston pikakabat, aralem a pakatalos, tan kakabatan a nanlapud si Jehova ya impaslep na atateng to’d sikato. Kabisado ton maong so impansungdo nen Jesus, tan satan so amakiwas ed sikaton aligen so uliran to. Tinmulong ed sikato so Biblia a say rason a manggagawa na mauges iran bengatla so totoo et lapud inka-ignoranti, tan amaseseg itan ed sikaton busolen iramay ginawa na saray managpekpek bangta agbubusolen so totoon mismo.​—Lucas 23:34; Roma 12:9, 17-21.

Siempre, anggapoy atateng a malabay a makanengneng ed anak da a luludlureyen tan aabusoen. Siansia, naisip mo la no panon kakinon so atateng nen Akemi sanen abalitaan dan amin so agawa. Say ontan ya ananak so talagan bendision manlapud si Jehova.​—Salmo 127:3; 1 Pedro 1:6, 7.

Siaanos a Manalagar ed si Jehova

Balet, sakbay mon nagamoran so bendision nen Jehova, no maminsan et nepeg moy manalagar ed panaon to. Amta nen Jehova so kipapasen mo tan mangitatarya ed kada nakaukolan a makagunggunan tuloy. (Salmo 145:16; Eclesiastes 3:1; Santiago 1:17) Nayarin panliketan moy mangan na prutas, balet antoy isipen mo ed sakey a managsankaili a mangiparungo ed sika na maeta nin prutas? Balanglan sakey a mansanas, kahil, odino arum ni, lablabayen mon alutoy prutas, makbol, tan masamit. Mipadpara, iter nen Jehova so nakaukolan mo diad suston panaon​—agtanton masakbay tan agtanton atrasado.

Nonoten so eksperiensia nen Jose. Anggaman anggapoy agawaan ton kasalanan, naimano toy inkasikato ed bartolina na Ehipto. Sakey a kaparan priso, say manangawit na kopa nen Faraon, so manpipirawat a nibulos tan insipan ton ipaimanoy kaso nen Jose ed si Faraon. Balet kayari na inkibulos to et alingwanan to lay Jose. Ompatnag a pinaulyan lay Jose. Balet, duay taon ed saginonor, sikaton siansiay nibulos ed prisoan tan kabekta sikatoy ginawan komaduan mananguley ed Ehipto. Imbes ed pagmaliw ya agmakankaanos, nanalagar si Jose ed si Jehova. Lapud saya, sikatoy abendisionan diad paraan a kabaliksan toy kipreserbay bilay na namparan Israelitas tan Ehipsios.​—Genesis 39:1–41:57.

Si Masashi so sakey a matatken ed kongregasyon diad mamaamianen ya Hapon. Sikatoy agnikulong ed bartolina, balet ta kaukolan toy manalagar ed si Jehova. Akin? Nanlapulad inggapo na Ministerial Training School, eskuelaan parad panangipasal ed kualipikadon Kristiano iran ministro, ed Hapon, ginawa ton masimoon a kalat so pakapan-eskuela. Impikasi ton maong so nipaakar ed pribilihyo. Say kaiba ton payunir so naimbitaan, balet agnaimbitaan si Masashi, anggaman ed magunaet a pilalek to. Sikatoy adismayan tuloy.

Anggaman kuan, sikatoy angalay kundang pian natalonaan so liknaan to. Inaral toy Biblia tan saray publikasyon ya impalapag na Watch Tower Society, ya iyaapasakey to’d saray tema nipaakar ed pagmaliw a mapaabeba tan pakakontrol na emosyon na sakey. Inyarunsa toy panag-isip to tan diad ontan ed naeksperiensia toy lalon inkapenek ed asainmin to. Insan, sanen agto la iilaloan itan, sikatoy akaawat na imbitasyon a man-eskuela ed say eskuelaan.

Lapud abayuboan toy kualidades a singa say inkaanos tan inkamapaabeba, sikatoy lalon agunggunaan ed eskuelaan. Saginonor, naikdan si Masashi na pribilihyon manlingkor ed agagi to bilang managbiahen manangasikaso. On, amta nen Jehova so nakakaukolan nen Masashi tan intarya to itan diad panaon a makagunggunan tuloy.

Anapen Iray Bendision To

Sirin, si Jehova so aliwan singa say parmaseutiko. Anggaman nayarin onsaew itayon natebek so panagtalima tan panagpaga nen Jehova, saray kaabigan to so onsasabi ed nanduruman nengneng​—diad saray panaon tan diad saray paraan a mangunggunan tuloy ed sikatayo. Kanian mantultuloy ya anapen iray panamendision to. Tandaan a walaan ka lay dakel a rason ed pagmaliw a misalsalamat. Nabebendisionan ka la na manuna iran probisyon pian mantultuloy a manbilay ed dalin. Naiikdan ka la na pikakabat nen Jehova tan ed naspot iran dalan to. Naiikdan ka la na aralem a pakatalos. Tan makakagamor ka la na pakatebek. Amin iraya so ontulong ed pankaabigan tan panliket mo.

Pian sigpot a lalon naeksperiensia so panamendision nen Jehova, mantultuloy ya aralen a maparanay so Biblia. Patulongan ed si Jehova a talosan tan iyaplika so singa mablin-bato a bangabangat diad apuyanan a Salita to. Tuan payamanen to ka ed espiritual a paraan, ta pian agka onkulang. On, kabaliksan toy panliket tan inkakontento natan tan inkadaakan a bilay diad balon mundo ya onsabi.​—Juan 10:10; 1 Timoteo 4:8, 9.

[Litrato ed pahina 23]

Say bendision nen Jehova so mas mabli nen say balitok